Mateu 26 - ꞌRe Ihâimana Uꞌâsi Mono Zadawa Wasuꞌu

Zezusihi ãma da te irosa'rata za'ra zé, da te dasiwi wĩrĩ da

¹ Tawamhã Zezusi hã tinhimiroti na uburé ãne na te te dama rowahutu parimhã, ma tô tãma nharĩ za'ra, tisiré 're inomro mono norĩ ma, ãne:

² — Romhuture di oto, dato hã da te 're i'manharĩ za'ra mono zéb u hã, 'Re ihâimana u'âsi mono, Ezitu hawi te te idawaibuzém na ãma dasipo're pu'u za'ra da, Pascowa na dato nhisi na hã. Awẽ amo na te za iwa waptãrã, bâdâ hã. Ãne hã aima waihu'u pese za'ra wa'aba di. Tawapsi te za oto dasiwi ĩhâiba nhomri ni, Danho'reptui'wa da 'Re ihâimana u'âsi mono te te ĩpisudu hã, da te dasiwi ĩzasõmri da hâiwi, wedepo'o nhonhi'rãmi na.

³ Tawamhã sasedoti ipire norĩ hã, duré zudeu norĩ ma roti'wa norĩ hã ma tô si'rã'õtõ, Caifasihi nhorõwa u, 'ri za'ẽtẽ u. Ta hã tisiré norĩ nhipai u sasedoti ipire uptabi 're ihâimana mono, 'Re ihâimana u'âsi mono ma, da'ãma romhuri'wa.

⁴ Tawamhã sitẽme si'rã'õtõ wamhã, ma tô sima ãma rosa'rata za'ra. Tahawa, te roti hã pi'uriwi siwi ãma 'manha, Zezusi hã pi'uriwi te te siwi âri da, da te oto dasiwi wĩrĩ da hã.

⁵ Ãne te sima ãma roti za'ra: — Dasa hã da te 'manharĩ za'ra ré, wa te wasiwi âri õ di za, wazada dazahi za'ra õ'umnhasite, duré wazada dahâimana za'ra tõ da.

Pi'õ nhoprubzé wasu'u, Zezusihi ma

⁶ Tawamhã Zezusi hã ma tô mo, Betãnha u. Tame te oto nhamra, Simahã nhorõwa ãma, i'wa're ré nhorõwa ãma.

⁷ Tawamhã sai ma sãmra ré, ma tô pi'õ hã itẽme wi, Zezusihi u. Wedewa'u zadaze hã ma siré sada ãwisi, ẽtẽ 'manharĩ 'remhã, simhi ne 'remhã idup surure wamhã. Wa'âbâ za'ẽtẽ di ta hã, wedewa'u zadaze hã. Wa'âbâ za'ẽtẽ nherẽ, ma tô Zezusihi 'rã nhisiwi sa'wa pi'õ hã, tãma sawi wa.

^8-9 Tawamhã Zezusihi siré 're inomro mono norĩ hã ãne hã te te 'madâ'â za'ra wamhã, ma tô sada ab'ru za'ra, pi'õ da. Tahawa, ma tô sima ãma nharĩ za'ra, ãne: — Oro õ hã wa'âbâ za'ẽtẽ za, ma taré i'rã nhisiwi sa'wa, wedewa'u zadaze hã. Te te dama wede 'wa'âhã, aré iwa'âbâ za'ẽne. Tawamhã iwa'â hã te aré isibrob'õ norĩ ma, te te sõmri.

¹⁰ Tawamhã Zezusi hã te te sima ãma inharĩ za'ra zé hã te te tiwi waihu'u za'ra wamhã, te ãne na ãma sadanharĩ za'ra: — E marĩ da, te pi'õi ma inharĩ za'ra wa'wa. Tãma nharĩ za'ra wa'aba tõ. Tô'ã. I'uwaibaba ma tô ãne na hã ãma ĩzawi wẽ.

¹¹ Isibrob'õ norĩ hã te ai'rata 're si'ubumroi u'âsi 'wa, 're ipawaptob za'ra wa'aba mono zéb da hã. Tanei õ di, wa hã. Ai'rata 're ĩnhamra u'âsi aba mono õ di za oto.

¹² Pi'õ hã wedewa'u zadaze hã ĩ'rã nhisiwi te te sa'wari wamhã, za ĩdâ'â wa, da te dasiwi ĩnherẽzéb u te te ãma ĩhâiba u'ré da, ma tô ãne hã ĩma 'manha, zudeu norĩ hâimanazéb zarina.

¹³ Daro mono bâ te za ĩwasu'u wẽ na da te 're dapo're pu'u za'ra. Tawamhã pi'õ hã te te ĩma i'manharĩ wẽ zém na zama, te za tô duré da te dasima 're wasu'u wẽ u'âsi za'ra, ãma 're dasipo're pu'u za'ra mono da. Tô sena, wa ãne aima waihu'u za'ra wa'wa.

Zuda hã, Zezusi te te dama hâiba nhomri da, te te sima irosa'ratazé wasu'u

¹⁴ Tawamhã 12 na Zezusihi siré 're inomro mono norĩ hã misi ma tô 'maimo, Zuda Icarioti na isisi hã sasedoti ipire norĩ u, te te sadanharĩ za'ra da.

¹⁵ Tawamhã ãne te sadanharĩ za'ra: — Zezusi hã ma tô asima iwẽ za'ra wa'wa, asiwi âri aba da. E ãne hã aima wẽ za'ra wa'aba di za, te aima ihâiba nhomri za'ra wa'aba da hã. Aima wẽ za'ra wa'aba wamhã, e niha te za ĩma iwa'âbâ za'ra wa'wa. Tawamhã ãne na ãma sisaze za'ra wamhã, ma tô rob'uiprazé isapotore hã tãma sa'rata za'ra, 30 na ẽtẽ waipo prã prata 'manharĩ hã. Taha pari, ma tô tãma sõmri za'ra, Zudaha ma.

¹⁶ Tawamhã ta hawim haré te oto Zuda hã sima ãma rosa'rata u'âsi, nimahã bâtâ na Zezusi te te oto dama ihâiba nhomrizéb da hã, danhimiza'rese ãna dahâimana za'ra ré.

Zezusi norĩ hã Pascowa na siré isaihurizé wasu'u

¹⁷ Tawamhã bâdâ ma tô iwa waptãrã, i'u'ẽtẽ duptoi'õ, da te 're ihuri mono zé hã, Pascowa na dato nhisi hã. Taha ré, ma tô Zezusihi siré 're inomro mono norĩ hã sina tété za'ra, te te siwi sadanharĩ da, ãne: — E momo ma tô asima irowẽ, asô iwanhipi za'ra zéb da hã, Pascowa na dato nhisi na iwasaihurizéb da hã.

¹⁸ Tawamhã Zezusi te asa tãma nharĩ za'ra, ãne: — 'Ri ahâ u te za oto ai'aba'réi wa'wa, aibâ hã asiwi sõpẽtẽ aba da. Tawamhã ãne te za tãma ĩzadawa wasu'u za'ra wa'wa: “Wama rowahutu'wa hã wa za aima sadawa wasu'u za'ra ni, ãne: ‘Ĩnhibâdâ hã romhuture di oto, Ĩmama te te ipisutuzé hã, ĩ'ãma. Asõrõwa ãma wa za wasa hã huri ni, ĩsiré 're inomro mono norĩ me, Pascowa na dato nhisi na 're idasaihuri mono zém na hã.’ ” Ãne te za tãma ĩzadawa wasu'u za'ra wa'wa, aibâ ma.

¹⁹ Tawamhã isiré 're inomro mono norĩ hã ma tô ãma uwaimrami za'ra, te te tãma iwaihu'u za'ra zéb zarina. Tinhipi ma tô 'manharĩ za'ra, Pascowa na dato nhisizém na dasazé hã.

²⁰ Tawamhã mara wamhã, ma tô oto asimro, siré saihuri da, 12 na ihâiba za'ra hã, Zezusihi me.

²¹ Tawamhã saihuri ré, ma tô Zezusi hã tãma waihu'u siromo za'ra, ãne: — Tô sena, wa aima waihu'u siromo za'ra wa'wa. Misire te za dama ĩ'maihâiba nhomri 'wa.

²² Ãne, te te sina mreme wapari za'ra wamhã, ma tô tiwi tirobzei'õ pese za'ra, isiré 're inomro mono norĩ wi hã. Ãhã wamhã, misi si ma tô nasi ãma siwi sadanha, ãne: — Wanhib'apito, e wa hã te dama aihâiba nhomri da bâ, te ãne wama inharĩ za'ra.

²³ Tawamhã asa te Zezusi hã duré tãma nharĩ za'ra, ãne: — Za dama ĩhâiba nhomri'wa hã, te za tô i'u'ẽne piza'a 're ĩsiré ti'rẽ za.

²⁴ Ti'ai ãma Dasiré Ipodo hã duréihã ma tô idâ'âzém na rob'ui'éré siromo za'ra, 'Re ihâimana u'âsi mono zadawa 'mahârâ'wa norĩ hã. Ta norĩ hã te te ãma irob'ui'éré za'ra zéb zarina te za ãma mo tô, tidâ'âzéb u. Tane nherẽ, aibâ ma, tãma 're ropipa uptabi mono di za, za te te dama ihâiba nhomri'wa da ma hã. 'Re ihâimana u'âsi mono za te te azâri wamhã, te za sima rosa'rata, ãne: “Ĩpoto õ 'wa'âhã, aré wẽ di. E marĩ wa. Ãne na te 're robzépata mono õ wa aré.” Ãne te za 'râwi si'ãma rosa'rata, za dama ihâiba nhomri'wa hã.

²⁵ Tawamhã Zuda hã dama isõmri'wa da hã te Zezusi hã sina sadanha, ãne: — Rowahutu'wa, e wa hã za te dama i'aihâiba nhomri na, ma tô asina ĩwaihu. Tawamhã asa te Zezusi hã tãma tinha: — Tane tô. Asi'uihâ na ma tô ãne na hã asiwaihu.

²⁶ Tawamhã saihuri ré, ma tô i'u'ẽne hã ti'â, Zezusi hã. 'Re ihâimana u'âsi mono ãma te iré ãma tiwata, sõpru wa. Taha pari, ma tô te te wẽ'ẽ, i'u'ẽne hã. Te te wẽ'ẽi mono parimhã, ma tô te te tãma sõmri, tisiré 're inomro mono norĩ ma. Ãne te oto tãma nharĩ za'ra: — Ã, i'u'ẽne hã huri aba. Ã hã ĩhâiba te wasu'u.

²⁷ Taha pari, hâsizé hã ma duré ti'â, uwa 'rãi wa'u isé ré hã. 'Re ihâimana u'âsi mono ãma te duré tiwata, sõpru wa. Taha pari, ma tô iré te te tãma sõmri, uwa 'rãi wa'u isé ré hã. Ãne te duré tãma nharĩ za'ra: — Ã, rob'rãi wa'u hã âhuri aba, aihĩni.

²⁸ Ã hã ĩwapru, te wasu'u. Rob'rãi wa'u za'wari ne, te za ĩwapru hã ĩwi asa'wa, da'ahâ zada ĩdâ'â wamhã, 'Re ihâimana u'âsi mono hã dawasédé hã te te oto 're ab'madâ'â tõ mono da, da'ãma. Ã hã ĩwapru, ĩwi sisa'wari wamhã, 'Re ihâimana u'âsi mono hã tinhib'a'uwẽ ma, te te tãma iropisutuzé hã tô sena za te te tãma ãma 're i'uwaimrami mono zé, te wasu'u.

²⁹ Tô sena, wa za aima ĩsiwasu'u za'ra wa'wa. Ãne hã rob'rãi wa'u te 're hâsi mono õ di za oto, a'â. Niwapsi Ĩmama hã uburé da'ãma 're sib'a'uwẽ mono wapsi, wa za duré te 're hâsi, asiré wa'aba.

³⁰ Tawamhã tinho're na ma tô ãma tiwata za'ra, 'Re ihâimana u'âsi mono ãma. Sõ're za'ra parimhã, ma tô duré oto wairé, Oriwera na ẽtẽ 'rãihâ nhisi u si'aba'ré da.

Pedru hã te te dawi i'udâzém na, Zezusi te te tãma iwaihu'u siromo zé wasu'u

³¹ Tawamhã Zezusi hã ma tô tisiré 're inomro mono norĩ ma rowasu'u za'ra, ãne: — A norĩ wa'wa hã ã bara na, niha ĩma romhâimana wamhã, te za aihĩni asiwi ĩrẽme 'wa. Duréihã 'Re ihâimana u'âsi mono zadawa 'mahârâ'wa hã ma tô ãne na ĩ'ãma rob'ui'éré siro, 'Re ihâimana u'âsi mono mreme na hã: “Pone'ẽrebâ 'madâ'â'wa hã wa za tiwĩ. Tawamhã pone'ẽrebâ hã te za ropé.” Ãne na duréihã 'Re ihâimana u'âsi mono mreme na rob'ui'éré, ibaihâ na hã.

³² Tane nherẽ, asiwi ĩrẽme aba nherẽ, ab're hawi apâ ĩhâiwa'utu parip si, wa za aiwana za'ra wa'aba ĩmorĩ 'wa za, Galiléa u, tamomo ĩnhopẽtẽ za'ra wa'aba da.

³³ Tawamhã Pedru, te Zezusihi ma tinha, ãne: — Asiré 're iwanomro mono norĩ hã aihĩni za te te airẽme za'ra nherẽ, wa hã te dame i'airẽme da hã mare di za.

³⁴ Tawamhã Zezusi te asa tãma tinha, Pedruhu ma, ãne: — Tô sena wa za ãhã na hã aima rowasu'u. Ãma aipo're pu'u za duré ĩmreme na hã. Ã bara na si'a hârâ õ ré, te za si'ubdatõ dawi ĩ'udâ, aima ĩza'rese õ na hã.

³⁵ Tawamhã Pedru te duré tãma tinha, Zezusihi ma, ãne: — Wa hã asiré ĩdâ'â da nherẽ, te dawi ai'udâ õ di za, te i'aiwaihu'u õ na hã. Tawamhã õhõ na si, ma tô isiré 're inomro mono norĩ hã tãma siwasu'u za'ra, za te te dawi i'udâ za'ra õ zém na hã.

Zezusi norĩ hã Zésemani ãma isi'ubumrozé wasu'u

³⁶ Tawamhã Zezusihi me, ma tô ai'aba'ré oto, Zésemani na rob're nhisi u. Duré tamomo oto sihutu wamhã, ma tô tãma nharĩ za'ra, tisiré 're inomro mono norĩ ma, ãne: — Ãme ĩzô asimroi wa'aba. Õwa wa za a'â mo asiti za'ra wa'aba, romnhiwasi Ĩmama ma, ĩmreme da.

³⁷ Tawamhã Pedru hã te siré saprõ, Zebedehe 'ra norĩ me. Ãhã wamhã ma tô Zezusihi wi, tiwi tirobzei'õ pese. Za te te irobzépatazé hã ma tô sima simimnhasi.

³⁸ Tawamhã Pedru norĩ ma, te rowasu'u, Zezusi hã, ãne: — Ĩpẽ'ẽzé hã sa'ẽtẽ na te ĩma tihâiba. Ĩpẽ'ẽzé uptabi wa, wa aré dârâ. Ãme a'â asimroi wa'aba ĩ'rata, asõtõ ãna. Asõpré u'âsi aba.

³⁹ Tawamhã romhâ prã na ma tô isiti timorĩ za'ra, Zezusi hã. Dumana na te nomro ti'ai wa, Timama ma, mreme da. Ãne te tãma mre: — Ĩmama, asima wẽ wamhã, ĩma ba'a, ĩdâ'âzé hã te sépata tõ da. Tane nherẽ, te ĩsima iwẽzéb uwaibaba, ĩma pisutu õ di za. Asima iwẽzéb uwaibaba si, te 'manharĩ da hã, ĩma wẽ di, wa hã.

^40-41 Tawamhã Timama ma mreme pari, ma tô apâ mo, Pedru norĩ u. Tane nherẽ sõtõ za'ra ré, ma tô siza za'ra. Tawamhã Pedruhu ma, te tinha, Zezusi hã, ãne: — E niha asimiza'rese suru na ĩme asãmra da hã, aima waihu'u õ. Satanasihi zada, asiptete sina 're aihâimana za'ra wa'aba mono da, asima 're wẽ za'ra wa'aba mono nherẽ, asi'uihâ na hã sada 're asiptete waihu'u za'ra wa'aba mono õ di. Tahawa, asimiza'rese te za ai'ubumroi wa'wa ãhã na hã, 'Re ihâimana u'âsi mono wi, asima rowaptẽrẽ za'ra wa'aba da, Wa'uburé nhimiwada'uri wasété wi, te te aipawaptob za'ra wa'aba da.

⁴² Tawamhã te duré romhâ prã na isiti timorĩ za'ra, Timama ma mreme da. Ãne te tãma mre: — Ĩmama, ĩdâ'âzé hã te sépata da, asima wẽ wamhã, ĩma wẽ di duré, asima iwẽzéb uwaibaba, ĩma pisutu da.

⁴³ Timama ma mreme pari, te duré apâ mo, Pedru norĩ u. Sõtõ za'ra ré, ma duré tawamhã siza za'ra. Aptâ'â si te huri u'âsi, sõpré waihu'u ãna.

⁴⁴ Tawamhã apâ te duré isiti timorĩ za'ra Zezusi hã, Timama ma mreme da. Si'ubdatõ ma oto sina siri. Tô õhõ na si te tawamhã tãma mre, tãma imreme 'rata zém na.

⁴⁵ Tawamhã apâ te duré mo, Pedru norĩ u. Ãne te duré tãma nharĩ za'ra: — E niha bâ te zahadu asõtõ za'ra wa'wa bété. Ma'ãpé, waihu'u za'ra wa'aba. Romhuture di oto bâdâ hã, ti'ai ãma Dasiré Ipodo hã te za aibâ hã tãma hâiba nhomri za'ra oto, aibâ iwasété norĩ ma.

⁴⁶ Oto aiwahutu za'ra wa'aba. Wasi'aba'réi hâ. Õhõta te we oto mo, dama ihâiba nhomri'wa da hã.

Zezusi hã da te dasiwi i'ârizé wasu'u

⁴⁷ Tawamhã Zezusi hã zahadu te te rowasu'u ré, ma we Zuda hã sô wi, aré Zezusihi siré 're inomro mono norĩ me 're imorĩ, 12 na ihâiba za'ra siré hã. Da'ahâ na te duré we isiré ai'aba'ré ni, sib'ézé 'wa pa ré, duré uibroi ré zama. Sasedoti ipire norĩ zadawa para te we ai'aba'ré, zudeu norĩ ma roti'wa norĩ zadawa para zama.

⁴⁸ Ãne ma tô Zuda hã tãma waihu'u za'ra, te te siwi i'âri wana ré hã: “Aibâ za te itob'rata hârâ hã, te za asiwi i'âri 'wa.” Ãne ma tô dama waihu'u, te te ãma irosa'ratazém na, Zuda hã.

⁴⁹ Tawamhã wisi wi, ma tô itẽme mo õne haré, Zezusihi u, awa'awi. Ãne te sawi, timreme na: — Rowahutu'wa, rowẽ na 're aihâimana mono. Tawamhã tob'rata hârâ na ma tô sawi, Zezusi hã.

⁵⁰ Tawamhã Zezusi asa te tãma tinha, ãne: — Ĩsiwadi, te we tô ĩzô aimo, marĩ hã ĩ'ãma 'manharĩ da. Ma'ãpé, niha tô ĩma rob'manharĩ su'u. Tawamhã ma tô sô ai'ré za'ra oto, Zezusihi zô, te te siwi âri da. Te te siwi âri wamhã, ma tô siwi pawasisi õne haré.

⁵¹ Tawamhã Zezusihi siré 're imorĩ hã i'rata isa hã ma tô sib'ézé 'wapa waze. Te te wazere wi, ma romhuri'wa hã ãma po're nhizâ, sasedoti ipire uptabi ma, romhuri'wa hã.

⁵² Tawamhã Zezusi te tãma tinha, i'u'a'wai ma, ãne: — Ma'ãpé, sib'ézé 'wapa hã apâ sẽrẽ. Ni'wam norĩ hã sib'ézé 'wapa na te te 're danhimroi mono wamhã, asa te za sib'ézé 'wapa na hã da te 're simro, tô te te ãma 're idanhimroi mono zéb zarina.

⁵³ Te ĩsima wẽ 'wa'âhã, wa aré Ĩmama wi waptẽ, hâiwa ãma tãma iromhuri'wa norĩ hã ahâ uptabi na te te we ĩtẽme satõrĩ za'ra da, ãhã na ĩ'ãma sisaprĩ za'ra da, dawi. E ãne na ĩ'ãma rosa'rada hã waihu'u ã bâ bété.

⁵⁴ Ĩ'ãma dawi sisaprĩ za'ra wamhã, 'Re ihâimana u'âsi mono te te ĩ'ãma uwaimrami õ di aré, duréihã isadawa wasu'u'wa norĩ te te ĩ'ãma irob'ui'éré za'ra zéb zém na hã, za niha ĩ'ãma iromhâimanazém na. Tahawa, te tiwi waptẽrẽ õ di za, Ĩmama wi.

⁵⁵ Tawamhã Zezusi hã te oto dama rowasu'u, ãne: — E wa hã danhibrob zô dapãrĩ'wa pâ, ma te bété we ĩzô aihutu 'wa, sib'ézé 'wapa ré, duré uibroi ré zama. Bâtâ sidâpâsi wa tô asõ'a za'ra wa'aba 're ĩsimasisi, 'Re ihâimana u'âsi mono nhorõwa ãma 'ri 'wawi wa'ra 're, te dama 're rowahutu mono da. Oro zapre bété, tameb ré asiwi ĩ'âri aba õ di.

⁵⁶ Tane tô. Marĩ õre di. Ãne na hã ma te tô ĩ'ãma tiromhâiba ãhã na hã, duréihã 'Re ihâimana u'âsi mono zadawa 'mahârâ 'rata 'wa norĩ nhimi'ui'éré hã te te ĩ'ãma uwaimrami da. Tawamhã isiré 're inomro mono norĩ hã ma tô oto rẽme za'ra dama. Wara sina te ãhã wamhã dawi sisa're.

Dama roti'wa norĩ hã isi'rã'õtõzé wasu'u, Zezusihi zada

⁵⁷ Tawamhã Zezusi, da te oto dasiwi âri wamhã, ma tô dasiwi saprõni ni, Caifasihi nhorõwa u, 'Re ihâimana u'âsi mono ma da'ãma romhuri'wa ipire uptabi nhorõwa u, sasedoti ipire uptabi u. Tame ma tô sô si'rã'õtõ, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã, duré dama roti'wa norĩ hã.

⁵⁸ Zezusi hã da te dasiwi saprõni ré, te Pedru hã romhâ na te te pibu. Sasedoti ipire uptabi nhorõwa u, te isarina hã mo. Wisi wamhã, 'ri 'wawi wa'ra 're, ma tô ãzé. Sébré wamhã, tame te dame nhamra rowi, 'Re ihâimana u'âsi mono nhorõwa 'madâ'â'wa norĩ me. Zezusi hã te te 'madâ'â da, te nhamra, niha na da te tãma rob'manharĩ õ'umnhasite.

⁵⁹ Tawamhã sasedoti ipire norĩ hã, duré uburé zudeu norĩ ma roti'wa norĩ hã, te ni'wam norĩ zô tinhopré, Zezusi hã marĩ te te 're i'ab'manharĩ wasété mono zém na, sadawa nhipese na te te siwi ãma hiri da, tawapsi romanu norĩ hã te te siwi wĩrĩ da.

⁶⁰ Tawamhã da'ahâ na ma tô taré Zezusihi ãma iwasédé hã sa'ra ni, dama roti'wa norĩ nho'a. Tane nherẽ, ãma dasisaze za'ra õ di, iwasédé hã dasisõ'a da te ãma isa'ra za'ra zém na hã, taha zarina si, da te oto dasiwi iwẽ'õ da. Taré te nasi iwasédé hã ãma sa'ra ni, dazadawa nhipese na. Tawamhã aibâ norĩ hã ma tô sipisutu zahuré, dama ipire norĩ nho'a, iwasédé hã te te ãma ihiri zahuré zéb da hã.

⁶¹ Ãne te oto wasu'u zahuré Zezusi hã, isõ'a za'ra: — Ã hã aibâ hã ma tô ãne dama siwasu'u, sadawa nhipese na: “Wa hã ĩma waihu'u pese di, ã hã 'ri hã te isãmra da hã, 'Re ihâimana u'âsi mono nhorõwa hã, duré apâ te 'ri su'u da, si'ubdatõ bâdâ hã ĩ'ãma si'utõrĩ õ ré, te 'ri pari da.” Ãne ma tô dama siwasu'u.

⁶² Tawamhã sasedoti ipire uptabi hã ma tô hâiwi za, dawa'wa. Ãne te ta hã sadanha, Zezusi hã: — E asadawa na dama ãma wa'rãmi ãna, da te dasiwi i'aiwasu'u wasété na hã. E tô isarina ma tô aiwasédé hã õ norĩ ai'ãma hiri zahuré. E taré.

⁶³ Tane nherẽ, te Zezusi hã ari'iwi za. Tawamhã sasedoti ipire uptabi hã te duré sadanha, ãne: — E a hã Danho'reptui'wa da, 'Re ihâimana u'âsi mono te te i'aipisudu. E a hã 'Re ihâimana u'âsi mono 'ra. Ma'ãpé sena na wama asiwasu'u na. Duré wawi ai'udâ tõ, 'Re ihâimana u'âsi mono nho'a hã.

⁶⁴ Tawamhã Zezusi te asa tãma tinha, ãne: — Tahata ma te tô tane hã ãma iwaihu. Ãne wa za duré aima waihu'u za'ra wa'wa. Ti'a ãma Dasiré Ipodo hã te za asiwi 'madâ'â za'ra wa'wa za, iwaihu'u pese uptabi nhimire niwĩ 're isãmra mono na, dama pire na. Duré hâiwa'a na apâ we morĩ wamhã, te za ãne na i'madâ'â za'ra wa'wa.

⁶⁵ Tawamhã sasedoti ipire uptabi hã, Zezusihi mreme te te ãne wapari wamhã, ma tô ti'uza hã hâiwazu, te te wẽ'õ wa, duré tipẽ'ẽ na hã sada sahi wa. Tawamhã isi'rã'õtõ norĩ ma, te oto tinha, ãne: — Tâibâ oto. Aibâ aimawi norĩ zô, ai'maihârâ aba õ di za, Zezusi te te wama iwasu'u za'ra da hã, iwasété na. 'Re ihâimana u'âsi mono newa, si'uihâ na ma tô tiwaihu'u pe hã sina tihi, wasine 're hâimana mono nherẽ. Si'uihâ na ma tô timreme wasété. Imreme ma tô iwapari za'ra wa'wa.

⁶⁶ E marĩ tawamhã, ma tô ãma ipisutu za'ra wa'wa. Tawamhã ãne, ma te asa ãma tãma wa'rãmi za'ra: — Tiwasédé hã ma tô 'manha. Te za tô dârâ za.

⁶⁷ Tawamhã te te oto siwi wẽ'õ pese za'ra wa, ma tô tizadaipro na hã nasi siwi ubu upto. Tinhib'rata hi'rãti na, ãhã wamhã te duré nasi siwi ahâ. Tinhib'rata na te duré nasi i'ubu wi siwi ahâ.

⁶⁸ Tawamhã te te nasi siwi ahâri sina, te nasi 'mahârâ za'ra, ãne: — A hã danho'reptui'wai wamhã, ma'ãpé ai'azâri'wa norĩ hã wama wasu'u za'ra na.

Pedru hã, Zezusi te te dawi i'udâzé wasu'u

⁶⁹ Tawamhã Pedru, 'ri 'wawi wa'ra 're, rowi sãmra ré, ma tô pi'õ hã oto 'râwi itẽme za. Sasedoti ipire uptabi ma romhuri'wa, pi'õ hã. Ãne te ta hã tãma tinha, Pedruhu ma: — A zama te Zezusihi siré 're aimo, Galiléa ãma aré 're isãmra mono siré.

⁷⁰ Tawamhã Pedru te tiwi ai'udâ, uburé danho'a, ãne: — Te waihu'u õ di, we ĩma ãma inharĩ hã.

⁷¹ Tawamhã te oto mo, 'ri 'wawi wa'ra ãma 'ridawa u. Tame sãmra ré, ma tô duré pi'õ ihâiba amo hã tisã Pedru hã, 'Re ihâimana u'âsi mono ma da'ãma romhuri'wa norĩ nhib'apito ma romhuri'wa hã. Te te duré ta hã sãmri wamhã, i'rata isimasam norĩ ma, te wasu'u za'ra, ãne: — Õ hã Zezusihi siré 're imorĩ, Nazaré ãma aré 're isãmra mono siré.

⁷² Tawamhã Pedru te duré dawi ai'udâ, ãne: — Tô sena, wa aima ĩsiwasu'u za'ra wa'wa, 'Re ihâimana u'âsi mono nho'a. Ta hã ĩma sa'rese õ di, aibâ hã.

⁷³ Tawamhã suru na ãma ronomro wi, ma duré i'rata isimasam norĩ hã 'râwi itẽme aimasa Pedruhu u, te te tãma nharĩ za'ra da, ãne: — Galiléa ãma 're idamreme zusi mono ne, aimreme hã. Tahawa, wa tô wasiwi aiwaihu'u ni, Galiléa ãma aré 're i'asãmra mono na. Tahawa, tô sena wa tô duré wasiwi aiwaihu'u ni, Zezusihi siré 're inomro mono norĩ siré 're i'aimorĩ na.

⁷⁴ Tawamhã Pedru te asa tãma nharĩ za'ra, ãne: — Mare di. Tane na ĩwaihu'u nherẽ, õ hã ĩma sa'rese õ di. Tô sena te aiwi udâ za'ra wa'aba di pâ, 'Re ihâimana u'âsi mono hã te te ĩ'azâri pé. Tawamhã ãne na dama siwasu'u wi, ma tô si'a hã hârâ watobro, awa'awi.

⁷⁵ Tawamhã Zezusi te te tãma iwaihu'uzém na ma sina po're puru, Pedru hã. Ãne Zezusi te te tãma iwaihu'u siromo zé hã, isõwa: “Si'a hã hârâ õ ré, si'ubdatõ te za dawi ĩ'udâ, ĩzadawa para õ nherẽ.” Tawamhã ãne na oto imreme na sina po're pu'u wamhã, ma tô watobro rob u, Pedru hã. Tahawa, te oto aiwa'õ, sina pẽ'ẽzé uptabi wa.