Mateu 25 - ꞌRe Ihâimana Uꞌâsi Mono Zadawa Wasuꞌu

Pi'õi hâiba tém norĩ hã dasina damro u, isi'aba'rézé wasu'u

¹ Tawamhã Zezusi hã ma tô tinhimiromnhimiré'é na tãma rowasu'u za'ra, tisiré 're inomro mono norĩ ma, ãne: — Nimahã na 'Re ihâimana u'âsi mono, oto da'ãma 're sib'a'uwẽ mono da, apâ we dazô ĩmorĩ wamhã, ni'wam norĩ si te za, ĩzô 're simipari za'ra mono sina, hâimana nhimiza'rese 're hâimana za'ra. Ã norĩ wasu'u zarina, wa za ãma aima romnhimiré'é za'ra wa'wa, ãne. Pi'õ ipréduptém norĩ hã bara na ma tô ai'aba'ré, dasina damro u, 10 na ihâiba za'ra na, imro'õ norĩ hã. Aibâ hã za azarutu na imro zô simipari za'ra da, ma tô itẽme ai'aba'ré, pi'õ nhorõwa u. Âro'ore hã te siré 'wasa hâiba bâ, aibâ hã za pi'õ na imro u wisi wa, te te tãma ãma rob'uiwẽ za'ra da, zudeu norĩ hâimanazéb zarina.

^2-4 Tane nherẽ, pi'õ ipréduptém norĩ hã 5 na si ma tô hâiba mono bâ rob'rãi wa'u to hã siré 'wasa, simhi ne ẽtẽ 'manharĩ 're, âro'ore da hã, ta norĩ si hâimana nhimiza'rese 're hâimana za'ra mono wa. Duré tawamhã ihâiba amo norĩ hã 5 na ihâiba za'ra hã te te siré 'mai'âri za'ra õ di, rob'rãi wa'u tob ré hã simhi ne ẽtẽ 'manharĩ 'remhã, hâimana nhimiza'rese ta norĩ hã 're hâimana za'ra mono õ wa.

⁵ Taha wamhã aibâ zô te tirowaptâ'â hâ, za pi'õ na imro zô hã. Tawamhã sô rowaptâ'â wa, ma tô aptâ hã simro. Tahawa, ma tô nasi titomhâima'ã za'ra. Duré tahawa, te oto tinhotõ za'ra, iwana.

⁶ — Tawamhã mara wa'wa ma tô ni'wa hã oto 'mahâ, ãne: “Õhõta te we oto aibâ hã mo. We aiwairébé su'u aba, wa te wasina uzusi za'ra hâ.” Ãne te ni'wa aibâ hã dama rob'mahâ.

⁷ — Tawamhã pi'õ ipréduptém norĩ hã sô isimipari za'ra hã ma tô ti'utu za'ra wara sina. Utu za'ra wamhã, âro'ore na wedenhorõ hã ma tô sõrõ nhihâri za'ra, ro'o wẽ da.

⁸ Tawamhã hâimana nhimiza'rese ãna 're ihâimana za'ra mono norĩ hã ma tô tiwi rowaptẽrẽ za'ra, tihâiba amo norĩ wi, hâimana nhimiza'rese sina 're ihâimana za'ra mono norĩ wi: “Ma'ãpé suru na wama sa'wari za'ra wa'aba, âro'ore na rob'rãi wa'u to hã. Âro'ore hã wate za'ra hã te za oto wawi tidâ'â za'ra.” Ãne te pi'õ ipréduptém norĩ hã tisiré norĩ wi rowaptẽrẽ za'ra.

⁹ — Tawamhã asa ma te ãma tãma wa'rãmi za'ra, ãne: “Rob'rãi wa'u to hã wa te aima sõmri za'ra wa'aba õ di za. Mara wab õ di za, wa te aima a za'ra wa'aba wamhã. Te za wawi ai'utõrĩ za'ra. Ma'ãpé tiha, da te 're i'uipra za'ra mono zéb u, sô ai'aba'ré wa'aba waptu na, tamemhã asima 'mai'uipra za'ra wa'aba da.” Ãne te satõrĩ za'ra, tisiré norĩ hã.

¹⁰ — Tawamhã pi'õ ipréduptém norĩ hã hâimana nhimiza'rese ãna 're ihâimana za'ra mono norĩ hã ma tô ai'aba'ré, rob'rãi wa'u tob zô, te te sima 'mai'uipra za'ra da. Tawamhã ta norĩ za'u si ma tô oto aibâ hã wi, timro zô. Wisi wamhã, pi'õ ipréduptém norĩ hã 5 na ihâiba hã hâimana nhimiza'rese 're ihâimana za'ra mono norĩ hã ma tô isiré asisi 'ri para u, isiré saihuri da, sina imro zahuré zém na. Sisisi wamhã, ma tô oto iré 'ridawa nhitop tete za'ra ni.

¹¹ — Tawamhã ãma ronomro za'ra parip si, ma tô isiré norĩ hã apâ aihutu, pi'õ ipréduptém norĩ hã, aibâ pi'õi ãma imrozéb u hã. Sihutu wamhã, ãne te nasi 'mahârâ za'ra, rowi hawi: “Apito, apito, wei wama 'ridawa za'ra na, ãma atẽme wanhisisi da.”

¹² — Tawamhã aibâ pi'õ na imro hã ma te asa sada'âbâ za'ra, ãne: “Mare di. Te aima 'ridawa za'ra wa'aba õ di za, ĩma aiwaihu'u za'ra wa'aba õ wa.”

¹³ — Tahawa, a norĩ wa'wa hã aihâimana nhimiza'rese sina te za ĩzô 're asõpré u'âsi aba mo, bâdâ hã aima waihu'u za'ra wa'aba õ wa, apâ za we ĩmorĩzé hã.

Romhuri'wa norĩ hã, tinhib'apito zô rob'uiprazé te te 're i'madâ'â za'ra mono norĩ wasu'u

^14-15 Tawamhã Zezusi hã ma duré tinhimiromnhimiré'é na marĩ hã tãma waihu'u za'ra, tisiré 're inomro mono norĩ ma, ãne: — 'Re ihâimana u'âsi mono, za da'ãma 're isib'a'uwẽ mono zém na, wa za duré aima ãma romnhimiré'é za'ra wa'wa, ãne. Aibâ hã ma tô sima rowẽ, darob amoi u morĩ da. Tawamhã morĩ õ ré, ma tô sô tihârâ za'ra, tãma iromhuri'wa norĩ zô, tite rob'uiprazé hã te te tãma sõmri za'ra da, isa'u te te sô 'madâ'â za'ra da, duré te te sina tãma hâimo da, õhõ u'âsi simi'wara tõ da, tãma sina hâ'â ãna. Isimiromhuri wẽ na tãma i'umnhasi za'ra zarina, ma tô tãma sõmri za'ra. Imorĩ'rata ma hã ma tô 5 miu na tãma tisõ rob'uiprazé isapotore hã, ẽtẽ waipo pré oru 'manharĩ hã. Duré isãna're ma hã 2 miu na ma tô tãma tisõ. Duré da'rãsutu'wai ma hã, miu na ma tô tãma tisõ. Taha pari te oto mo, darob amoi u, danhib'apito hã.

¹⁶ Tawamhã tãma iromhuri'wa hã, 5 miu na rob'uiprazé isapotore te te i'âri ma hã õne haré ma tô tãma sina hâ, te te ãma iromhuri wẽ zéb zarina. Tawamhã 5 miu na nherẽ, ma tô duré 5 miu na tãma ihâimana amo na oto ãma ato, isib'apito te te tãma isõmri na. Uburé hã oto tawamhã 10 miu na, rob'uiprazé isapotore hâiba hã, ãma sito wamhã.

¹⁷ Tane duré tãma iromhuri'wa hã 2 miu na rob'uiprazé isapotore te te i'âri ma hã ma tô duré tãma sina hâ. Tawamhã 2 miu na nherẽ, ma tô duré 2 miu na tãma ihâimana amo na ãma ato. Uburé hã oto tawamhã duré 4 miu na ihâiba hã oto.

¹⁸ Tane nherẽ, tãma iromhuri'wa hã miu na rob'uiprazé isapotore te te i'âri hã tinhib'apito nhimiroti te te 'madâ'â õ di. Taré ma tô sada ab're, tinhib'apito wi, rob'uiprazé hã te te sẽrẽ da ti'ai 'rowi.

¹⁹ — Tawamhã ãma ronomro hâ parip si, ma tô oto isib'apito za'ra hã apâ itẽme sina siri za'ra, darob amoi hawi. Wisi wi, te sô tihârâ za'ra, tãma iromhuri'wa norĩ zô, rob'uiprazé isapotore hã niha si te te tãma hâimana za'ra mono zô, duré te te tãma wasu'u za'ra da niha te te ihâimana za'ra zé hã.

²⁰ Tawamhã romhuri'wa hã 5 miu na rob'uiprazé te te aré i'âri hã ma tô itẽme ãzé imorĩ'rata na, tinhib'apito u. Ãne te tãma tinha: “Apito, rob'uiprazé isapotore hã 5 miu na ma tô ĩma isõ, asa'u aima sina hâ'â da, duré tawapsi, aima ãma ĩsitob da, sina hâ'â ãna taré aiwi isimi'wara na. Ãhãta ma tô oto aima sina hâ, 5 miu na, te ãma aima iromhuri wẽ zéb zarina. Uburé hã 10 miu na oto ihâiba hã, rob'uiprazé isapotore hã. Ãhãta te asô nomro.” Ãne te romhuri'wa hã tinhib'apito ma wasu'u, tinhimiromhuri hã.

²¹ — Tawamhã isib'apito te asa tãma tinha, ãne: “Wẽ di tô. A hã ĩma romhuri wẽ 'wai uptabi. Ĩma ai'umnhasi di. Rob'uiprazé hã surure na hâimana nherẽ, ma tô ãma iromhuri wẽ, ĩzô. Tahawa, ãhã nhipai u wa za oto aima pisutu, marĩ ahâ uptabi na ĩma 're ab'madâ'â u'âsi mono da. Te za oto ĩsiré 're aihâimana mo, wasiré ãma 're watoi u'âsi mono da.” Ãne ma tô tãma ropisutu siro, tãma iromhuri wẽ 'wai ma.

²² — Tawamhã romhuri'wa hã 2 miu na rob'uiprazé te te aré i'âri hã ma tô duré itẽme ãzé, tinhib'apito u. Tawamhã ãne te duré ta hã tãma tinha: “Apito, rob'uiprazé isapotore hã 2 miu na ma tô ĩma isõ, asa'u aima sina hâ'â da, tawapsi, aima ãma ĩsitob da, taré aima sina hâ'â ãna aiwi simi'wara hã. Ãhãta ma tô aima sina hâ oto, 2 miu na, te ãma iromhuri wẽ zéb zarina, aima. Uburé hã oto tawamhã 4 miu na ihâiba hã rob'uiprazé isapotore hã. Ãhãta te asô nomro.” Ãne te romhuri'wa hã tinhib'apito ma siwasu'u, tinhimiromhurizém na.

²³ — Tawamhã isib'apito asa te tãma tinha, ãne: “Wẽ di tô. A hã ĩma romhuri wẽ 'wa. Ĩma ai'umnhasi di. Rob'uiprazé hã surure nherẽ, ma tô ãma ĩzô iromhuri wẽ. Tahawa, ãhã nhipai u wa za duré aima pisutu, marĩ ahâ uptabi na ĩma 're ab'madâ'â u'âsi mono da. Te za oto ĩsiré 're aihâimana mo, wasiré ãma 're watoi u'âsi mono da.” Ãne ma tô duré tãma ropisutu siro, tãma iromhuri wẽ 'wai ma hã.

²⁴ — Tawamhã romhuri'wa hã miu na rob'uiprazé te te aré i'âri hã ma tô duré itẽme ãzé, tinhib'apito u. Tawamhã ãne te tãma tinha, ta hã senai õ na hã: “Apito, ĩma aiwaihu'u pese di. A hã da'ãma 're aipẽ'ẽzé mono õ. Ni'wa hã te te dame 're rob're mono õ nherẽ, danho hã tite da, te te dawi sima 're i'a'rãihâri mono ne, te danhimarĩ hã dawi asima 're i'awaibui mo, ate da.

²⁵ Ãne na te aiwaihu'u wa, wa tô aima ĩpahi. Tahawa, te aiwi simini wa, niha ĩma rob'manharĩ õ'umnhasite, wa tô rob'uiprazé isapotore hã simi'u ti'ai 'rowi, wẽ na asô 're sa'wari mono da. Ãhãta te wẽ na asô nomro, uburé ate rob'uiprazé hã te asô 're 'madâ'â mono da, ĩma isõmri hã.” Ãne te romhuri'wa hã tãma siwasu'u, tinhib'apito ma.

²⁶ — Tawamhã isib'apito, te ãne asa tãma tinha: “A hã ĩma romhuri wasété 'wa. Aiwa'a uptabi di. Ma tô ĩ'ãma irosa'ra, marĩ hã date nherẽ, te dawi ĩsima 're i'awaibui mono na, ĩte da. Ãne ma tô ĩ'ãma asima, irosa'ra.

²⁷ Ãne na 're ĩhâimana mono wamhã, e marĩ wa bété, rob'uiprazé hã ĩzô sẽrẽ õ di, wedehâpâ 're. Tawamhã apâ we ĩwisi wapsi, te aima isõmri nhipai u, wa aré ĩsima waze uburé, ĩzô hã sina hâ'â wa oto.” Ãne ma tô tãma waihu'u, tãma iromhuri wasété 'wai ma.

^28-29 Tawamhã te duré tãma rowasu'u za'ra, uburé i'rata isimasam norĩ ma, ãne: “Ni'wam norĩ hã marĩ ahâ nherẽ, simi'ẽ na te te 're romhuri za'ra mono wamhã, te za ãma tãma 're dasito, marĩ na. Tane nherẽ, ni'wam norĩ hã marĩ suru nherẽ simi'ẽ na te te ãma 're romhuri za'ra mono õ wamhã, te za surure nherẽ, apâ tiwi sani za'ra ni. Tahawa, te za tiwi i'âri 'wa, rob'uiprazé isapotore hã, ĩma romhuri wasété 'wai wi, 10 miu na te te ĩzô ihâiba ma, sõmri aba da.

³⁰ Taha pari, te za asiwi imei wa'wa rob u, robra u. Tame te za oto 'râwi sina tiwawa. Te za duré 'wasitete, te te oto robzépata za'ẽtẽ wa.” Ãne isib'apito hã ma tô dama hâiba 'ru.

Zezusi hã, za da'ãma isipo'ozé wasu'u

³¹ Tawamhã Zezusi hã ma tô duré romhâ ré tãma rowaihu'u siromo za'ra, ãne: — Ti'ai ãma Dasiré Ipodo hã niwapsi te za wei mo apâ, Timama zadawa para, hâiwa ãma tãma iromhuri'wa norĩ siré. Tawapsi te za danhib'apito simasisizém na hã 're sãmra, pire na te te ãma 're da'ab'madâ'â u'âsi mono da oto.

³² Tame te za aihĩni pese isõ're aimasam ni, daro mono bâ 're idahâimana za'ra mono norĩ hã, dapoto mono bâ. Tawamhã tame te za oto da'ãma aipo'o. Pone'ẽrebâ 'madâ'â'wa hã te za tinhimizama na 're sipo'o, pone'ẽrebâ zéré mapu na, duré pone'ẽrebâ zéré uzé na zama. Tane te za duré da'ãma aipo'o, iwẽ na, duré iwasété na zama.

³³ 'Re ihâimana u'âsi mono nhimiroti te te 're i'madâ'â pese za'ra mono norĩ hã isimire niwĩ te za sõré, ta norĩ si te te 're awẽsãmri mono wa. 'Re idanomro wasété mono norĩ hã isimi'e niwĩ te za duré sõré, ta norĩ si te te siwi 're awẽ'õ pese mono wa.

³⁴ Tawamhã Uburé Danhib'apito te za ãne ta norĩ ma hã nharĩ za'ra, isimire niwĩm norĩ ma: “Ĩmama, iwẽ si te te aima 're isõmri za'ra wa'aba mono norĩ hã te za oto ĩ'rata 're aihâimana u'âsi za'ra wa'aba mo. Duréihã te te aropoto mono wamhã, ma tô sima aipisutu za'ra wa'wa, ai'ãma 're sib'a'uwẽ za'ra wa'aba mono da. Tahawa, te za oto ĩ'rata 're aihâimana u'âsi za'ra wa'aba mo, ai'ãma 're sib'a'uwẽ u'âsi za'ra wa'aba mono da oto.

³⁵ Ti'ab ré, mram na 're ĩhâimana mono ré hã, ma tô mra hã ĩma 're isõmri za'ra wa'aba mo. Duré 'rubu ré ma tô â hã ĩma 're i'õb za'ra wa'aba mo. Duré asiré za'ra wa'aba õ nherẽ, ma tô ĩzô 're atob'uzu za'ra wa'aba mo, asõrõwa u atẽme 're ĩzasi aba mono da hã.

³⁶ Duré ĩ'uza õ ré, ma tô asiwi 're ĩ'uza za'ra wa'aba mo. Duré ĩhâzé wa, ma tô asiwi 're ĩpibui wa'aba mo. Dazazéb 're, 're ĩza mono ré, ma tô duré asiwi 're ĩzabu za'ra wa'aba mo. Ãne na 're ĩpawaptob u'âsi za'ra wa'aba mono wa, hâiwa ãma te za oto ĩsiré 're anomro u'âsi aba mo, Ĩmama hã ai'ãma 're isib'a'uwẽ za'ra wa'aba mono zéb ãma hã.” Ãne na te za nimahã na hã tãma siwasu'u za'ra, isimire niwĩ isimasam norĩ ma.

³⁷ — Tawamhã õ norĩ hã 'Re ihâimana u'âsi mono nhimiroti te te 're i'madâ'â pese za'ra mono norĩ hã te za sina sadanharĩ za'ra, ãne: “Wanhib'apito, e niwa wa tô mra hã wa te aima 're sõmri za'ra, mram na 're aihâimana mono ré hã. E niwa duré 'rubu na 're aihâimana mono ré, wa tô â hã wa te aima 're õb za'ra.

³⁸ E niwa wa tô aiwaihu'u õ nherẽ, asô 're watob'uzu za'ra, wanhorõwa u zama 're azasi mono da. E niwa wa tô duré ai'uzazéb da hã wa te aima 're sõmri za'ra, ai'uza õ wa.

³⁹ E niwa wa tô duré wa te wasiwi 're aipibu, aihâzé ré 're aihâimana mono ré hã. E niwa wa tô duré atẽme 're wanomro, wa te 're asabu za'ra mono da, dazazéb 're, 're asa mono ré hã.” Ãne te za ta norĩ hã sina amrami za'ra, tãma.

⁴⁰ — Tawamhã Uburé Danhib'apito hã te za ta norĩ ma ãne tãma rowasu'u za'ra: “Tô sena wa aima rowasu'u za'ra wa'wa. Ĩsisãnawã norĩ hã ti'ab ré ãne na te te 're robzépata za'ra mono wamhã, dama wapu na 're hâimana za'ra mono nherẽ, marĩ iwẽ hã tô õhõ na hã tãma 're 'manharĩ wẽ za'ra wa'aba mono wamhã, ta norĩ hâiba u'âbâ ma tô ĩma 're i'manharĩ wẽ za'ra wa'aba mo.” Ãne na te za ta norĩ ma waihu'u za'ra.

⁴¹ — Tawamhã isimi'e niwĩ isimasam norĩ ma, te za oto nharĩ za'ra, ãne: “A norĩ wa'wa hã ma tô 'Re ihâimana u'âsi mono hã te te siwi 're aiwẽ'õ pese za'ra wa'wa. Mo oto ĩnhiti ai'aba'réi wa'aba, unhama ro'o u'âsi u, wa'uburé norĩ zô 'Re ihâimana u'âsi mono te te ipisutuzéb u, duré ta norĩ nhib'apito zô zama.

⁴² Ti'ab ré mram na 're ĩhâimana mono ré hã, ĩsa hã ĩma 're sõmri za'ra wa'aba mono õ di. Duré 'rubu ré, â hã ĩma 're õb za'ra wa'aba mono õ di.

⁴³ Wa hã aima ĩwaihu'u za'ra wa'aba õ nherẽ, duré ĩzô 're atob'uzu za'ra wa'aba mono õ di, asõrõwa u 're ĩzasi aba mono da hã. Duré ĩ'uza õ ré, asiwi 're ĩ'uza za'ra wa'aba mono õ di. Duré ĩhâzé ré ĩhâimana ré, asiwi 're ĩpibu za'ra wa'aba mono õ di. Duré dazazéb 're, 're ĩza mono ré, ĩtẽme 're anomro aba mono õ di, 're ĩzabu za'ra wa'aba mono da hã.” Ãne te za ta norĩ ma nharĩ za'ra, isimi'e niwĩ isimasam norĩ ma hã.

⁴⁴ — Tawamhã ta norĩ hã te za asa tãma nharĩ za'ra, ãne: “Apito, e niwa wa tô taré wa te 're ai'madâ'â za'ra, mram na 're aihâimana mono ré hã, duré 'rubu 're sépata mono ré hã, duré wama aiwaihu'u õ nherẽ, nima hawi watẽme 're aimasisi mono na hã, duré ai'uza ãna 're aimorĩ ré hã, duré aihâzé na 're aihâimana mono ré hã, duré dazazéb 're, 're asa mono ré hã. E niwa wa tô ãne na hã taré wa te 're ai'madâ'â za'ra, wa te wasiwi 're aipawaptob za'ra mono ãna.” Ãne te za duré ta norĩ hã isadanharĩ na tãma ãma wa'rãmi za'ra, isimi'e niwĩ isimasam norĩ hã.

⁴⁵ — Tawamhã ta norĩ ma, te za duré ãne rowasu'u za'ra: “Tô sena wa aima rowasu'u za'ra wa'wa. Ti'ab ré, ã norĩ hã dama wapu na 're ihâimana za'ra mono norĩ hã ãne na te te 're robzépata za'ra mono ré hã, marĩ iwẽ na 're pawaptob za'ra wa'aba mono õ di. 'Re pawaptob za'ra wa'aba mono õ wamhã, ta norĩ hâiba u'âbâ, asiwi 're ĩpawaptob za'ra wa'aba mono õ di duré.” Ãne te za ta norĩ ma, tãma waihu'u na wa'rãmi za'ra, isimi'e niwĩ isimasam norĩ ma hã.

⁴⁶ — Tawamhã ta norĩ hã te za oto ai'aba'ré, 'Re ihâimana u'âsi mono nhiti, isimihâzém na za te te 're irobzépata u'âsi za'ra mono zéb u. 'Re ihâimana u'âsi mono nhimiroti te te 're i'madâ'â pese za'ra mono norĩ si, te za i'rata 're hâimana u'âsi za'ra, rowẽ u'âsi ãma.