Mateu 24 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono nhorõwa 'ri, romhutu'õ za isi'utõrĩzé wasu'u

¹ Tawamhã Zezusihi siré 're inomro mono norĩ hã ma tô wairé, 'ri 'rãihâ hawi, 'Re ihâimana u'âsi mono nhorõwa 'ri hawi. Aré oto morĩ da, ma te rob u watobro, Zezusi hã. Tane nherẽ, isiré 're inomro mono norĩ hã ma tô 'râwi itẽme aimasa, 'Re ihâimana u'âsi mono nhorõwa hã te te tãma wasu'u za'ra da, uburé 'ri 'wawi wa'ra 're, 'ri, 're isimasa mono hã.

² Tawamhã Zezusi te tãma nharĩ za'ra, ãne: — Ã 'ri hã wẽ na 're simasa mono ré, te tô i'madâ'â za'ra wa'wa. Tane nherẽ, niwapsi te za dasiwi pru pese ni, ẽtẽ na 'ri hã. Tawamhã 're na misi si te za oto simi'wara, ẽne hã. Duré sisisiwimhã 'manomro waihu'u õ di za oto. Tâibâ za oto duré. Tô sena, wa ãne hã aima waihu'u za'ra wa'wa.

Robzépata wasu'u, da'ruiwapari na rowasu'u me

³ Tawamhã Zezusi hã te oto nhamra, Oriwera na ẽtẽ 'rãihâ nhisi ãma. Sahâ na sãmra wamhã, ma tô oto 'râwi itẽme ubumro Zezusihi u, isiré 're inomro mono norĩ hã, hâiba pisutu te te siwi sadanharĩ da, ãne: — E niwa te za ãne hã ãma tiromhâiba, 'ri nhamrazéb da hã. Ma'ãpé wama waihu'u za'ra na, marĩ iwatobrozé hã, isõwa wa te ãma waihu'u siromo za'ra da. Duré e marĩ te za watobro, apâ za we i'aimorĩzéb da hã, wa te ãma iwaihu'u siromo za'ra zéb da hã, duré rob'rãsutuzéb u hã bâdâ, iwa iwaptã'ãzéb u da hã.

^4-5 Tawamhã Zezusi hã te ãne na asa tãma rowasu'u za'ra: — Ni'wam norĩ hã te za sadawa nhipese na sisarina datẽme 're nomro, ahâ na. Wa hã newa, te za taré ĩnhisi na dama 're siwasu'u za'ra, Cristu na, Danho'reptui'wa na. Tawamhã da'ahâ na te za ta norĩ ãma da te 're sasõmri za'ra, tô sena newa, dama 're isiwasu'u za'ra mono zém na hã. Tahawa, te za a norĩ wa'wa hã aihâimana nhimiza'rese, 're aihâimana za'ra wa'aba mo, sadawa nhipese sina, datẽme 're inomro mono norĩ ãma, 're sasõmri za'ra wa'aba mono tõ da.

⁶ 'Re dasi'wapé za'ra mono wa, da te dasina 're iropupu'u za'ra mono zé hã te za 're iwapari za'ra wa'aba mo, romhâ na 're idasi'wapé za'ra mono norĩ wasu'u zama. Ãne hã 're wapari za'ra wa'aba mono wamhã, tãma 're aipahi za'ra wa'aba mono õ di za, dasi'wapéi ma hã. Dasi'wapé te za tô dazada 're wairébé. Tane nherẽ, ta hã rob'rãsutu õ di. Mare di.

⁷ Danhipti'ai amoi u te za dasisô 're dapra, 're dasi'wapé za'ra mono da. Tawamhã daro mono bâ te za tô 're dasiwasutu za'ra. Nima niwĩmhã danho õ wa, te za duré da te 're robzépata za'ra, dasa surure wa. Nima niwĩm norĩ ré hã te za duré ti'a hã iré 're popo'o za'ra.

⁸ Ãne na dama 're romhâimana mono wamhã, za daré irob'rãsutu na'rata zé, te wasu'u, pi'õi ãma iwasã hã 're isépu'u na'rata za'ra mono ne. Ãhã haré dazô 're wairébé mono õ di za.

⁹ — Tawamhã ãne na oto daré 're romhâimana mono wamhã, te za da te 're aiwaibui wa'wa, da te dama 're ai'ru za'ra wa'aba mono da, rowasédé hã da te aima 're 'manharĩ za'ra wa'aba mono da, duré da te 're asimroi wa'aba mono da. Ĩzazei'wa oto 're anomro aba mono wa, te za uburé da te 're ai'ruiwapari za'ra wa'wa, daro mono bâ.

¹⁰ Ãne na daré 're romhâimana mono ré, te za ĩzazei'wa norĩ hã te te 're ĩzazei utõrĩ za'ra, ahâ na. 'Râwim nherẽ, te za duré dama 're sihâiba nhomri za'ra, da te 're i'ruiwapari za'ra mono zéb zarina, da te 're waibui mono da. Ĩzazei'wai wa, tisisãnawã na sima 're hâimana za'ra mono nherẽ, te za oto duré 're si'ruiwapari za'ra, 'râwim nherẽ.

¹¹ 'Re ihâimana u'âsi mono zadawa 'mahârâ'wa newa, roti tô senai'õ na te te dama 're iroti za'ra mono norĩ hã te za datẽme 're nomro, sadawa nhipese na te te dama 're rowasu'u za'ra mono da, taré. Tawamhã isimiroti hã te za tô da te 're saze za'ra, tô sena newa, ta norĩ hã sadawa nhipese na taré dama 're siwasu'u za'ra mono nherẽ.

¹² Duré dawasété uptabi na si da'ahâ uptabi na za oto 're danomro mono wa, te za 're idasisawi za'ra mono zé hã dawi 're si'utõrĩ za'ra.

¹³ Tane nherẽ, ni'wam norĩ hã rob'rãsutu u siptete sina ĩ'ãma 're nomro u'âsi mono wamhã, duré ĩwi 're sipizari za'ra mono õ wamhã, ta norĩ si te za ropipa hawi tinho'reptuzé hã te te sina 're uwaimrami za'ra.

¹⁴ 'Re ihâimana u'âsi mono, da'ãma 're isib'a'uwẽ mono zé wasu'u hã iwẽ uptabi hã, ĩzazei'wa norĩ hã te za daro mono bâ te te dama 're wasu'u za'ra, daro mono bâ da te oto 're wapari za'ra mono da, da te ãma 're isaze za'ra mono zéb da hã. Tame te za oto tirob'rãsutu.

Robzépata za'ẽtẽ uptabi wasu'u

^15-16 Tawamhã Zezusi hã ma duré ãne na tãma rowaihu'u siromo za'ra: — Zahadu wapsi, te za asiwi i'madâ'â za'ra wa'wa, marĩ iwasété uptabi hã. 'Re ihâimana u'âsi mono nhorõwa ãma te za tihâiba, te te siwi iwẽ'õ pe hã. Taha ãma ma tô Daniéu hã rob'ui'éré siro duréihã, 'Re ihâimana u'âsi mono zadawa 'mahârâ 'rata 'wa hã. (Ãhã wasu'u na rob'ui'éré hã 're sõré za'ra wa'aba mono wamhã, ma'ãpé ãma 're rosa'rata pese za'ra wa'aba mono za, waihu'u za'ra wa'aba da.) Tawamhã ãne hã za oto daré romhâimana wamhã, rowasété si te za a'â daré 're sa'wari. Tahawa, Zudéa ãma 're isi'ubumroi mono norĩ hã, wara sina te za 're sisa're, ẽtẽ 'rãihâ u tiwi simani za'ra da, duré tiwi sisõ'reptu za'ra da.

¹⁷ Ni'wam norĩ hã 'ri nhisi hâpâ ãma si'ubumroi wamhã, tinhibrob zô sisisi õ di za a'â, 'ri para u hã. Õne haré te za dame sisa're, ẽtẽ 'rãihâ u, ta norĩ hã.

¹⁸ Duré ni'wam norĩ hã buru ãma te te romhuri za'ra wamhã, 'ri tẽme sisa'rei mono õ di za apâ, tisi'ubuzéb zô. Õne haré te za duré ta norĩ hã ẽtẽ 'rãihâ u dame sisa're.

¹⁹ Ãne hã rowasédé hã daré hâimana wamhã, iwasã ré norĩ ma hã tãma ropipa uptabi za'ra di za, duré i'ra pré ré norĩ ma zama hã.

²⁰ Tahawa, te za 'Re ihâimana u'âsi mono ma 're aimreme zusi aba mo, rowa'u'u wahâ 're sa'wari mono ré, duré sabadu na romhuri zahârizém na bâdâ hã te te pisutu tõ da, ẽtẽ 'rãihâ u i'asa'rei wa'aba mono zéb da hã, rowasété wi aimani za'ra wa'aba da.

²¹ Rowasédé hã oto dazô 're wairébé mono wamhã, te za oto da te 're robzépata za'ẽtẽ za'ra. 'Re ihâimana u'âsi mono te te i'aropoto na'rata mono zém hawimhã, ãne na hã da te 're robzépata za'ẽtẽ uptabi za'ra mono õ di. Duré tane nherẽ niwamhã ãne na hã da te 're robzépata zahu za'ra mono õ di za.

²² 'Re ihâimana u'âsi mono hã bâdâ ma tô sima pisutu, za da te 're irobzépata za'ra mono zé, te te dama wãtari da, rowasété ré da'ãma romhâimana pahâ tõ da. Ãne hã te te sima pisutu õ 'wa'âhã, te aré uburé dasi'utõrĩ pese, za daré irob'rãsutuzém na hã. 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ zawi te, te za ãne hã tô 'manha.

²³ — Za da te 're robzépata za'ẽtẽ za'ra mono ré, ãté ni'wam norĩ hã te za te te aima 're da'mahârâ za'ra wa'wa, ãne: “Ãhãta, Cristu, 'Re ihâimana u'âsi mono te te ipisudu, Danho'reptui'wa da.” Ãté aimawi norĩ hã te za duré ãne te te aima 're da'mahârâ za'ra wa'wa: “Õhõta, Cristu.” Ãne wamhã, ãma 're dazaze za'ra wa'aba mono õ di za, damreme na hã.

²⁴ E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese sina. Ta norĩ hã marĩ dama i'manharĩ waihu'u'õ hã te za duré te te dama 're 'manharĩ za'ra, 'Re ihâimana u'âsi mono zadawa param newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da hã.

²⁵ Ãne hã wa aima waihu'u siromo za'ra wa'wa, zahadu romhâimana õ ré. Tahawa, ma'ãpé ãma 're asõpré u'âsi aba mono za, ãne na hã.

²⁶ — Ãté ni'wam norĩ hã te za taré te te aima 're rowasu'u za'ra wa'wa, ãne: “Danho'reptui'wa da, 'Re ihâimana u'âsi mono te te ipisudu hã ma tô wei mo, apâ. Õhõta te nhamra, a'ubuni wi.” Ãne hã 're wapari za'ra wa'aba mono wamhã, a'ubuni u 're anomro aba mono õ di za, ĩzô 're asõpré wa'aba mono da. Ãté te za duré ãne da te aima 're rowasu'u za'ra wa'wa: “Ãhãta ma dawi aima'u.” Ãne wamhã, ãma 're dazaze za'ra wa'aba mono õ di za, senai'õ na hã, wa hã pi'uriwi nimahã na hã za we apâ ĩmorĩ õ na dâ'âsina.

²⁷ Tã 're si'ubuzi za'ra mono wamhã, dama hã rob'madâ'â pibu pese di, hâiwa mono bâ hã. Tane duré, ti'ai ãma Dasiré Ipodo hã apâ we morĩ wamhã, aihĩni te za 'madâ'â za'ra ni.

²⁸ — Sipahudu hã marĩ dâ'â u 're si'rã'õtõ mono wamhã, dama pibui pese za'ra di, marĩ hã 're dâ'â za'ra mono wa, 're isimasa mono zé hã. Tane, wa hã apâ we ĩmorĩzé hã uburé dama pibui pese za'ra di za.

Ti'ai ãma dasiré ipodo hã za we apâ imorĩzé wasu'u

²⁹ Ãne na ma duré tãma waihu'u siromo za'ra: — Tawamhã da te 're robzépata za'ẽtẽ za'ra mono parip si, awa'awi te za bâtâ na tirobra. A'amo zama te te rob'uiwẽ õ di za oto. Wasi norĩ hã te za duré rere, hâiwa hawi. Uburé hâiwa na 're isimasa mono hã te za duré 're sisa're.

³⁰ Ãne hã daré romhâimana pari, marĩ hã te za watobro hâiwa na, dama ipibu pese zéb da hã, ti'ai ãma Dasiré ipodo, apâ we imorĩzém na da te ãma waihu'u za'ra da oto. Tawapsi te za oto daro mono bâ dasiwi 'madâ'â ni, hâiwa'a na we morĩ ré. Tiwaihu'u pese na te za wei mo apâ, duré ihâiba na hã rowa'a za'ẽtẽ ré. Da te dasiwi 'madâ'â za'ra wamhã, te za 're dazadari za'ra, robzawi te, danhimiza'rese sô 're danhimipari za'ra mono õ wa.

³¹ Tawamhã hâiwa ãma tãma romhuri'wa hã tinhimnhihârâzém na te za oto amnhihâ, hârâ 'rãihâ uptabi na, daro mono bâ da te iwapari za'ra da hã. Simnhihârâ wi, hâiwa hawi tãma romhuri'wa norĩ hã te za we dazô satõrĩ za'ra, ti'ai u. Tawamhã 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ hã te za we daro mono bâ te te simro, itẽme.

Figuera wede wasu'u

³² Tawamhã ãne te duré tãma rowasu'u za'ra: — Figuera wede na, wa za oto aima ãma romnhimiré'é za'ra wa'wa, waihu'u za'ra wa'aba da. Figuera wede panhipti hã wapti'i wamhã, duré isu té hã 're wairébé mono wamhã, tawapsi te za oto ãma iwaihu'u za'ra wa'wa, tã 're ita'a mono zéb u 're irob'umhutu mono zém na hã.

³³ Tane duré, marĩ hã 're iromhâimana mono zéb da, te aima iwasu'u za'ra wa'aba zéb zarina, 'madâ'â za'ra wa'aba wamhã, te za iwaihu'u za'ra wa'wa, rob'rãsutuzé hã za oto iwatobro na hã.

³⁴ Tô sena, wa ãne hã aima waihu'u siromo za'ra wa'wa. Ã hã uburé rowasédé hã dazô 're wairébé mono ré, ti'ai ãma 're idahâimana za'ra mono norĩ hã 're dâ'â za'ra mono õ ré, te za isõ'a za'ra ti'rãsutu, romhâimanazé hã.

³⁵ Nimahã na te za hâiwa norĩ hã ai'utõrĩ zahuré, ti'ai me. Si'utõrĩ zahuré nherẽ, ĩnhimirowasu'u hã si'utõrĩ waihu'u õ di za. Pire na te za dama 're hâimana u'âsi.

Danhimiza'rese ãna 're danomro mono ré, Zezusi hã za we apâ imorĩzé wasu'u

³⁶ Tawamhã Zezusi hã ma duré ãne na tãma waihu'u siromo za'ra: — Ãne hã uburé za daré 're iromhâimana mono zéb da hã, ni'wa bâdâ hã te te waihu'u õ di. Duré Hâiwa ãma romhuri'wa norĩ zama, bâdâ hã te te siwi waihu'u õ di. Duré 'Re ihâimana u'âsi mono 'ra nherẽ, te te duré bâdâ hã waihu'u õ di. Imama ma si hã, waihu'u pese di bâdâ hã.

³⁷ Danhimiza'rese ãna 're danomro mono ré, te za wei mo apâ Dasiré ti'ai ãma Ipodo hã, duréihã Nowé 're hâimana mono ré, danhimiza'rese ãna 're idahâimana za'ra mono wam ne ré.

³⁸ Ta norĩ hã daro mono bâ daré âpusi mono õ ré hã, ma tô 're saihuri, tisa na. Te duré te te 're âhuri, rowẽ na 're rosa'wari u'âsi mono da newa. Te duré sina 're mro za'ra. Ãne ma tô danhimiza'rese ãna 're dahâimana za'ra, Nowé hã uba're ne 'manharĩ 're sébré õ ré, 'ri ne 'manharĩ 'remhã.

³⁹ Tawamhã rosa'rese õ ré, ma tô daré âpusi. Tawamhã oto daré âpusi mono wamhã, ma tô uburé pese dasi'utõrĩ, â na hã. Tane duré, ti'ai ãma Dasiré Ipodo hã danhimiza'rese ãna 're danomro mono ré, te za wei mo, apâ.

⁴⁰ — Ãté aibâ norĩ hã buru na siré te te romhuri zahuré ré, te za we apâ mo, dazô. Tawamhã ãté ihâiba amo hã te za tiwi ti'â hâiwa u, 'Re ihâimana u'âsi mono hã. Ãhã wamhã ãté ihâiba amo si hã te za tirẽ za.

⁴¹ Ãté pi'õ norĩ hã siré 'ru'u zahuré ré, te za duré tiwi ti'â, ihâiba amo hã. Tawamhã ihâiba amo si ãté te za duré tirẽ za, 'Re ihâimana u'âsi mono hã.

⁴² Tahawa, te za asimiza'rese, sô 're asimipari u'âsi za'ra wa'aba mo, Asib'apito za'ra wa'wa hã apâ we imorĩzé hã bâdâ hã waihu'u za'ra wa'aba õ wa.

⁴³ Wa za duré aima ãma romnhimiré'é za'ra wa'wa, ãma rosa'rata za'ra wa'aba da. 'Ri tede'wa hã isõrõwa u isipsaihuri iwisizé hã, bâdâ te te waihu'u siromo wamhã, bara na te za sô rob'madâ'â u'âsi, sõtõ ãna, 'ri para u sébré tõ da, tiwi hã simisaihuri õ'umnhasite.

⁴⁴ Tane duré, a norĩ wa'wa hã te za asimiza'rese sô 're asõpré u'âsi aba mo. E marĩ wa. Dasiré Ipodo hã nimahã bâtâ na sô asimipari za'ra wa'aba õ zém na za we apâ morĩ na dâ'âsina.

Romhuri'wa i'umnhasi wasu'u, romhuri'wa i'umnhasi'õ wasu'u me

⁴⁵ Tawamhã Zezusi te duré tãma ãma romnhimiré'é za'ra, ãne: — Dama romhuri'wa i'umnha hã duré isimiroti wẽ hã, e niha 're ihâimana mono zé hã. Ãne hã 're hâimana mono wamhã, te za isib'apito hã nimomo tiwi morĩ õ ré, tãma pisutu, uburé tãma iromhuri'wa norĩ hã isa'u nherẽ, te te sô 'madâ'â pese za'ra da. Te za duré tãma roti, bâtâ pisutu zéb zarina isa za'ra zé hã te te ãma tãma uwaimrami za'ra da, tãma iromhuri'wa norĩ ma.

⁴⁶ Tawamhã apâ we imorĩzéb u, tinhib'apito nhimiroti hã te te tãma ãma uwaimrami wamhã, tãma rowẽ di za, romhuri'wai ma hã.

⁴⁷ Taha ma, tãma rowẽ uptabi di za tô. E marĩ wa. Isib'apito hã apâ wisi wapsi, te za tãma pisutu, uburé isimarĩ hã te te tãma 're 'madâ'â u'âsi mono da oto, tãma i'umnhasi uptabi zarina.

⁴⁸ Tazahã, tinhib'apito za're'ra, isimiroti hã te te tãma ãma uwaimrami õ wamhã, tãma rowẽ õ di za. Ãté apito za're'ra wẽ te, te za ãne 'râwi sima tinha: “Ĩnhib'apito hã simahudu õ di.”

⁴⁹ Tawamhã sô rowaptâ'â wẽ te, te za oto tizapari romhuri'wa norĩ hã te te 're ahâ za'ra. Âzé hã te za duré te te 're hâsi, âzézei'wa norĩ siré. Siwa'ru te za oto duré 're hâimana.

⁵⁰ Tawamhã simisa'rese ãna hâimana ré, te za isib'apito hã itẽme wi apâ, sô isimipari õ zém na siwa'ru, bâtâ na.

⁵¹ Tawamhã sa'ẽtẽ te za azâ, tãma iromhuri'wa hã. Tane ni'wam norĩ hã 'Re ihâimana u'âsi mono nhimiroti te te 're 'madâ'â pese za'ra mono õ wamhã, te za tãma pisutu za'ra, ropipa u 're sisisi mono da, dasiré, isimiroti hã te te 're 'madâ'â pese za'ra mono newa, taré ãma 're dawata za'ra mono da, 're ihâimana wasété za'ra mono norĩ zu. Tame te za oto 're 'ru'ru. Te za duré 're 'wasitete za'ra, te te 're robzépata za'ẽtẽ za'ra mono wa.