Mateu 23 - ꞌRe Ihâimana Uꞌâsi Mono Zadawa Wasuꞌu

Farizeu norĩ hâimanazé wasu'u

¹ Tawamhã Zezusi hã ma tô dama rowasu'u, duré tisiré 're inomro mono norĩ ma zama, ãne:

² — 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã duré farizeu norĩ hã dama pire za'ra di, 'Re ihâimana u'âsi mono nhimiroti zarina Mozési te te ãma irob'ui'érézém na te te dama 're irowasu'u za'ra mono zéb da hã.

³ Tahawa, farizeu norĩ nhimiroti hã te za 're iwapari pese za'ra wa'aba mo, ãma 're anomro aba mono da. Tane nherẽ, 're ihâimana za'ra mono zéb zarina, isine 're aihâimana za'ra wa'aba mono õ di za. E marĩ wa. Te te dama 're iroti za'ra mono zém na si 're sõpré mono õ wa, ta norĩ hã.

⁴ Da te danhoihi waptob za'ra mono ãna, marĩ ipire uptabi da te 're 'wasari mono da, da te dama 're iromnhibu za'ra mono ne, te ta norĩ hã tinhimiroti na zama te te dama 're roti u'âsi za'ra, 'Re ihâimana u'âsi mono nhimiroti upana, taha na si 're danomro mono da, dama pire uptabi nherẽ, da te dasina 're i'uwaimrami za'ra mono zéb da hã. Tane nherẽ, ta norĩ hã te te 're dapawaptob za'ra mono õ di, ãma 're idanomro wẽ mono zéb da hã.

⁵ Taré da te 're 'madâ'â wẽ za'ra mono da, te marĩ hã te te 're 'manharĩ za'ra, danho'a. Powawẽ hâ 'manharĩ hã 'Re ihâimana u'âsi mono nhimiroti ui'éré na ibaihâ nhemezébre hã isa'ẽtẽ uptabi na si te ãma 're si'uihâ wasisi za'ra, tipaihi wib zama, 're nomro wẽ mono newa, da te 're 'madâ'â wẽ za'ra mono da. Taha da, te duré ti'uza hâpa za'ru pa ré na 're si'uza za'ra.

⁶ Te duré te te sima 're pisutu za'ra, dama ipire norĩ simasisizém na si 're si'ubumroi mono da, dasa da te 're huri mono sidâpâsi, duré rowahutuzé mono bâ, 'ri hã 're isimasa mono zéb 'remhã.

⁷ Te duré te te sima 're wẽ za'ra, dama ipire norĩ hã damreme ipire na da te 're isawi za'ra mono ne, dahâimana prédup sina da te 're sawi za'ra mono da, da'ahâ na 'ri nhi'riti wa, da te dasima 're irowede za'ra mono zéb ãma hã. Te duré te te sima 're wẽ za'ra, da te 're sawi za'ra mono wamhã, rowahutu'wa na da te 're sisi za'ra mono sina, da te 're sawi za'ra mono da, dama 're idapire za'ra mono norĩ 'mahârâzém na. Ãne te ta norĩ hã uburé marĩ hã te te sima 're wẽ za'ra, dama ipire zarina, da te 're 'madâ'â wẽ za'ra mono da.

⁸ Tane nherẽ, te a norĩ wa'wa hã simisutu asisãnawã 're anomro aba mo, asiré isazei'wai wa. Duré misire Asib'apito wa'wa hã. Tahawa, “rowahutu'wa” na dama aiwaptẽrẽ pire na da te 're asisi za'ra wa'aba mono da, 're asi'madâ'â ze za'ra wa'aba mono õ di za, a norĩ wa'wa hã.

⁹ Dawaptẽrẽ pire zém na, aimama za'ra wa'aba na hã 're danhisi za'ra wa'aba mono õ di za. E marĩ wa. Misire te Aimama za'ra wa'wa hã 're hâimana hâiwa ãma, siwaprosi.

¹⁰ Wa hã misire Asib'apito za'ra wa'wa hã wa 're ĩhâimana, 'Re ihâimana u'âsi mono, ĩwétési te te ĩpisutu wa, Danho'reptui'wa da. Tahawa, 're asi'madâ'â ze za'ra wa'aba mono õ di za, danhib'apito na da te 're i'awaptẽrẽ za'ra wa'aba mono zéb da na hã.

¹¹ Asiré norĩ ma ai'maipire wa'aba da, asina 'mairob'ruiwapari aba wamhã, te za 're i'maipawaptob u'âsi aba mo, marĩ zô 're ai'manhimnhasi aba mono ãna.

¹² Ni'wam norĩ hã pire na 'râwi sina 're sõpré mono wamhã, 'Re ihâimana u'âsi mono si te za tãma pisutu za'ra, wapu na dama 're hâimana za'ra mono da oto. Duré, ni'wam norĩ hã pire na 'râwi 're si'madâ'â za'ra mono õ wamhã, ta norĩ ma si te za pisutu za'ra, pire na oto dama 're hâimana za'ra mono da.

Zezusi hã farizeu norĩ ma, te te inharĩ za'ra zé wasu'u

^13-14 — Farizeu norĩ, duré dama rowahutu'wa norĩ, aihâimana uptabi õ na dama 're aihâimana za'ra wa'aba mono wa, aima 're ropipa uptabi za'ra wa'aba mono di za. 'Ridawa hã 're danhisisi tõ mono da, da te dawi 're isitob za'ra mono ne, te a norĩ wa'wa hã dawi 're isawi za'ra wa'aba mo, 'Re ihâimana u'âsi mono, da'ãma 're isib'a'uwẽ mono zéb u 're danomro tõ mono da hã. A norĩ wa'aba zama te 'Re ihâimana u'âsi mono wi 're asihâiba zawi za'ra wa'aba mo, ai'ãma 're sib'a'uwẽ za'ra wa'aba mono tõ da.

¹⁵ — Farizeu norĩ, duré dama rowahutu'wa norĩ, a norĩ wa'aba ma, aima 're ropipa uptabi za'ra wa'aba mono di za. Ma tô datẽme 're iropéi wa'aba mo daro mono bâ, dama 're rowasu'u za'ra wa'aba mono da, asimirowasu'u na da te 're asaze za'ra wa'aba mono da. Tawamhã ni'wam norĩ hã asiniwĩ 're isipizari za'ra mono hã, 're anomro wasété aba mono zéb zarina, ma tô 're hâimana wasété uptabi za'ra, asimiroti wasété aba zarina. Tahawa, ropipa ãma 'Re ihâimana u'âsi mono te te 're aihâ za'ra wa'aba mono zém nhipai u, te za te te 're ahâ za'ra za'ẽtẽ za, ta norĩ hã.

¹⁶ — A norĩ wa'aba ma, aima 're ropipa uptabi za'ra wa'aba mono di za. E ni'wa hã tob'a nherẽ, te za dazaprõni wẽ. Mare di. Tane te duré a norĩ wa'wa hã roti senai'õ na dama 're iroti wasété za'ra wa'aba mo, 'Re ihâimana u'âsi mono nhimiroti hã sena na waihu'u za'ra wa'aba õ wa. Ãne te dama 're iroti wasété za'ra wa'aba mo: “Ãté ni'wam norĩ hã te za marĩ na te te dama 're ropisutu za'ra. Tawamhã ãté tô sena te te dama 're iropisutu za'ra mono zém na, da te 're saze za'ra mono da, te za 'Re ihâimana u'âsi mono nhorõwa nhisi hã te te ãma dama 're waptob za'ra, tinhimiropisutu me. Ãne na te te dama ãma 're uwaimrami za'ra mono õ nherẽ, 'Re ihâimana u'âsi mono hã te te 're hâ za'ra mono õ di za. Tane nherẽ, ni'wam norĩ hã marĩ na te te dama 're ropisutu za'ra mono wamhã, ẽtẽ waipo pré oru 'manharĩ hã, 'Re ihâimana u'âsi mono nhorõwa 're, 're isimasa mono na te te dama 're rowasu'u za'ra mono nherẽ, te te dama ãma 're uwaimrami za'ra mono õ wamhã, te za te te 're hâ za'ra, 'Re ihâimana u'âsi mono hã.” Ãne te ai'rã ahâ na dama 're iroti za'ra wa'aba mo, tô senai'õ na.

¹⁷ E niha waihu'u za'ra wa'aba õ di bété, 'Re ihâimana u'âsi mono nhimiroti hã. Datob'a na 're idanomro mono ne, te 're anomro aba mo. Oru 'manharĩ hã 'ri 're wa'wa 're, 'Re ihâimana u'âsi mono nhorõwa 'ri ãma 're simasa mono wa, tãma hã sawi di. Oru 'manharĩ hã isõrõwa ãma 're simasa mono õ 'wa'âhã, aré tãma sawi õ di. Tahawa, 'ri hã 'Re ihâimana u'âsi mono nhorõwa hã oru 'manharĩ, iwa 're isimasa mono zawi nhipai u, sawi uptabi di tãma, 'ri hã. Tahawa, 'Re ihâimana u'âsi mono nhorõwa nhisi na zama taré dama 're dasiwaptob za'ra mono õ di za. E ãne hã asima waihu'u za'ra wa'aba ã bâ bété a norĩ wa'wa hã.

¹⁸ Ãne na te duré dama 're iroti wasété za'ra wa'aba mo: “Ni'wa hã marĩ na te te dama 're ropisutu mono wamhã, 'Re ihâimana u'âsi mono nhorõwa ãma, tãma danhoprubzé nomrizém nhisi na wedeza ne nhisi na te te dama ãma 're waptob za'ra mono wamhã, duré te te dama ãma 're uwaimrami za'ra mono õ wamhã, tane nherẽ, 'Re ihâimana u'âsi mono hã te te azâri õ di za. Tane nherẽ, ni'wa hã tãma danhoprubzé nomrizém nhisiwi, tinhoprubzé te te ihiri nhisi na dama ãma 're siwapto mono wamhã, duré te te dama ãma 're uwaimrami mono õ wamhã, tawapsi te za azâ, 'Re ihâimana u'âsi mono hã.” Ãne te duré a norĩ wa'wa siwa'ru dama 're iroti za'ra wa'aba mo, tô senai'õ na.

¹⁹ E niha waihu'u za'ra wa'aba õ di bété, 'Re ihâimana u'âsi mono nhimiroti hã. Datob'a na 're idanomro mono ne, te 're anomro aba mo. Danhoprubzé hã tãma danhoprubzé nomrizém nhisiwi, da te tãma 're isa'ra mono zé hã 'Re ihâimana u'âsi mono ma, sawi di. Tane nherẽ, tãma 're idanhoprub za'ra mono zé hã isõrõwa ãma tãma danhoprubzé nomrizém nhisiwi 're simi'wara mono õ 'wa'âhã, aré tãma sawi prã ti, 'Re ihâimana u'âsi mono ma hã. Tahawa, tãma danhoprubzé nomrizé hã tãma 're idanhoprub za'ra mono zéb zawi nhipai u, tãma sawi uptabi di. E ãne hã asima waihu'u za'ra wa'aba õ di bété.

²⁰ Tahawa, ni'wam norĩ hã 'Re ihâimana u'âsi mono ma, danhoprubzé nomrizém nhisi na dama ãma 're siwaptob za'ra mono wamhã, taha nhisi zarina te duré uburé isisiwi danhoprubzém nhisi na zama dama ãma 're siwaptob za'ra.

²¹ Duré ni'wam norĩ hã 'Re ihâimana u'âsi mono nhorõwa nhisi na dama ãma 're siwaptob za'ra mono wamhã, taha nhisi zarina te duré iwa 're isãmra mono nhisi na 're siwaptob za'ra, 'Re ihâimana u'âsi mono nhisi na hã.

²² Duré ni'wam norĩ hã hâiwa nhisi na dama 're siwaptob za'ra mono wamhã, taha nhisi zarina te duré 'Re ihâimana u'âsi mono, pire na te te 're ida'ab'madâ'â mono zém nhisi na dama ãma 're siwaptob za'ra, iwa 're isãmra mono nhisi na zama, tô õhõ nhisi na.

²³ — Farizeu norĩ, duré dama rowahutu'wa norĩ, aihâimana uptabi õ na dama 're aihâimana za'ra wa'aba mono wa, aima 're ropipa uptabi za'ra wa'aba mono di za. 'Re ihâimana u'âsi mono nhimiroti 'rada hã taha ma, tãma ipire prã si te 're i'madâ'â pese za'ra wa'aba mo. Wesuirã isu zadazei mono hã ma tô 'Re ihâimana u'âsi mono ma, isimiroti 'rata zarina, tãma 're ipo'o za'ra wa'aba mo, suru na otelã na wesuirã zadaze wamri hã, duré ewa-doce na wesuirã nhisi hã, duré cominhu na dasai warĩrĩzé nhisi hã. Tane nherẽ, isimiroti pire na Mozési te te ãma i'arob'ui'éré mono hã 're 'madâ'â za'ra wa'aba mono õ di, isarina si dama 're irob'manharĩ wẽ za'ra wa'aba mono zéb da hã, duré da'ãma 're aipẽ'ẽzé za'ra wa'aba mono zéb da hã, duré 'Re ihâimana u'âsi mono wi, 're aipizari za'ra wa'aba mono ãna 're anomro aba mono zéb da hã. Ãne hã isimiroti ipire prã norĩ zu, 're 'madâ'â za'ra wa'aba mono 'wa'âhã, te aré tô sena aihâimanazém na asina tãma ãma 're i'uwaimrami za'ra wa'aba mo, 'Re ihâimana u'âsi mono ma hã.

²⁴ E itob'a hã simizaprõni wẽ bâ. Ta hã simizaprõni wẽ õ di. Tane te duré a norĩ wa'wa hã roti senai'õ na dama 're iroti wasété u'âsi za'ra wa'aba mo, 'Re ihâimana u'âsi mono nhimiroti hã sena na aima waihu'u pese za'ra wa'aba õ wa. Isimiroti pire norĩ hã 're 'madâ'â za'ra wa'aba mono õ nherẽ, te isimiroti ipire prã norĩ si, 're i'madâ'â pese za'ra wa'aba mono zéb da si, 're asiwasutu u'âsi za'ra wa'aba mo.

²⁵ — Farizeu norĩ, duré dama rowahutu'wa norĩ, aihâimana uptabi õ na dama 're aihâimana za'ra wa'aba mono wa, aima 're ropipa uptabi za'ra wa'aba mono di za. Ãne na wa za aima ãma romnhimiré'é za'ra wa'wa: Hâsizé hã duré pratu dasazé hã imana wawip si, da te 're upsõ za'ra mono wamhã, iwa'wamhã wasété di, zahadu upto wa. Tane, a norĩ wa'wa hã 're anomro wẽ wa'aba mono newa, da te 're ai'madâ'â wẽ za'ra wa'aba mono da, te 'Re ihâimana u'âsi mono nhimiroti ipire prã norĩ si 're i'madâ'â pese za'ra wa'aba mo, danho'a. Tane nherẽ, aipẽ'ẽ 'remhã asimirosa'rata wasété na te zahadu iré 're aihâimana u'âsi za'ra wa'aba mo. Te duré danhibrob na si 're ida'ruiwapari za'ra wa'aba mo. Aihâimana uptabi õ zarina, te duré marĩ na dawi 're asipsaihuri za'ra wa'aba mo.

²⁶ Farizeu norĩ, datob'a ne 're i'aihâimana za'ra wa'aba mono norĩ, ma'ãpé aihâimana wasété za'ra wa'aba zé hã rẽme pese za'ra wa'aba, danhimihâsizé 're wa'wamhã upto wa, da te 're i'upsõ za'ra mono ne. Tawapsi te za oto 're i'anomro wẽ wa'aba mono zém na sena na da te 're aiwaihu'u za'ra wa'wa.

^27-28 — Farizeu norĩ, duré dama rowahutu'wa norĩ, aihâimana uptabi õ na dama 're aihâimana za'ra wa'aba mono wa, aima 're ropipa uptabi za'ra wa'aba mono di za. Ãne na wa za duré aima ãma romnhimiré'é za'ra wa'wa, waihu'u za'ra wa'aba da: Adâ'â 'ru hã imana wawimhã te za a ni, i'madâ'â ze zéb da hã. Tane nherẽ, 're idadâ'â za'ra mono norĩ hi hã te iwa 're simi'wara u'âsi ab're 'remhã, 're idahâiba hâi ware za'ra mono zama. Iwasété si te iwa 're simi'wara, ab're 'remhã. — Tane duré, a norĩ wa'wa hã 're aihâimana wẽ za'ra wa'aba mono newa, te da te 're ai'madâ'â wẽ za'ra wa'wa, sõ'awim na hã. Tane nherẽ, aipẽ'ẽ 'remhã aiwasété uptabi na te iré 're aihâimana za'ra wa'aba mo. Aihâimana uptabi õ za'ra zéb zarina si, te duré dama 're anomro aba mo.

²⁹ — Farizeu norĩ, duré dama rowahutu'wa norĩ, aihâimana uptabi õ na dama 're aihâimana za'ra wa'aba mono wa, aima 're ropipa uptabi za'ra wa'aba mono di za. A norĩ wa'wa hã duréihã 'Re ihâimana u'âsi mono zadawa 'mahârâ 'rata 'wa norĩ nhimirowasu'u hã aima 're wẽ uptabi za'ra wa'aba mono newa, ma tô ta norĩ 'ru na hã marĩ ãma 're i'manharĩ za'ra wa'aba mo, wẽ na 're simi'wara mono da 'madâ'â ze na, 'Re ihâimana u'âsi mono nhimiroti 'madâ'â pese 'wa norĩ 'ru hã.

³⁰ Asina 're aiwata za'ra wa'aba mono sina, te duré ãne dama 're asiwasu'u za'ra wa'aba mo: “Wa norĩ hã wahi'rata norĩ siré 're wahâimana za'ra mono 'wa'âhã, 'Re ihâimana u'âsi mono zadawa 'mahârâ 'rata 'wa norĩ hã wa te aré 're simroi mono õ di, isiré za'ra.” Ãne te dama 're asiwasu'u za'ra wa'aba mo.

³¹ E marĩ te bété ãhã na hã aima wasu'u za'ra wa'wa, 'Re ihâimana u'âsi mono zadawa wasu'u 'rata pãrĩ'wa norĩ nhihudu na dama 're asiwasu'u za'ra wa'aba mono zé hã. Tô õhõ isine marĩ iwasété si 're i'manharĩ za'ra wa'aba mono zé, te tô aima wasu'u za'ra wa'wa.

³² Tahawa, aihi'rata norĩ te te 're irob'manharĩ na'rata wasété za'ra mono zéb zarina si, tô 're anomro aba mono, asima ãma 're sa'ẽtẽ za'ra wa'aba mono da, aima wẽ za'ra wa'aba ze te bâ.

³³ Farizeu norĩ, a norĩ wa'wa hã wahi nhipãrĩ pese ne, te tô 're anomro aba mo. E ropipa u, 'Re ihâimana u'âsi mono te te 're asatõrĩ za'ra wa'aba mono wa isimihâzé wi, tiwi 're aiwairébé aba mono da bâ.

³⁴ Ni'wam norĩ hã wa za oto te 're satõrĩ za'ra, atẽme 're nomro aba mono da, Ĩmama 'Re ihâimana u'âsi mono hã te te aima 're sadawa wasu'u za'ra wa'aba mono da, isimiroti na te te aima 're rowahutu za'ra wa'aba mono da, ãma 're anomro wẽ wa'aba mono da oto. Tane nherẽ, ĩzadawa para õ nherẽ, te za 're isimroi wa'aba mo ta norĩ hã, 'Re ihâimana u'âsi mono zadawa 'mahârâ'wa norĩ hã. Te za duré dama 're i'ru za'ra wa'aba mo, wedepo'o nhonhi'rãmi na hâiwi da te 're sasõmri za'ra mono da, 're dâ'â za'ra mono da, hâiwi sa'o ré. Rowahutuzéb 're, te za duré 're ihâ za'ra wa'aba mo, powawẽ hâiwaré na. 'Ri wa'õtõ mono bâ te za duré sô 're anomro aba mo, 'Re ihâimana u'âsi mono zadawa 'mahârâ'wa norĩ zô, tãma 're rob'manharĩ wasété za'ra wa'aba mono da hã, ta norĩ ma zama.

³⁵ Duréihã aihi'rata 'wa hã ma tô Abéu hã tiwĩ, marĩ te te 'manharĩ wasété õ nherẽ. Ta hawim haré, ma tô aihi'rata norĩ wa'wa hã te te 're danhimro da'ahâ na, 're danomro wasété mono õ nherẽ. Daza'u si ma duré Zacaria hã siwi tiwĩ. Ta hã Baraquiaha 'ra, 'Re ihâimana u'âsi mono ma da'ãma romhuri'wa. 'Re ihâimana u'âsi mono nhorõwa ãma 'ri 'wawi wa'ra 're, tãma danhoprubzé nomrizéb 'rata te te tãma romhuri ré, ma tô wĩrĩ ni, wedeza ne 'rata. Ãne ma tô aihi'rata norĩ wa'wa hã da'ahâ na te te 're danhimro, 'Re ihâimana u'âsi mono nhimiroti si te te 're 'madâ'â pese za'ra mono nherẽ, ta norĩ hã. Ta norĩ ne, te duré a norĩ wa'wa hã dama 're irob'manharĩ wasété za'ra wa'aba mo. Tahawa, wa hã wa za aiwasédé hã te ai'ãma 're sa'ra wa'wa, uburé aihi'rata norĩ te te 're idanhimroi mono zéb zarina. Tahawa, te za te te 're ai'ahâ za'ra za'ẽtẽ 'wa, 'Re ihâimana u'âsi mono hã.

³⁶ Ãne hã wa tô sena, aima waihu'u za'ra wa'wa. 'Re ihâimana u'âsi mono hã te za tô te te 're ai'ahâ za'ra za'ẽtẽ 'wa, nimosi i'aipoto té wa'aba mono hã i'aihâimana za'ra wa'wa hã, ãne na dama 're irob'manharĩ wasété za'ra wa'aba mono zéb zarina, aihi'rata norĩ nhipãrĩ zarina.

Zezusi hã, Zeruzalẽ ãma 're idahâimana za'ra mono ãma ipẽ'ẽzézé wasu'u

³⁷ Tawamhã Zezusi te duré dama tinha, ãne: — Zeruzalẽ ãma 're ai'ubumroi wa'aba mono norĩ ãma, ai'ãma ĩpẽ'ẽzé za'ra wa'aba di. Aihi'rata norĩ hã ma tô 'Re ihâimana u'âsi mono zadawa 'mahârâ 'rata 'wa norĩ hã te te 're simroi u'âsi. Datẽme te te 're isatõrĩ za'ra mono norĩ zama, te duré te te 're simroi u'âsi, ẽtẽ na. Si'a hã ti'ra zawi te, 're ipapo za'ra mono ne, wa aré te ĩsima 're aiwẽ u'âsi za'ra wa'wa, ĩsitẽme te 're ai'awaibui wa'aba mono da. Tane nherẽ, asima 're ĩwẽ za'ra wa'aba mono õ di asa hã.

³⁸ Tahawa, tinhorõwa hã te za oto tirẽ, 'Re ihâimana u'âsi mono hã, ãma 're i'aiwata za'ra wa'aba mono zé hã. Baba na te za oto duré 're sa, 'ri 'rãihâ hã. Ma'ãpé ãne na ĩzadaihu'u za'ra wa'aba.

³⁹ Duré a norĩ wa'wa hã ĩhâiba 'madâ'â na sahu za'ra wa'aba õ di za, a'â. Niwapsi te za duré ĩhâiba 'madâ'â za'ra wa'wa, ãne na ĩwaihu'u za'ra wa'aba wapsi: “Zezusi hã, ta hã 'Re ihâimana u'âsi mono zadawa para we imorĩ ti'ai u, Danho'reptui'wa da. Tahawa, iwẽ si te te tãma 're anhomri u'âsi, Imama hã.” Ãne na aipẽ'ẽ 're ĩwaihu'u za'ra wa'aba wapsi, te za ĩhâiba 'madâ'â na duré isahu za'ra wa'wa.