Mateu 22 - ꞌRe Ihâimana Uꞌâsi Mono Zadawa Wasuꞌu

Dasina damrozém na dasai ahâ wasu'u

¹ Tawamhã Zezusi hã ma tô duré romnhimiré'é na tãma rowasu'u za'ra, farizeu norĩ ma, ãne:

² — 'Re ihâimana u'âsi mono, da'ãma 're isib'a'uwẽ mono zém na wa za duré aima ãma romnhimiré'é za'ra wa'wa, ãne. Apito 'ra si'aibâ hã tãma mro wẽ te, tãma irowẽzéb zarina ma tô sima roti, dasa hã te te dama 'manharĩ da, sa'ẽtẽ na, ti'ra mrozém na hã.

³ Tawamhã ma tô isiré dasaihuri da, da'apisutu. Taha parip si ma tô tãma iromhuri'wa norĩ hã satõrĩ za'ra, te te dapo're pu'u za'ra mono da, itẽme dasihutu da, isiré hã dasaihuri da. Tane nherẽ, te te ipo're pu'u 'rata za'ra norĩ hã te te sima rowẽ za'ra õ di, itẽme si'aba'ré da hã, isiré saihuri da.

⁴ Tahawa, te duré apito, tãma iromhuri'wa norĩ hâiba amo hã satõrĩ za'ra, ãne: “Mo oto ai'aba'réi wa'aba, aré sô ĩhârâ 'rata za'ra norĩ zô. Tawamhã ãne te za tãma ĩzadawa wasu'u za'ra wa'wa: ‘Powawẽ norĩ hã, duré powawẽ zapu da te dasima ihâipese za'ra hã ma dasiwi simro ni. Uburé ma tô marĩ hã dasiwi 'rã'õtõ ni, dasa da te ihurizéb da hã. Tahawa, te za we ĩtẽme ai'aba'réi wa'wa oto, wasiré wasa hã wa te huri da, ĩ'ra ĩma imrozém na.’ Ãne te za ta norĩ ma ĩzadawa wasu'u za'ra wa'wa.” — Tawamhã apito hã te te sô satõrĩ za'ra wa, te oto sô ai'aba'ré.

⁵ — Tane nherẽ, sô ihârâ 'rata za'ra norĩ hã sô simipari za'ra õ di, itẽme si'aba'ré da, isiré saihuri da hã. Tahawa, sô simipari za'ra ãna ma tô ni'wam norĩ hã tiburu u ai'aba'ré, duré tinhimiromhurizéb u hã.

⁶ Ni'wam norĩ hã ma tô apito ma romhuri'wa norĩ hã siwi waibu. Duré te te siwi waibui parimhã, ma tô niha tãma rob'manharĩ wasété za'ra. Taha pari, ma tô duré uburé siwi uprosi.

⁷ Tawamhã apito hã tãma iromhuri'wa norĩ, da te i'uprosi wasu'u te te wapari wamhã, ma tô ab'rui pese. Tahawa, tãma da'wapéi'wa norĩ hã ma tô itẽme satõrĩ za'ra, tãma iromhuri'wa norĩ, da te tiwi i'uprosi za'ra u. Tawamhã da'wapéi'wa norĩ hã ma tô siwi uprosi, ta norĩ hã. Ma tô duré ta norĩ nhorõwa hã te te siwi 'ri su, 'ri nho'õmo wa, aré tãma 're isimasa mono hã.

⁸ Taha pari, ma tô duré sô hâ, tãma iromhuri'wa norĩ zô, aimawi norĩ zô. Tawamhã ãne te ta norĩ ma hã tãma nharĩ za'ra: “Dasazéb da hã tâibâ ma tô api pari za'ra ni, ĩ'ra imrozém na dasa da te ihurizéb da hã. Tane nherẽ, sô ĩhârâ 'rata za'ra norĩ hã we si'aba'réi õ di. Ibâre ma tô ta norĩ zô rowasédé hã tiwatobro za'ra, sô ĩhârâ za'ra nherẽ, te te ĩwapari za'ra õ wa.

⁹ Tahawa, te za oto dazô iropéi wa'aba mo 'ri nhi'riti mono bâ, dasai u we danhimroi wa'aba mono da, danhopẽtẽ za'ra wa'aba mono sidâpâsi.”

¹⁰ — Tawamhã te oto ai'aba'ré, 'ri nhi'riti mono bâ, dazô sõpré mono da. Tawamhã te te danhopẽtẽ za'ra mono sidâpâsi, ma tô te te dazatõrĩ za'ra da'ahâ na, 're idanomro wẽ mono hã, 're idanomro wasété mono norĩ zama. Tawamhã da'ahâ uptabi na ma tô 'ri 're wa'wa nho'u hã dasiwi sitom ni, apito 'ra imrozém na dasai u, dasi'rã'õtõ wa.

¹¹ Tawamhã apito hã ma tô datẽme ãzé, dasi'rã'õtõzéb u, te te da'ab'madâ'â da. Datẽme sébré wamhã, ma tô aibâ hã 'madâ'â pese, dasina damro wa, da'uzazé hã te te dame sima 'manherẽ õ wa, ihâi wẽ hã.

¹² Tawamhã ãne te sadanha, apito hã: “Ĩsiwaihu, e niha bâ ma we tane ré asé, dasina damro wa, da'uzazé hã we dame asima sẽrẽ ãna.” — Tawamhã aibâ hã te ari'iwi za, niha te te tãma nharĩ waihu'u õ wa asa hã, te te duré tãma ãma upai wa.

¹³ Tawamhã apito hã ma tô ãne tãma iromhuri'wa norĩ ma nharĩ za'ra: “Ma'ãpé, ã hã aibâ hã asiwi âri aba, asiwi pawasisi aba da, duré asiwi hiwasisi aba da, rob u asiwi mei wa'aba da, robra u. Tawamhã tame te za oto sina tiwawa, sina pẽ'ẽzé wa. Te za duré 'wasitete, te te oto robzépata za'ẽtẽ wa.” Ãne ma tô apito hã tãma waihu'u za'ra.

¹⁴ Tawamhã Zezusi hã ma tô ãne na timreme na 'rãsutu: — 'Re ihâimana u'âsi mono hã da'ahâ uptabi na dazô 're hârâ mono nherẽ, da'umro na si te za da'ãma 're sib'a'uwẽ.

Rob'uiprazé, danhib'apito ma, da te 're i'arĩ za'ra mono zé wasu'u

¹⁵ Tawamhã farizeu norĩ hã ma tô ai'aba'ré Zezusihi nhiti, si'rã'õtõ da, a'â. Si'rã'õtõ wamhã, ma tô sima ãma roti za'ra, Zezusi hã te te siwi pibu da, tinhimirowasu'u na te te tãma ãma upa za'ra zô, te te tãma ãma upa za'ra wa, da te dasiwi wẽ'õ da, duré da te dasiwi âri da.

¹⁶ Tawamhã Zezusihi u ma tô 'mazatõrĩ za'ra, tizadawa zapari'wa norĩ hã, duré apito Erodihi nhimiroti wẽ 'wa norĩ zama hã, ma tô siwi 'mazatõrĩ za'ra. Tawamhã Zezusihi u sihutu wamhã, ãne te siwi sadanha: — Rowahutu'wa, asadawa nhipese õ na 're aihâimana mono zém na hã wa tô aiwaihu'u za'ra ni. Tô sena na te iwẽ na si dama 're irowasu'u u'âsi mo, 'Re ihâimana u'âsi mono nhimiroti zarina si. Asimiroti hã da te dasiwi 're wẽ'õ za'ra mono nherẽ, te tô õhõ na si dama 're i'aroti u'âsi mo. Duré ni'wam norĩ hã dama pire na 're hâimana za'ra mono nherẽ, aimawi hã aima 're hâimana mono õ di. Aiwapsi te 're dahâimana za'ra, aima hã.

¹⁷ Tahawa, wa za oto wa norĩ hã wasiwi asadanharĩ za'ra ni, ãne. E Roma ãma danhib'apito uptabi ma, wa za rob'uiprazé hã wa te tãma 're arĩ za'ra, isimiwada'uri zarina. E 'Re ihâimana u'âsi mono ma, wẽ di, ãne hã. E tãma wẽ õ di. Ma'ãpé wama waihu'u za'ra na asimirosa'rada hã, wa te waihu'u za'ra da.

¹⁸ Tawamhã tinhimirosa'rata wasété zarina te te sima ãma iroti za'ra zé hã ma tô sina waihu'u, Zezusi hã. Tahawa, ma ãne tizadawa na ãma tãma wa'rãmi za'ra: — A norĩ wa'wa hã te asadawa nhipese na 're aihâimana za'ra wa'aba mo. E marĩ da, te ãne na asiwi ĩzadanharĩ 'wa, ĩmreme na te ãma aima upa za'ra wa'aba wa, asiwi ĩwẽ'õ za'ra wa'aba da.

¹⁹ Tane wamhã, ma'ãpé rob'uiprazé isapotore hã we ĩma 'mai'âri aba, te 'madâ'â da, romanu norĩ nhib'apito ma, da te tãma 're i'arĩ za'ra mono zéb da si, rob'uiprazé isapotore 're ihâimana mono hã. Tawamhã ãne wa, ma te nima hawi rob'uiprazé isapotore hã tãma 'mai'ãwisi ni.

²⁰ Tawamhã Zezusi hã te te 'madâ'â wamhã, te oto sadanharĩ za'ra, ãne: — E 'wai hâibarĩ, rob'uiprazé isapotore na hã. E 'wa sisi ui'éré duré, ãma hã.

²¹ Tawamhã asa ma te ãma sada'âbâ za'ra, ãne: — Ã hã, Roma ãma danhib'apito hâibarĩ, duré taha nhisi ui'éré, ãhã. Tawamhã Zezusi hã ma duré tãma waihu'u za'ra, ãne: — Tahawa, Roma ãma danhib'apito ma, te za isimiwada'uri zarina, marĩ hã tãma 're ipo'o za'ra wa'aba mo apâ, ite wa. Tane duré, 'Re ihâimana u'âsi mono ma, te za marĩ hã isimiwada'uri zarina si tãma 're isõmri za'ra wa'aba mo apâ, ite wa, marĩ mono hã.

²² Tawamhã farizeu norĩ zadawa zapari'wa norĩ hã ãne na te te wapari za'ra wamhã, ma tô ãma titob'uzu za'ra. Tawamhã Zezusihi ãma, marĩ te te 'manharĩ za'ra ãna, ma tô ihawi apâ hã ai'aba'ré.

Dahâiwa'utuzém na, Zezusi da te dasiwi isadanharĩzé wasu'u

²³ Tawamhã saduseu norĩ hã ma duré itẽme aihutu Zezusihi u, te te siwi sadanharĩ da, tinhimirowasu'u na te te tãma ãma upa za'ra zô. Ta norĩ hã 're dadâ'â za'ra mono wamhã, ab're hawi apâ 're idahâiwa'utu za'ra mono õ na te te dama 're iroti za'ra mono.

²⁴ Tawamhã Zezusihi u simasa wamhã, te tãma nharĩ za'ra, ãne: — Rowahutu'wa, duréihã wahi'rada Mozési hã ma tô ãne dama rob'ui'éré, 'Re ihâimana u'âsi mono nhimiroti na: “Aibâ hã 'ra õ ré, 're dâ'â za'ra mono wamhã, te za ino hã ãma 're mro za'ra, tizédé'aba mro na, 're 'ra za'ra mono da, iwasu'u hã si'utõrĩ tõ da, isédé'aba wasu'u hã.” Ãne na Mozésihi nhimi'ui'éré hã, wahi'rata norĩ ma hã.

²⁵ Tawamhã Zezusihi ma, te duré rowasu'u za'ra, ãne: — Ni'wam norĩ sisãnawã si 're ihâimana za'ra mono norĩ wasu'u hã wa za oto aima wasu'u za'ra ni. Ta norĩ wasu'u hã wa te waihu'u za'ra da, wa za ãma wasiwi asadanharĩ ni za. Ni'wam norĩ sisãnawã si hã ma tô aré wasiré 're si'ubumro, wasiré zudeu norĩ hã 7 na ihâiba za'ra, aibâ norĩ hã. Tawamhã ipoto'rada hã ma tô timro. Mro nherẽ, ti'ra hã sisõ'a ré te te 'maipoto õ ré, ma tô dârâ. Tahawa, i'uirĩ na hã ma tô duré isõsi hã ãma timro tizédé'aba mro na, Mozésihi nhimi'ui'éré zarina.

²⁶ Tane nherẽ tawamhã isõsibi zama hã ma tô dârâ, 'ra õ ré. Tahawa, ma tô duré taha nhosi hã ãma timro, tizédé'aba mro na. Tawamhã taha zama hã ma tô duré dârâ, ti'ra hã sisa'u te te 'maipoto õ ré. Ãne zarina ma tô aré sidâpâsi sisõwa're'remhã nasi ãma timro za'ra pi'õi ãma hã. Tane nherẽ ma te uburé sisarina za'ra hã ai'utõ iwa 'masipoto õ ré.

²⁷ Tawamhã pi'õ zama ma tô duré oto dârâ, timro norĩ zarina hã.

²⁸ Aibâ norĩ hã 7 na ihâiba za'ra na ma tô pi'õi ãma hã siparabâsi nasi ãma timro za'ra. Ãne ma tô ta norĩ ma hã tãma tiromhâimana za'ra. Tawamhã e 'wai mro uptabi za bété pi'õ hã, ab're hawi 're dahâiwa'utu za'ra mono wamhã.

²⁹ Tawamhã Zezusi hã asa te tãma nharĩ za'ra, ãne: — Ab're hawi apâ 're idahâiwa'utu za'ra mono zé wasu'u na, 'Re ihâimana u'âsi mono nhimiroti 'rata na rob'ui'éré hã aima iwaihu'u za'ra wa'aba õ zarina, ma tô ãma i'upa za'ra wa'wa, asimirosa'rata aba na hã. 'Re ihâimana u'âsi mono, tiwaihu'u pese na te te 're ida'ahâiwa'utu mono zé wasu'u na zama, aima iwaihu'u za'ra wa'aba õ zarina, ma tô asimirosa'rata na ãma i'upa za'ra wa'wa.

³⁰ 'Re ihâimana u'âsi mono hã ab're hawi apâ te te 're da'ahâiwa'utu mono wamhã, hâiwa ãma romhuri'wa norĩ ne, te za oto 're dahâimana u'âsi za'ra, dasina 're damro zahu za'ra mono ãna.

³¹ 'Re ihâimana u'âsi mono hã ab're hawi te te 're ida'ahâiwa'utu mono zém na, a norĩ wa'wa hã 're saze za'ra wa'aba mono õ di. E 're sõré za'ra wa'aba mono õ di bété, duréihã 'Re ihâimana u'âsi mono mreme na rob'ui'éré hã, wahi'rada Mozésihi ma, isiwasu'uzé hã, ãne na hã:

³² “Wa hã Abra'ãhã nhib'apito, wa 're ĩhâimana u'âsi, duré Izaquihi nhib'apito, duré Zacoho nhib'apito.” Ãne ma tô 'Re ihâimana u'âsi mono hã Abra'ã norĩ uirĩ na nherẽ, Mozésihi ma, siwaihu'u. Wahi'rata norĩ hã dawi 're dâ'â za'ra mono nherẽ, 'Re ihâimana u'âsi mono wi, 're dâ'â za'ra mono õ di. Tahawa, ma tô Isib'apito za'ra na siwasu'u. Dâ'â u'âsi 're hâimana za'ra mono 'wa'âhã, Isib'apito za'ra na aré siwasu'u õ di.

³³ Tawamhã ãne hã da'ahâ uptabi na da te wapari za'ra wa, ma tô ãma tatob'uzu za'ra ni, isimirowasu'u na hã.

'Re ihâimana u'âsi mono nhimiroti ipire uptabi wasu'u

³⁴ Ãne na Zezusi hã te te tãma rowasu'u za'ra wamhã, ari'iwi te oto aimasa, saduseu norĩ hã, niha te te ãma sada'âbâ waihu'u za'ra õ wa, waihu'u pese uptabi wa, Zezusi hã. Tawamhã farizeu norĩ hã ãne na te te wapari za'ra wamhã, ma tô sitẽme ubumro a'â, Zezusihi u siré si'aba'ré da.

³⁵ Tawamhã 'Re ihâimana u'âsi mono nhimiroti 'rata na dama rowahutu'wa hã tô farizeu norĩ siré hã ma tô Zezusi hã sadanha, te te tãma ãma upa zô, te te pibu da, ãne:

³⁶ — Rowahutu'wa, e ma hã bété, danhipai u ipire uptabi hã, 'Re ihâimana u'âsi mono nhimiroti na Mozési te te ãma irob'ui'éré hã, ibaihâ na hã.

³⁷ Tawamhã Zezusi hã asa te tãma tinha, ãne: — 'Re ihâimana u'âsi mono nhimiroti, danhipai u ipire uptabi hã, ãne: “'Re ihâimana u'âsi mono hã, Asib'apito za'ra wa'wa hã 're morĩ wa, te za asiwi 're isawi pese za'ra wa'aba mo, sena na. Taha zarina, te za isimiroti na ãma 're irosa'rata u'âsi za'ra wa'aba mo. Taha zarina, te za duré asimi'ẽ na tãma 're iromhuri u'âsi za'ra wa'aba mo.”

³⁸ Ãne 'Re ihâimana u'âsi mono nhimiroti, danhipai u ipire uptabi wasu'u hã.

³⁹ Duré 'Re ihâimana u'âsi mono nhimiroti amo hã, aiwa ipire uptabi hã, ãne: “Te za 're idazawi pese za'ra wa'aba mo, uburé. Marĩ iwẽ zô asima 're asõpré wa'aba mono ne, te za duré uburé dama zama sô 're asõpré wa'aba mo, iwẽ zô.” Ãne isimiroti amo hã ipire uptabi hã, Mozési te te ãma irob'ui'érézé hã.

⁴⁰ Ã norĩ si, 'Re ihâimana u'âsi mono nhimiroti ma, pire uptabi zahuré di. Uburé 'Re ihâimana u'âsi mono nhimiroti na Mozési te te ãma i'arob'ui'éré mono hã duré isadawa 'mahârâ'wa norĩ zama te te ãma 're irob'ui'éré za'ra mono zé hã, e marĩ te ãma wasu'u za'ra, ã norĩ hã. Tô õ norĩ na si te ãma rowasu'u za'ra, 'Re ihâimana u'âsi mono, da te dasiwi 're isawi pese za'ra mono zéb da hã, duré 're idasisawi pese za'ra mono zéb da hã.

Danho'reptui'wa na Zezusi te te ida'azadanharĩzé wasu'u

⁴¹ Tawamhã farizeu norĩ hã zahadu siré hâimana za'ra ré, te Zezusi hã sadanharĩ za'ra, ãne:

⁴² — E niha asimirosa'rata za'ra wa'wa hã Danho'reptui'wa da, 'Re ihâimana u'âsi mono te te ipisudu, we datẽme imorĩ na hã. E 'wa sihudu na ma bété a norĩ wa'wa hã asiwi iwaihu'u za 'wa. Tawamhã asa ma te ãne ãma sada'âbâ za'ra, farizeu norĩ hã: — Apito Dawihi nhihudu te za, u, 're mo.

⁴³ Tawamhã Zezusi te duré tãma nharĩ za'ra, ãne: — Tane wamhã, ma'ãpé ãma rosa'rata pese za'ra wa'aba, ãne na hã. Duréihã apito Dawi hã ma tô tinhib'apito na sisi, Danho'reptui'wa da, 'Re ihâimana u'âsi mono te te ipisudu hã. 'Re ihâimana u'âsi mono pẽ'ẽzani nhimipawaptobzéb zarina, ma tô tinhib'apito na sisi. Oro Dawihi mreme wasu'u na rob'ui'éré hã, ãne hã nomro za:

⁴⁴ “'Re ihâimana u'âsi mono, ma tô Ĩnhib'apito ma tinha, ãne: ‘Ĩ'rata te za 're asãmra mo ĩnhimire niwĩ, dama aipire na ĩsiré 're aihâimana u'âsi mono da. Asitob'ru norĩ nhiptetezé hã wa za te tiwi 're a'uprosi, wapu na aima 're hâimana za'ra mono da oto, duré aima sib'uwa na 're hâimana za'ra mono da oto.’ Ãne ma tô tãma waihu'u.”

⁴⁵ Dawi hã tinhib'apito na te te sisi nherẽ, e niha te za isihudu si 're hâimana, Danho'reptui'wa da, 'Re ihâimana u'âsi mono te te ipisudu hã. Ma'ãpé ãma rosa'rata pese za'ra wa'aba, waihu'u za'ra wa'aba da.

⁴⁶ Tawamhã ni'wa ãne na hã te te ãma sada'âbâ waihu'u õ di, Zezusihi zada, 're isiwamnhasi za'ra mono norĩ hã. Tahawa, Zezusi hã timreme na te te tãma ãma upa za'ra zô, te te siwi sadanharĩ waihu'u õ di oto, te te sina hã mreme wazéb za'ra wa.