Mateu 20 - ꞌRe Ihâimana Uꞌâsi Mono Zadawa Wasuꞌu

Buru na romhuri'wa norĩ wasu'u

¹ Tawamhã Zezusi hã ma tô duré romnhimiré'é na tãma rowasu'u za'ra, tisiré 're inomro mono norĩ ma, ãne: — 'Re ihâimana u'âsi mono, da'ãma 're isib'a'uwẽ mono zém na, wa za duré aima ãma romnhimiré'é za'ra wa'wa, ãne. Aibâ hã buru tede'wa hã bâdâ 'rãiwatobro wi, ma tô mo, tãma iromhuri'wa norĩ da hã, te te da'a'maipisutu da, te te ãma tãma iromhuri za'ra da hã, uwa 'ru na.

² Tawamhã te te anhopẽtẽ wamhã, ma tô tãma pisutu za'ra, misi bâtâ na dapawa'âbâzéb uwaibaba te te ãma pawa'âbâ za'ra mono da. Taha wamhã, ma tô ãma saze za'ra, tãma iromhuri za'ra 'wa da hã. Tawamhã ma tô tãma rob'ru za'ra, misi bâtâ na te te romhuri za'ra da, rob're na, uwa 'ru na hã.

³ Tawamhã mararé ma tô duré mo, bâtâ si'ré na, 'ri nhi'riti wa, da te dasima 're irowede za'ra mono zéb u. Tame ma tô duré aibâ norĩ hã sõpẽtẽ za'ra, romhuri ãna taré da'rata isi'ubumro hã.

⁴ Tawamhã ãne ma tô tãma nharĩ za'ra: “A norĩ wa'wa hã te za oto ai'aba'réi wa'wa ĩburu u, uwa 'ru na dame romhuri za'ra wa'aba da. Tawamhã dapawa'âbâzéb uwaibaba, wa za duré aipawa'âbâ za'ra wa'wa.” Ãne ma tô duré buru tede'wa hã tãma pisutu za'ra.

⁵ — Tawamhã iburu u te oto ai'aba'ré, te te tãma romhuri za'ra da. Tawamhã abzuma ma tô duré aibâ norĩ hã sõpẽtẽ za'ra, buru tede'wa hã. Tahawa, te duré satõrĩ za'ra, iburu na te te dame romhuri za'ra da. Bâdâ sipra wi, ma duré sõpẽtẽ za'ra aibâ norĩ hã, aimawi hã. Tawamhã tô õhõ si romhuri hã ma duré tãma pisutu za'ra. Taha wamhã, ta norĩ hã te duré oto dazarina ai'aba'ré.

⁶ Tawamhã hâiwahâ pesere te duré mo buru tede'wa hã, 'ri nhi'riti wa, da te dasima 're irowede za'ra mono zéb u. Tawamhã aibâ norĩ hã ma duré sõpẽtẽ za'ra aimawi hã, romhuri ãna taré da'rata isi'ubumro hã. Te te sõpẽtẽ za'ra wamhã, ãne te sadanharĩ za'ra: “E marĩ wa, te taré asimroi wa'wa, bâtâ bâ, marĩ hã dame 'manharĩ za'ra wa'aba ãna.”

⁷ — Tawamhã asa te tãma nharĩ za'ra, ãne: “Ni'wa hã marĩ hã te te wama pisutu za'ra õ di, wa te tãma i'manharĩ za'ra zéb da hã. Tahawa, marĩ na hã wa te dame romhuri za'ra õ di, ã bâtâ na hã.” — Tawamhã buru tede'wa te duré tãma rob'ru za'ra: “Mo oto a norĩ wa'aba zama dazarina ai'aba'réi wa'aba, ĩburu na dame romhuri za'ra wa'aba da, uwa 'ru na.” Ãne ma tô buru tede'wa hã satõrĩ za'ra.

⁸ — Tawamhã mara simei wamhã, tãma iromhuri'wa norĩ 'madâ'â'wai ma, te tinha ãne, buru tede'wa hã: “Ma'ãpé, uburé ĩma romhuri'wa norĩ zô aihârâ za'ra na, pawa'âbâ za'ra da oto. Tawamhã daza'u romhuri na te te isãna'rata za'ra norĩ, uimrehẽne te za ipawa'âbâ na'rata za'ra. Taha parip si te za duré romhuri na isãna'rata'wa norĩ hã ipawa'âbâ za'ra.” Ãne ma tô tãma waihu'u, buru tede'wa hã.

⁹ — Tawamhã hâiwahâ pesere, romhuri na te te isãna'rata za'ra hã ma tô rob'uiprazé hã waibu hâiba mono bâ, misi bâtâ na dapawa'âbâzéb uwaibaba, bâtâ bâ te te romhuri za'ra õ nherẽ.

^10-11 Tawamhã dawana romhuri na te te isãna'rata za'ra norĩ hã ma tô duré hâiba mono bâ waibu rob'uiprazé hã, aiwapsi. Tane nherẽ, te te waibui wamhã, ma tô tãma nharĩ za'ra, buru tede'wai ma, isa'u romhuri na te te isãna'rata za'ra norĩ pawa'âbâ nhipai u, te te waibui õ wa.

¹² Ãne te mreme nhiti'ru na tãma nharĩ za'ra: “Õ norĩ hã hâiwahâ si romhuri na te te isãna'rata za'ra hã misi bâtâ za'ratazé hã ma tô sina uprosi za'ra. Wa norĩ hã bété. Bâtâ bâ, wa te iromhuri za'ra hã, rowa'ro uptabi nherẽ. E niha bâ, ma bété õ norĩ zama tipawa'â hã waibu, aiwa wapawa'â, wa te iwaibu za'ra ne.”

¹³ Tawamhã aibâ norĩ siré ma, te misi tinha, buru tede'wa hã: “Ĩsiwaihu, ĩwapari pese. Wa hã te aima 'manharĩ wasété õ di, ãne hã. Oro ãma ĩzaze za, bâtâ bâre ĩma romhuri da, tô misi bâtâ na dapawa'âbâzéb uwaibaba te aipawa'âbâ da.

¹⁴ Ma tô dame asima i'âri pa. Tahawa, te za oto aimo. Wa tô ĩsima wẽ, aiwa aipawa'âbâ za'ra wa'aba ne te pawa'âbâ za'ra da, asa'u wa'aba romhuri na te te isãna'rata za'ra norĩ hã.

¹⁵ Te ĩsima iwẽzéb zarina, ĩte rob'uiprazém na te da'apawa'âbâ wamhã, e ĩwasédé wa tô 'manha. Mare di. Ĩwasédé hã te 'manharĩ õ di. Ãté taré dama ĩnhopru wa, ma tô ĩzada asahi, bâtâ bâ te te ĩma romhuri za'ra õ nherẽ, bâtâ na dapawa'âbâzém na te pawa'âbâ za'ra 'ru te.” Ãne ma tô buru tede'wa hã tãma siwaihu'u, tãma iromhuri'wai ma.

¹⁶ Tawamhã ãne ma tô Zezusi hã timreme na tãma 'rãsutu za'ra: — Ni'wam norĩ hã dama pire na ti'ab ré 're hâimana za'ra mono nherẽ, 'Re ihâimana u'âsi mono si te za te te tãma 're pisutu za'ra, wapu na 're hâimana za'ra mono da oto, za da'ãma 're isib'a'uwẽ mono zéb ãma hã. Duré ni'wam norĩ hã ti'ab ré dama wapu na 're hâimana za'ra mono nherẽ, te za te te tãma 're pisutu za'ra, pire na oto 're hâimana za'ra mono da.

Zezusi hã, si'ubdatõ ãma za idâ'âzém na isiwasu'uzé, ihâiwa'utuzé me

¹⁷ Tawamhã Zezusihi siré 're inomro mono norĩ hã te oto Zeruzalẽ u isiré ai'aba'ré. Si'aba'réi ré, ma tô hâiba pisutu, tãma rowasu'u za'ra, tisiré 're inomro mono norĩ ma, 12 na ihâiba za'ra ma. Ãne te tãma rowasu'u za'ra, Zezusi hã:

¹⁸ — Ĩwapari pese za'ra wa'aba. Ãhã na, wa Zeruzalẽ u ai'aba'ré ni. Tame te za Dasiré Ipodo hã dasima hâiba nhomri ni, sasedoti ipire norĩ ma, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ ma zama. Ta norĩ hã iwasédé te te ãma isa'ra za'ra zéb zarina, te za dama 'ru za'ra, da te iwĩrĩ da, dasiwi.

¹⁹ Taha zarina te za oto zudeu'õ norĩ ma siwi hâiba nho. Tawamhã te za ãma tiwa'ẽ za'ra, zudeu'õ norĩ hã. Te za ãma wasété za'ra ni duré. Te za duré da te dasiwi 're pré'é. Taha parip si, te za wedepo'o nhonhi'rãmi na dasiwi sasõmri ni hâiwi, dâ'â da. Tane nherẽ, bâdâ maparane ãma si'utõrĩ õ ré, te za apâ hâiwa'udu.

Zebedehe mro, Zezusihi wi, te te irowaptẽrẽzé wasu'u, ti'ra norĩ ma

²⁰ Tawamhã Zebedehe mro hã ma tô Zezusihi u mo, ti'ra si'aibâ norĩ siré. Itẽme morĩ wamhã, tãma pire wa, ma tô tãma aiwẽ'ẽ, ti'ra norĩ ma, te te tiwi rowaptẽrẽ da.

²¹ Tawamhã Zezusi hã te pi'õ sadanha, ãne: — E marĩ ma tô asima ĩwẽ, te aima ãma i'uwaimrami da hã. Tawamhã pi'õ te asa tãma tinha: — Ma'ãpé, ĩ'ra norĩ ma, ropisutu siromo zahuré na, danhib'apito simasisizém na asimire niwĩ duré asimi'e niwĩ dama pire na 're simasisi u'âsi zahuré mono da, za 'Re ihâimana u'âsi mono hã da'ãma isib'a'uwẽzéb ãma hã.

²² Tawamhã Zezusi hã te i'ra norĩ ma oto rowasu'u zahuré, ãne: — E marĩ da, te rosa'rata ãna asina ĩzadanharĩ 'wa. Wa hã wa za robzépata za'ẽtẽ, dawi ĩsisawi ãna. E tawamhã sada asiptete aba di, za te irobzépata za'ẽtẽ ne, irobzépata aba da hã. Tawamhã asa te tãma nharĩ zahuré, Zebedehe 'ra norĩ hã: — Ĩhe. Sada wanhiptete di za, asine wa te irobzépata da hã.

²³ Tawamhã Zezusi hã te duré tãma rowasu'u zahuré, ãne: — Te za tô ĩsine irobzépata za'ẽtẽ 'wa. Tane nherẽ, ĩsi'uihâ na te aipisutu waihu'u aba õ di za, dama aipire wa'aba na 're aihâimana aba mono zéb da hã, ĩnhimire niwĩ, duré ĩnhimi'e niwĩmhã. Ĩmama te te ipisutu za'ra norĩ si te za dama pire na ĩ'rata 're hâimana u'âsi za'ra. Ta norĩ hã te pisutu za'ra õ di za, wa hã.

²⁴ Tawamhã Zezusihi siré 're inomro mono norĩ hã 10 na ihâiba za'ra hã, Zebedehe 'ra norĩ mreme te te wapari za'ra wamhã, ma tô sada tinhiti'ru za'ra.

²⁵ Tahawa, Zezusi hã te sima sô tihârâ za'ra, tisiré 're inomro mono norĩ zô. Tawamhã ãne te tãma nharĩ za'ra: — Ti'ai ãma danhib'apito norĩ hã te pire uptabi na dama 're hâimana za'ra. Sa'ẽtẽ te duré te te 're dawada'uri za'ra, isimiroti hã da te 're 'madâ'â pese za'ra mono da.

²⁶ Tane asima 're aihâimana za'ra wa'aba mono õ di za, a norĩ wa'wa hã. Asiré norĩ ma, ai'maipire wa'aba da, asina 're 'mairob'ruiwapari aba mono wamhã, te za asiré hã 're i'maipawaptob u'âsi aba mo, marĩ zô 're ai'manhimnhasi aba mono ãna.

²⁷ Duré 'râwi asima aipire uptabi na 're ai'maihâimana aba mono da, asima 'maiwẽ uptabi aba wamhã, pawa'âbâ ãna romhuri'wa ne, te za asima 're i'mairomhuri wẽ wa'aba mo.

²⁸ Tane duré, ti'ai ãma Dasiré Ipodo hã da te tãma 're romhuri za'ra mono da, we morĩ õ di, ti'ai u. Te te 're da'apawapto mono da si, te we datẽme mo, sihâiba zawi ãna dazada dâ'â da, da'upana te te da'awa'âbâ da.

Zezusi hã, itob'a norĩ te te ipese zahuré zé wasu'u

²⁹ Tawamhã Zezusihi siré 're inomro mono norĩ hã ma tô isiré ai'aba'ré, Zerico hawi. Si'aba'réi wamhã, da'ahâ na ma tô isarina za'ra ai'aba'ré ni.

³⁰ Tawamhã aibâ itob'a norĩ hã bâdâdi waptoma isimasisi zahuré hã ma tô Zezusihi wasu'u hã wapari zahuré, bâdâdi na isababa za te te iro'razâri zahuré na hã. Ãne hã te te wapari zahuré wamhã, te nasi sina 'mahârâ zahuré, ãne: — Dawihi nhihudu, ma'ãpé wa'ãma aipẽ'ẽzé na.

³¹ Tawamhã da'ahâ na Zezusihi zarina idasi'aba'ré norĩ hã ma tô tãma nharĩ za'ra, ari'iwi simasisi zahuré da. Tane nherẽ, sa'ẽtẽ te nasi sina 'mahârâ zahuré, ãne: — Apito, Dawihi nhihudu, ma'ãpé wa'ãma aipẽ'ẽzé na.

³² Tawamhã ma Zezusi hã i'rata mazazâri zahuré, bâdâdi wa. Tahawa, te 'mahârâ zahuré, itob'a norĩ hã: — E marĩ te asima iwẽ wa'wa, te aima i'manharĩ aba da hã.

³³ — Apito, wato pese da, wa wasima wẽ ni. — Ãne ma tizadawa na tãma wa'rãmi zahuré, itob'a norĩ hã.

³⁴ Tawamhã Zezusi hã ma tô ãma tipẽ'ẽzé zahuré, itob'a norĩ ãma. Tahawa, ma tô tõmo upi zahuré, apâ tõmo wẽ zahuré da. Te te tõmo upi zahuré wi, awa'awi ma tô tito pese zahuré. Te te rob'madâ'â wẽ zahuré di oto. Tawamhã Zezusihi zarina te oto tineb zahuré, awa'awi.