Mateu 18 - ꞌRe Ihâimana Uꞌâsi Mono Zadawa Wasuꞌu

Danhipai u dama ipire na Zezusi hã te te irowasu'uzé wasu'u

¹ Tawamhã Zezusihi siré 're inomro mono norĩ hã ma tô itẽme ubumro, te te siwi sadanharĩ da, ãne: — E 'wa hã 'Re ihâimana u'âsi mono nhib'a'uwẽ, siré 're ihâimana za'ra mono norĩ hã danhipai u dama ipire.

² Tawamhã Zezusi hã ma tô ai'uté hã 'mahâ, isiré 're inomro mono norĩ wa'wa, te te sãrĩ da.

³ Tawamhã te tãma nharĩ za'ra oto, ãne: — Tô sena, wa aima waihu'u za'ra wa'wa. Aihâimanazém na saprĩ za'ra wa'aba õ wamhã, 'Re ihâimana u'âsi mono hã ai'ãma 're sib'a'uwẽ za'ra wa'aba mono õ di za. Dama iwapu na ai'uté hâimanazém ne 're aihâimana za'ra wa'aba mono wapsi, te za ai'ãma 're sib'a'uwẽ za'ra wa'wa.

⁴ Ni'wam norĩ hã ã ai'uté ne tipire na 'râwi 're si'madâ'â za'ra mono õ wapsi, te za pire na 're hâimana u'âsi za'ra, 'Re ihâimana u'âsi mono, da'ãma 're isib'a'uwẽ mono zéb ãma hã.

⁵ Duré ni'wam norĩ hã te te 're ĩzawi pese za'ra mono wa, ai'uté zô 're tob'uzu za'ra mono wamhã, ta norĩ u'âbâ te duré ĩzô hã 're tob'uzu za'ra.

Dawasédé, da te 're i'manharĩ za'ra mono õ zé wasu'u

⁶ — Ãhãta ai'uté norĩ te asimro. Ãté ni'wa hã te za tinhimiroti wasété na ãma ropé, ai'uté norĩ ãma, te te sina 're ĩ'umnhasi za'ra mono norĩ ãma. Tawamhã isimiroti wasété hawi, ai'uté te te ĩ'mairẽme wamhã, tãma ropipa uptabi di za, tãma iroti wasété 'wai ma hã, 'Re ihâimana u'âsi mono, za te te azâri wa. Ibutu na ẽtẽ tõmo wawẽ, da te ãma wasisi pari, dâ'â da, âi ba da te mei 'wa'âhã, tãma ropipa di aré. Tane nherẽ, isimiroti wasété zarina ai'uté te te ĩrẽme wamhã, tãma ropipa uptabi di za, roti wasété'wai ma hã.

⁷ Danhimiroti wasété hawi 're dasi'marõpãrĩ u'âsi za'ra mono wa, taha wa, dama 're ropipa uptabi za'ra mono di za, daro mono bâ. Te za tô da te 're ĩrẽme za'ra. Tane nherẽ, tinhimiroti wasété hawi te te 're ida'marõpãrĩ za'ra mono norĩ ma si, danhipai u tãma 're ropipa uptabi za'ra mono di za.

⁸ — Asib'rata na aiwasédé hã 're waibui wa'aba mono wamhã, duré aipara na aiwasédé hã 're waibui wa'aba mono wamhã, te za asiwi 're isihâri za'ra wa'aba mo, 're sãmra aba mono da. Asib'rada asiwi 're isihâri za'ra wa'aba mono wam ne, duré aipara hã asiwi 're isihâri za'ra wa'aba mono wam ne, te za oto misire ré si ne, hâiwa u 're anomro aba mo, 're asimroi u'âsi aba mono da oto, tame. Tawapsi aima 're rowẽ uptabi za'ra wa'aba mono di za. Tane nherẽ, asib'rata zahuré ré, duré aipara zahuré ré, unhama u'âsi u 'Re ihâimana u'âsi mono te te 're asãmra aba mono wamhã, aima hã 're ropipa uptabi za'ra wa'aba mono di za.

⁹ Duré atõmo na marĩ 're 'madâ'â za'ra wa'aba mono wa, aiwasété na 're asi'marõpãrĩ za'ra wa'aba mono wamhã, ato hã te za asiwi 're isani za'ra wa'aba mo, 're sãmra aba mono da. Tawamhã ato hã asiwi 're isani za'ra wa'aba mono wam ne, te za atõmo misire ré si ne, 're asisisi aba mo, hâiwa u, 're ai'ubumroi u'âsi aba mono da, tame. Tawapsi aima hã 're rowẽ uptabi za'ra wa'aba mono di za. Tane nherẽ, atõmo zahuré ré ropipa u unhama u'âsi u, 'Re ihâimana u'âsi mono te te 're asãmra aba mono wamhã, aima 're ropipa uptabi za'ra wa'aba mono di za.

Pone'ẽrebâire isimanizé wasu'u

^10-11 — Ãhãta ai'uté norĩ hã te asimro. Ãma 're rosa'rata wasété za'ra wa'aba mono tõ, dama iwapu newa. Tô sena, wa aima rowasu'u za'ra wa'wa. Hâiwa ãma 'Re ihâimana u'âsi mono ma romhuri'wa norĩ hã te ai'uté mono bâ te te 're 'madâ'â pese za'ra, misi si, tite mono bâ. Ta norĩ hã te Ĩmama nho'a te te 're 'madâ'â pese za'ra, hâiwa ãma 're isãmra mono nho'a.

¹² — Wa za oto aima ãma romnhimiré'é za'ra wa'wa. Aibâ hã pone'ẽrebâ 100 na isimizama hâiba hã misi tiwi 'masimani wamhã, e sô rĩtĩ mono õ di za bété. Te za tô sô 're rĩtĩ. Pone'ẽrebâire hã te za a'â rẽme za'ra 99 na ihâiba hã. Isa'u rom na tisa te te 're huri mono ré, te za sô rĩtĩ, tiwi isimani zô hã.

¹³ Tawamhã te te sãmri wẽ te, te za 're to, pone'ẽrebâ tede'wa hã. Pone'ẽrebâ hã isimani'õ norĩ hã rowẽ u'âsi tãma 're hâimana za'ra mono wa, tãma 're irowẽ mono zém nhipai u, te za 're to za'ẽtẽ.

¹⁴ Tane, ã ai'uté norĩ hã Aimama aba wi, 're isimani za'ra mono da hã sô 're simipari mono õ di, tãma wẽ õ wa.

Dasiré isazei'wa nherẽ, dasiwi 're idawasété za'ra mono zé wasu'u

¹⁵ — Asisãnawã, asiré isazei'wa nherẽ, asada 're wasété za'ra wa'aba mono wamhã, te za aihâiba pisutu itẽmemhã 're anomro aba mo, asada 're iwasété za'ra wa'aba mono zém na tãma asina 're rowaihu'u za'ra wa'aba mono da. Tawamhã tãma 're asiwaihu'u za'ra wa'aba mono zé hã te te 're wapari za'ra mono wamhã, te za apâ asina 're asisãnawã za'ra wa'aba mo.

¹⁶ Tane nherẽ, te te 're aiwapari za'ra wa'aba mono õ wamhã, te za oto asiré isazei'wa hã misi, niha wamhã duré maparane asiré 're isimroi wa'aba mo, asada 're iwasété za'ra wa'aba mono u, isõ'a zahuré oto tãma 're asiwaihu'u za'ra wa'aba mono da. Duréihã 'Re ihâimana u'âsi mono nhimiroti na rob'ui'éré hã ãma 're uwaimrami za'ra wa'aba mono da, te za ãne asima 're i'manharĩ za'ra wa'aba mo. Ãne isimiroti na rob'ui'éré hã: “Ni'wam norĩ zada 're dawasété za'ra mono wamhã, te za dahâiba maparane nho'a dama 're siwaihu'u za'ra, iwapari'wa norĩ hã danho'a te te ãma 're mreme waptob za'ra mono da.” Ãne duréihã 'Re ihâimana u'âsi mono nhimiroti na rob'ui'éré hã, ibaihâ na hã.

¹⁷ Tawamhã asiré isazei'wa norĩ nho'a tãma 're roti za'ra wa'aba mono nherẽ, te te 're aiwapari za'ra wa'aba mono õ wamhã, te za oto uburé asiré isazei'wa norĩ ma 're irowasu'u za'ra wa'aba mo, asada 're iwasété za'ra wa'aba mono zém na hã. Tawamhã uburé asiré isazei'wa norĩ hã te te 're wapari za'ra mono õ wamhã, isazei'õ'wa hâimanazém ne ihâimana na hã, te za oto ãma 're irosa'rata za'ra wa'aba mo, ta hã tiwasété na 're siwaihu'u za'ra mono õ wa oto.

¹⁸ — Tô sena wa aima waihu'u za'ra wa'wa. Uburé marĩ hã da te 're 'manharĩ tõ za'ra mono da, dawi 're isawi za'ra wa'aba mono na hã te za 'Re ihâimana u'âsi mono hã te te ãma 're asaze za'ra wa'wa, hâiwa ãma. Duré uburé marĩ hã dawi 're isawi za'ra wa'aba mono õ na, te za duré te te ãma 're ai'uzei pese za'ra wa'wa.

¹⁹ — Ãne wa za duré tô sena aima waihu'u za'ra wa'wa. Ni'wam norĩ hã maparane na aihâiba nherẽ, marĩ na ti'ai ãma 're asisaze za'ra wa'aba mono wamhã, Ĩmama wi 're irowaptẽrẽ za'ra wa'aba mono zéb uwaibaba, te za tô te te aima ãma 're a'uwaimrami 'wa, hâiwa ãma 're isãmra mono hã.

²⁰ Ni'wam norĩ hã maparane ihâiba na, niha wamhã si'ubdatõ na ihâiba na, ĩzadawa para 're mreme zusi mono da, siré 're si'ubumroi mono wamhã, wa hã wa za duré tamemhã isiré 're ĩhâimana za'ra.

²¹ Tawamhã Pedru hã ma tô Zezusihi u ai'ré, te te sadanharĩ da. Ãne te taha wamhã sadanha: — Wanhib'apito, wasiré isazei'wa nherẽ, ĩzada 're iwasété u'âsi mono zé hã e mame isa'ratazém nhitõ ãma wa za ĩsina hã 'madâ'â zazâ, iwasédé te ĩsina i'madâ'â'õzém na hã za oto. E 7 ãma.

²² Tawamhã Zezusi te asa tãma tinha: — Mare di. 7 ãma asina 'madâ'â zazâri õ di za. Ãté 77 ãma si te za asina i'madâ'â zazâ za, iwasédé hã asina i'madâ'â'õzé hã.

²³ Ãne, wa za oto aima ãma romnhimiré'é za'ra wa'wa, 'Re ihâimana u'âsi mono, da'ãma 're isib'a'uwẽ mono zém na hã. Tawamhã ti'ai ãma danhib'apito hã ma tô rosa'rata, tite rob'uiprazé te te sa'rata da, isapari tãma rob'madâ'â'wa norĩ hã rob'uiprazé te te tiwi 're iwaptẽrẽ za'ra mono hã wahuré isõwa're're te te tãma 're sõmri za'ra mono zô.

²⁴ Tawamhã te te ãma sãna'rata wi, ma tô itẽme saprõni ni aibâ hã, isapari rob'madâ'â'wa hã. Ta hã ma tô rob'uiprazé hã tinhib'apito wi te te 're awaptẽrẽ, sa'ẽtẽ uptabi na. Sa'ẽtẽ uptabi wa, niwa isõwa're're te te tãma isõmri da hã waihu'u õ di.

²⁵ Tawamhã te te tãma sõmri waihu'u õ wa, ma tô isib'apito hã dama ti'ru, da te wede da, da te uipra da, imro zama, duré i'ra norĩ zama, pawa'âbâ ãna te te dama 're romhuri za'ra mono da oto. Uburé isibro hã da te dama wede za'ra da hã, ma tô duré dama ti'ru, rob'uiprazé te te tiwi 're i'awaptẽrẽ mono hã te te ãma wa'âbâ da.

²⁶ Tawamhã õ hã tô tãma rob'madâ'â'wa hã aré, ma tô hi'rãtitõ tãma aime ipapara, tinhib'apito ma. Tawamhã te tiwi waptẽ, ãne: “Apito, a'â asimi'ẽ na ĩzapari ze na. Zahadu wa za wa hã uburé aima wa'â.” Ãne ma tô tãma siwaihu'u, aibâ hã.

²⁷ — Tawamhã isib'apito hã ma tô ãma aiwamri, imreme na. Tahawa, ma tô tãma sisisi apâ, õne haré nomro da, te te tãma sõmri tõ da. Tahawa, te õne haré duré satõ oto, apâ morĩ da hã.

²⁸ Tawamhã ta hã aibâ te oto mo. Morĩ wamhã, ma tô tisiré romhuri'wa hã sõpẽtẽ. Taha wi, ma tô duréihã rob'uiprazé misi bâtâ na dapawa'âbâzé hã waptẽ suru na, apito hawi imorĩ wi. Tawamhã isõwa're're te te tãma sõmri õ wa, ma tô ti'â, ibutu na awa'awi. Ibutu na te te tété sina, ma tô tiwi waptẽ, ãne: “Ma'ãpé ãhã na ĩma sõmri, zahadu ĩma iwa'âbâ õ hã.” Ãne te tiwi waptẽ.

²⁹ — Tawamhã isiré romhuri'wa ma tô hi'rãtitõ nhamra ipapara, te te tiwi rowaptẽrẽ da, ãne: “Ma'ãpé, a'â ĩzapari ze na suru na. Wa za tô aima tisõ uburé, isõwa're'remhã.”

³⁰ — Tawamhã ãne te te tiwi waptẽrẽ nherẽ, te te ãma sazei õ di. Te te ãma sazei õ wa, ma tô dama ti'ru, da te sẽrẽ da, dazazéb 're. Rob'uiprazé hã te te tãma sõmri wapsi, te za dama ti'ru, apâ da te wazere da, dazazém hawimhã.

³¹ Tawamhã isiré rob'madâ'â'wa norĩ hã ma tô iwasu'u hã wapari za'ra, te te dama i'ru na hã da te sẽrẽ da, dazazéb 're. Te te wapari za'ra wamhã, ma tô sada tihâimana za'ra. Ma tô duré ai'aba'ré, tinhib'apito ma, te te siwi wasu'u da hã.

³² Tawamhã te te tãma wasu'u za'ra parimhã, ma tô isib'apito hã sô hâ, dazazéb 're danherẽ'wa zô. Sô hârâ wamhã, te ãne tãma tinha: “A hã romhuri'wa i'aiwasédé, ĩwi iwaptẽrẽzéb zarina hã wa tô po'reha'âri pese, rob'uiprazé ĩwi 're i'awaptẽrẽ mono zém na hã apâ ĩma sõmri õ nherẽ. Ã hã, wa hã te 'ruiwapari õ di.

³³ E niha bâ bété, ãma aipẽ'ẽzé õ di asiré romhuri'wai ãma hã, wa hã ai'ãma ĩpẽ'ẽzé ne.” Ãne te tãma tinha isib'apito hã, te te tãma 're irob'madâ'â mono ma hã.

³⁴ — Tawamhã isib'apito hã ma tô ab'rui pese. Sib'rui wa, ma tô dama ti'ru, dazazéb 're da te sẽrẽ da, da te tãma 're irob'manharĩ u'âsi za'ra mono zém na, tame te te 're robzépata mono da. Rob'uiprazé te te tiwi 're i'awaptẽrẽ mono nhowa're're tinhib'apito ma hã, te te tãma sõmri wapsi, te za apâ dasiwi wazere ni za.

³⁵ Tawamhã ãne ma tô timreme hã tãma 'rãsutu za'ra, Zezusi hã: — Ãne hã asiré isazei'wa hã asada 're iwasété za'ra wa'aba mono zém na sena na asina 're 'madâ'â zahâri za'ra wa'aba mono õ wamhã, te za Ĩmama hã te te aima 're rob'manharĩ wasété za'ra wa'wa aihâiba mono bâ wa'aba, hâiwa ãma 're isãmra mono hã.