Mateu 17 - ꞌRe Ihâimana Uꞌâsi Mono Zadawa Wasuꞌu

Ẽtẽ 'rãihâ ãma, Zezusihi hâiba na rowa'a za'ẽtẽ wasu'u

¹ Tawamhã 6 na bâdâ ãma si'utõrĩ pari, ma tô Zezusi hã Pedru norĩ, Tiagu, duré Zuwã isisãnawã norĩ me hã te te siré simro, ẽtẽ 'rãihâ u hã.

² Tawamhã tame si'ubumroi ré, ma tô Zezusi hã isõ'a za'ra aimawi tihâiba na hã saprĩ. Ma tô ti'uburã pese, bâtâ ro'o ne. Duré i'uza hã hâ zarob'a uptabi di, bâtâ ro te te 're irowa'a pese mono ne.

³ Tawamhã Pedru norĩ hã ma tô siwi 'madâ, Mozési norĩ hã Eliasihi me, Zezusihi me, te te sima irobzanhamri za'ra hã.

⁴ Tahawa Pedru te Zezusihi ma tinha, ãne: — Wanhib'apito, ãme wama rowẽ za'ra di. Aima wẽ wamhã, si'ubdatõ uridi hã wa za aima sõré wa'wa, aima hã, duré Mozésihi ma hã, duré Eliasihi ma hã.

⁵ Tawamhã ãne Pedru te te tãma nharĩ ré, ma tô hâiwa nhirõno hã we hâiba zuwa za'ra, Zezusi norĩ hã. Tawamhã hâiwa nhirõtõ zarob'a hawi, ma tô 'Re ihâimana u'âsi mono hã mre, ãne: — Ã hã ĩ'ra, te 're isawi pese mono. Tãma 're ĩto za'ẽtẽ mono di. Ma'ãpé isimiroti hã 're wapari pese za'ra wa'aba mono za.

⁶ Tawamhã Pedru norĩ, Zezusihi siré isi'aba'ré norĩ hã, 'Re ihâimana u'âsi mono mreme te te wapari za'ra wamhã, ma tô tãma tipahi pese za'ra. Tãma pahi pese za'ra wa, ma tô ti'ai wa rere, dumana na. Ti'ubu na ma tô duré ti'ai u hã roptob za'ra.

⁷ Tawamhã Zezusi hã ma tô itẽme ai'ré za'ra. Simi'wara ré, ma tô tinhib'rata na hã upi za'ra. Te te upi za'ra wamhã, te ãne tãma nharĩ za'ra: — Ma'ãpé aiwahutu za'ra wa'aba. Aipahi za'ra wa'aba tõ.

⁸ Tawamhã ma tô ti'rãiwahutu za'ra oto, te te rob'madâ'â za'ra da. Te te rob'madâ'â za'ra wamhã, Zezusihi si ma tô duré oto 'madâ'â za'ra.

⁹ Tawamhã ẽtẽ 'rãihâ hawi, ma tô si'ra za'ra, Zezusi norĩ hã. Si'aba'réi ré, ma tô Zezusi hã Pedru norĩ hã sadawa uwati za'ra, ãne: — Ẽtẽ 'rãihâ ãma i'madâ'â za'ra wa'wa hã dama wasu'u za'ra wa'aba õ di za a'â. Ti'ai ãma Dasiré Ipodo hã ab're hawi, Imama te te hâiwa'utu parip si, te za dama ãma 're irowasu'u za'ra wa'aba mo.

¹⁰ Tawamhã Pedru norĩ hã te oto ãma siwi sadanha, ãne: — E marĩ wa, te dama rowahutu'wa norĩ hã te te dama 're rowasu'u za'ra, Cristu, Danho'reptui'wa da, 'Re ihâimana u'âsi mono te te ipisutu wana, za Eliasi we imorĩ na hã.

¹¹ Tawamhã Zezusi hã ma te ãma sada'âbâ za'ra, ãne: — Duréihã 'Re ihâimana u'âsi mono zadawa 'mahârâ'wa hã ma tô i'uwaibaba na hã ãma rob'ui'éré, Eliasi za we apâ imorĩzém na hã te te ropese mono da.

¹² Tane nherẽ, wa za aima waihu'u za'ra wa'wa. Eliasi hã ma tô wei morĩ pa. Tane nherẽ, ta hã da te dasiwi waihu'u õ wa, ma tô tãma rob'manharĩ wasété ni, da te dasima iwẽ za'ra zéb zarina. Tane te za duré da te ĩma 're rob'manharĩ wasété za'ra, ti'ai ãma dasiré ĩpoto ma.

¹³ Tawamhã Pedru norĩ ma tô siwi sadaihu'u, Eliasihi upana Zuwã Batista te te iwasu'u na, Zezusi te te tãma irowasu'u za'ra zém na hã.

Zezusi hã ai'reputu ma, wa'uburé te te imezé wasu'u

¹⁴ Tawamhã ma tô apâ ai'aba'ré, Zezusihi me, da'ahâ uptabi na sô idahâimana za'ra u. Tawamhã aibâ hã ma tô Zezusihi u wi. Wisi wamhã, ma tô ipapara nhamra, hi'rãtitõ.

¹⁵ Tawamhã te Zezusihi ma hã tãma tinha ãne: — Apito, ma'ãpé ĩ'ra ãma aipẽ'ẽzé na. Te 're sitete u'âsi. 'Re sitete u'âsi mono wa, te unhama u hã 're waptã'ã. Duré â u zama hã te 're waptã'ã.

¹⁶ Asiré 're inomro mono norĩ u, wa tô aré saprõ. Tane nherẽ, te te siwi pese waihu'u õ di, ta norĩ hã.

¹⁷ Tawamhã Zezusi ma tô tinha, ãne: — E niha ai'rata 're ĩnhamra u'âsi za'ra wa'aba mono nherẽ, asina 're ĩ'umnhasi za'ra wa'aba mono õ di, te 're i'aipawaptob za'ra wa'aba mono zéb da na hã. Nimosi aipoto té wa'aba mono hã i'aihâimana wasété za'ra wa'wa. E ĩpẽ'ẽzé u'âsi, wa za asiré wa'aba hã 're morĩ u'â, 're ĩ'umnhasi za'ra wa'aba mono õ wa. Ma'ãpé we ĩtẽme asiwi saprõni aba, ai'repudu hã.

¹⁸ Tawamhã wa'uburé ma, ma tô Zezusi hã rob'ru, ai'repudu te te 're ipibui u'âsi mono nhiti, morĩ da oto. Te te tãma rob'rui wi, ma tô awa'awi watobro, ai'reputu hawimhã. Tawamhã awa'awi ma tãma tirowẽ, ai'reputu ma hã.

¹⁹ Tawamhã isiré 're inomro mono norĩ hã ma tô hâiba pisutu itẽme ai'ré za'ra Zezusihi u, romnhiwasi te te siwi sadanharĩ da. Ãne, ma tô tawamhã siwi sadanha: — E niha bâ bété wa norĩ hã, wa'uburé ma, wa te rob'ru za'ra nherẽ, wa te wasiwi imei waihu'u õ, tãma hã.

^20-21 Tawamhã Zezusi hã te asa tãma nharĩ za'ra, ãne: — 'Re ihâimana u'âsi mono hã suru na 're umnhasi za'ra wa'aba mono wa, tãma hã mei waihu'u za'ra wa'aba õ di. Tô sena, wa aima waihu'u za'ra wa'wa. Mostada nhamare hã surure nherẽ, da te 're wa, oto poto wamhã, wede za'ẽtẽ uptabi di. Tane, a norĩ wa'wa hã surure na 'Re ihâimana u'âsi mono 're umnhasi za'ra wa'aba mono wamhã, surure na nherẽ, uburé marĩ hã te aré 're i'manharĩ za'ra wa'aba mo, asi'uihâ na aima waihu'u za'ra wa'aba õ nherẽ. Ã ẽtẽ 'rãihâ ma, te aré inharĩ za'ra wa'wa, si'uihâ na si'ré da, isabzém nhiti. Tawamhã te aré tô ai'ré.

Zezusi hã za idâ'âzém na isiwasu'uzé hâiba amo, duré ihâiwa'utuzém na zama

²² Tawamhã Zezusihi siré 're inomro mono norĩ hã ma tô isiré asimro, Galiléa ãma. Isiré si'ubumroi wamhã, ma tô Zezusi hã tãma siwasu'u za'ra, ãne: — Ti'ai ãma Dasiré Ipodo hã te za dasima hâiba nhomri za'ra ni.

²³ Te za duré dasiwi hã wĩrĩ ni. Tane nherẽ, bâdâ maparane ãma si'utõrĩ õ ré, te za Imama hã apâ hâiwa'utu. Tawamhã te te wapari za'ra wamhã, ma tô tiwi tirobzei'õ pese za'ra, isiré 're inomro mono norĩ wi hã.

'Re ihâimana u'âsi mono nhorõwa 'ri 'madâ'âzéb da, rob'uiprazé da te tãma 're i'arĩ za'ra mono zé wasu'u

²⁴ Tawamhã Zezusihi siré 're inomro mono norĩ hã ma tô ai'aba'ré, Cafanau na 'ri nho'õmo nhisi u. Sihutu wamhã, rob'uiprazé arĩ ubumroi'wa norĩ hã ma tô Pedru siwi sadanha, 'Re ihâimana u'âsi mono nhorõwa 'ri ma, rob'uiprazé arĩ ubumroi'wa norĩ hã. Ãne ma tô siwi sadanha: — E asib'apito za'ra wa'wa hã rowahutuzé 'madâ'âzéb da, te te dame hã 're wa'âbâ mono õ di.

²⁵ — Te te 're wa'âbâ. — Ãne ma tô sada'â, Pedru hã. Tawamhã Pedru ma tô ãzé 'ri para u, Zezusihi zarina, te te ãma sadanharĩ da. Sébré wamhã, ma tô Zezusi hã timreme na sõzâ, Pedru hã: — Sima, e niha ma asimirosa'rada iwaihu. Daro mono bâ danhib'apito norĩ ma, e 'wam norĩ hã te rob'uiprazé hã te te tãma 're arĩ za'ra. E isib'a'uwẽ norĩ hã, e darob zô te te da'ãma 're i'ai'uté za'ra mono norĩ si te za te te tãma 're po'o za'ra.

²⁶ Tawamhã Pedru te asa tãma tinha: — Darob zô te te da'ãma 're i'ai'uté za'ra mono norĩ si, te za te te 're wa'âbâ za'ra. Tawamhã Zezusi hã te duré tãma tinha, ãne: — Tane tô. Daro mono bâ danhib'apito nhib'a'uwẽ norĩ, tinhib'apito ma, te te 're iwa'âbâ za'ra mono da hã mare di. (Tane, wa hã Ĩmama nhib'a'uwẽ wa, rowahutuzé 'madâ'âzéb da, te dame 're wa'âbâ mono õ nherẽ, te ãma dame 're upai mono õ di za.)

²⁷ Tane nherẽ, wawasédé, da te wa'ãma 're sa'ra mono õ'umnhasite, wa za wa'âbâ za'ra ni, ãhã na hã. Ma'ãpé ai'maimorĩ aba isõ'ui u, tepe zô 'maimei wa'aba da. Tawamhã imorĩ'rada 'mai'âri aba wamhã, te za asiwi i'maiwazere waré wa'wa, rob u. Tawamhã isadai'ré 're, te za i'manhopẽtẽ 'wa, rob'uiprazé isapotore hã. Ta hã iwabre za, rowahutuzé 'madâ'âzéb da, te ãma iwa'âbâzéb da hã, duré ãma iwa'âbâ za'ra wa'aba zéb da hã. Tahawa, rob'uiprazé isapotore hã 'mai'âri aba wamhã, te za asiwi i'mai'âri 'wa, rowahutuzé ma, rob'uiprazé arĩ ubumroi'wa norĩ u, ãma wa'âbâ za'ra wa'aba da.