Mateu 16 - ꞌRe Ihâimana Uꞌâsi Mono Zadawa Wasuꞌu

Zezusi hã marĩ iwaihu'u'õ te te 'manharĩ da, da te tãma i'ruzé wasu'u

¹ Tawamhã farizeu norĩ hã duré saduseu norĩ hã ma tô Zezusihi u ai'aba'ré, te te tãma 'ru za'ra da, marĩ dama i'manharĩ waihu'u'õ hã te te 'manharĩ da, isõ'a za'ra, 'Re ihâimana u'âsi mono zadawa para di pâ, marĩ hã sena hã te te tô 'manharĩ zô. Ãne ma tô tãma 'ru za'ra, te te siwi pibu da, Zezusi hã.

² Tawamhã Zezusi te asa hã tãma nharĩ za'ra, ãne: — Hâiwahâ pesere wamhã, te za ãne asima inharĩ za'ra wa'wa: “Awẽmhã hâiwa wẽ di za oto. E marĩ wa. Hâiwa pré wẽ na ma te tihâiwahâ, bâdâ isébrézéb u hã.”

³ Duré nimahã bâtâ na awẽm na hã te za ãne asima inharĩ za'ra wa'wa: “Ãhã na hã tã te za we tita'a. E marĩ wa. Hâiwa 'rãdâ'â pré mono di.” Ãne hã aima waihu'u pese za'ra wa'aba di, hâiwa u 're asimizawẽrẽ za'ra wa'aba mono wa, tã 're ita'a mono zéb da hã duré 're ihâiwa pese mono zéb da hã. Tane nherẽ, ãhã na uburé 're iromhâimana mono zé 'madâ'â za'ra wa'aba nherẽ, za 're iromhâimana mono zéb da hã aima waihu'u za'ra wa'aba õ di.

⁴ Nimosi aipoto té wa'aba mono hã i'aihâimana wasété za'ra wa'wa. 'Re ihâimana u'âsi mono zô, 're asimipari za'ra wa'aba mono zahã, te ĩma i'ru za'ra wa'wa, marĩ dama i'manharĩ waihu'u'õ hã te aima 'manharĩ za'ra wa'aba da. Tane nherẽ, te 'manharĩ õ di za. Duréihã Zonahã ma iromhâimanazém na si te za ãma aipo're pu'u za'ra wa'wa, 'Re ihâimana u'âsi mono, marĩ dama i'manharĩ waihu'u'õ hã te te tãma i'manharĩzém na. Tawamhã Zezusi hã te oto tiwi timorĩ za'ra, nimomo morĩ da.

I'u'ẽtẽ wapuzém na Zezusi te te ãma isimiré'é za'ra zé wasu'u, farizeu norĩ ãma

⁵ Tawamhã isiré 're inomro mono norĩ hã ma tô saprĩ za'ra, Zezusihi me, isõ'u na. Te te saprĩ za'ra wamhã, ma tô i'u'ẽtẽ wapu na po're ha'âri za'ra. Tahawa, te ubana ai'aba'ré.

⁶ Tawamhã Zezusi hã ma tô tãma nharĩ za'ra, tisiré 're inomro mono norĩ ma, ãne: — Ma'ãpé 're asi'madâ'â pese za'ra wa'aba mono, i'u'ẽtẽ wapuzém nhiti 're anomro aba mono da, farizeu norĩ nhimi'manharĩzém nhiti, duré saduseu norĩ nhimi'manharĩzém nhiti.

⁷ Tawamhã isiré 're inomro mono norĩ hã ma tô sima nharĩ za'ra, ãne: — Ãté õ hã i'u'ẽtẽ wapu hã wa te wei wasiré 'mai'âri za'ra õ wa, ma tô ãne wama nharĩ za'ra.

⁸ Tawamhã Zezusi hã isimirosa'rata za'ra hã te te sina waihu'u wa, te ãne tãma nharĩ za'ra: — E niha te i'u'ẽtẽ wapu hã aima ihâimana za'ra wa'aba õ na, sô asimrami za'ra wa'wa. E asiwi ĩ'umnhasi za'ra wa'aba ãna.

⁹ E zahadu bété asiwi ĩzadaihu'u za'ra wa'aba õ di. E ma tô ãma aipo're si'âri za'ra wa'wa, 5 miu na aibâ norĩ ma, i'u'ẽtẽ wapu hã 5 na te iwẽ'ẽi mono zém na hã. E niha si'õno hã i'masisi za'ra wa'wa hã, i'u'ẽtẽ wapu wẽ'ẽi ré hã. E ma tô duré ãma aipo're si'âri za'ra wa'wa.

¹⁰ Duré 4 miu na aibâ norĩ ma, i'u'ẽtẽ wapu hã 7 na te wẽ'ẽi mono wamhã, e niha si'õno hã ãma i'masisi aba mono hã. E ma tô duré ãne na hã ãma aipo're si'âri za'ra wa'wa.

¹¹ E niha bâ bété waihu'u za'ra wa'aba õ di, i'u'ẽtẽ wapu 'manharĩzém na te ãma inharĩ uptabi õ zé hã. Ma'ãpé 're asi'madâ'â pese za'ra wa'aba mono, i'u'ẽtẽ wapuzém nhiti 're anomro aba mono da, farizeu norĩ nhimi'manharĩzém nhiti, saduseu norĩ nhimi'manharĩzé me.

¹² Tawamhã isiré 're inomro mono norĩ hã ma tô sina waihu'u za'ra, Zezusihi mreme hã, i'u'ẽtẽ wapu 'manharĩzém na te te tãma inharĩ uptabi õ za'ra na hã, farizeu norĩ nhimiroti wasété na te te ãma isimiré'ézém na si, saduseu norĩ nhimi'manharĩzé me.

Zezusi hã Danho'reptui'wa da, 'Re ihâimana u'âsi mono te te ipisutu na, Pedru te te iwasu'uzé wasu'u

¹³ Tawamhã Zezusi hã te oto mo darob amoi u, apito Filipihi te, Sézaréa na 'ri nho'õmo nhisi niwĩ. Tame ma tô sadanharĩ za'ra, tisiré 're inomro mono norĩ hã, ãne: — E niha ma tô dasima wasu'u za'ra ni, ti'ai ãma Dasiré Ipodo hã. E 'wa hã, ta hã te 're mo.

¹⁴ Tawamhã ãne ma te asa ãma sada'âbâ za'ra: — Aiwasu'u hã, ahâ di. A hã, u, Zuwã Batista, apâ aihâiwa'udu. Duré a hã, u, Eliasi apâ we i'aimorĩ. Duré a hã, u, Zeremia. Duré a hã, u, duréihã 'Re ihâimana u'âsi mono zadawa 'mahârâ 'rata 'wa ihâiba amo, apâ aihâiwa'udu.

¹⁵ Tawamhã Zezusi hã te duré ãne sadanharĩ za'ra: — A norĩ wa'wa hã bété, e niha ma tô asima 're ĩwasu'u za'ra wa'aba mo.

¹⁶ Tawamhã Sima Pedru ma te ãne asa ãma sada'â: — A hã Cristu, 'Re ihâimana u'âsi mono te te i'aipisudu, Danho'reptui'wa da. A hã 'Re ihâimana u'âsi mono 'ra.

¹⁷ Tawamhã Zezusi, te Pedru oto 'mahâ: — Sima, Zuwãhã 'ra, aima 're rowẽ mono di za. Ma tô ãma i'uwaimra. A hã danhimirowasu'u hawi, ãne na ĩwaihu'u õ di. Ĩmama, hâiwa ãma 're isãmra mono si ma tô ãne na aima ĩwaihu'u.

¹⁸ Pedru, ãne wa za aima waihu'u. Ẽtẽ na, wa ai'ãma simiré'é. Ni'wa hã ẽtẽ nhisiwi te za 'ri na'rada hã 'manha, 'ri hã siptete na tãma 're sa mono da. Õne na 'Re ihâimana u'âsi mono te te ĩpisutu na, ma tô a hã ĩwaihu'u na'ra. Tahawa, ni'wa hã ẽtẽ nhisiwi te te i'ri ne, te za oto ĩwaihu'u na'rata zém hawim na ĩwaihu'u za'ra ni, za da te 're ĩzaze za'ra mono norĩ hã. 'Re idadâ'â za'ra mono zé hã dama siptete nherẽ, duré dama pire nherẽ, ĩzazei'wa norĩ ãma hã te te ai'uté waihu'u za'ra õ di za.

¹⁹ Danhib'apito, 'ri za'ẽtẽ 're, 're isãmra mono hã te za 'ridawazé hã te te tãma 're iromhuri mono ma hã tãma tisõ, te te dama ãma 're 'ridawa mono wa, ãma 're danhisisi mono da. Tane, wa za aima tisõ 'ridawazé hã, 'Re ihâimana u'âsi mono, da'ãma 're isib'a'uwẽ mono zéb u, dama ãma 're a'ridawa mono wa, ãma 're danhisisi mono da. Uburé marĩ hã da te 're 'manharĩ tõ za'ra mono da, dawi 're i'azawi mono hã te za 'Re ihâimana u'âsi mono hã te te ãma 're asaze, hâiwa ãma. Duré uburé marĩ hã dawi 're i'azawi mono õ hã te za duré te te ãma 're ai'uzei pese.

²⁰ Tahawa, Zezusi hã ma tô sina sadawa uwati za'ra, tisiré 're inomro mono norĩ hã, te te dama wasu'u tõ za'ra da a'â, Danho'reptui'wa na 'Re ihâimana u'âsi mono te te ipisutu na hã.

Zezusi hã za idâ'âzém na isiwasu'uzé, za duré ihâiwa'utuzém na zama

²¹ Tawamhã ta hawim haré te oto Zezusi hã tidâ'âzém na, duré tihâiwa'utuzém na zama tãma 're siwasu'u u'âsi za'ra sõ'awi, tisiré 're inomro mono norĩ ma. Ãne ma tô tãma 're siwasu'u za'ra: — Ĩmama te te ĩma ipisutuzéb zarina wa za mo, Zeruzalẽ u. Tamemhã zudeu norĩ ma roti'wa norĩ hã, duré 'Re ihâimana u'âsi mono ma da'ãma romhuri'wa ipire norĩ hã, duré isimiroti na rob'ui'éré 'rata na dama rowahutu'wa norĩ hã te za ĩma rob'manharĩ wasété za'ra. Taha zarina, wa za robzépata za'ẽtẽ. Te za duré dasiwi ĩwĩrĩ ni. Taha wamhã, maparane bâdâ ĩ'ãma si'utõrĩ õ ré, wa za duré apâ hã hâiwa'udu.

²² Tawamhã Pedru ma tô Zezusi hã sima saprõ tisiré norĩ nhiti, romnhiwasi, tãma isiwasu'u za'ra zé hã te te tiwi sawi da. Ãne te taha wamhã tãma tinha: — Wanhib'apito, ãne hã ai'ãma iromhâimana da hã mare di za. 'Re ihâimana u'âsi mono hã te te aima iba'a da si, wa tô ĩsima wẽ, da te aima rob'manharĩ tõ da.

²³ Tawamhã Zezusi hã ma tô aipi'ra, Pedruhu u. Ãne te tãma tinha: — Satanasi, mo oto aimorĩ, ĩnhiti. Marĩ hã bâdâdi wa, 're isimi'wara mono, te te 're ida'marõpãrĩ za'ra mono ne, te ĩwasutu u'âsi mo, Ĩmama te te ĩma ipisutuzéb zarina te ĩsina dama uwaimrami tõ da. 'Re ihâimana u'âsi mono nhimirosa'rata nei õ di, asimirosa'rada hã. Ti'ai ãma danhimirosa'rata zarina si te a hã ĩ'ãma irosa'ra.

²⁴ Tawamhã Zezusi te duré tãma nharĩ za'ra, tisiré 're inomro mono norĩ ma, ãne: — Ni'wam norĩ hã ĩsiré 're nomro u'âsi mono da, te te sima 're ĩwẽ za'ra mono wamhã, tihâimanazém na hã te te 're rosa'rata za'ra mono õ di za. Tiza'ozéb ré, ĩzarina 're inomro mono ne, te za ĩsiré 're nomro, da te 're simroi mono da nherẽ hã.

²⁵ Ni'wam norĩ hã tihâimanazé te te sima 're sawi za'ra mono wamhã, rowẽ isi'utõrĩ'õ hã te te sina 're uwaimrami za'ra mono õ di za. Ni'wam norĩ hã ĩzarina 're nomro mono da, tihâimanazé te te sima 're sawi za'ra mono õ wapsi, te za te te sina 're uwaimrami za'ra, rowẽ hã.

²⁶ Ãté ni'wa hã te za tinhibro hã te te sima 're a'ubumroi pese, sibrob ahâ uptabi da. Tawamhã te za oto dârâ. Ti'ab ré, sibrob ahâ nherẽ, e tãma 're rowẽ mono di za, rowẽ isi'utõrĩ'õ hã te te sina uwaimrami õ wamhã. Mare di. Tãma 're rowẽ mono õ di za. Ti'ai ãma, simarĩ ahâ uptabi nherẽ, tãma hã waihu'u õ di za, tinhimarĩ na rowẽ ãma 're ihâimana mono zé te te ãma sima iwa'âbâzéb da hã.

²⁷ Ti'ai ãma Dasiré Ipodo, niwapsi te za wei mo apâ, Timama zadawa para, hâiwa ãma tãma iromhuri'wa norĩ siré. Tamep si uburé marĩ hã da te 're i'manharĩ za'ra mono zéb zarina, te za dama hã arowairébé, iwẽ norĩ ma, duré iwasété norĩ ma.

²⁸ Tô sena wa aima rowasu'u za'ra wa'wa. A norĩ wa'wa hã ni'wam norĩ si ai'matâ'â aba õ ré, te za i'madâ'â za'ra wa'wa ti'ai ãma Dasiré Ipodo hã, uburé Danhib'apito uptabi na apâ we morĩ wamhã.