Mateu 14 - ꞌRe Ihâimana Uꞌâsi Mono Zadawa Wasuꞌu

Zuwã Batista, idâ'âzé wasu'u

¹ Tawamhã apito Erodi Galiléa na danhipti'a nho'õmo nhisi ãma te te 're da'madâ'â mono ré, ma tô Zezusihi wasu'u hã wapa.

² Iwasu'u te te wapari wamhã, ma tô te te tãma 're iromhuri za'ra mono norĩ ma hã rowasu'u za'ra, ãne, Zezusihi hâiba na hã: — Zuwã Batista te dama 'rui wa, da te ĩwĩrĩ, apâ ihâiwa'udu, ta hã. Tahawa, te tiwaihu'u pese na te te dama 're arob'manharĩ, marĩ dama i'manharĩ waihu'u'õ na hã.

^3-4 Ãne ma tô apito Erodi hã Zezusihi wasu'u na tãma rowasu'u za'ra. Ta hã ma tô aré tinoi mro zô rowasutu, Erodiza na pi'õ nhisi zô. Ino nhisi hã Filipi na isisi. Zuwã Batista hã ma tô aré te te tãma 're roti u'âsi, ãne: “'Re ihâimana u'âsi mono nhimiroti 'rata na rob'ui'éré hã te te ãma roti õ di, asisãnawãi mro na aimro da hã. Tãma wẽ õ di, 'Re ihâimana u'âsi mono ma hã.” — Ãne ma tô te te tãma 're roti u'âsi, Erodihi ma. Tane nherẽ, ma tô apito Erodi hã tinoi mro na tiwi ãma ai'ré. Tahawa, ma tô dama ti'ru, Zuwã Batista hã da te âri da, da te pawasisi da, duré da te sẽrẽ da, dazazéb 're.

⁵ Apito Erodi hã ma tô sima wẽ aré, te te dama 'ru da, Zuwã Batista da te wĩrĩ da. Tane nherẽ, pahi di zudeu norĩ ma hã, Zuwã Batista hã 'Re ihâimana u'âsi mono zadawa 'mahârâ'wa na da te waihu'u za'ra wa.

⁶ Tawamhã Erodihi waptã'ãzém na ma tô dato hã dasiwi 'manharĩ ni. Tawamhã Erodizaha 'ra hã ma tô danho'a apese azarudu hã, apito Erodihi nho'a zama. Tahawa, ma tô 'madâ'â ze, apito Erodi hã.

⁷ Taha zarina, ma tô azarutu ma ropisutu, ãne: — Tô sena, wa za uburé marĩ hã aima tisõ, asima iwẽzéb uwaibaba, ĩwi iwaptẽrẽzé hã.

⁸ Tawamhã ina hã te te tãma irotizéb zarina, ma tô tiwi rowaptẽ, ãne: — Zuwã Batistaha 'rã si, wa ĩsima wẽ, piza'a 'renho'a wa, ĩma hiri da, ãhã na awa'awi hã.

⁹ Ãne wa, ma tô apito Erodihi wi hã tirobzei'õ. Tane nherẽ, sô ihârâ norĩ nho'a azarutu ma, te te ropisutu wa, ma tô ãma tãma uwaimra, te te tiwi iwaptẽrẽzém na hã.

¹⁰ Taha wamhã, ma tô oto dama ti'ru, Zuwã Batistaha zô dazazéb u da'maimorĩ da hã, da te dasiwi butu nhizâri da.

¹¹ Duré da te dasiwi butu nhizâri wamhã oto, ma tô i'rã hã azarutu ma, piza'a 'renho'a wamhã dasiwi âri ni. Tawamhã ma tô duré oto tina ma zama hã ti'â, azarudu hã.

¹² Tawamhã Zuwãhã siré 're inomro mono norĩ hã ma tô ihâiba zô hã sô ai'aba'ré, te te siwi âri da, duré te te siwi sẽrẽ da, ab're 're. Taha pari, ma tô duré oto ai'aba'ré Zezusihi u, te te tãma rowasu'u za'ra da hã.

Zezusi hã dasa te te dama i'manharĩzé wasu'u

¹³ Tawamhã Zezusi hã Zuwãhã wasu'u te te wapari wamhã, ma tô danhiti uba're na siwaprosi hã mo, romnhiwasi sãmra da. Tane nherẽ, nimomo romnhiwasi siwaprosi isãmra na iwasu'u da te wapari za'ra wamhã, ma tô darom hawimhã tawairébé ni da'ahâ na, isarina dasi'aba'ré da isõ'rãmi, ti'ai baba.

¹⁴ Tawamhã Zezusi hã uba're hawi watobro wamhã, da'ahâ uptabi na ma tô da'ab'madâ. Te te da'ab'madâ'â wamhã, ma tô da'ãma tipẽ'ẽzé, Zezusi hã. Tahawa, ihâzé ré norĩ tame isi'ubumro norĩ hã ma tô apese.

¹⁵ Tawamhã hâiwahâ pesere, ma tô isiré 're inomro mono norĩ hã itẽme ubumro, Zezusihi u. Ãne ma tô taha wamhã tãma nharĩ za'ra: — Ma tô tihâiwahâ. Duré ãme a'ubuni wi, wa wahâimana za'ra ni, 'ri nhiti. Tahawa, ma'ãpé dama rob'ru na, 'ri wa'õtõ u dasi'aba'ré da, dasa hã da te dasima uipra za'ra da.

¹⁶ Tawamhã Zezusi hã te asa tãma nharĩ za'ra, ãne: — Mare di. Dasi'aba'réi õ di za. A norĩ wa'wa hã te za dasa hã dama i'a za'ra wa'wa, dasaihuri da.

¹⁷ Tawamhã te duré asa tãma nharĩ za'ra ãne, Zezusihi ma: — I'u'ẽtẽ wapu hã te 5 na wama tihâimana za'rare. Duré pe'a hã te maparanere wama tihâimana za'rare. Ã norĩ sire, dama hã umrore di.

¹⁸ Tane nherẽ, te Zezusi hã tãma 'ru za'ra oto ãne: — Ma'ãpé we ĩma waibui wa'aba, i'u'ẽtẽ wapu norĩ hã, pe'a me.

¹⁹ Tawamhã te oto dama tinha, duiroi wa, dasi'ubumroi mono da. Taha pari, ma tô i'u'ẽtẽ wapu 5 na ihâiba hã oto waibu. Duré pe'a maparane ihâimana zahuré hã ma tô timra. Tawamhã hâiwa u te iré rob'madâ, Timama ãma wata da, sõpru wa. Taha pari, ma tô i'u'ẽtẽ wapu hã te te si'ẽ. Duré ãhã wamhã, tisiré 're inomro mono norĩ ma hã, ma tô tãma sõmri za'ra, te te dama sõmri za'ra mono da.

²⁰ Tawamhã aihĩni pese ma tô dasa hã huri ni. Duré ãhã wamhã, ma tô dasa hã da te 'mahâpãrĩ. Tawamhã Zezusihi siré 're inomro mono norĩ hã ma tô apâ danho'rata mono hã si'õtõ 're, te te sé i'u'ẽtẽ wẽ'ẽ norĩ hã, pe'a wẽ'ẽi me. Ãhã wamhã, 12 na si'õno hã, danho'rata ré hã. Si'õtõ 'remhã, duré 'masisi mono di.

²¹ Aibâ norĩ hã 5 miu na ihâiba za'ra hã isaihuri norĩ hã, Pi'õ norĩ, dame isa'rata za'ra õ na hã, duré ai'uté norĩ hã.

Zezusi hã â nhisi baba imorĩzé wasu'u

²² Tawamhã Zezusi hã ma tô tãma 'ru za'ra, tisiré 're inomro mono norĩ ma, uba're wa, sisisi da, iwana zara u isõ'u na te te saprĩ za'ra da, isa'u za'ra te te dama rob'rui pibui pese da, darob u apâ da te ropéi mono da.

²³ Te te dama rob'rui pari, te oto Zezusi hã mo sa'a u, siwaprosi Timama ma mreme da. Taha wamhã, tame siwaprosi sãmra ré, ma tô ãma timara.

²⁴ Taha ré, isiré 're inomro mono norĩ hã ma tô â wa'wa u tihâimana za'ra, uba're na hã. Tame ma tô â sisasi hã te te iré wabzuri za'ra uba're hã, rowa'u'u za'ẽne hã isõ'õmoi baba te te rowapõrĩ wa.

²⁵ Ãhã wamhã, zahadu mara hâ ré, te Zezusi hã itẽme timorĩ za'ra, â nhisi baba.

²⁶ Tawamhã te te siwi 'madâ'â wamhã, ma tô tãma tipẽ'ẽwara za'ra, adâ hã itẽme morĩ za'ra newa. Ãne, te tawamhã sima 'mahârâ za'ra: — Õhõta adâ'â hâiba warõ, te wei watẽmemhã timorĩ za'ra. Tawamhã tãma pahi za'ra wa, ma tô tãma tizadari za'ra.

²⁷ Ãhã wamhã, awa'awi ma tô Zezusi hã tãma si'mahârâ za'ra, ãne: — Wa hã wa we atẽme ĩmorĩ za'ra wa'wa. Ĩma aipahi za'ra wa'aba õ di za.

²⁸ Tawamhã Pedru te tãma tinha, ãne: — Wanhib'apito, tô sena a hã wamhã, ma'ãpé ãma ĩzô aihârâ, â nhisi baba ãma atẽme ĩmorĩ da, asabzéb u.

²⁹ Tawamhã asa ma te ãma sada'â ãne, Pedru hã: — We aimorĩ pé, ĩtẽme. Tahawa, ma tô uba're hawi watobro Pedru hã, â nhisi baba morĩ da, Zezusihi u.

³⁰ Tawamhã â nhisi baba itẽme morĩ wamhã, ma tô rowa'u'u za'ẽtẽ ma hã tipahi, Pedru hã. Tahawa, ma tô tizadari. Taha wamhã, ma tô aré ãzé, â 'rowi. Tahawa, te sina 'mahâ, ãne: — Wanhib'apito, ma'ãpé ĩnho'reptu na, ĩdâ'â tõ da.

³¹ Tawamhã awa'awi ma tô Zezusi hã pa'â, tinhib'rata na. Ãne te tãma tinha, Pedruhu ma: — E niha aima ĩzaze surure di. E marĩ da, ma tô 'râwi ĩ'ãma asiwawã, za te i'aipawaptobzém na hã.

³² Tawamhã uba're 're ma tô tizasi zahuré, Zezusi norĩ hã Pedruhu me. Zasi zahuré wi, ma tô rowa'u hã tiwa'u'utu.

³³ Tawamhã isiré 're inomro mono norĩ hã ma tô ãma tiwata za'ra, Zezusihi ãma. Ãne te ãma tiwata za'ra: — Wanhib'apito, a hã tô sena 'Re ihâimana u'âsi mono 'ra, te 're aimo.

Zezusi hã te te ida'apesezé wasu'u

³⁴ Tawamhã isiré 're inomro mono norĩ hã ma tô saprĩ za'ra, Zezusihi me, isõ'u na hã. Te te saprĩ za'ra wamhã, ma tô aihutu oto, Zenezaré na danhipti'a nho'õmo nhisi u.

³⁵ Taha wamhã, tamemhã ma tô dasiwi waihu'u ni, Zezusi hã. Tahawa, ma tô Zezusihi wasu'u na ãma dasima da te ropé, 'ri wa'õtõ mono bâ, ti'ai 're dasi'rata 're idahâimana za'ra mono norĩ hã. Tawamhã da'ahâ na ma tô ihâzé ré norĩ hã itẽme 'wasari ni.

³⁶ Tawamhã ma tô ihâzé ré norĩ hã tiwi waptẽrẽ za'ra, i'uza nhisutu si te te tiwi upi za'ra da. Tawamhã i'uza nhisutu si te te nasi upi za'ra nherẽ, ma tô uburé ihâzé ré norĩ hã, awa'awi tizéptâ'â za'ra.