Mateu 12 - ꞌRe Ihâimana Uꞌâsi Mono Zadawa Wasuꞌu

Zudeu norĩ wa'utuzé wasu'u

¹ Tawamhã suru na ronomro pari, sabadu na ma tô Zezusi hã ro'razâ, buru nho wa'wai baba, zudeu norĩ te, romhuri zahârizém na. Tawamhã isiré 're inomro mono norĩ hã mrap te, ma tô amnho trigu, da te 're izuri mono hã te te sima 'rãnhinarĩ za'ra trigu 'rã hã, te te huri mono da.

² Tawamhã farizeu norĩ hã te te ãma 'madâ'â za'ra wamhã, Zezusihi ma, te nharĩ za'ra, ãne: — E 'madâ'â za'ra ãna, asiré 're inomro mono norĩ hã. Ta norĩ hã ma tô trigu hã te te sima 'rãnhinarĩ za'ra, sabadu na 're iwawa'utu za'ra mono zém na nherẽ. Tahawa, wahi'rata nhimiroti hã ma tô ãma upa za'ra, dawa'utuzé bâtâ na romhuri, wa te dawi 're isawi za'ra mono zém na roti hã.

³ Tawamhã Zezusi hã te asa tãma nharĩ za'ra, ãne: — E apito Dawihi wasu'u na rob'ui'éré hã 're sõré za'ra wa'aba mono ã bâ, te te irob'manharĩzém na hã tisiré norĩ me, mra te te simroi wamhã.

⁴ 'Re ihâimana u'âsi mono nhorõwa 'ri u, ma tô ãzé, apito Dawi hã. Sébré wamhã, ma tô 'mai'rẽ, i'u'ẽne hã. Isiré norĩ zama ma tô tihu, 'Re ihâimana u'âsi mono ma, aré da te isa'ra hã. 'Re ihâimana u'âsi mono, ma tô pisutu aré, da'ãma romhuri'wa norĩ si i'u'ẽne hã te te 're huri mono da, sasedoti norĩ si. Tane nherẽ, ma tô 'mai'rẽne za'ra, Dawi norĩ hã. Te te 'mai'rẽne za'ra nherẽ, 'Re ihâimana u'âsi mono hã te te siwi wẽ'õ za'ra õ di, ta norĩ hã.

⁵ E sasedoti norĩ wasu'u zama, 're sõré za'ra wa'aba mono õ di duré, 'Re ihâimana u'âsi mono nhimiroti na Mozési te te ãma irob'ui'éré na hã. Ta hã ma tô 're isõré za'ra wa'aba mo, tô. Tahawa, te za oto ãma iwaihu'u pese za'ra wa'wa. Duréihã ta norĩ hã ma tô te te 're romhuri za'ra sabadu na, dawa'utuzém na nherẽ, 'Re ihâimana u'âsi mono nhorõwa 'ri ãma. Tawamhã 'Re ihâimana u'âsi mono hã romhuri zahârizém na romhuri hã te te dawi sawi nherẽ, te te 're romhuri za'ra mono wamhã, iwasédé hã te te ãma 're sa'ra mono õ di ta norĩ ãma hã, dawa'utuzém na te te 're romhuri za'ra mono nherẽ.

⁶ Tô sena, wa aima waihu'u za'ra wa'wa. Ĩnhimiroti hã pire uptabi di, duréi roti ma hã, 'Re ihâimana u'âsi mono nhorõwa 'ri ãma da'ãma romhuri'wa norĩ hâimanazém na, danhimiroti ma hã.

⁷ Duréihã 'Re ihâimana u'âsi mono zadawa 'mahârâ'wa hã ma tô ãne na rob'ui'éré ibaihâ na hã, 'Re ihâimana u'âsi mono mreme na: “Asimizama hã ĩma 're izata za'ra wa'aba mono zô, 're ĩnhimipari mono õ di oto. Asimizawi pese zarina da'ãma 're aiwamri za'ra wa'aba mono da si, wa ĩsima te 're aiwẽ za'ra wa'wa oto.” Ãne hã ãma waihu'u za'ra wa'aba wamhã, aré iwasédé hã ãma sa'ra wa'aba õ di, ĩsiré 're inomro mono norĩ ãma hã, marĩ iwasédé hã te te 'manharĩ za'ra õ wa, ã bâtâ na ta norĩ hã.

⁸ Wa hã 'Re ihâimana u'âsi mono te te ĩpisudu, dasiré ĩpoto da, ti'ai ãma. Tahawa, dama ĩpire di, romhuri zahârizém na roti hã te dama 're i'apisutu mono zéb da hã.

Aibâ isimizu'rã're hã Zezusi te te ipesezé wasu'u

⁹ Tawamhã Zezusi hã ta norĩ hawi oto morĩ wamhã, zudeu norĩ te, rowahutuzéb u hã ma tô ãzé.

¹⁰ Tame te aibâ hã nhamra, isimizu'rã're isib'rata rési waihu'u'õ hã. Tawamhã ni'wam norĩ hã ma tô sima wẽ za'ra, duréihã 'Re ihâimana u'âsi mono nhimiroti na Mozési te te ãma irob'ui'éré na hã sabadu na romhuri zahârizém na roti hã, te te ãma upai wa, Zezusihi ãma iwasédé te te ãma hiri za'ra da. Tahawa ma tô ãne Zezusi hã ãma siwi sadanha: — Dawa'utuzém na idapesezé romhuri zahârizém na hã, e Mozésihi nhimi'ui'éré zarina.

¹¹ Tawamhã asa te ãne Zezusi hã tãma nharĩ za'ra: — Pone'ẽrebâ aima i'maihâimana za'ra wa'wa, ab're 'rehâ wa, aiwi i'maiwaptã'ã 'wa hã, e aré asiwi 'maiwazere aba õ di, 'manho'reptui aba da hã. Te aré tô asiwi i'maiwazere 'wa, romhuri zahârizém na 'maiwaptã'ã nherẽ.

¹² Duré, 'Re ihâimana u'âsi mono hã pone'ẽrebâ te te 're azawi pese mono nherẽ, pone'ẽrebâ zawi nhipai u, tãma hã dazawi uptabi di. Tahawa, sabadu na romhuri zahârizém na ni'wam norĩ marĩ te te dama 're 'manharĩ wẽ za'ra mono wamhã, duréi 'Re ihâimana u'âsi mono nhimiroti 'rada ihâimana zarina hã, te za tô te te dama 're 'manharĩ za'ra, te te ãma 're upa za'ra mono ãna, ta norĩ hã.

¹³ Tawamhã isimizu'rã're ma, te duré tinha, Zezusi hã ãne: — Ma'ãpé, asimizu wahutu. Tawamhã ma tô tinhimizu hã wahutu, aibâ hã. Te te wahutu wamhã, awa'awi ma tô tinhimizu pese apâ. Isimizu amo ne, wẽ di oto.

¹⁴ Tawamhã te te pese pari, ma tô farizeu norĩ hã wairé, te te sima ãma roti za'ra da, Zezusihi ãma, da te dasiwi wĩrĩ da, isadawa parab za'ra.

'Re ihâimana u'âsi mono hã tãma romhuri'wa da, Zezusi te te ipisutuzé wasu'u

¹⁵ Tawamhã Zezusi hã ma tô sina waihu'u, farizeu norĩ te te sima ãma iroti za'ra zé hã te te siwi wĩrĩ da. Tahawa, ma tô ihawi timorĩ za'ra. Ihawi morĩ za'ra wamhã, da'ahâ na ma tô isarina ai'aba'ré ni. Tawamhã daro mono bâ 're morĩ ré, ma tô uburé dahâzé ré idahâimana za'ra hã da'apese, Zezusi hã.

¹⁶ Te te da'apese parimhã, ma tô duré sina da'azadawa uwati, da te dasina 're wasu'u za'ra mono tõ da.

¹⁷ Ãne ma tô Zezusi hã sina da'azadawa uwati, duréihã 'Re ihâimana u'âsi mono mreme na, Izaia hã isadawa 'mahârâ'wa te te ãma irob'ui'érézé hã te te ãma uwaimrami da. Ãne duréihã 'Re ihâimana u'âsi mono mreme na rob'ui'éré hã:

¹⁸ “Ãhãta te ipisudu ĩma romhuri'wa da, te 're isawi pese mono hã. Taha ãma si wa ãma 're ĩpẽ'ẽ toi u'âsi. Taha ma, wa za ĩpẽ'ẽzani hã tãma tisõ. Tawamhã daro mono bâ te 're ida'anho'reptui mono zé wasu'u na te za te te dama 're rowasu'u, da te 're iwaihu'u za'ra mono zéb da hã.

¹⁹ Ta hã awa'awi te te dama 're anharĩ mono õ di za. Ãma 're idawata za'ra mono zéb da na hã, duré mreme 'rãihâ na te te dama 're rowasu'u mono õ di za, sõ'awimhã.

²⁰ Duré, buru teihi hã sihâpâ na 're simasa mono wamhã, e te za da te 're si'ẽ. Mare di. Taré te za da te 're wahutu za'ra, wahu na apâ 're simasa mono da. Tane duré, sib'uware na ĩ'ãma 're inomro mono norĩ ma, te te tãma 're rob'manharĩ wasété za'ra mono õ di za, ta hã. Duré iro'ore hã ro'o nhib'uware nherẽ, da te 're isimroi mono õ ne, sib'uware na ĩ'ãma 're inomro mono norĩ ma, te te tãma 're rob'manharĩ wasété za'ra mono õ di za duré. Ta norĩ ãma te za 're siwamri u'âsi za'ra. Tawamhã nimahã na si te za oto isimipawapto wẽ zéb zarina, da te 're waihu'u za'ra, dapoto mono bâ, te 're ida'anho'reptui mono zém na hã, isitob'ru norĩ hã te te dawi 're ro'wa'rutu u'âsi za'ra mono nherẽ, da te 're waihu'u za'ra mono tõ da, te 're ida'anho'reptui mono zé wasu'u hã.

²¹ Tawamhã daro mono bâ te za tô sena sô 're danhimipari za'ra, te te 're ida'anho'reptui mono zéb zô.”

Bezebuhu wasu'u

²² Tawamhã Zezusihi tẽme, ma tô aibâ hã dasiwi saprõni ni, wa'uburé te te 're pibui u'âsi mono wa, itob'a na duré imreme'õ 're ihâimana mono hã. Tawamhã Zezusi hã ma tô pese. Te te pese parip si, ma oto apâ mreme watobro. Duré te te oto rob'madâ'â wẽ di, aibâ hã.

²³ Tawamhã da'ahâ na ma ãma tatob'uzu za'ra ni. Tahawa, te dasima nharĩ za'ra ni, ãne: — Ãté õ hã apito Dawihi nhihudu, sô 're iwanhimipari za'ra mono.

²⁴ Tawamhã ãne na farizeu norĩ te te dawapari za'ra wamhã, ma tô sima nharĩ za'ra, ãne, ta norĩ hã: — Õ hã Bezebuhu zadawa para, ma tô wa'uburé hã te te dama 're anhamra, wa'uburé norĩ nhib'apito zadawa para. Bezebu hã tiwaihu'u pe hã te te tãma 're sõmri mono õ 'wa'âhã, aré te te dama 're anhamra waihu'u mono õ di, wa'uburé hã.

²⁵ Tawamhã te te ãma irosa'rata wasété za'ra na, ma tô sina waihu'u za'ra, Zezusi hã. Tahawa, te ãne tãma ãma romnhimiré'é za'ra: — Danhib'apito nhib'a'uwẽ norĩ hã 'râwim nherẽ, oto sisada 're simasa mono wamhã, te aré 're si'uprosi. Duré 'ri nho'õmo ãma 're idahâimana za'ra mono norĩ hã sisada 're hâimana za'ra mono wamhã, te aré 're si'uprosi. Duré dasisãnawã nherẽ, 'râwi dasisada 're dahâimana za'ra mono wa, 're dasi'wapé za'ra mono wamhã, te aré 're dasi'uprosi, 'râwim nherẽ.

²⁶ Tane duré, wa'uburé norĩ hã Satanasihi nhib'a'uwẽ, simisutu 're hâimana za'ra mono nherẽ, dapẽ'ẽ hawi 're wairébé mono da, te te sima 're rob'ru za'ra mono wamhã, te aré sisada 'râwimhã 're hâimana za'ra, wa'uburé norĩ hã. Tawamhã sisada 're sipo'o za'ra mono wa, te aré waptu na 're si'utõrĩ, Satanasihi nhib'a'uwẽ norĩ hã. Ãne, ĩma inharĩ za'ra wa'aba zéb zarina, Bezebuhu zadawa para, wa'uburé te dama 're anhamra mono 'wa'âhã, 'râwim nherẽ, te aré tô sisada 're simasa. Taha zarina, te aré tô ta norĩ hã duré 're si'uprosi.

²⁷ Ma tô ĩma inharĩ za'ra wa'wa, Bezebuhu zadawa para wa'uburé te dama 're i'anhamra mono na. Asiré norĩ hã bété. E 'wa sadawa para, te bété wa'uburé norĩ hã te te dama 're sãmra za'ra. E Bezebuhu zadawa para. Mare di. Duré e Bezebuhu zadawa para wa'uburé te te dama 're isãmra za'ra mono na, ma tô dama 're iwasu'u za'ra wa'aba mo. Mare di. Ãne na dama 're wasu'u za'ra wa'aba mono õ di. Tahawa, ma tô ãma i'upa za'ra wa'wa, ĩma inharĩ za'ra wa'aba zém na hã, Bezebuhu zadawa para, wa'uburé te dama 're i'anhamra mono na.

²⁸ 'Re ihâimana u'âsi mono pẽ'ẽzani zadawa parap si, wa tô te dama 're anhamra, wa'uburé hã. Taha zarina si, te za oto iwaihu'u za'ra wa'wa, tô sena 'Re ihâimana u'âsi mono, ai'ãma 're isib'a'uwẽ za'ra wa'aba mono zéb da, te te ãma isãna'ratazém na hã.

²⁹ — Ni'wa hã aibâ isiptete nhorõwa u sébré wamhã, te te sima pawasisi õ ré, isimarĩ hã te te tiwi ubumroi waihu'u õ di za, aibâ isiptete wi hã. Te te sima pawasisi wapsi, te za isimarĩ hã tiwi ubumro oto, 'ri 're tãma iromnhimi'wara mono hã.

³⁰ — Ni'wam norĩ hã ĩwẽ'wa 're nomro mono õ wamhã, ta norĩ hã te ĩzada 're hâimana za'ra. Duré ni'wam norĩ hã 'Re ihâimana u'âsi mono u, te 're ida'anhimroi mono ne, te te 're danhimroi mono õ wamhã, ta norĩ hã te 'Re ihâimana u'âsi mono nhiti, te te 're dazatõrĩ za'ra.

³¹ Tahawa, wa za duré ãne aima waihu'u za'ra wa'wa. Dawasédé hã da te 're 'manharĩ za'ra mono nherẽ, duré 'Re ihâimana u'âsi mono ãma da te 're wasété za'ra mono nherẽ, dawasété na oto tãma 're dasiwasu'u za'ra mono wamhã, tãma waihu'u pese di, dawasédé hã te te dama 're i'apari mono zéb da hã, te te oto da'ãma 're ab'madâ'â tõ mono da. Tane nherẽ, 'Re ihâimana u'âsi mono pẽ'ẽzani ãma, da te 're wasété za'ra mono wamhã, taha na dawasédé hã te te dama 're apari mono õ di za. Te za te te da'ãma 're ab'madâ'â u'âsi, 'Re ihâimana u'âsi mono hã.

³² Duré ni'wam norĩ hã dasiré ĩpoto ãma te te ĩ'ãma 're wasété za'ra mono wa, oto tiwasété na 'Re ihâimana u'âsi mono ma, 're siwasu'u za'ra mono wamhã, tãma waihu'u pese di, ãne hã iwasédé hã te te tãma 're i'apari mono zéb da hã, te te oto ãma 're 'madâ'â za'ra mono tõ da. Tane nherẽ, ni'wam norĩ hã 'Re ihâimana u'âsi mono pẽ'ẽzani ãma te te 're wasété za'ra mono wamhã, te za taha na iwasédé hã te te ãma 're a'madâ'â u'âsi, 'Re ihâimana u'âsi mono hã.

Rowede iwẽ wasu'u, rowede iwasété wasu'u me

³³ — Rowede hã wẽ wamhã, te za 're 'rãi wẽ u'âsi za'ra. Rowede hã wasété wamhã, te za duré 're 'rãi wasété u'âsi za'ra. Rowede, 're i'rã za'ra mono zéb zarina te za ãma waihu'u za'ra ni, rowede iwẽ na, duré rowede iwasété na.

³⁴ A norĩ wa'wa hã te wahi ne 're anomro aba mo. Dapẽ'ẽ 're, da te 're irosa'rata za'ra mono zéb zarina te za 're damreme zusi. Tahawa, aiwasété na 're aihâimana za'ra wa'aba mono wa, marĩ iwẽ na 're aimreme zusi waihu'u aba mono õ di. Aipẽ'ẽ 're, 're irosa'rata wasété za'ra wa'aba mono zéb zarina si, te a norĩ wa'wa hã marĩ iwasété na si hã 're aimreme zusi aba mo.

³⁵ Ni'wa hã 're morĩ wẽ wamhã, tipẽ'ẽ 're tinhimirosa'rata wẽ hawim na te za 're mreme wẽ u'âsi. Duré ni'wa hã 're morĩ wasété wamhã, tinhimirosa'rata wasété hawim na te za duré 're mreme wasété u'âsi.

³⁶ — Tô sena, wa za aima waihu'u za'ra wa'wa. 'Re ihâimana u'âsi mono, za da'ãma isipo'ozéb ãma hã dahâiba mono bâ te za tãma tasiwasu'u za'ra ni, rosa'rata ãna marĩ iwasété na da te dama 're inharĩ za'ra mono zém na hã.

³⁷ Tahawa, ti'ab ré uburé marĩ na 're i'aimreme zusi aba mono zéb zarina, te za 'Re ihâimana u'âsi mono hã aima rowairébé za'ra wa'wa, za da'ãma isipo'ozéb ãma hã. Ti'ab ré, marĩ iwẽ na 're i'aimreme zusi aba mono zéb zarina si, te za aiwẽsãmri za'ra wa'wa. Duré, marĩ iwasété na 're i'aimreme zusi aba mono zéb zarina si, te za siwi aiwẽ'õ za'ra wa'wa, 'Re ihâimana u'âsi mono hã. — Ãne ma tô Zezusi hã tãma waihu'u siromo za'ra, farizeu norĩ ma.

Zonahã wasu'u, apito Salomahã wasu'u me

³⁸ Tawamhã farizeu norĩ, 'Re ihâimana u'âsi mono nhimiroti na rob'ui'éré na dama rowahutu'wa norĩ me, ma tô Zezusihi ma, nharĩ za'ra, ãne: — Rowahutu'wa, wa wasima wẽ za'ra ni, marĩ dama i'manharĩ waihu'u'õ hã aiwaihu'u pese na wanho'a za'ra 'manharĩ da, wa te wasiwi 'madâ'â da, 'Re ihâimana u'âsi mono zadawa para dama 're i'ab'manharĩ mono na, sena na hã wa te ãma aiwaihu'u za'ra da.

^39-40 Tawamhã Zezusi hã te asa tãma nharĩ za'ra, ãne: — Nimosi aipoto té wa'aba mono hã, i'aihâimana wasété za'ra wa'wa. 'Re ihâimana u'âsi mono zô 're asimipari za'ra wa'aba mono zahã, ma tô ĩwi iwaptẽrẽ za'ra wa'wa, marĩ dama i'manharĩ waihu'u'õ hã te 'manharĩ da, asõ'a za'ra wa'aba, 'Re ihâimana u'âsi mono zadawa para, te dama 're i'ab'manharĩ mono na sena na hã ãma ĩwaihu'u za'ra wa'aba da. Tane nherẽ, ãhã na hã marĩ hã te 'manharĩ õ di za. Ãne si wa za a'â aima waihu'u za'ra wa'wa. Duréihã Zona hã 'Re ihâimana u'âsi mono zadawa 'mahârâ 'rata 'wa hã si'ubdatõ ma tô bâdâ hã ãma ai'utõ, tebe isa'ẽtẽ di'i 're, hâimana ré hã. Taha parimhã, ma tô 'Re ihâimana u'âsi mono hã sõ'reptu. Â zada'ré u ma tô tebe hã, Zonahã ré rob u iré 'rãiwatobro. Tane duré, ti'ai ãma Dasiré Ipodo hã si'ubdatõ bâdâ hã te za ãma ai'utõ, dâ'â wa, ab're 're nomro ré hã. Taha parip si, te za duré hâiwa'udu, apâ. Ãne wapsi, te za oto iwaihu'u za'ra wa'wa, 'Re ihâimana u'âsi mono hawi sena na we imorĩ na hã.

⁴¹ Niwamhã 'Re ihâimana u'âsi mono, za da'ãma isipo'ozéb ãma hã, duréihã Niniwé na 'ri nho'õmo nhisi ãma 're idasi'ubumroi mono norĩ hã te za asada tihâimana za'ra wa'wa, aiwasédé hã te te ai'ãma hiri za'ra wa'aba da, 'Re ihâimana u'âsi mono nho'a. E marĩ wa. Duréihã Zona hã 'Re ihâimana u'âsi mono te te tãma 're sadawa wasu'u za'ra mono wamhã, ma tô te te 're wapari za'ra. Tahawa, ma tô ta norĩ hã tiwasété wi 're sipizari za'ra. Zonahã nhimiroti hã pire nherẽ, isipai u ĩnhimiroti si pire uptabi di. Tane nherẽ, a norĩ wa'wa hã ĩzaze za'ra wa'aba õ di, 'Re ihâimana u'âsi mono nhimipisutuzéb zarina we atẽme ĩmorĩ aba zém na hã. Tahawa, te za tô i'uwaibaba aiwasédé hã ai'ãma sa'ra wa'wa, Niniwé ãma 're idasi'ubumroi mono norĩ hã.

⁴² Niwa apto'o ré 'Re ihâimana u'âsi mono, za da'ãma isipo'ozéb ãma, duréihã danhib'apito sipi'õ Saba na romnhisi ãma te te 're ida'ab'madâ'â mono hã te za duré asada tihâimana za'ra wa'wa, aiwasédé hã te te ai'ãma sa'ra wa'aba da, 'Re ihâimana u'âsi mono nho'a. E marĩ wa. Ta hã duréihã romhâ uptabi nherẽ, ma tô wi, apito Salomahã u, isimiroti hã te te wapari da, isimiroti hã dahâimanazém na rowaihu'u na hã wẽ uptabi wa. Taha nhimiroti hã pire nherẽ, isipai u ĩnhimiroti si pire uptabi di. Tane nherẽ, ĩnhimiroti hã aima wapari ze za'ra wa'aba õ di. Tahawa, te za tô i'uwaibaba aiwasédé hã ai'ãma sa'ra wa'wa, danhib'apito sipi'õ hã.

Wa'uburé norĩ, da'ãma 're isõrõwa za'ra mono zé wasu'u

^43-44 — Ãne wa za duré aima ãma romnhimiré'é za'ra wa'wa. Ãté wa'uburé hã te za aibâ hawi 'maiwatobro. Watobro wamhã, a'ubuni wi te za 're mo, rob'ré na. Tawamhã dazô 're rĩtĩ baba mono wa, nimomo wa'utu õ wa, te za sima tinha ãne: “Ĩnhorõwa 'rata u, wa za apâ mo, ãma 're ĩnhorõwa u'âsi mono da oto, ipẽ'ẽ 'remhã.” Ãne te za sima tinha. Tawamhã apâ te za tô oto, aibâ u hã mo, ipẽ'ẽ 're apâ sébré da. Tawamhã ihawi watobro haré, te aré hâiba baba na 're hâimana, 'ri hã baba na 're simasa mono wa, 'ri 're wa'wa su'u na 're isimasa mono ne, duré 'ri paramhã robza'ra wẽ u'âsi 're iromnhimi'wara mono ne. Taha wab zama, wa'uburé ma hã wẽ di, aibâ ãma apâ 're isõrõwa mono da hã.

⁴⁵ Tawamhã tisiré norĩ zô te za mo wa'uburé hã, si'u ãma 're sõrõwa za'ra mono da. Tawamhã te za itẽme ãwisi za'ra, 7 na ihâiba za'ra hã isipai u iwasété uptabi za'ra hã. Tawamhã siré te za tô ãma 're sõrõwa za'ra, aibâ ãma. Duré wa'uburé misi ãma 're sõrõwa mono ré hã, aré aibâ ma hã, tãma rowẽ prã ti, ipẽ'ẽ 'remhã. Ahâ na oto iwa 're hâimana za'ra mono wa, tãma hã rowẽ õ uptabi di. Tane duré, a norĩ wa'wa hã aima 're rowẽ prã za'ra wa'aba mono di aré. Tane nherẽ, aiwasété wi 're aipizari za'ra wa'aba mono newa, zahadu ĩzazei ãna 're aihâimana wasété u'âsi za'ra wa'aba mono wa, aima 're rowẽ õ uptabi za'ra wa'aba mono di za oto.

Zezusihi na wasu'u, ino norĩ wasu'u me

⁴⁶ Tawamhã Zezusi hã te te dama rowasu'u ré, ma tô ino norĩ hã itẽme aihutu, tina norĩ me. Tawamhã rowi simasa wa, ma tô siwi da'maipo're pu'u, Zezusihi ma, da te 'mairowasu'u da, rob u itẽme hã watobro za'ra da.

⁴⁷ Tawamhã Zezusihi ma, ma tô 'mairowasu'u ni, ãne: — Ano norĩ hã te rowi asô aimasa, ana ré. Te sima wẽ za'ra, marĩ na te te aima rowasu'u za'ra da hã.

⁴⁸ Tawamhã Zezusi hã te ãne ãma da'mazadanha: — E 'wa hã ĩna. Duré e 'wam norĩ hã ĩno norĩ.

⁴⁹ Tawamhã tinhiptõmo na tisiré 're inomro mono norĩ hã te te wasu'u za'ra sina, te duré dama tinha, ãne: — Ãhãta, ĩna. Duré ãhãta ĩsisãnawã norĩ.

⁵⁰ Ni'wam norĩ hã Ĩmama, hâiwa ãma 're isãmra mono te te sima 're iwẽ za'ra mono zéb zarina, te te tãma ãma 're i'uwaimrami za'ra mono norĩ si, te za ĩsisãnawã na hã, duré ĩna na hã 're hâimana za'ra.