Mateu 11 - ꞌRe Ihâimana Uꞌâsi Mono Zadawa Wasuꞌu

Zuwã Batista hã Zezusihi u, tizadawa wasu'u'wa norĩ te te isatõrĩ za'ra zé wasu'u

¹ Tawamhã 12 na isiré 're inomro mono norĩ ma, ãne na te te tãma roti za'ra pari, ma tô Zezusi hã mo, dama isãmrazém hawimhã, 'ri nho'õmo mono bâ te te dama rowahutu mono da hã.

² Tawamhã Zuwã Batista, dazazéb 're sãmra ré, ma tô Cristuhu wasu'u hã wapa, marĩ te te dama 're i'ab'manharĩ wẽ mono zém na hã. Te te wapari wamhã, ma tô isiré 're inomro mono norĩ hã 'mazatõrĩ za'ra, Zezusi hã te te siwi 'mazadanharĩ da.

³ Ãne ma tô taha wamhã siwi sadanha: — E a hã Zuwã Batista te te dama 're i'aiwasu'u mono, te we aimo. E zahadu wa za aimawi zô hã, a'â 're wanhimipari za'ra.

⁴ Tawamhã Zezusi hã te asa tãma nharĩ za'ra, ãne: — Mo oto apâ ai'aba'réi wa'aba Zuwãhã u, marĩ hã iwapari za'ra wa'aba zém na tãma rowasu'u za'ra wa'aba da, duré marĩ hã i'madâ'â za'ra wa'aba zém na zama.

⁵ Itob'a norĩ hã to pese za'ra wa, ma tô apâ te te 're rob'madâ'â za'ra. Imorĩ'õ norĩ hã te duré oto para na 're nomro. Duré i'wa're ré norĩ hã ma tô 're pese za'ra. Tahawa te oto duré hâiba wẽ na hã 're nomro. Duré ipo'reptõ norĩ hã te oto po're 'repu'u wa 're simipari za'ra. Duré 're idâ'â za'ra mono norĩ hã ma tô duré apâ 're hâiwa'utu za'ra. Ĩwasu'uwẽ hã ma tô duré isibrob'õ norĩ hã te te 're wapari za'ra. Ãne na te za tãma irowasu'u za'ra wa'wa, Zuwãhã ma.

⁶ Ni'wam norĩ hã, wa hã 'Re ihâimana u'âsi mono zadawa para we ĩmorĩ na, 'râwi ĩ'ãma 're siwawã za'ra mono õ wamhã, ta norĩ ma si tãma 're rowẽ uptabi za'ra mono di za.

⁷ Tawamhã Zuwã Batistaha siré 're inomro mono norĩ hã apâ si'aba'réi wamhã, ma tô Zezusi hã dama rowasu'u, Zuwã Batistaha hâimanazém na. Da'ahâ na idasi'ubumroi mono norĩ ma, te ãne tãma rowasu'u za'ra: — Zuwã hã a'ubuni wi 're sãmra mono ré, ma tô itẽme 're anomro aba mo, 're sabu za'ra wa'aba mono da. E tawamhã du teihi 'rãihâ hã uware wa, rowa'u te te 're ihâpâ za'ra mono ne, Zuwã Batista hã roti da, sib'uware na 're hâimana mono wa, ma tô itẽme 're anomro aba mo. Mare di. Ta hã roti da, siptete na hã ma tô 're hâimana.

⁸ E uza wẽ na 're si'uza mono wa, ma tô itẽme 're anomro aba mo, 're sabu za'ra wa'aba mono da. Mare di. Uza wẽ na 're si'uza mono õ di. Uza wẽ ré 're inomro mono norĩ si hã, te danhib'apito nhorõwa ãma 're si'ubumro, 'ri 'rãihâ ãmap si.

⁹ Ma'ãpé, ĩma wasu'u za'ra wa'aba za. E 'Re ihâimana u'âsi mono zadawa wasu'u'wai wa, te itẽme 're anomro aba mo, 're sabu za'ra wa'aba mono da. Tane tô. Õ hã uburé iwana 'Re ihâimana u'âsi mono zadawa 'mahârâ'wa norĩ nhipai u te pire na 're hâimana, Zuwã hã.

¹⁰ Duréihã ma tô 'Re ihâimana u'âsi mono zadawa 'mahârâ'wa hã ãne ãma rob'ui'éré, Zuwãhã ãma, 'Re ihâimana u'âsi mono mreme na: “Ĩzadawa wasu'u'wa, wa za aiwana satõ, te te asô ropese mono da.” Ãne duréihã 'Re ihâimana u'âsi mono mreme na rob'ui'éré, ibaihâ na hã.

¹¹ Tô sena wa aima waihu'u za'ra wa'wa. Uburé iwana 're inomro mono norĩ hã te te siwi ãma wabzu za'ra õ di Zuwã Batista hã, isimiromhuri pire na hã. Tane nherẽ, 'Re ihâimana u'âsi mono te te 're ida'azawi mono zéb zarina te te 're ida'apawapto mono zé hã, hâiba ré, te te waihu'u õ di za, Zuwã Batista hã. Ni'wam norĩ si, 'Re ihâimana u'âsi mono nhib'a'uwẽ norĩ si te za te te sina 're waihu'u za'ra, i'uirĩ na. Tahawa, ta norĩ hã te za pire na 're hâimana za'ra, Zuwã Batistaha nhipai u. Duré ni'wam norĩ hã 'Re ihâimana u'âsi mono nhib'a'uwẽ norĩ hã, tisiré norĩ ma, wapu na 're hâimana za'ra mono nherẽ, te za pire na 're hâimana za'ra, Zuwã Batistaha nhipai u, ta norĩ si i'uirĩ na te te sina 're waihu'u za'ra mono wa za, 'Re ihâimana u'âsi mono te te 're ida'apawapto mono zé hã.

¹² Zuwã Batista hã, 'Re ihâimana u'âsi mono te te dama 're isadawa wasu'u mono zém na te te dama ãma isãna'ratazém hawim haré, te oto ni'wam norĩ hã sib'ru na 're hâimana za'ra, 'Re ihâimana u'âsi mono hã da'ãma 're sib'a'uwẽ mono tõ da. Da te dasima 're wẽ za'ra mono nherẽ, te ta norĩ hã te te dawi 're ro'wa'rutu za'ra, 'Re ihâimana u'âsi mono hã ãma 're sib'a'uwẽ za'ra mono tõ da.

¹³ Zuwãhã wana ré hã, ma tô 'Re ihâimana u'âsi mono zadawa 'mahârâ 'rata 'wa norĩ hã te te ãma 're rob'ui'éré za'ra Mozésihi zama, 'Re ihâimana u'âsi mono, za da'ãma 're isib'a'uwẽ mono zé wasu'u na hã.

¹⁴ Tawamhã isimirowasu'u za'ra na, 're saze za'ra wa'aba mono wamhã, taha zarina te za duré ãne 're isaze za'ra wa'aba mo, Eliasi ti'ai u za we imorĩ na Zuwã te te iwasu'uzém na hã.

¹⁵ Asimipari pese za'ra wa'aba wamhã, ma'ãpé ĩwapari pese za'ra wa'aba.

^16-17 — E 'wai ãma, wa za oto romnhimiré'é, ãhã na 're idahâimana za'ra mono norĩ ãma hã. Ai'uté norĩ ãma, wa za simiré'é. 'Ri nhi'riti wa, rowedezéb ãma si'ubumroi ré, te za ãne si'mahârâ za'ra, ai'uté norĩ hã: “Wa norĩ hã wa tô aima rowamreme za'ra wa'aba ni aré, dasina damro wa, rowamremezém na. Tane nherẽ, ãma ato za'ra wa'aba õ di. Duré da te dasina 're ti'a za'ra mono wa, rowamremezém na wa tô aré duré aima rowamreme za'ra wa'aba ni. Tane nherẽ, duré wame ai'ru'ru wa'aba õ di.” Ãne te za si'mahârâ za'ra. Ãne wa tô ai'uté norĩ ãma simiré'é, ãhã na 're idahâimana za'ra mono norĩ na hã.

¹⁸ Duré Zuwã Batista te te dama 're sadawa wasu'u mono ré, 'Re ihâimana u'âsi mono 'madâ'â sina ma tô sai ãna te te 're romhuri, misi bâtâ na. Duré uwa 'rãi wa'u hã te te dame 're hâsi mono õ di. Tahawa, ma tô da te tãma 're nharĩ wasété za'ra. Ãne ma tô da te tãma 're nharĩ za'ra: “Õ hã te wa'uburé hã te te 're pibui u'âsi.”

¹⁹ Duré ti'ai ãma Dasiré Ipodo hã te to sina dasiré 're sa, mram na. Uwa 'rãi wa'u isé hã te duré dame te te 're hâsi. Tahawa, ma tô ãne na da te tãma 're nharĩ wasété za'ra: “Ma'ãpé 'madâ'â za'ra wa'aba. Õhõta te aibâ hã sa za'ẽtẽ na 're sai u'âsi. Ta hã uwa 'rãi wa'u zei'wa duré. Rob'uiprazé arĩ ubumroi'wa norĩ siwadi ta hã, uburé siwa'ru 're idanomro mono norĩ siwadi.” Ãne ma tô da te tãma 're nharĩ wasété za'ra. Ni'wam norĩ hã 'Re ihâimana u'âsi mono nhimiroti zarina 're nomro mono wamhã, te za marĩ iwẽ si te te 're 'manharĩ u'âsi za'ra. Ãne wa, te za iwaihu'u pese za'ra wa'wa, tô sena 'Re ihâimana u'âsi mono nhimiroti iwẽ uptabi na hã.

²⁰ Tawamhã nima niwĩmhã 'ri wa'õtõ mono bâ 're idahâimana za'ra mono norĩ hã dawasété wi 're dasipizari za'ra mono õ wa, ma tô Zezusi hã siwi dawẽ'õ, tiwaihu'u pese na marĩ dama i'manharĩ waihu'u'õ hã tamep si te te dama 're ab'manharĩ wẽ u'âsi mono nherẽ.

²¹ Ãne te 'ri wa'õtõ ãma ma tinha Zezusi hã, 'ri wa'õtõ 're, 're idahâimana za'ra mono norĩ ma: — Corazĩ na 'ri wa'õtõ nhisi ãma 're aihâimana za'ra wa'aba mono norĩ ma, aima 're ropipa uptabi za'ra wa'aba mono di za, duré Besada na 'ri wa'õtõ nhisi ãma 're aihâimana za'ra wa'aba mono norĩ ma zama. Marĩ dama i'manharĩ waihu'u'õ hã asõ'a za'ra wa'aba, te 're i'ab'manharĩ wẽ mono ne, Tiru ãma 'ri nho'õmo ãma, duré Sidõ ãma 'ri nho'õmo ãma 're idahâimana za'ra mono norĩ nho'a, te dama 're ab'manharĩ mono 'wa'âhã, duréi te aré ta norĩ hã 're sipizari za'ra, tiwasété wi. Tiwasété wi 're isipizari za'ra mono zém na, da te 're waihu'u za'ra mono da, te aré 'ru'a hã ti'rã nhisiwi te te 're sa'wari za'ra. Te duré aré sa'u ihâiro na 're si'uza za'ra.

²² Tô sena wa aima waihu'u za'ra wa'wa. Niwapsi 'Re ihâimana u'âsi mono, da'ãma isipo'ozéb ãma hã Tiru ãma duré Sidõ ãma 're idahâimana wasété za'ra mono norĩ ma, te te irob'manharĩ pipa zém nhipai u, te za te te 're aihâ za'ra za'ẽtẽ 'wa, 'Re ihâimana u'âsi mono hã.

²³ Duré Cafanau ãma 're i'aihâimana za'ra wa'aba mono norĩ hã e danhipai u aipire na 're aihâimana za'ra wa'aba mono da, ma tô asina 're irosa'rata za'ra wa'aba mo. Ropipa u si, te za 'Re ihâimana u'âsi mono hã te te 're asãmra 'wa, dapẽ'ẽ 're dadâ'â u'âsi na 're idahâimana za'ra mono zéb u. Marĩ dama i'manharĩ waihu'u'õ hã asõ'a za'ra wa'aba, te dama 're i'ab'manharĩ wẽ mono ne, duréihã Sodoma ãma 're idahâimana wasété za'ra mono norĩ te ãma 're pawaptob za'ra mono 'wa'âhã, aré ta norĩ hã si'utõrĩ õ di. Rowẽ na te aré 're hâimana u'âsi za'ra.

²⁴ Niwapsi 'Re ihâimana u'âsi mono hã da'ãma isipo'ozéb ãma hã Sodoma ãma 're idahâimana wasété za'ra mono norĩ ma, te te irob'manharĩ pipa zém nhipai u, te za te te 're aihâ za'ra za'ẽtẽ 'wa, tô sena. — Ãne ma tô Zezusi hã dama waihu'u, Cafanau ãma 're idahâimana za'ra mono norĩ ma hã.

²⁵ Tawamhã Zezusi hã te duré ãne Timama ma hã mre: — Ĩmama, a hã Danhib'apito uptabi, hâiwa ãma hã, duré ti'ai ãma zama. A hã ma tô rowaihu'u pese 'wa norĩ wi roti iwẽ hã 're i'anhito mo, te te 're waihu'u za'ra mono tõ da hã. Rowaihu'u prãi 'wa na 're ihâimana za'ra mono norĩ ma si, ma tô marĩ iwẽ hã 're i'awaihu'u mo. Tahawa, wa ai'ãma ĩwata, asõpru wa.

²⁶ Tane tô, Ĩmama. Asima 're i'awẽ mono zéb uwaibaba si, ma tô õ norĩ ma si 're i'awaihu'u mo.

²⁷ — Ĩmama ma tô ĩma waihu'u, uburé za 're ihâimana mono zé hã. Ni'wam norĩ hã si'uihâ na te te 're ĩwaihu'u za'ra mono õ di, 're ĩhâimana mono zém na hã. Ĩmama si ma tô ti'ra na ĩwaihu'u pese, 're ĩhâimana mono zém na hã. Duré dasi'uihâ na Ĩmama, da te 're waihu'u za'ra mono õ di za. Ĩwétési wa tô Ĩmama hã waihu'u pese, 're ihâimana mono zém na hã. Te ĩsima 're i'awẽ mono zéb uwaibaba si, wa za ni'wam norĩ ma si te 're awaihu'u, ta norĩ zama Ĩmama hã te te 're waihu'u za'ra mono da, 're ihâimana mono zém na hã.

²⁸ — Marĩ ipire, da te 're 'wasari mono wamhã, te za 're dazadâ'â wairébé. Tane te duré a norĩ wa'wa hã 're asiwasutu u'âsi za'ra wa'aba mo, dama rowahutu'wa norĩ nhimirowasu'u hã 're i'madâ'â pese za'ra wa'aba mono zéb zarina, 'Re ihâimana u'âsi mono te te 're asõ'reptu za'ra wa'aba mono da newa. Tane nherẽ, asina 're uwaimrami waihu'u za'ra wa'aba mono õ di za. Ãne hã uburé 're aihâimana za'ra wa'aba mono norĩ hã ma'ãpé we ĩzô 're asõpré u'âsi aba mono. We ĩzô 're asõpré u'âsi aba mono wamhã, wa za te 're aipẽ'ẽ nomri za'ra wa'wa za, 're asiwasutu zahu za'ra wa'aba mono tõ da hã oto.

²⁹ Wa hã ĩpẽ'ẽ na ĩnhimizawi pese uptabi di. Atãma duré ĩhâimanazé hã. Tahawa, ma'ãpé ĩ'ãma 're sasõmri za'ra wa'aba mono, ĩ'ãma 're waihu'u pese za'ra wa'aba mono da. Tawapsi te za aipẽ i're aima 're simi'wara 'wa.

³⁰ Marĩ iwapure, da te 're 'wasari mono wa, 're idazadâ'â wairébé mono õ ne, te za aipẽ'ẽ wapu na oto 're anomro aba mo, ĩnhimiroti zarina si.