Mateu 10 - ꞌRe Ihâimana Uꞌâsi Mono Zadawa Wasuꞌu

Zezusi hã tisiré 're inomro mono norĩ te te isatõrĩ za'ra zé wasu'u, daro mono bâ

¹ Tawamhã Zezusi hã ma tô sitẽme sô tihârâ za'ra, 12 na ihâiba na isiré 're inomro mono norĩ zô. Sô hârâ za'ra wamhã, ma tô tãma pisutu za'ra, iwaihu'u pese zarina isadawa para, wa'uburé norĩ te te 're idawamnarĩ za'ra mono hã te te dama 're sãmra za'ra mono da. Duré ihâzé ré norĩ hã dahâzé mono bâ isadawa para, te te 're dapese za'ra mono da, duré hâzé u'âsi 're hâimana za'ra mono wa, 're isib'uwa pese za'ra mono norĩ zama te te 're dapese za'ra mono da hã, ma tô duré tãma pisutu za'ra.

² Isisi za'ra hã, ãne: Sima, isisi amo hã Pedru na. Duré ino nhisi hã Ãdré na. Duré Tiagu, duré isisãnawã, Zuwã. Ta norĩ hã Zebedehe 'ra zahuré.

^3-4 Duré Filipi, duré Batolomeu, duré Tome, duré Mateu. Ta hã rob'uiprazé arĩ ubumroi'wa aré. Duré Tiagu, Afeuhu 'ra. Duré Tadeu, duré Sima ihâiba amo. Ta hã ma tô aré dame 're hâimana, romanu norĩ zada, tirom hawi apâ te te 're satõrĩ za'ra mono da. Duré Zuda Icarioti, Zezusi te te dama ihâiba nhomri'wa da hã.

⁵ Tawamhã Zezusi hã te te satõrĩ za'ra da, ma tô ãne tãma roti za'ra, 12 na ihâiba norĩ ma hã: — Zudeu'õ norĩ nhipti'ai u 're anomro aba mono õ di za. Duré samaritanu norĩ nhipti'ai u 'ri nho'õmo mono bâ, 're asisisi aba mono õ di za.

⁶ Izaraéu nhihudu norĩ u si te za 're anomro aba mo, pone'ẽrebâ 'madâ'â ãna, siwa'ru 're inomro mono ne, 're ihâimana za'ra mono norĩ u si.

⁷ Ãne te za dama 're irowahutu za'ra wa'aba mo: “'Re ihâimana u'âsi mono, da'ãma 're isib'a'uwẽ mono zéb u hã romhuture di oto.”

⁸ Ihâzé ré norĩ hã te za duré 're ipese za'ra wa'aba mo. 'Re dadâ'â za'ra mono nherẽ, te za duré 're idahâiwa'utu za'ra wa'aba mo. I'wa're ré norĩ zama te za duré 're ipese za'ra wa'aba mo. Wa'uburé hã te za dama 're isãmra za'ra wa'aba mo. Wa'âbâ ãna wa tô ĩwaihu'u pe hã aima sõmri za'ra wa'wa. Tahawa, wa'âbâ ãna te za duré ãne uburé dama ãma 're i'uwaimrami wẽ za'ra wa'aba mo.

⁹ Rob'uiprazé isapotore hã asiré 're 'wasari aba mono õ di za, duré ẽtẽ waipo pré oru hã duré ẽtẽ waipo prã prata zama.

¹⁰ Dama romhuri'wai ma, te za dasa hã da te tãma 're sõmri za'ra, tiwi sô robaba wa. Tahawa, nimomo 're anomro aba mono wamhã, romramizé hã asiré 're 'wasari aba mono õ di za. Ai'uza misire ré si te za duré 're anomro aba mo. Aipara'uza misire ré si te za duré 're anomro aba mo. Wedehu hã asiwazusizé hã misire te za duré asiré 're i'wasari aba mo.

¹¹ — Nimomo daza'rui u 're anomro aba mono wamhã, asô 're itob'uzu za'ra wa'aba mono norĩ u si te za 're asisisi aba mo. Tawamhã tame te za isiré 're aihâimana za'ra wa'aba mo, 'ri tede'wa siré, nimomo 're i'anomro aba mono zéb u.

¹² Danhorõwa u 're asisisi aba mono wamhã, ãne te za 're idazawi za'ra wa'aba mo: “Rowẽ na 're aihâimana za'ra wa'aba mono.” Ãne te za 're idazawi za'ra wa'aba mo.

¹³ Tawamhã danhorõwa u 're aihutu aba mono wi, da te 're ai'mazasi wẽ za'ra wa'aba mono wamhã, 're isawi za'ra wa'aba mono zéb zarina, te za rowẽ na 're hâimana za'ra, 'ri tede'wa norĩ hã. Duré da te 're ai'mazasi wẽ za'ra wa'aba mono õ wamhã, rowẽ na 're hâimana za'ra mono õ di za, 'ri tede'wa norĩ hã.

¹⁴ Duré nimomo darob u 're aihutu aba mono wa, asô 're datob'uzu za'ra wa'aba mono õ zarina, da te 're aiwapari ze za'ra wa'aba mono õ wamhã, ta hawi te za 're aiwairébé aba mo. Duré oto 're anomro aba mono zéb u, te za asisa'u aipara zapru hã 're itata'a za'ra wa'aba mo, ti'ai u 're rere'e mono da, dapo're õ na 're danomro mono wa, 'râwi 're dasisãmri za'ra mono da.

¹⁵ Tô sena, wa aima waihu'u za'ra wa'wa. Niwapsi 'Re ihâimana u'âsi mono, da'ãma isipo'ozéb ãma hã Sodoma ãma duré Gomora ãma 're idahâimana wasété uptabi za'ra mono norĩ ma, te te irob'manharĩ pipa zém nhipai u, te za asô 're itob'uzu za'ra wa'aba mono õ norĩ ma hã te te tãma 're arob'manharĩ za'ẽtẽ.

Zezusi te te isatõrĩ za'ra ma, za da te tãma 're irob'manharĩ wasété za'ra mono zé wasu'u

¹⁶ — Ma'ãpé ĩwapari pese za'ra wa'aba. Pone'ẽrebâire, robzahi wa'wa u 're isisisi mono ne, wa za datẽme asatõrĩ za'ra wa'wa. Tahawa, te za asimiza'rese 're anomro aba mo, wahi ne. Duré utu'u, marĩ iwasédé hã te te 're i'manharĩ za'ra mono õ ne, te za 're anomro wẽ wa'aba mo.

¹⁷ Tahawa, te za 're asipibui pese za'ra wa'aba mo, dawi. Ãté ni'wam norĩ hã te za te te sima 're aiwẽ za'ra wa'wa, te te 're aiwaibui wa'aba mono da, zudeu norĩ ma roti'wa norĩ u, te te 're asimroi wa'aba mono da. Tawamhã ta norĩ hã te te siwi 're aiwẽ'õ za'ra wa'aba mono zéb zarina, te za duré isimirowahutuzéb ãma da te 're ai'maipré'é 'wa, romhâ nhorõ na.

¹⁸ Duré ĩ'ãma si 're anomro aba mono wa, te za dama ipire norĩ u da te 're asimroi wa'wa, zudeu'õ norĩ nhib'apito norĩ u, te te 're aiwaihu'u za'ra wa'aba mono zéb zarina, te te siwi 're aiwẽ'õ za'ra wa'aba mono da. Taha ré, isõ're 're aimasa aba mono ré, te za õ norĩ ma hã ĩwasu'uwẽ na, duré isib'a'uwẽ norĩ ma zama hã tãma 're irowasu'u za'ra wa'aba mo za.

¹⁹ Tawamhã dama ipire norĩ u, da te 're asimroi wa'aba mono wamhã, asimirosa'rata na asisõwa asina 're aihâtâ'â za'ra wa'aba mono õ di za, niha tãma 're asiwasu'u za'ra wa'aba mono zéb da na hã. Da te aima 're iropipa za'ra wa'aba mono zéb u, da te 're asimroi wa'aba mono wamhã, 'Re ihâimana u'âsi mono te za te te aima 're sõmri za'ra wa'wa, niha tãma 're i'asiwasu'u za'ra wa'aba mono zéb da hã.

²⁰ Tãma 're asiwasu'u za'ra wa'aba mono wamhã, asi'uihâ na asimirosa'rata na tãma 're aimreme zusi aba mono õ di za. 'Re ihâimana u'âsi mono, Tipẽ'ẽzani na te te aima 're iwaihu'u za'ra wa'aba mono zéb zarina si, te za tãma 're asiwasu'u za'ra wa'aba mo, danhib'apito norĩ ma hã.

²¹ — Da te 're ĩzaze za'ra mono 'ru te, te za dasisãnawãi uptabi nherẽ, da te dasima 're dahâiba nhomri za'ra, da te 're danhimroi mono da. Damama norĩ hã te za ti'ra ma, ãne te te tãma 're rob'manharĩ wasété za'ra, 'râwim nherẽ. Duré da'ra norĩ hã timama uptabi da nherẽ, te za sada 're hâimana za'ra, te te dama 're hâiba nhomri za'ra mono da, da te 're simroi mono da, ina me.

²² Uburé te za da te 're ai'ruiwapari za'ra wa'wa, ĩzazei'wa 're anomro aba mono wa. Tane nherẽ, asiptete sina õne u'â ĩ'ãma si 're anomro aba mono wamhã, te za asina 're i'uwaimrami za'ra wa'aba mo, asõ'reptu za'ra wa'aba zé hã.

²³ Tawamhã nima hã 'ri nho'õmo ãma da te 're ai'ruiwapari za'ra wa'aba mono wa, da te aima 're 'manharĩ wasété za'ra wa'aba mono wamhã, ta hawi te za 're aimani za'ra wa'aba mo, 'ri nho'õmo amoi u 're anomro aba mono da hã. Tô sena wa aima waihu'u za'ra wa'wa. Izaraéu nhihudu norĩ nhipti'ai 're, 'ri wa'õtõ mono bâ asimiromhuri 'rãsutu za'ra wa'aba õ ré, te za we dama sihâi'ré apâ, Dasiré Ipodo hã.

^24-25 — Romnhoré'wa norĩ hã te te 're romnhoré za'ra mono ré hã, pire na 're hâimana waihu'u za'ra mono õ di, tãma iromnhoré'wa norĩ ma hã. Tane nherẽ, romnhoré hã te te sima 're 'ruiwapari u'âsi za'ra mono wamhã, zahadu wapsi te za tãma iromnhoré'wa norĩ ne oto 're hâimana za'ra, aiwa. Duré te te dama 're iromhuri za'ra mono norĩ hã te te dama 're romhuri za'ra mono ré hã, hâimana pire na 're hâimana waihu'u za'ra mono õ di, tinhib'apito norĩ nhipai u hã. Tane nherẽ, tipire zô te te duré sima 're rob'ruiwapari u'âsi za'ra mono wamhã, zahadu wapsi te za tinhib'apito ne pire na 're hâimana za'ra oto. Ĩ'ruiwapari'wa norĩ hã te Bezebu na te te 're ĩnhisi za'ra, wa'uburé norĩ nhib'apito nhisi na. Ãne te ta norĩ hã te te ĩ'ãma 're wasété za'ra. Tahawa, taha nhipai u te za duré te te ai'ãma 're wasété uptabi za'ra wa'wa, ĩsiré 're anomro aba mono wa.

'Re ihâimana u'âsi mono si, da te dasima 're ipipa za'ra mono zé wasu'u

²⁶ — Tahawa, dama 're aipahi za'ra wa'aba mono õ di za. Uburé marĩ hã upsibi na 're ihâimana za'ra mono hã zahadu wapsi te za suwa nhamra ni. Duré uburé marĩ hã pi'uriwi 're ihâimana za'ra mono hã te za niwapsi waihu'u za'ra ni.

²⁷ Uburé pi'uriwi te aima 're iwaihu'u za'ra wa'aba mono hã te za oto sõ'awi dama ãma 're irowasu'u za'ra wa'aba mo.

²⁸ Dahâiba te te dawi 're isimroi mono norĩ ma hã, tãma 're aipahi za'ra wa'aba mono õ di za, dapẽ'ẽzani hã te te dawi 're simroi waihu'u mono dai õ wa. 'Re ihâimana u'âsi mono si te za asima 're ipipa za'ra wa'aba mo. Taha ma si waihu'u pese di, dahâiba hã duré dapẽ'ẽzani zama, te te dawi 're i'a'uprosi mono zéb da hã.

²⁹ Sire wa'â hã wa'âbâ surure nherẽ, uburé Damama zadawa para õ nherẽ, 're si'utõrĩ mono da hã, mare di, sire norĩ hã.

³⁰ Tane duré, aséré za'rata aba zama, tãma waihu'u pese di, 'Re ihâimana u'âsi mono ma hã. Simi'madâ'â pese uptabi di.

³¹ Sire hã tãma sawi pese za'ra nherẽ, sire zawi nhipai u, tãma asawi uptabi za'ra wa'aba di, 'Re ihâimana u'âsi mono ma hã. Tahawa, asina 're aihâtâ'â za'ra wa'aba mono õ di za.

Zezusihi zazei'wa na 're idasiwasu'u za'ra mono zé wasu'u, duré isazei'õ'wa na zama

³² — Ni'wam norĩ hã ĩzazei'wa na dama 're siwasu'u za'ra mono wamhã, wa hã wa za duré Ĩmama nho'a te 're awasu'u, ĩzazei'wa na, hâiwa ãma 're isãmra mono nho'a.

³³ Tazahã, duré ni'wam norĩ hã ĩzazei'õ'wa na dama 're siwasu'u za'ra mono wamhã, wa hã wa za duré Ĩmama nho'a hã te 're awasu'u, ĩzazei'õ'wa na, hâiwa ãma 're isãmra mono nho'a. — Ãne ma tô tãma rowasu'u za'ra, Zezusi hã.

Zezusihi ãma dasina 're idasipo'o za'ra mono zé wasu'u

³⁴ — E ti'ai u we ĩmorĩ wa, te za ti'ab ré rowẽ na si dasiré 're dahâimana za'ra, simisutu. Mare di. Ãne hã ĩ'ãma 're rosa'rata za'ra wa'aba mono õ di za. Ti'ai u we ĩmorĩ wa, rowẽ na si 're dahâimana za'ra mono õ di za. Te za ĩ'ãma hã dasima ãma 're dasiwanhizari. Te za duré ĩ'ãma hã 're dasi'wapé za'ra.

³⁵ Ti'ai u we ĩmorĩ wa, te za da'ra si'aibâ norĩ hã timama ãma 're sitob'ru za'ra. Da'ra sipi'õ norĩ hã te za duré tina ãma 're sitob'ru za'ra. Duré dasani'aba norĩ hã te za timaprebaba sipi'õi ãma hã 're sitob'ru za'ra.

³⁶ Ãne te za dasisãnawãi uptabi nherẽ, dasina 're danhitob'ru uptabi za'ra, 'râwi dasiré 're dahâimana za'ra mono nherẽ.

³⁷ — Ni'wam norĩ hã te te 're ĩzawi za'ra mono zém nhipai u, timama norĩ hã te te 're sawi pese za'ra mono wamhã, ĩ'ãma 're nomro waihu'u mono õ di za. Duré ni'wam norĩ hã ĩzawi nhipai u ti'ra norĩ te te 're sawi pese za'ra mono wamhã, ĩ'ãma 're nomro waihu'u mono õ di za duré.

³⁸ Wedepo'o nhonhi'rãmi hã, daza'ozéb da, da te dasisada 're i'wasari mono ne, ni'wam norĩ hã da te 're simroi mono da nherẽ, sisawi ãna ĩzarina 're nomro mono wapsi, te za ĩ'ãma 're hâimana u'âsi za'ra. Duré ãne na 're hâimana za'ra mono õ wamhã, ĩ'ãma 're nomro waihu'u mono õ di za.

³⁹ Ni'wam norĩ hã 'râwi tihâimanazép si te te sima 're sawi za'ra mono wamhã, rowẽ isi'utõrĩ'õ hã te te sina 're uwaimrami za'ra mono õ di za. Duré ni'wam norĩ hã ĩzarina 're nomro mono da, 're sihâiba zawi za'ra mono õ wapsi, te za te te sina 're uwaimrami za'ra, rowẽ hã.

'Re ihâimana u'âsi mono, za te te dama 're i'awa'âbâ mono zé wasu'u

⁴⁰ — Ni'wam norĩ hã te te 're aiwaibui wẽ wa'aba mono wamhã, ta norĩ hã ai'u'âbâ wa'aba te za te te siwi 're ĩmrami wẽ. Ta norĩ hã te te siwi 're ĩmrami wẽ mono wa, we ĩzatõrĩ'wa zama hã te za duré ĩsiré te te siwi 're mrami wẽ.

⁴¹ Ãté ni'wa hã te za 'Re ihâimana u'âsi mono zadawa 'mahârâ'wa hã âri wẽ, isadawa wasu'u'wa na te te waihu'u wa. Ãne ni'wam norĩ hã te te 're 'manharĩ wẽ za'ra mono wamhã, tizadawa wasu'u'wa norĩ ma, za te te 're i'awa'âbâ mono ne, te za 'Re ihâimana u'âsi mono hã te te tãma 're awa'âbâ, damrami wẽ 'wa norĩ ma hã aiwa. Ãté ni'wa hã te za duré 'Re ihâimana u'âsi mono nhimiroti zarina 're imorĩ wẽ uptabi hã âri wẽ, 're imorĩ wẽ uptabi na te te waihu'u wa. Ãne ni'wam norĩ hã te te 're 'manharĩ wẽ za'ra mono wamhã, tinhimiroti 'madâ'â pese 'wa norĩ ma, za te te 're i'awa'âbâ mono ne, te za duré 'Re ihâimana u'âsi mono hã te te tãma 're awa'âbâ aiwa.

⁴² — Ãté ni'wa hã te za ĩzazei'wai ma, â wahâ hã tãma õ, te te hâ'rẽne da, isiré ĩzazei'wa norĩ ma wapu na, 're imorĩ na hã te te waihu'u wa. Ãne hã ĩzazei'wa norĩ hã marĩ 'rare na nherẽ, ni'wam norĩ hã te te 're pawaptob za'ra mono wamhã, 'Re ihâimana u'âsi mono, za te te tãma 're i'awa'âbâ mono zé hã te za te te sina 're uwaimrami za'ra. Tô sena, wa aima waihu'u za'ra wa'wa.