Marcu 9 - ꞌRe Ihâimana Uꞌâsi Mono Zadawa Wasuꞌu

¹ Tawamhã Zezusi hã ma duré dama waihu'u, ãne: — Tô sena wa aima rowasu'u za'ra wa'wa. Aihĩni õ nherẽ, ai'matâ'â aba õ ré, te za tiwaihu'u pese na 'Re ihâimana u'âsi mono, da'ãma 're isib'a'uwẽ mono zé hã ãma i'madâ'â za'ra wa'wa.

Zezusihi hâiba isisaprĩzé wasu'u

² Tawamhã bâdâ 6 na ãma si'utõrĩ pari, ma tô Zezusi hã Pedru norĩ si te te simro, Tiagu norĩ me, duré Zuwã. Ẽtẽ 'rãihâ u ma tô ai'aba'ré. Tame ma tô Zezusi hã tihâiba na saprĩ, Pedru norĩ nho'a.

³ I'uza hã ma tô tihâirã uptabi. Rowa'a za'ẽtẽ ne, ma ai'ubuzi, rã uptabi na. Da'uza hã da te 're hâ upsõi pese za'ra mono nherẽ, hâirã prã ti, Zezusihi uza ma hã.

⁴ Tawamhã dahi'rata norĩ hã ma tô 'madâ'â za'ra, Eliasi norĩ hã Mozésihi me. Zezusihi me, te sima rowasu'u za'ra.

⁵ Tawamhã Pedru te Zezusihi ma tinha, ãne: — Rowahutu'wa, e niha irowẽ, ãme iwahâimana za'ra zém na hã. Si'ubdatõ, wa za aima 'ri za'ra wa'aba ni aihâiba bâ wa'aba, ate da hã, duré Mozésihi te da hã, duré Eliasihi te da hã.

⁶ Ãne te Pedru hã tãma tinha, atãma na te te rosa'rata ãna a'â. Ãhã wamhã, te te 'madâ'â za'ra wa, ma tãma tipahi za'ra, Pedru norĩ hã.

⁷ Tawamhã hâiwa nhirõtõ'a zarob'a hã ma ubu za'ra, Zezusi norĩ hã. Tahawa, hâiwa nhirõtõ'a hawi, te we tãma nharĩ za'ra, 'Re ihâimana u'âsi mono hã, Pedru norĩ ma: — Ã hã ĩ'ra, te 're isawi pese mono. Ma'ãpé isimiroti hã 're wapari pese za'ra wa'aba mono za.

⁸ Taha wamhã, taré te titõmo na hã sô rowaimrami za'ra. Ãhã wamhã, Zezusihi si ma tô siwi 'madâ, ime za'ra siwaprosi isam na hã.

⁹ Tawamhã ẽtẽ 'rãihâ hawi, ma oto si'ra za'ra, Zezusi norĩ hã. Si'aba'ré sina, te Zezusi hã tãma nharĩ za'ra, ãne: — Ẽtẽ 'rãihâ ãma i'madâ'â za'ra wa'aba zém na hã, dama rowasu'u za'ra wa'aba õ di za a'â. Ti'ai ãma Dasiré Ipodo hã ab're hawi hâiwa'utu parip si, te za dama 're irowasu'u za'ra wa'aba mo.

¹⁰ Tawamhã imreme ma tô wapari za'ra, Pedru norĩ hã. Tahawa, te 'râwi sima rowasu'u za'ra, ãne: — E niha isiwasu'uzé hã ab're hawi, za te te ihâiwa'utu na. Wa norĩ hã wama waihu'u za'ra õ di.

¹¹ Tawamhã te oto siwi sadanha, Zezusi hã, ãne: — E marĩ wa, te rowahutu'wa norĩ hã te te dama 're rowasu'u za'ra bété, Cristu, Danho'reptui'wa da, 'Re ihâimana u'âsi mono te te ipisutu wana, Eliasi za we imorĩ na hã.

^12-13 Tawamhã Zezusi ma tô asa tãma waihu'u za'ra: — Duréihã 'Re ihâimana u'âsi mono zadawa 'mahârâ'wa hã ma tô i'uwaibaba ãma rob'ui'éré ibaihâ na, Eliasi za we apâ imorĩzém na te te ropese da. Tane nherẽ, wa za aima waihu'u za'ra wa'wa. Eliasi hã ma tô wei morĩ pa. Da te dasima iwẽ za'ra zéb zarina, ma tô tãma rob'manharĩ wasété za'ra ni, iwana da te duré ãma irob'ui'érézéb zarina. 'Re ihâimana u'âsi mono zadawa 'mahârâ'wa norĩ hã ma tô ãma rob'ui'éré siromo za'ra, ti'ai ãma Dasiré Ipoto ãma hã, sa'ẽtẽ na za te te irobzépatazém na hã, duré za da te dasiwi iwẽ'õzém na hã. E marĩ wa, ma tô ãne ãma rob'ui'éré siromo za'ra.

Ai'repudu ipesezé wasu'u

¹⁴ Tawamhã Zezusi norĩ hã te oto apâ ai'aba'ré, tisiré norĩ u. Iwana za'ra ma tô da'ahâ na tasi'rã'õtõ ni. Tame 'Re ihâimana u'âsi mono nhimiroti ui'éré na rowahutu'wa norĩ hã te nasi imreme wa'rãmi tãma nharĩ za'ra, Zezusihi siré 're inomro mono norĩ ma, isimirowasu'u na te te saze za'ra õ wa.

¹⁵ Zezusi hã da te 'madâ'â za'ra wamhã, uburé ma tô ãma tatob'uzu za'ra ni. Tahawa, ma tô itẽme dasisa're, da te sawi za'ra da.

¹⁶ Tawamhã Zezusi te dama tinha, ãne: — E marĩ na, te asima irowasu'u za'ra wa'wa.

¹⁷ Tawamhã aibâ hã dawa'wa hawi te 'mahâ, ãne: — Rowahutu'wa, ĩ'ra wa we atẽme saprõ, ĩma pawaptob da. Wa'uburé te te 're upi mono wa, mreme õ u'âsi te 're sãmra.

¹⁸ Wa'uburé hã te te 're wabzuri, ti'ai u. Tawamhã isadaipro hã te tiwi 're pusi. Te duré 're 'wahãihãsi. Te duré 're sitete. Te duré 're sib'uwa. Wa tô aré waptẽrẽ za'ra, asiré 're inomro mono norĩ hã wa'uburé te te siwi me da, tãma. Tane nherẽ, tãma waihu'u za'ra õ di, ĩ'ra ma, te te siwi ime da hã.

¹⁹ Tawamhã aibâ mreme te te wapari wamhã, ma tô tisiré 're inomro mono norĩ ma tinha, ãne: — E niha bété ai'rata za'ra wa'aba 're ĩnhamra u'âsi mono nherẽ, asina 're ĩ'umnhasi za'ra wa'aba mono õ di bété, te 're i'aipawaptob za'ra wa'aba mono zéb da hã. E ĩpẽ'ẽzé u'âsi, wa za asiré za'ra wa'aba hã 're mo, asina 're ĩ'umnhasi za'ra wa'aba mono õ wa. Ma'ãpé, ai'repudu hã we ĩtẽme asiwi saprõni aba.

²⁰ Tawamhã ma tô itẽme siwi saprõ, ai'repudu hã. Itẽme te te siwi ãwisi wi, te wa'uburé Zezusi hã 'madâ. Tahawa, te sisa'u ai'repudu hã wasutu. Sa'ẽtẽ te 're sipizari, ti'ai wa. Ma duré sadaiproi waze.

²¹ Tawamhã Zezusi hã te imama hã ãma sadanha, ãne: — E niha ma tô ãma tiwahu, ai'ra iré 're hâimana mono ré hã. — Ĩ'ra hã sapore ré, ma tô 're siwamnarĩ.

²² Unhama u te te 're wabzuri wa'uburé hã, unhama na te te wĩrĩ da. Âi ba zama te te 're wabzuri, â na te te wĩrĩ da duré. Tô sena aiwaihu'u pese wamhã, ma'ãpé ãma wapawapto na. Duré ma'ãpé, wa'ãma aipẽ'ẽzé na.

²³ Tawamhã ãne te Zezusi hã tãma tinha: — E niha te ãne ĩma inha, tô sena ĩwaihu'u pese wamhã, te aipawapto wa'aba da hã, ai'ra na wa'aba. Ĩwaihu'u pese na, da te 're ĩ'umnhasi za'ra mono wamhã, uburé dama waihu'u pese di za, marĩ na da te 're idapawaptob za'ra mono zéb da na hã.

²⁴ Tawamhã awa'awi te aibâ hã Zezusihi ma tinha: — Asimipawaptobzém na, wa tô ai'umnhasi. Ma'ãpé, 're ĩpawaptob u'âsi mono, asimipawaptobzém na te 're asazei pese mono da oto. Taha da, wa aima ĩsiwasu'u.

²⁵ Tawamhã Zezusi hã itẽme idasi'rã'õtõ norĩ hã da'ahâ na te te da'ab'madâ'â wamhã, ma tô wa'uburé ma rob'ru, ãne: — Wa'uburé, ai'repudu 're upi u'âsi mono wa, te mreme'õ u'âsi 're hâimana. Te duré po'reptõ u'âsi 're sãmra. Aiwatobro, ai'reputu hawi. Niwa apâ asébré tõ, ai'reputu 'remhã.

²⁶ Tawamhã wa'uburé, ma tizadari. Sisa'u te duré wasutu, ai'repudu hã. Tawamhã ihawi ma tô watobro. Ai'repudu hã rési ãna te oto nomro, dâ'â newa. Tahawa, te dasima rowasu'u za'ra ni, ai'repudu hã idâ'â na.

²⁷ Tane nherẽ, ma tô Zezusi hã ai'repudu hã pa'â. Ma tô hâiwi wahutu, para na sab da.

²⁸ Taha pari, ma asisi 'ri para u, Zezusi norĩ hã. Tame hâiba pisutu ma tô si'ãma sadanharĩ za'ra, isiré 're inomro mono norĩ hã: — E niha bâ bété wa norĩ hã, wa'uburé ma, wa te rob'ru za'ra nherẽ, wa te wasiwi imei waihu'u õ, tãma.

²⁹ Tawamhã asa ma Zezusi hã ãne tãma waihu'u za'ra: — 'Re ihâimana u'âsi mono ma, te za a'â 're damreme zusi ãma. Taha parip si, dama waihu'u pese di za, wa'uburé hã dama 're iwairébé mono zéb da hã.

Zezusi hã za idâ'âzém na duré za apâ ihâiwa'utuzém na isiwasu'uzém na rowasu'u

^30-31 Tawamhã Zezusi norĩ hã ta hawi te oto ai'aba'ré. Galiléa na danhipti'a nho'õmo nhisi wa'wai baba, ma ro'rahâri za'ra. Zezusi hã ma tô sima wẽ, ihâimanazém na a'â da te sa'rese za'ra tõ da, tisiré 're inomro mono norĩ ma, a'â hâiba pisutu tãma siwasu'u za'ra da. Tawamhã ma tô tãma siwasu'u za'ra, ãne: — Dasiré Ipodo hã te za dasima hâiba nhomri ni. Te za duré dasiwi wĩrĩ ni. Da te dasiwi wĩrĩ wamhã, bâdâ maparane ãma si'utõrĩ õ ré, te za apâ hâiwa'udu ab're hawi, dâ'â uptabi nherẽ.

³² Tawamhã te te siwi sadaihu'u za'ra õ di, tãma isiwasu'u za'ra zém na hã. Tane nherẽ, tãma pahi za'ra wa, te te siwi ãma sadanharĩ õ di oto. Ari'iwi te oto asimro.

Danhipai u dama ipire na, Zezusi te te irowasu'uzém na rowasu'u

³³ Tawamhã Cafanau na 'ri nhisi u, ma tô oto aihutu, Zezusi norĩ hã. Tame 'ri para u sisisi wamhã, te Zezusi hã sadanharĩ za'ra, tisiré 're inomro mono norĩ hã, ãne: — Bâdâdi na we wasi'aba'réi ré hã e marĩ na, te we asima irowasu'u za'ra wa'aba mo.

³⁴ Tazahã te ari'iwi tihâimana za'ra oto, bâdâdi na si'aba'ré sina, sipibu za'ra wa aré, 'râwi sima i'maipire zô.

³⁵ Tawamhã Zezusi hã ma tô nhamra oto. Tisiré 're inomro mono norĩ zô, te duré ãhã wamhã sitẽme sô tihârâ za'ra. Ãne te taha wamhã tãma nharĩ za'ra: — Ni'wam norĩ hã dama pire da, 'râwi te te si'ãma 're rosa'rata za'ra mono wamhã, dama iwapu ne, te za dama 're si'ai'uté za'ra.

^36-37 Taha pari, ma ai'uté hã pa'â, tisiré 're inomro mono norĩ wa'wa, te te sãrĩ da, tipa. Tawamhã tipa te te sãrĩ sina, ma ãne tãma waihu'u za'ra: — Ni'wam norĩ hã te te 're ĩzawi pese za'ra mono wa, ai'uté zô 're tob'uzu za'ra mono wamhã, ta norĩ u'âbâ te duré ĩzô 're tob'uzu za'ra. Tawamhã e ĩzô si te 're tob'uzu za'ra. Mare di. We ĩzatõrĩ'wa zô zama te duré sô 're tob'uzu za'ra.

Zezusi norĩ wẽ 'wa norĩ wasu'u na rowasu'u

³⁸ Tawamhã Zuwã hã te Zezusihi ma siwasu'u, ãne: — Rowahutu'wa, aibâ wa tô 'madâ'â za'ra ni, asisi na wa'uburé ma, te te 're irob'rui mono hã, dama 're wairébé mono da. Tawamhã ma tô dama 're wairébé. Õ hã wasiré 're morĩ õ di. Tahawa, wa tô tiwi sawi za'ra ni, wasiré õ hã 're morĩ õ wa, asisi na wa'uburé ma, te te 're arob'ru tõ mono da.

^39-40 Tawamhã Zezusi hã ma tô asa tãma waihu'u za'ra, Zuwã norĩ ma, ãne: — Tiwi sawi za'ra wa'aba õ di za, te te 're ida'apawapto mono zé hã. Ãté ni'wam norĩ hã ĩwaihu'u pese zarina, te za iwẽ hã te te dama 're 'manharĩ za'ra, dama i'manharĩ waihu'u'õ hã. E taha pari, te za ta norĩ hã awa'awi na ĩnhisi wasété za'ra. Mare di. Te te 're ĩnhisi wasété za'ra mono õ di za. E marĩ wa. Ni'wam norĩ hã wazada 're hâimana za'ra mono õ wamhã, ta norĩ hã wahâiba niwĩ te za 're hâimana za'ra. Tahawa, aibâ hã wahâiba niwĩ 're hâimana mono nherẽ, tiwi sawi za'ra wa'aba õ di za, te te 're ida'apawapto mono zé hã.

⁴¹ Tawamhã ma tô duré tãma nharĩ za'ra, ãne: — Ma'ãpé, ĩwapari pese za'ra wa'aba asina. A norĩ wa'wa hã ĩzazei'wa 're aihâimana za'ra wa'aba mono wa, â hã ni'wam norĩ hã te te aima 're sõmri za'ra wa'aba mono wamhã, 'Re ihâimana u'âsi mono, za te te tãma 're i'awa'âbâ mono zé hã tiwi 're simani za'ra mono õ di za. Te za te te sina 're uwaimrami za'ra.

Dawasété na romnhimimnhasi wasu'u

⁴² Tawamhã Zezusi hã roti na ma duré tãma ãma uzusi za'ra, ãne: — Ãté ã norĩ hã, ai'uté dama iwapu ne, te za 're nomro, ĩzazei'wa norĩ hã. Tawamhã ãté duré ni'wa simiroti zarina hã, te za siwi ĩ'mairẽ. Tawamhã tãma iroti wasété'wai ma hã, tãma rowẽ õ uptabi di za, 'Re ihâimana u'âsi mono, za te te azâri wa. Ibutu na ẽtẽ tõmo wawẽ, da te ãma wasisi pari, âi ba da te mei 'wa'âhã, uihâ na dâ'â da, tãma rowẽ õ di aré. Tane nherẽ, isimiroti wasétézéb zarina, ĩzazei'wa te te ĩrẽme wamhã, tãma rowẽ õ uptabi di za, roti wasété'wai ma hã.

⁴³ Tahawa, wa za ãne aima waihu'u za'ra wa'wa. Asib'rata na aiwasédé hã 're waibui wa'aba mono wamhã, asib'rada asiwi 're isihâri za'ra wa'aba mono ne, te za oto 're anomro wẽ wa'aba mo. Asib'rada misire ré si rowẽ uptabi u, 're asisisi aba mono wamhã, aima 're rowẽ za'ra wa'aba mono di za, hâiwa ãma hã. Asib'rata zahuré ré, ropipa u 're asisisi aba mono wamhã, unhama u'âsi u, aima 're ropipa uptabi za'ra wa'aba mono di za.

^44-45 Duré nimomo 're aiwairébé aba mono wa, aiwasédé hã 're waibui wa'aba mono wamhã, aipara asiwi 're isihâri za'ra wa'aba mono ne, te za oto 're anomro waré wa'aba mo. Aipara misire ré si, rowẽ uptabi u 're asisisi aba mono wamhã, aima 're rowẽ za'ra wa'aba mono di za, hâiwa ãma hã. Aipara zahuré ré ropipa u, 're asisisi aba mono wamhã, aima 're ropipa uptabi za'ra wa'aba mono di za.

^46-47 Duré marĩ hã atõmo na 're 'madâ'â za'ra wa'aba mono wa, aiwasédé hã 're waibui wa'aba mono wamhã, tawamhã ato asiwi 're isani za'ra wa'aba mono ne, te za oto 're anomro waré wa'aba mo. Atõmo misire ré si, 'Re ihâimana u'âsi mono u, 're asisisi aba mono wamhã, Asib'apito wa'aba u, aima 're rowẽ za'ra wa'aba mono di za. Atõmo zahuré ré ropipa u, 'Re ihâimana u'âsi mono te te 're asãmra aba mono wamhã, aima 're ropipa uptabi za'ra wa'aba mono di za.

⁴⁸ Ropipa ãma ubu hã te te 're idahâiba uprosi za'ra mono hã, si'utõrĩ õ di. Duré uzâ hã si'utõrĩ waihu'u õ di. Õne u'â te 're hâimana u'âsi.

⁴⁹ — Marĩ na da te 're irobzépata za'ra mono zém na, te za te te 're da'apibu, 'Re ihâimana u'âsi mono hã, tô sena ĩzazei'wa 're danomro mono zô.

⁵⁰ Wa za duré aima rowasu'u za'ra wa'wa, ãne. Sa na hã dasa hã ãma se ti, dasai warĩrĩzé wa. Tane nherẽ, oto 're se si'utõrĩ mono wamhã, niha da te 'manharĩ waihu'u õ di, apâ se da, dasa da te ãma 're iwarĩrĩ za'ra mono da hã. Sa na, wa za duré aima rowasu'u za'ra wa'wa, ãne. Ni'wam norĩ hâimanazéb zarina, te za dasi'u suru na sa na 're dasaihuri, dasisawi te. Tane asisawi te, te za rowẽ na asiré 're aihâimana za'ra wa'aba mo.