Marcu 2 - ꞌRe Ihâimana Uꞌâsi Mono Zadawa Wasuꞌu

Zezusi hã aibâ ihi'ré te te ipesezé wasu'u

¹ Suru na ãma ronomro parip si, ma Zezusi norĩ hã apâ aihutu, Cafanau na danhipti'a nho'õmo nhisi u. Tawamhã awa'awi ma iwasu'u hã ropé, 'ri para ãma oto ihâimana na, Zezusi hã.

² Tawamhã da'ahâ na ma itẽme dasito. Da'ahâ na itẽme dasito mono wamhã, 'ri 're wa'wa ãma hã, duré 'ridawa ãmab zama hã da'masisi di.

³ Tawamhã Zezusi hã rowasu'u wẽ na te te dama rowasu'u ré, aibâ norĩ, ma tô ihi'ré hã itẽme siwi ãwisi, isimiwaptâ wa. Aibâ norĩ hã maparane si'uiwa na ihâiba za'ra hã.

⁴ Tazahã da'ahâ wamhã, te te siwi 'mazébré waihu'u õ di, Zezusihi u hã. Tahawa, sipapara 'ri nhisi hawi, ma tô siwi 'ri 're pu'u za'ra sada, Zezusihi uwaibaba te te siwi hiri da. Tawamhã ma tô ãma siwi si'ra, isa'warizéb ré, ihi'ré hã.

⁵ Taha wamhã, aibâ norĩ, ma tô Zezusi hã siwi ãma umnhasi, isiwadi za te te tãma ipese za'ra zém na hã. Ãhã wamhã, Zezusi isimirosa'rata za'ra ma tô tiwi sina waihu'u za'ra. Tahawa, te ihi'ré ma tinha ãne: — Ĩsiwadi, aiwasédé hã 're i'ab'manharĩ wasété mono zé, te ai'ãma hã 're ab'madâ'â mono õ di za oto.

⁶ Tame aibâ norĩ hã te dame asimro, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã.

⁷ Ta norĩ hã te 'râwi sima ãma rosa'rata za'ra, ãne: — E niha te aibâ ma tinha bété, õ hã, imorĩ'õ ma. 'Re ihâimana u'âsi mono ma, wẽ õ di, aibâ ma, te te inharĩzé hã. Dawasédé hã da te 're i'manharĩ wasété za'ra mono zé hã, ni'wa hã te te dama 're apari waihu'u mono õ di. 'Re ihâimana u'âsi mono ma si waihu'u pese di, dawasédé hã te te dama 're i'apari mono zé hã.

⁸ Tawamhã 'râwi te te ãma irosa'rata za'ra zém na, ma tô Zezusi hã sina waihu'u za'ra. Tahawa, te tãma nharĩ za'ra, ãne: — E marĩ da, te ãne ĩ'ãma irosa'rata za'ra wa'wa.

⁹ Wa hã dawasédé hã te dama 're i'apari waihu'u pese mono na, e niha te za iwaihu'u za'ra wa'wa, sena na ĩwaihu'u za'ra wa'aba da hã. Ihi'ré ma, wa tô tinha: “Aiwasédé hã 're i'ab'manharĩ wasété mono zé, te ai'ãma hã 're ab'madâ'â mono õ di za oto.” Ãne hã ĩmreme si wamhã, aima pibu prã za'ra wa'aba di tô. Ã hã imorĩ'õ hã wahutu da, duré tiza'warizé hã te te sima âri da, oto morĩ da, te tãma nharĩ wapsi, te za iwaihu'u za'ra wa'wa, ĩwaihu'u pese na sena na ĩwaihu'u pese za'ra wa'aba da oto. Taha wapsi, aima pibu pese za'ra wa'aba di za tô oto.

¹⁰ Ti'ai ãma Dasiré Ipoto ma hã tãma waihu'u pese di, dawasédé te te dama 're i'apari mono da hã, 'Re ihâimana u'âsi mono zadawa para. Ãne na asiwi waihu'u za'ra wa'aba da, wa za ihi'ré ma tinha, wahutu da. Tawamhã ihi'ré ma, te tinha oto ãne:

¹¹ — Ma'ãpé, aiwahutu. Asa'warizé âri, asõrõwa u aimorĩ da oto.

¹² Tawamhã awa'awi ma tô wahudu, aibâ hã. Tiza'warizé, ma tô ti'â. Rob u, ma tô oto iré watobro, danho'a. Tahawa, uburé, ma ãma tatob'uzu za'ra ni. 'Re ihâimana u'âsi mono ãma, te duré ãma tawata za'ra ni. Ãne ma tô dasima rowasu'u za'ra ni: — Ãne hã niwa wa te i'madâ'â za'ra õ.

Levihi wasu'u

¹³ Tawamhã Galiléa ãma isõ'u zapoto u, te apâ mo Zezusi hã. Da'ahâ na ma tô itẽme 're danomro. Tawamhã dasihutu sidâpâsi te nasi dama rowahutu, rowasu'u wẽ na.

¹⁴ Tawamhã morĩ ré, ma tô aibâ tisã, danhib'apito ma, dawi rob'uiprazé arĩ ubumroi'wa hã, Levi na isisi hã, Afeuhu 'ra hã. Tinhimiromhurizéb ãma te nhamra, rob'uiprazé te te dawi 're i'a'ubumroi mono zéb ãma. Tawamhã Zezusi hã te 'mahâ, ãne: — We aiwahutu, ĩsiré 're aimorĩ da oto. Tawamhã awa'awi ma wahudu Levi hã, isiré oto 're morĩ da.

¹⁵ Tawamhã suru na ãma ronomro wamhã, Zezusi hã te tisa, Levihi nhorõwa ãma. Isiré 're inomro mono norĩ zama, te isiré tisaihu. Da'ahâ na duré isarina idasi'aba'ré hã te duré isiré tasaihuri ni. Ta norĩ hã rob'uiprazé arĩ ubumroi'wa, duré farizeu norĩ nhimiroti zarina 're ihâimana za'ra mono õ.

¹⁶ Tawamhã ta norĩ me sai ma, sãmra ré, ma tô Zezusi hã 'madâ'â za'ra, dama rowahutu'wa norĩ hã, farizeu norĩ hã. Ta norĩ hã Zezusihi siré 're inomro mono norĩ ma, te nharĩ za'ra, ãne: — E niha bâ, te bété rob'uiprazé arĩ ubumroi'wa norĩ siré, duré dawasété na 're idahâimana za'ra mono norĩ siré zama hã dame tisa.

¹⁷ Tawamhã Zezusi hã ãne te te sina wapari za'ra wamhã, ma tô tãma nharĩ za'ra, ãne: — Hâzé ãna 're inomro mono norĩ zô, dawede'wa hã 're siwasutu za'ra mono õ di, te te 're wede za'ra mono da. Ihâzé ré norĩ zô si te za 're siwasutu za'ra, te te 're pese za'ra mono da. Tane duré wa hã. Dawẽ na 're idanomro mono norĩ zô, ĩsitẽme 're ĩhârâ mono da, we ĩmorĩ õ di. Dawasété na 're idanomro mono norĩ zô si, 're ĩhârâ mono da, wa tô wei mo.

Bâtâ na dasai ãna, idahâimana za'ra zé wasu'u

¹⁸ Tawamhã Zuwã Batistaha siré 're inomro mono norĩ hã, duré farizeu norĩ hã, ã bâtâ na te saihuri ãna tihâimana za'ra, 'Re ihâimana u'âsi mono ma, mreme zusi da. Tahawa, ni'wam norĩ hã te Zezusihi ma, nharĩ za'ra, ãne: — Zuwãhã siré 're inomro mono norĩ hã, duré farizeu norĩ hã, ã bâtâ na saihuri ãna te tihâimana za'ra, 'Re ihâimana u'âsi mono ma, mreme zusi da. E marĩ wa, asiré 're inomro mono norĩ hã, saihuri ãna ã bâtâ na hâimana za'ra õ di bété, tãma mreme zusi da.

¹⁹ Tawamhã Zezusi, ma tô asa tãma waihu'u za'ra: — Aibâ hã imrozéb u, sô ihârâ za'ra norĩ hã sihutu wamhã, e saihuri ãna, te za tihâimana za'ra. Mare di. Saihuri ãna hâimana za'ra õ di za. Aibâ imro da hã i'rata sãmra za'ra ré, te za tô isiré tisa hã tihu, to sina.

²⁰ Niwapsi te za bâdâ hã iwa waptãrã, aibâ imro da hã isiwadi norĩ wa'wa hawi, da te tiwi i'âri za'ra zéb da hã. Tawapsi te za tô sai ãna 're si'ubumro, robzei'õ na.

²¹ Da'uza hâ 'ratare hã, e te za ihâi wẽ na ãma hâiwa'aba ni, ihâ nhihâri tém na. Mare di. Ãne wamhã, te za dawi 're hâzahutu za'ra. Tawamhã ihâ'rada hã te za sina hâta. Te za oto duré dawi hâihatari za'ẽtẽ.

²² Tane duré uwa 'rãi wa'u isé hã 're wa'ui ware mono õ ré, da te 're séme waihu'u mono õ di, romhâ 'manharĩ 'ratare 'remhã. Wa'ui ware õ ré, da te 're séme mono nherẽ, oto wa'ui ware wamhã, te za romhâ 'manharĩ 'ratare hã sina wazu. Tawamhã uwa 'rãi wa'u isé hã te za asa'wa. Romhâ 'manharĩ hã te za duré hâihaiwamna. Itép si'uiwa 'rep si, te za da te 're sé, rob'rãi wa'u té hã.

Romhuri zahârizém na roti wasu'u

²³ Tawamhã romhuri zahârizém na, ma tô buru nho wa'wai baba ro'rahâri za'ra Zezusi norĩ hã, sabadu na. Isiré 're inomro mono norĩ hã ma tô te te sima 'rãnhinarĩ za'ra, te te huri mono da.

²⁴ Tawamhã farizeu norĩ hã te Zezusihi ma nharĩ za'ra, ãne: — E niha, romhuri zahârizém na nherẽ, te te sima 'rãnhinarĩ za'ra, asiré 're inomro mono norĩ hã, wahi'rata norĩ hã romhuri zahârizém na te te dawi 're sawi za'ra mono nherẽ.

²⁵ Tawamhã Zezusi ma asa tãma waihu'u za'ra: — E apito Dawihi wasu'u na rob'ui'éré hã 're sõré za'ra wa'aba mono ã bâ, te te irob'manharĩzém na, isiré norĩ me, mra te te simroi wamhã.

²⁶ 'Re ihâimana u'âsi mono nhorõwa 'ri u, ma tô ãzé, apito Dawi hã. Abiata hã 're hâimana mono ré, ma tô ãzé. 'Re ihâimana u'âsi mono ma da'ãma romhuri'wa ipire uptabi, Abiata hã, ta hã tisiré norĩ nhipai u sasedoti ipire uptabi. Tawamhã sébré wamhã, ma tô 'mai'rẽ i'u'ẽne hã, Dawi, 'Re ihâimana u'âsi mono ma, aré da te isa'ra za'ra hã. Duré tisiré norĩ ma, ma tô tãma a za'ra. 'Re ihâimana u'âsi mono, ma tô aré pisutu, da'ãma romhuri'wa norĩ si, i'u'ẽne hã te te 're ihuri mono da hã, sasedoti norĩ si. Tane nherẽ, ma tô 'mai'rẽne za'ra, Dawi norĩ hã.

^27-28 Tawamhã ãne ma tô Zezusi hã tãma 'rãsutu za'ra, timreme na: — Wa hã 'Re ihâimana u'âsi mono te te ĩpisudu, dasiré ĩpoto da, ti'ai ãma. Tahawa, dama ĩpire di, sabadu na roti hã te dama 're i'apisutu mono zéb da hã.