Marcu 10 - ꞌRe Ihâimana Uꞌâsi Mono Zadawa Wasuꞌu

Dasiwi 're idasiwanhizari za'ra mono zém na rowasu'u

¹ Tawamhã Zezusi hã Cafanau hawi te oto mo, Zudéa na danhipti'a nho'õmo nhisi u, morĩ da. Tawamhã Zodã pa zara u, ma tô saprĩ. Te te saprĩ wamhã, da'ahâ uptabi na ma tô duré itẽme dasito. Tahawa, te duré dama rowahutu, te te dama 're irowahutu u'âsi mono zém na, Zezusi hã.

² Tawamhã ni'wam norĩ farizeu hã, timreme na te te tãma ãma upa za'ra wa, te te siwi mreme wẽ'õ da, te ãne siwi sadanha: — Aibâ norĩ hã timro me sima 're siwanhizari za'ra mono wamhã, e wahi'rata norĩ nhimiroti zarina, te za timro hã time, aibâ hã.

³ Tawamhã asa ma Zezusi hã ãma sada'âbâ za'ra, ãne: — E niha ma tô Mozési hã bété dama waihu'u aré, damro me dasiwi 're idasiwanhizari za'ra mono zém na hã.

⁴ Tawamhã asa ma duré ãma sada'âbâ za'ra: — Mozési hã ãne ma tô dama roti: Aibâ norĩ hã timro me, siwi 're siwanhizari za'ra mono õ ré, te za rob'ui'éré hã timro ma te te 're sõmri za'ra pi'õi ma, da te ãma 're waihu'u za'ra mono da, te te imezém na hã. Taha parip si, te za oto pi'õi ma, te te 're rob'ru za'ra.

⁵ Tawamhã Zezusi te duré asa tãma nharĩ za'ra: — Ta hã Mozési hã aipẽ'ẽ tete za'ra wa'aba wa, ma tô ãne na te te aima 're roti za'ra wa'wa.

⁶ Ropoto na'rata hawimhã, ãnei õ di. Ropoto na'rata hawimhã, ma tô 'Re ihâimana u'âsi mono hã aibâ hã poto, a'uwẽ na. Pi'õ zama ma tô duré poto.

⁷ Tahawa, aibâ hã 're mro za'ra mono wamhã, te za timama norĩ hã te te 're rẽme za'ra, timro me si, siré 're simasisi zahuré mono da oto.

⁸ Sina hâiba sitob zahuré wamhã, maparane ihâiba nherẽ, misi ihâiba ne, te za siré 're hâimana u'âsi zahuré oto.

⁹ Tahawa, 'Re ihâimana u'âsi mono, dasi'ãma te te 're da'ahâiba to mono nherẽ, ni'wa hã da'ãma 're siwanhizari mono õ di za. Mare di.

¹⁰ Taha pari, 'ri tẽme sihutu wamhã, isiré 're inomro mono norĩ hã ma tô ãma siwi sadanha.

¹¹ Tawamhã Zezusi asa ma tô tãma waihu'u za'ra: — Ni'wa hã aibâ timro te te mei wa, duré oto pi'õ aimawi na mro wamhã, te za tiwasédé hã 'manha, aibâ hã.

¹² Duré ni'wa hã pi'õ, timro te te mei wa, duré oto aibâ aimawi na mro wamhã, te za tiwasédé hã 'manha, pi'õ hã.

Zezusi hã, ai'uté te te i'azawizém na rowasu'u

¹³ Taha pari, ma tô da'ra hã ãwisi za'ra ni Zezusihi u, 'Re ihâimana u'âsi mono ma, ãma mreme za'ra da, te te 're apawaptob u'âsi mono da, iwẽ na. Tane nherẽ, isiré 're inomro mono norĩ hã ma tô dawẽ'õ za'ra, da'ra hã da te itẽme 'wasari tõ da, Zezusihi u.

¹⁴ Ãne te te idawẽ'õ za'ra zém na hã, te te wapari ze za'ra õ di, Zezusi hã. Tahawa, te ãne tãma nharĩ za'ra: — Tô'ã. Dawi rosawi za'ra wa'aba tõ. A'â we ĩtẽme da te simroi mono, ai'uté norĩ hã. Ã norĩ hã ai'uté hã õne haré simizazei pese na 're ihâimana za'ra mono ne, ni'wam norĩ 're hâimana za'ra mono wapsi, te za 'Re ihâimana u'âsi mono hã ãma 're sib'a'uwẽ za'ra.

¹⁵ Tô sena, wa aima waihu'u za'ra wa'wa. Ni'wam norĩ hã ai'uté dama iwapu ne, 're hâimana za'ra mono õ wamhã, 'Re ihâimana u'âsi mono, da'ãma 're isib'a'uwẽ mono zéb u, 're sisisi mono õ di za.

¹⁶ Tawamhã awa'awi ma tô nasi ai'uté hã dawi azaza tipa. Duré tinhib'rata na te te nasi upi za'ra sina, 'Re ihâimana u'âsi mono wi, ma tô ãma arowaptẽ, iwẽ hã te te tãma 're anhomri mono da.

Aibâ isibro pese na rowasu'u

¹⁷ Zezusi norĩ hã sina pahâ za'ra õ ré, te aibâ hã isarina tiwara za'ra. Ãma wisi za'ra wamhã, Zezusihi papara ma aime hi'rãtitõ. Tawamhã ãne te sina sadanha: — Rowahutu'wa, aiwẽ di a hã. E marĩ iwẽ hã wa za 'manha, 're idanomro u'âsi mono zé hã te ĩsina i'uwaimrami da hã.

¹⁸ Tawamhã asa te Zezusi hã tãma tinha, ãne: — E niha te ĩ'ãma aiwa, ĩwẽ na. 'Re ihâimana u'âsi mono si iwẽ uptabi hã. Ni'wa isine hã hâimana õ di.

¹⁹ A hã aima waihu'u pese di, 'Re ihâimana u'âsi mono nhimiroti hã. Ãne dama isimiroti hã: “'Re danhimroi wa'aba mono õ di za. Duré aimro na asiwi 're asipsaihuri za'ra wa'aba mono õ di za. Duré danhibrom na dawi 're asipsaihuri za'ra wa'aba mono õ di za. Duré dahâiba wasu'u na dama 're asadawa nhipese za'ra wa'aba mono õ di za. Duré dama 're asadawa nhipese za'ra wa'aba mono õ di za. Duré aimama hã te za 're iwazé pese mo, ana zama.” Ãne 'Re ihâimana u'âsi mono nhimiroti hã.

²⁰ Tawamhã asa te Zezusihi ma siwasu'u: — Rowahutu'wa, ĩprédu wi, wa tô te 're 'madâ'â pese, isimiroti hã.

²¹ Tawamhã Zezusi hã te aibâ 'madâ, isawi hã tãma hâimana sina. Ãne te tãma tinha: — Zahadu te misi aiwi sô rowaptâ, tãma ãma i'uwaimrami'õ hã. Mo oto aimorĩ apâ, asibro hã uburé dama wede mono da, iwa'âbâ zô, isibrob'õ norĩ ma, sõmri mono da. Ãne wamhã, duré asibro pese di za, hâiwa ãma. Taha parip si, te za we apâ aimo ĩtẽme, ĩsiré 're aimorĩ da hã oto.

²² Aibâ hã ãne hã te te wapari wamhã, ma tô tiwi tirobzei'õ. E marĩ wa. Sibrob ahâ uptabi wa. Tahawa, te oto mo apâ, robzei ãna.

²³ Tawamhã aibâ za'u, te Zezusi hã 'madâ'â za'ra, tisiré 're inomro mono norĩ hã. Tahawa, ma tô ãne tãma waihu'u za'ra: — Isibro pese norĩ hã 'Re ihâimana u'âsi mono, da'ãma 're isib'a'uwẽ mono zéb u 're isisisi mono da hã, pire di. Tãma hã pire uptabi za'ra di za.

²⁴ Tawamhã te ãma rosa'rata za'ra, te te tãma iwaihu'u za'ra zém na hã. Ãne ma duré tãma waihu'u za'ra: — Ĩsiwadi norĩ, e niha te za 'Re ihâimana u'âsi mono ãma, 're sib'apito za'ra, itẽme 're isisisi mono zéb da hã. Tãma pire uptabi za'ra di.

²⁵ E niha te za awaru ba'õmore hã isi'uwazi para'õtõ zapu'u 're ãzé. Sébré waihu'u õ di. Tane, isibro pese norĩ hã si'uihâ na 're sisisi waihu'u mono õ di za, 'Re ihâimana u'âsi mono, da'ãma 're isib'a'uwẽ mono zéb u hã.

²⁶ Ãne imreme hã te te wapari za'ra wamhã, ma tô ãma titob'uzu za'ra. Tawamhã te ãma sisadanharĩ za'ra, ãne: — Isibro pese norĩ ma, waihu'u za'ra õ wamhã, e 'wam norĩ hã te za bété danho'reptuzé hã te te sina 're uwaimrami za'ra, dadâ'â ãna 're idanomro u'âsi mono zé hã. Ãté ni'wai õ di.

²⁷ Tawamhã Zezusi hã te 'madâ'â za'ra. Ãne ma tô tãma waihu'u za'ra: — Dasi'uihâ na danho'reptuzé hã, da te dasina 're uwaimrami za'ra mono õ di za. Dama waihu'u õ di. 'Re ihâimana u'âsi mono si siminho'reptu waihu'u pese di. Taha ma si, uburé marĩ hã 'manharĩ waihu'u pese uptabi di.

²⁸ Tawamhã Pedru hã te asa tãma siwasu'u: — Wa norĩ hã uburé wa tô wanhibro hã wasipara rẽme za'ra ni, asiré 're wanomro mono da hã oto.

²⁹ Tawamhã Zezusi hã ãne ma duré tãma waihu'u za'ra: — Tane tô. Ĩwapari pese za'ra wa'aba. Ãté ni'wa hã te te 're ĩzawi pese mono zéb zarina, te za tinhorõwa hã a'â tirẽ, te te dama 're ĩzadawa wasu'u mono da. Ãté tisisãnawã norĩ, duré tihidiba norĩ te za a'â rẽme za'ra. Ãté tina, timama, duré ti'ra norĩ hã te za a'â rẽme za'ra. Ãté tinhipti'a zama, te za a'â tirẽ.

³⁰ Ãne wamhã, ti'ai ãma 're morĩ ré, te za marĩ iwẽ uptabi hã ahâ na tãma 're hâimana za'ra, 'Re ihâimana u'âsi mono nhib'ratamhã, isõrõwa za'ra hã, isisãnawã norĩ hã, ihidiba norĩ hã, i'ra norĩ hã, duré isipti'a hã. Marĩ iwẽ hã tãma 're ihâimana za'ra mono zu, te za duré rowasédé hã tãma 're hâimana za'ra, taré da te 're i'ruiwapari za'ra mono zéb zarina. Niwapsi te za duré tãma pisutu, dâ'â ãna 're morĩ u'âsi da, rowẽ uptabi ãma, 'Re ihâimana u'âsi mono hã.

³¹ Ni'wam norĩ hã ahâ uptabi na pire na ti'ab ré dama 're hâimana za'ra mono nherẽ, te za 'Re ihâimana u'âsi mono hã te te tãma 're apisutu, wapu na 're hâimana za'ra mono da oto, za da'ãma 're isib'a'uwẽ mono zéb ãma hã. Duré ni'wam norĩ hã ahâ uptabi na ti'ab ré wapu na dama 're hâimana za'ra mono nherẽ, te za te te tãma 're apisutu, pire na oto 're hâimana za'ra mono da.

Zezusi hã za tidâ'âzém na, duré za tihâiwa'utuzém na zama isiwasu'u zahu zé

³² Tawamhã Zezusi norĩ hã ma oto bâdâdi na hã sõ'a na sai'uri za'ra, Zeruzalẽ u. Zezusi hã tisiré 're inomro mono norĩ nhowa, ma tô mo. Sina hâtâ'â ãna, morĩ wa, te ãma rosa'rata za'ra. Tahawa, ma tô isiré 're inomro mono norĩ me isi'aba'ré norĩ hã sina tipahi za'ra. Tawamhã danhiti te sima satõrĩ za'ra, tisiré 're inomro mono norĩ hã, te te tãma rowasu'u siromo za'ra da, za tãma iromhâimanazém na.

^33-34 Tawamhã ãne te tãma rowasu'u za'ra: — Ĩwapari pese za'ra wa'aba. Ãhã na Zeruzalẽ u, wa ai'aba'ré ni. Tame ti'ai ãma Dasiré Ipodo hã te za dasima hâiba nhomri ni, sasedoti ipire norĩ ma, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ ma zama. Ta norĩ hã iwasédé te te ãma isa'ra za'ra zéb zarina, te za dama 'ru za'ra, da te wĩrĩ da, dasiwi. Tawamhã zudeu'õ norĩ ma, te za siwi hâiba nho. Ta norĩ hã te za ãma tiwa'ẽ za'ra, zudeu'õ norĩ hã. Tizadaipro na te za duré nasi siwi upto. Te za duré te te siwi 're pré'é. Tawamhã te za oto siwi tiwĩ. Tane nherẽ, bâdâ maparane ãma si'utõrĩ õ ré, te za apâ hâiwa'udu.

Tiagu norĩ hã Zuwãhã me, te te sina irowaptẽrẽ zahuré zé wasu'u

³⁵ Taha pari, Tiagu hã Zuwãhã me, Zebedehe 'ra zahuré hã, ma tô Zezusihi u sina rotété zahuré, te te tãma nharĩ zahuré da, ãne: — Rowahutu'wa, wa za aiwi rowaptẽrẽ ni. Ma'ãpé, ãma wama uwaimrami, wa te wasima iwẽ hã.

³⁶ Tawamhã Zezusi ma ãma sada'âbâ zahuré: — E marĩ ma tô asima ĩwẽ wa'wa, te aima ãma i'uwaimrami aba da hã, asima iwẽ wa'aba zé hã.

³⁷ Tawamhã asa te duré tãma nharĩ zahuré, Zezusihi ma: — Niwamhã danhib'apito simasisizém na te za 're asãmra mo, dama aipire uptabi na 're aihâimana mono da. Ãhã wa, ma'ãpé wama pisutu, nima hã asimire niwĩ 're sãmra mono da, duré nima hã asimi'e niwĩ 're sãmra mono da, asine dama wapire na 're wahâimana mono da.

³⁸ Tawamhã te duré asa tãma nharĩ zahuré, ãne: — Rosa'rata ãna te ãne asina ĩzadanharĩ 'wa. Wa hã wa za robzépata za'ẽtẽ, dawi ĩsisawi ãna. E tawamhã sada asiptete aba di za, za te irobzépata za'ẽtẽ ne, irobzépata aba da hã.

³⁹ Tawamhã asa te duré Zezusihi ma siwaihu'u zahuré: — Ĩhe. Sada wanhiptete di za, asine wa te irobzépata da hã. Tawamhã Zezusi ma duré asa ãma tãma wa'rãmi zahuré, ãne: — Te za tô ĩsine irobzépata za'ẽtẽ 'wa.

⁴⁰ Tane nherẽ, ĩsi'uihâ na te aipisutu waihu'u aba õ di, dama aipire wa'aba na 're aihâimana aba mono zéb da hã ĩnhimire niwĩ, duré ĩnhimi'e niwĩ. 'Re ihâimana u'âsi mono si te za te te dama 're apisutu, te te sima 're ida'awẽ mono zéb uwaibaba, dama pire na ĩ'rata 're dahâimana u'âsi za'ra mono da.

⁴¹ Tawamhã Zezusihi siré 're inomro mono norĩ hã 10 na ihâiba za'ra hã, Tiagu norĩ mreme te te wapari za'ra wamhã, ma tô sada tinhiti'ru za'ra.

⁴² Tahawa, Zezusi te sô tihârâ za'ra, 'râwi itẽme si'rã'õtõ da. Tawamhã ãne ma tô tãma waihu'u za'ra: — Ti'ai ãma danhib'apito na da te 're iwamri za'ra mono norĩ hã te pire uptabi na dama 're hâimana za'ra. Sa'ẽtẽ te duré te te 're dawada'uri za'ra, isimiroti hã da te 're 'madâ'â za'ra mono da.

⁴³ Tane asima 're aihâimana za'ra wa'aba mono õ di za, a norĩ wa'wa hã. Asiré norĩ ma, ai'maipire wa'aba da, asima 're 'mairob'ruiwapari aba mono wamhã, te za asiré hã 're i'maipawaptob u'âsi aba mo, marĩ zô 're ai'manhimnhasi aba mono ãna.

⁴⁴ Duré 'râwi asima aipire uptabi na, 're ai'maihâimana aba mono da, asima 'maiwẽ uptabi aba wamhã, pawa'âbâ ãna romhuri'wa ne, te za asima 're i'mairomhuri wẽ wa'aba mo.

⁴⁵ Tane duré, ti'ai Dasiré Ipodo hã da te tãma 're romhuri za'ra mono da, we morĩ õ di, ti'ai u hã. Te te 're da'apawapto mono da si, te we datẽme mo, sihâiba zawi ãna dazada dâ'â da, da'upana te te da'awa'âbâ da.

Zezusi hã Batimeu te te ito pesezé wasu'u

⁴⁶ Tawamhã Zezusi norĩ hã ma tô oto aihutu, Zerico na 'ri nho'õmo nhisi u. Zerico hawi duré si'aba'réi wamhã, da'ahâ uptabi na te isiré ai'aba'ré ni. Si'aba'réi ré, ma tô aibâ hã sõpẽtẽ za'ra itob'a hã, bâdâdi zababa isãmra hã. Itob'a hã Batimeu na isisi hã, Timezuhu 'ra. Rob'uiprazém na te nasi da'awa, da te tãma a za'ra da.

⁴⁷ Tawamhã ma tô Zezusihi wasu'u hã wapa, Nazaré nhihudu hã isababa te te iro'razâri na hã. Tahawa, te te sina 'mahârâ, sa'ẽtẽ, itob'a hã, ãne: — Zezusi, Dawihi nhihudu, ma'ãpé ĩ'ãma aipẽ'ẽzé na.

⁴⁸ Tawamhã da'ahâ na te tãma nharĩ za'ra ni, ari'iwi sãmra da. Tane nherẽ, te nasi sa'ẽtẽ sina 'mahâ: — Dawihi nhihudu, ĩ'ãma aipẽ'ẽzé na.

⁴⁹ Tawamhã ma tô mazazâ, Zezusi hã. Ãne te dama ti'ru: — Sô aihârâ za'ra wa'aba, we ĩtẽme morĩ da. Tahawa, te dasiwi 'mahârâ ni, itob'a hã: — Aiwahutu. Zezusi hã te asô hâ, itẽme aimorĩ da. Aima rowẽ di za oto.

⁵⁰ Tawamhã Batimeu hã tisi'ubuzé ma tô time, si'aba'ré na wahutu da, Zezusihi u morĩ da.

⁵¹ Itẽme wisi wamhã, Zezusi te ãne sadanha: — E marĩ te asima iwẽ, te ãma aima i'uwaimrami da hã. — Rowahutu'wa, ĩto pese da, wa ĩsima wẽ, apâ te 're rob'madâ'â mono da. — Ãne te asa tãma si'ru.

⁵² Tawamhã Zezusi te ãne tãma tinha: — Te za oto aimo. Asina ĩ'umnhasi wa, ma tô ato pe. Tawamhã awa'awi ma tô rob'madâ'â wẽ, aibâ hã. Tawamhã Zezusihi zarina te oto mo, bâdâdi na.