Marcu 1 - ꞌRe Ihâimana Uꞌâsi Mono Zadawa Wasuꞌu

Zuwã Batistaha wasu'u

^1-3 Ãhã na isãna'rata hawi, wa za aima rowasu'u za'ra wa'wa, Zezu Cristuhu wasu'uwẽ na, 'Re ihâimana u'âsi mono 'ra wasu'u na. Romhâ ré, ma tô ãma rob'ui'éré siro, Izaia hã, 'Re ihâimana u'âsi mono zadawa 'mahârâ 'rata 'wa hã. Duréihã 'Re ihâimana u'âsi mono hã, ti'ra ma, te te iwaihu'uzém na ma tô ãma rob'ui'éré, ãne: “Wa hã wa za satõ ĩzadawa wasu'u'wa hã, aiwana, te te asô ropese mono da. Ãne te za te te dama 're rob'mahârâ, mreme 'rãihâ sina, a'ubuni wi: Ni'wa hã te za te te dama 're rob'mahârâ, a'ubuni wi: Bâdâdi hã asiwi ropese aba, Wanhib'apito zô. Imana 'rãmi bâdâdi hã sô sa'ra wa'aba mono, awa'awi si da.”

⁴ Tawamhã Izaia te te dama irob'ui'éré zarina, te oto Zuwã Batista hã â dawabzuri hã te te dama 're ab'manharĩ, a'ubuni wi. Ãne te tawamhã te te oto dama 're roti: — Ma'ãpé, aiwasété wi 're aipizari za'ra wa'aba mono, 'Re ihâimana u'âsi mono, marĩ 're i'manharĩ wasété za'ra wa'aba mono zé te te aima 're apari aba mono da. Tawamhã â dawabzuri hã wa za te aima 're ab'manharĩ 'wa. — Ãne ma tô te te dama 're roti, Zuwã Batista hã.

⁵ Da'ahâ uptabi na te itẽme 're dasito, Zudéa na danhipti'a nho'õmo nhisi hawi. Zeruzalẽ na 'ri nho'õmo nhisi hawib zama, te itẽme 're dasito. Tawamhã dasisõ'a dawasété na, 'Re ihâimana u'âsi mono ma 're dasiwasu'u za'ra mono wamhã, ma tô â dawabzuri hã te te dama 're ab'manharĩ Zuwã hã, Zodã pa na â nhisi ãma.

⁶ Zuwã hã awaru ba'õmore zéré 'manharĩ na te 're si'uza. Duré romhâ 'manharĩ hâiwaré na te ãma 're si'usisi. 'Riti na si, te duré 're sa. Ropĩni na zama te duré 're sa.

⁷ Ãne te te oto dama 're rowasu'u: — Ĩza'u si te za ĩma ipire uptabi hã wei wi. Ĩma pire uptabi wa, ipara'uza wasisizé, te duré tãma wasihu waihu'u õ di za.

⁸ Wa hã wa tô â uptabi na si te 're aihâiba ubu za'ra wa'wa, â dawabzuri hã te aima 're ab'manharĩ aba mono wamhã. Tanei õ di za oto. Ĩma ipire hã wei wisi wapsi, te za oto 'Re ihâimana u'âsi mono pẽ'ẽzani na te te 're aihâiba ubu za'ra wa'wa, iré 're anomro u'âsi aba mono da. Wẽ uptabi di, taha pẽ'ẽzani hã.

Zezusi hã â dawabzuri te te i'manharĩzé wasu'u

⁹ Tawamhã ãne te te dama 're wasu'u mono ré, ma tô Zezusi hã itẽme wi, Nazaré na 'ri wa'õtõ nhisi hawi. Galiléa na danhipti'a nho'õmo nhisi ãma, Nazaré hã. Itẽme wisi wamhã, ma â dawabzuri hã Zezusihi ma 'manha, Zodã pa na â nhisi ãma.

¹⁰ Tawamhã â hawi watobro wi, ma hâiwa hã si'ridawa. Hâiwa hawi, ma we 'Re ihâimana u'âsi mono pẽ'ẽzani hã itẽme si'ra, utu'u ne. Taha wamhã, ma tô sina 'madâ, Zezusi hã.

¹¹ Tawamhã hâiwa hawi, te we 'Re ihâimana u'âsi mono hã Zezusihi ma tinha ãne: — A hã ĩ'ra. Ĩma asawi uptabi di. Aima ĩto za'ẽtẽ uptabi di.

Wa'uburé hã Zezusi te te iwada'urizé wasu'u

¹² Tawamhã Zezusi hã â dawabzuri te te 'manharĩ pari, te oto 'Re ihâimana u'âsi mono pẽ'ẽzani hã satõ, a'ubuni u sãmra da. Tahawa, te oto mo.

¹³ Tawamhã a'ubuni wi sãmra ré, bâdâ hã ahâ na ma ãma si'utõrĩ, 40 na. Tame sãmra ré, Satanasi hã te aré nasi wada'u, isimiroti na te te saze da. A'ubuni ãma abaze zahi hã te 're hâimana za'ra. Tane nherẽ, te taha wamhã 'Re ihâimana u'âsi mono ma romhuri'wa norĩ hã hâiwa hawimhã we siwi 'madâ'â pese.

Zezusi hã romhuri na te te isãna'ratazé wasu'u

¹⁴ Tawamhã Zezusi hã te mo, Galiléa u. Zuwã Batista hã dazazéb 're, da te dasiwi sẽrẽ pari, te Zezusi hã mo. Tawamhã rowasu'u wẽ hã, 'Re ihâimana u'âsi mono te te tãma isõmri na, te Zezusi hã te te dama 're rowasu'u oto.

¹⁵ Ãne ma tô te te dama 're rowasu'u: — Ãhã na bâdâ hã ma tô oto iwa waptãrã, 'Re ihâimana u'âsi mono, da'ãma 're isib'a'uwẽ mono zéb da hã. Ma'ãpé aiwasété wi, 're aipizari za'ra wa'aba mono za, 'Re ihâimana u'âsi mono niwĩp si oto iwasu'uwẽ hã 're saze za'ra wa'aba mono da.

¹⁶ Tawamhã â zaihâ u ma tô wi, Zezusi hã, Galiléa na isõ'u nhisi u hã. Wisi wamhã, â zababa 're morĩ ré, ma tô tepe mrami na romhuri'wa norĩ hã sõpẽtẽ zahuré. Sima Pedru norĩ, isisãnawã Ãdréhé me. Ta norĩ hã tepe zô, te nasi abazipara hã wabzuri zahuré.

¹⁷ Tawamhã ãne te Zezusi hã 'mahârâ zahuré: — We ane wa'aba, ĩsiré 're ane wa'aba da oto, romhuri na ãma aima ĩsisanho wa'aba da, za ĩma 're ida'awaibui wa'aba mono zéb da na hã.

¹⁸ Tawamhã õne haré ma tãma marẽme zahuré, abazipara ma. Taha wamhã, Zezusihi siré te oto tineb zahuré.

¹⁹ Tawamhã suru na sina pahâ wi, ma duré 'madâ'â zahuré, Tiagu norĩ hã Zuwãhã me. Ta norĩ hã Zebedehe 'ra zahuré. Abazipara sisinarĩ hã te apâ te te ãma a'rã'õtõ zahuré, uba're 're.

²⁰ Tawamhã Zezusi te duré ta norĩ zô hã tihârâ zahuré, isiré neb zahuré da. Ãhã wamhã, õne haré ma tô timama zahuré hã, duré tite zahuré romhuri'wa norĩ hã sisa'u rẽme za'ra, uba're 're isi'ubumro norĩ hã, Zezusihi siré si oto 're neb zahuré da.

Zezusi hã aibâ ma, wa'uburé te te isãmrazé wasu'u

²¹ Tawamhã Zezusi norĩ hã ma tô aihutu, Cafanau na 'ri nho'õmo nhisi u. Tawamhã sabadu na wa, ma awa'awi ãzé Zezusi hã, zudeu norĩ te rowahutuzéb u, te te dama rowahutu da, tô romhuri zahârizém na wa.

²² 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ nhimirowasu'u nei õ di, Zezusi te te dama 're irowahutu mono zé hã. Simirowahutu pire na te dama hã rowahutu. Simirowasu'u wẽ wa, ma tô duré ãma tatob'uzu za'ra ni.

²³ Tawamhã te te dama rowasu'u ré, ma we aibâ hã ãzé, rowahutuzéb u, wa'uburé ré 're imorĩ hã. Sébré wi, te sa'ẽtẽ 'mahâ ãne:

²⁴ — Zezusi, Nazaré nhihudu, e marĩ zô te we aimo. E wa'uprosi da, te we aimo. A hã ĩma aiwaihu'u pese di, 'Re ihâimana u'âsi mono, we te te i'asatõrĩ na hã. Duré aiwẽ uptabi di, a hã.

²⁵ Tawamhã Zezusi te asa tãma tinha ãne, wa'uburé ma: — Tô'ã, we ĩma nharĩ tõ. Mo oto aibâ hawi aiwatobro.

²⁶ Tawamhã sisa'u te sa'ẽtẽ hâiba wasutu, wa'uburé hã. Taha pari sadari sina, ma aibâ hawi watobro.

²⁷ Tawamhã ma ãma tatob'uzu za'ra ni. 'Râwi te ãma dasima rowasu'u za'ra ni, ãne: — Õ hã, e niha. Wama isa'rese õ na, te wama rowahutu za'ra. Wa'uburé norĩ ma, te te rob'rui wamhã, ma tô duré wapari za'ra, imreme hã.

²⁸ Tahawa, Zezusihi wasu'u hã ma tô waptu na hã ropé, Galiléa na danhipti'ai 're, daro mono bâ.

Sima Pedruhu maprewa, Zezusi te te ipesezé wasu'u

²⁹ Taha pari, ma tô Zezusi norĩ hã rowahutuzém hawi wairé, Sima Pedru norĩ nhorõwa u si'aba'ré da. Tisiséme me, Ãdréhé me, te siré 're simasisi zahuré, Sima Pedru norĩ hã. Ta norĩ hã, Tiagu norĩ me, Zuwã norĩ me hã, ma asisi 'ri para u, Zezusihi siré.

³⁰ Tame te Simahã maprewa hã hâzé ré nomro, wa'ro za'ẽtẽ na. Tawamhã sisisi wi, te Zezusihi ma 'mahârâ za'ra, hâzé na inomro na.

³¹ Tahawa, te oto itẽme mo, inomrozéb u. Tawamhã ma pa'â, wahutu da. Tahawa, ma awa'awi tiwahâ. Tawamhã ma tô tãma api za'ra ni Zezusi norĩ ma, saihuri da.

Zezusi hã Galiléa ãma te te 're ida'apawapto mono zém na rowasu'u

³² Tawamhã bâdâ sébrézéb u, ma tô itẽmemhã tasi'ãwisi za'ra ni, Zezusihi u, dahâzé mono bâ. Wa'uburé ré 're idanomro mono norĩ zama, ma itẽme ãwisi za'ra ni.

³³ Uburé 'ri ahâ 're, 're idasi'ubumroi mono norĩ hã ma itẽme tasi'rã'õtõ ni, 'ri nho'rem nho'õmob u.

³⁴ Tawamhã dahâzé mono bâ, ma da'apese, da'ahâ na. Duré timreme na ma wa'uburé hã dama anhamra, ahâ na. Wa'uburé norĩ hã ma tô waihu'u za'ra Zezusi hã, 'Re ihâimana u'âsi mono 'ra na. Tahawa, Zezusi ma tô wa'uburé norĩ hã sina sadawa uwati za'ra, te te dama rowasu'u za'ra tõ da hã.

³⁵ Tawamhã robza'rã ré, ma wahudu Zezusi hã, 'ri nhiti morĩ da, a'ubuni u. Taha wamhã, te tame a'â tihâiba, 'Re ihâimana u'âsi mono ma, mreme da.

³⁶ Tawamhã Sima Pedru norĩ hã te Zezusihi zô ropâ sô sõpré, tisiré norĩ me, te te siwi sõpẽtẽ da.

³⁷ Tawamhã te te siwi sõpẽtẽ wamhã, te tãma rowasu'u za'ra ãne: — Aihĩni te asô hã tanhopré ni.

³⁸ Tawamhã Zezusi te asa tãma nharĩ za'ra ãne: — Oto wasi'aba'réi wa'aba, 'râwi 'ri wa'õtõ 're, 're idahâimana za'ra mono u, tamomo zama te iwasu'uwẽ na hã da'apo're pu'u mono da. Taha da, wa wei mo, wa hã.

³⁹ Tawamhã daro mono bâ te 're mo, Galiléa ãma 're idasi'ubumroi mono norĩ ma, iwasu'uwẽ hã te te dama 're wasu'u mono da, zudeu norĩ te, rowahutuzé mono bâ. Wa'uburé hã te te duré dama 're anhamra.

Aibâ i'wa're ré hã, Zezusi te te ipesezé wasu'u

⁴⁰ Tawamhã aibâ hã ma itẽme wi, i'wa're ré hã. Hi'rãtitõ ma aime, Zezusihi papara, te te tãma nharĩ da, ãne: — Ĩma aiwaihu'u pese di, asimipese waihu'u pese na hã. Tahawa, asima ĩwẽ wamhã, te za ĩpe. — Ãne te Zezusihi ma si'ru, te te pese da.

⁴¹ Tawamhã Zezusi hã ãma pẽ'ẽzé wa, ma tô tinhib'rada hã wahutu, te te ãma upi da. Te te upi wamhã, ãne te tãma tinha: — Tane tô. Wa tô ĩsima aiwẽ, te aipese da. Tâibâ oto aihâzé hã.

⁴² Tawamhã awa'awi ma i'wa're hã tãma apa. Ma tô tihâiba wẽ pese oto duré.

^43-44 Tawamhã Zezusi hã ma tô sina sadawa uwati, te te dama sina wasu'u tõ da. Ãne te tãma tinha: — Ĩwapari pese, asina. Ni'wai ma, asina ĩwasu'u õ di za, te i'aipesezém na hã. Sasedoti u si te za aimo, 'Re ihâimana u'âsi mono ma, da'ãma romhuri'wai u si, aihâiba wẽ zô te te aihâiba 'madâ'â da. Taha parip si, 'Re ihâimana u'âsi mono ma, te za asõpru, Mozésihi nhimiroti zarina, aipesezém na da te ãma aiwaihu'u za'ra da, sena na hã.

⁴⁵ Tazahã aibâ hã rowasu'u wẽ na ma tô ãma ropé. Tahawa, sõ'awi 'ri ahâ u hã datẽme 're ne waihu'u mono õ di, Zezusi hã. Tahawa, a'ubuni wi te a'â 're hâimana, danhiti. Tame 're hâimana mono ré, te itẽme 're dasihutu, daro mono bâ, da te 're sabu za'ra mono da.