Galata 6 - ꞌRe Ihâimana Uꞌâsi Mono Zadawa Wasuꞌu

Roti iwẽ na 're idasipawaptob za'ra mono zém na rowasu'u

¹ Ĩsisãnawã norĩ, ãne wa za duré aima waihu'u za'ra wa'wa. Ãté ni'wa hã te za tihâimanazém na upa. Tawamhã 'Re ihâimana u'âsi mono pẽ'ẽzani nhimiwada'uri zarina si 're aihâimana za'ra wa'aba mono wamhã, te za aiwaimri 're ipawapto pese za'ra wa'aba mo, apâ 're hâimana wẽ mono da, ni'wa hã. 'Re pawaptob za'ra wa'aba mono wamhã, ma'ãpé 'râwi a'â asina 're asõpré wa'aba mono za, a norĩ wa'aba zama, wa'rui'wa nhimiwada'uri zarina, aihâimanazém na 're upa za'ra wa'aba mono tõ da.

² Marĩ wa, aiwi 're robzei'õ za'ra wa'aba mono wamhã, ma'ãpé 're asipawapto pese za'ra wa'aba mono, roti iwẽ na si. Ãne wamhã, Cristuhu nhimiroti wẽ 'madâ'â'wa te za tô 're aihâimana za'ra wa'aba mo.

³ Ãté ni'wa hã simiroti pire newa, te za 'râwi tinhimiroti pire na 're si'madâ'â ze. Ãne wamhã, 'râwi te za tipẽ'ẽ na sima 're sadawa nhipese.

^4-5 Romhuri hã te wama 're hâimana za'ra wahâiba mono bâ, wa te wasina 're i'madâ'â pese za'ra mono da hã. Ãne wa, wa za aihĩni 'râwi wa te wasima 're rosa'rata pese za'ra, wa te wasina 're 'madâ'â pese za'ra mono da, wanhimiromhuri hã. Wa te wasina 're 'madâ'â pese za'ra mono wamhã, wa za 'râwi wapẽ'ẽ 're wasima 're wato za'ra. Danhimiromhuri hã wanhimiromhuri me aiwab õ na, wa te da'ãma 're rosa'rata za'ra mono õ di za.

⁶ Ãté ni'wa hã Zezu Cristuhu wasu'uwẽ na, te za te te 're aipawaptob za'ra wa'wa. Ãne wamhã, te za asimarĩ na tãma 're asõprub za'ra wa'aba mo asa.

⁷ Ma'ãpé ĩwapari pese za'ra wa'aba za. 'Re ihâimana u'âsi mono wi, simani õ di za, dahâimana wẽ wa'rãmimhã, iwẽ na te te dama ãma 're i'a'uwaimrami mono da hã, duré dahâimana wasété wa'rãmimhã, iwasété na te te dama ãma 're i'a'uwaimrami mono da hã. Ãhã wasu'u hã tô sena wa, senai õ na ãma 're rosa'rata za'ra wa'aba mono õ di za, 'râwi aipẽ'ẽ 're asima 're asadawa nhipese za'ra wa'aba mono tõ da.

⁸ Danhimirosa'rata wasété zarina 're danomro u'âsi mono wamhã, te za 'Re ihâimana u'âsi mono nhiti 're dahâimana u'âsi za'ra, rowẽ isi'utõrĩ'õ nhiti. 'Re ihâimana u'âsi mono pẽ'ẽzani nhimiwada'uri zarina si 're danomro mono wamhã, te za rowẽ isi'utõrĩ'õ ãma 're dahâimana u'âsi za'ra, 'Re ihâimana u'âsi mono 'rata.

⁹ Tahawa, ma'ãpé wawa'a ãna marĩ iwẽ na, wa te 're dapawaptob u'âsi za'ra wa'aba mono za, wa norĩ hã. Tawamhã bâdâ iwa waptã'ã wapsi, 'Re ihâimana u'âsi mono te te wa'ãma sima irotizé hã te za iwa'rãmi marĩ iwẽ hã te te wama 're anhomri.

¹⁰ Ãne wa, wama iwaihu'u pese zarina, wa za dahâiba mono bâ marĩ iwẽ na, wa te 're dapawaptob za'ra. Wa te 're idapawaptob za'ra mono zém nhipai u, wa za wasiré isazei'wa norĩ hã marĩ iwẽ na 're wasipawapto pese za'ra.

Paulu hã roti na te te i'rãsutuzé wasu'u

¹¹ Ãhãta ĩnhimi'ui'éré isa'ẽtẽ na, wa aima rob'ui'éré za'ra wa'wa, ĩsi'uihâ na ĩnhib'rata na.

¹² Ni'wam norĩ hã ma tô te te aima 're roti zadawa za'réi'õ za'ra wa'wa, asihâiwata nhihâri ré, 're anomro aba mono da, tawapsi asizudeu za'ra wa'aba na hã 're aihâimana za'ra wa'aba mono da. E marĩ da. Isiré zudeu norĩ si ãma 're wata za'ra mono da, te te aima iroti za'ra wa'aba zém na hã. Cristu wedepo'o nhonhi'rãmi na wazada dâ'â wamhã, ma tô wa'awa'âbâ pa. Tane nherẽ, taha wasu'u si te te aima 're wasu'u za'ra wa'aba mono õ di, isimirowasu'u na te te siwi 're wẽ'õ za'ra mono tõ da, isiré zudeu norĩ hã.

¹³ Ta norĩ hã sihâiwata nhihâri ré, 're nomro mono nherẽ, uburé marĩ na 'Re ihâimana u'âsi mono nhimiroti 'rada hã te te sina tãma ãma 're uwaimrami za'ra mono õ di. Tane nherẽ, ma tô te te sima 're aiwẽ za'ra wa'wa, isimiroti zarina, aipibu pese na 're anomro aba mono da, iré 're anomro aba mono wa, tisiré zudeu norĩ ma, sina 're wata za'ra mono da, isimiroti zarina oto 're i'aihâimana za'ra wa'aba mono zém na hã.

¹⁴ Tanei õ di, wa hã. Wanhib'apito Zezu Cristuhu ãma si, wa za 're ĩwata u'âsi, wedepo'o nhonhi'rãmi na wazada idâ'â ãma. Tahawa, tiza'ozém na wazada dâ'â wa, ĩwi 're idadâ'â za'ra mono ne, duré wa hã dawi 're ĩdâ'â mono ne, ti'ai ãma danhimirosa'rata na hã oto 're ĩhâimana mono õ di.

¹⁵ Danhihâiwata nhihâri ré si, 're idahâimana za'ra mono zé hã, marĩ dai õ di, 'Re ihâimana u'âsi mono ma hã. Duré danhihâiwata nhihâri ãna 're idahâimana za'ra mono zéb zama hã marĩ dai õ di, tãma hã. Dahâimanazép tém na, iwẽ na si oto 're idahâimana za'ra mono hã, taha si tãma hã iwẽ uptabi.

¹⁶ Õhõ wasu'u zarina 're dahâimana za'ra mono wamhã, wa ĩsima te 're da'awẽ, rowẽ na si oto 're danomro mono da, 'Re ihâimana u'âsi mono da'ãma 're ipẽ'ẽzé mono zéb zarina. Taha da, wa za da'ãma te tiwi 're rowaptẽrẽ u'âsi, uburé 'Re ihâimana u'âsi mono nhib'a'uwẽ norĩ ãma hã.

¹⁷ Wa hã Zezusihi ma romhuri'wa, wa 're ĩhâimana, isimiwada'urizéb zarina. Da te ĩma 're irob'manharĩ wasété za'ra mono zéb zarina, ĩhâiba hâ'ẽtẽ ré, 're ĩmorĩ wa, ĩpibui pese di, tãma iromhuri'wa 're ĩmorĩ na hã. Te te oto sahâri za'ra, aimawi tinhimiroti na te te ĩwi 're iro'wa'ré za'ra mono norĩ hã.

¹⁸ Ĩsisãnawã norĩ, Wanhib'apito Zezu Cristuhu wi, wa za te tiwi 're rowaptẽrẽ u'âsi, aihâiba na za'ra wa'aba hã, tãma asawi za'ra wa'aba wa, te te 're aipawaptob u'âsi za'ra wa'aba mono da. Tane tô.