Galata 5 - ꞌRe Ihâimana Uꞌâsi Mono Zadawa Wasuꞌu

Wanhib'apito ãma rowẽ na 're idahâimana za'ra mono zém na rowasu'u

¹ Zezu Cristu hã ma tô wa'anho'reptui pa, rowẽ na ãma 're wahâimana za'ra mono da. Tahawa, 'Re ihâimana u'âsi mono nhimiroti 'rata na rob'ui'éré zarina, wa te 're irob'manharĩ za'ra mono zém na, 're wanhopré mono õ di za oto, taha zarina te te õ hã 're wa'anho'reptui mono õ wa oto. Ãne wa, tô senai'õ na rowasu'u'wa norĩ wi 're asiptete za'ra wa'aba mono za oto, isimiroti na 're aihâimana za'ra wa'aba mono wa, apâ robzei'õ na 're anomro aba mono tõ da.

² Ma'ãpé asina ĩwapari pese za'ra wa'aba za. Wa hã Paulu, marĩ hã wa za aima waihu'u za'ra wa'wa. Da te 're asihâiwata nhihâri za'ra wa'aba mono da, asizudeu za'ra wa'aba da, asina 're dazaze za'ra wa'aba mono wa, taha zarina 'Re ihâimana u'âsi mono te te 're asõ'reptu za'ra wa'aba mono da newa, e niha za tawamhã, ãne wamhã. Cristu hã wazada dâ'â za'ra nherẽ, te te 're wa'anho'reptui mono da, e taré te za ã hã bété 're hâimana, asada za'ra wa'aba idâ'âzé hã.

³ Wa za duré aima ãma sahu za'ra wa'wa, te aima iwaihu'u za'ra wa'aba zém na hã. Ni'wam norĩ hã da te sihâiwata nhihâri za'ra da, te te sina 're dazaze za'ra mono wamhã, taha zarina 'Re ihâimana u'âsi mono hã te te 're sõ'reptu za'ra mono da newa, e niha te za tawamhã 're hâimana za'ra, ta norĩ hã. Danhihâiwata nhihâri siré, te za õne haré 'Re ihâimana u'âsi mono nhimiroti mono bâ te te sina tãma ãma 're uwaimrami za'ra, 'Re ihâimana u'âsi mono te te siwi 're awẽ'õ tõ mono da.

⁴ Zudeu norĩ ne, ma tô 'râwimhã 're asi'mai'madâ'â aba mo, 'Re ihâimana u'âsi mono nhimiroti 'rata na rob'ui'éré zarina 're rob'manharĩ za'ra wa'aba mono da hã, taha zarina, 'Re ihâimana u'âsi mono, aiwasété za'ra wa'wa hã te te u ai'ãma 're ab'madâ'â aba mono õ wa, te te u duré ãma 're aiwẽsãmri za'ra wa'aba mono da hã, taha zarina aiwasété za'ra wa'aba 'ru te, te te u duré 're aihâ za'ra wa'aba mono tõ da, za irob'rãsutuzéb ãma hã. Ãne taré 'mairosa'rata aba wamhã, ma tô Zezu Cristuhu wi asina ai'maipahâ wa'wa, asimirosa'rata na. Ãhã wa, ma tô 'râwi asiwi i'maiwẽ'õ wa'wa, 'Re ihâimana u'âsi mono nhoprubzé hã Cristu tidâ'âzém na, te te 're ida'anho'reptui mono zéb da hã.

⁵ Ãnei õ di, wa norĩ hã. Cristu Danho'reptui'wa na, wa tô wasina wa te 're saze za'ra. Taha zarina, wa wasina sô 're wanhimipari za'ra, rob'rãsutuzéb ãma, 'Re ihâimana u'âsi mono te te wama iwaihu'u za'ra zéb zô, wawasédé te te oto wa'ãma 're i'ab'madâ'â mono õ zéb zarina, te te 're iwa'awẽsãmri mono zém na. Ãne 'Re ihâimana u'âsi mono pẽ'ẽzani te te wama 're i'awaihu'u mono zéb zarina, wa wasina sô 're wanhimipari za'ra oto.

⁶ Simisutu Cristu Zezusihi nhib'a'uwẽ oto 're wanomro mono wamhã, 'Re ihâimana u'âsi mono hã te te 're wa'aba'a mono õ di za, isihâiwata nhihâri ré norĩ hã, duré isihâiwata nhihâri õ norĩ hã. Zudeu na duré zudeu'õ na 're iwahâimana za'ra mono zém na hã, te te oto 're wa'awaihu'u mono õ di za. Zezu Cristu Danho'reptui'wa na, wa te wasina 're umnhasi za'ra mono wa, wanhimizawi pese na 're iwahâimana za'ra mono zém na si, te za oto te te 're wa'awaihu'u, 'Re ihâimana u'âsi mono hã.

⁷ A norĩ wa'wa hã ma tô aré tô sena rowasu'u na 're anomro aba mo. E 'wa simirowasu'u hawi, ma tô sena rowasu'u na asima ãma apa za'ra wa'wa.

⁸ E asima ãma apa za'ra wa'aba da, ma tô 'Re ihâimana u'âsi mono hã aima waihu'u za'ra wa'wa, sima asô ihârâ za'ra wa'wa hã. Mare di.

⁹ I'rada hã wa za aima sadawa wahutu za'ra wa'wa, ãne: “I'u'ẽtẽ wapuzé hã surure na da te ahiri nherẽ, te za ãma timapu, i'u'ẽtẽ wapu hã.” Tane duré aimawi na, da te dama 're rowasu'u za'ra mono wamhã, te za da te ãma 're ropé, rowasu'u senai'õ na hã.

¹⁰ Tane nherẽ, simisutu Wanhib'apito nhib'a'uwẽ 're wanomro mono wa, wa za te 're ai'umnhasi za'ra wa'wa, te aima iwaihu'u za'ra wa'aba zéb zarina si, za apâ 're aihâimana za'ra wa'aba mono na. Aibâ hã dama pire na 're hâimana mono nherẽ, aimawi tinhimirowasu'u na te te aiwi 're ro'wa'rutu za'ra wa'aba mono wa, tãma 're rowẽ mono õ di za, ta hã 'Re ihâimana u'âsi mono si za te te azâri wa.

¹¹ Ĩsisãnawã norĩ, wedepo'o nhonhi'rãmi na Zezu Cristu dazada idâ'âzé hã wa tô te dama 're wasu'u u'âsi, da te ãma 're saze za'ra mono da. Tahawa, ma tô zudeu norĩ hã te te siwi 're ĩwẽ'õ za'ra, imreme zarina te dama 're rowasu'u mono õ wa, u, tãma za'ra hã. Ta norĩ hã te duré taré te te dama 're ĩwasu'u za'ra, danhihâiwata nhihâri wapsi, 're dasizudeu za'ra mono da, te dama 're awaihu'u mono newa. Ãne zahadu zudeu'õ norĩ ma, te 're arowaihu'u mono 'wa'âhã, e te aré zudeu norĩ hã te te siwi 're ĩwẽ'õ za'ra, te dama 're irowasu'u mono zém na hã. Mare di. Te te siwi 're ĩwẽ'õ za'ra mono õ di aré ãma hã.

¹² Aimawi tinhimirowasu'u na te te aiwi 're iro'wa'rutu za'ra wa'aba mono norĩ hã, tinhihâiwata nhihâri siré, te za pé tane wamhã ta norĩ hã 're si're zani za'ra, wẽ te bâ.

¹³ Ĩsisãnawã norĩ, 'Re ihâimana u'âsi mono hã ma tô aima pisutu za'ra wa'wa, rowẽ na ãma 're aihâimana za'ra wa'aba mono da, isimiroti na rob'ui'éré 'rata zarina, 're irob'manharĩ za'ra wa'aba mono zém na 're asõpré wa'aba mono tõ da, taha zarina, 'Re ihâimana u'âsi mono te te 're asõ'reptu za'ra wa'aba mono dai õ wa. Tane nherẽ, rowẽ na 'Re ihâimana u'âsi mono ãma 're aihâimana za'ra wa'aba mono wẽ te, marĩ iwẽ'õ na aipẽ'ẽ 're, asima 're rosa'rata za'ra wa'aba mono wamhã, asina hã ãma 're rob'manharĩ za'ra wa'aba mono õ di za. Ãne te za oto 're anomro aba mo. Asimizawi pese za'ra wa'aba zéb zarina si, te za 're asipawaptob za'ra wa'aba mo niha wamhã asib'rata na, duré asimarĩ na zama, duré asimiroti na zama hã.

¹⁴ 'Re ihâimana u'âsi mono nhimiroti 'rada hã ahâ uptabi nherẽ, simisutu haré te wasu'u, isimiroti hã ãne: “Ma'ãpé, 're dazawi pese za'ra wa'aba mono za. Marĩ iwẽ na asima 're irosa'rata za'ra wa'aba mono ne, te za duré dama zama sô 're asõpré wa'aba mo.” Ãne si isimiroti hã.

¹⁵ Tane nherẽ, abaze zahi 're isisimroi mono ne, asisada 're asiti'rui u'âsi za'ra wa'aba mono wamhã, asina asapa'a za'ra wa'aba õ di za.

Wamama pẽ'ẽzani nhimiwada'uri zarina si, rowẽ na 're idanomro mono zém na rowasu'u

^16-17 Wa norĩ hã marĩ iwẽ'õ na ãté 'râwi wapẽ'ẽ 're, wa za wasima wa te 're rosa'rata za'ra. Ãne na te te sima 're wa'awẽ mono õ di, 'Re ihâimana u'âsi mono pẽ'ẽzani hã. Marĩ iwẽ na si 'râwi wapẽ'ẽ 're, wa te wasima 're rosa'rata za'ra mono da, te za te te sima 're wa'awẽ. Tawamhã marĩ iwẽ'õ na 'râwi wapẽ'ẽ 're, wa te wasima 're rosa'rata za'ra mono wamhã, te za te te 're wa'a'uwati, 'Re ihâimana u'âsi mono pẽ'ẽzani hã, wa te wasima ãma 're rob'manharĩ za'ra mono tõ da. Tahawa, wa za ãne aima waihu'u za'ra wa'wa. Ma'ãpé, 'Re ihâimana u'âsi mono pẽ'ẽzani nhimiwada'uri zarina si, 're anomro aba mono za oto. Tawamhã siwa'ru marĩ iwẽ'õ na aipẽ'ẽ 're asima 're rosa'rata za'ra wa'aba mono nherẽ, asina hã 're rob'manharĩ za'ra wa'aba mono õ di za.

¹⁸ Ãne 'Re ihâimana u'âsi mono pẽ'ẽzani nhimiwada'uri zarina si, 're aihâimana za'ra wa'aba mono wamhã, isimiroti na rob'ui'éré 'rata zarina 're irob'manharĩ 'rata za'ra wa'aba mono zém na, 're asõpré wa'aba mono õ di za oto, taha zarina 'Re ihâimana u'âsi mono te te 're asõ'reptu za'ra wa'aba mono dai õ wa.

¹⁹ Dasi'uihâ na danhimirosa'rata wasété zarina 're idanomro mono zé wasu'u hã, wa tô waihu'u za'ra ni. Ãne te 're danomro wasété. Siwa'ru te tiwasédé hã pi'õ na, duré aibâ na zama te te 're 'manharĩ u'âsi za'ra. Siwa'ru te dasina 're dahâimana za'ra. Danhiséb ãna, te marĩ iwasédé hã da te 're 'manharĩ za'ra.

²⁰ Duré 'Re ihâimana u'âsi mono upana, te romhâiba 'manharĩ ãma 're dawata za'ra. Te duré tãma 're damreme zusi. Duré abzé 'manharĩ'wa, te 're danomro. Duré te 're dasi'ruiwapari za'ra. Te duré 're dasisada'âbâ za'ra. Duré marĩ na te 're dasi'ruiwapari za'ra. Dasi'aba'ré na te duré 're dazahi za'ra. Duré marĩ iwẽ zô, te dasima si 're danhopré. Te duré 're dasirẽme za'ra, 'râwi dasi'rata 're dahâimana za'ra mono tõ da.

²¹ Marĩ na te duré 're dasisõ'ru za'ra. Duré da'rã siwamnarĩ na te 're dahâimana za'ra, âzézei'wa 're dahâimana za'ra mono wa. Duré datoi wasétére u, te 're dasi'rã'õtõ, siwa'ru da te 're âhuri mono da, âzé hã. Tane te duré 're hâimana, da te 're i'manharĩ wasété za'ra mono zé hã. Tahawa, wa za ãma sahu, te aima iwaihu'u za'ra wa'aba zém na hã. Ãne 're danomro wasété mono wamhã, hâiwa u, 'Re ihâimana u'âsi mono u 're idanhisisi mono da hã mare di, Danhib'apito uptabi u, iwẽ uptabi si, tinhib'a'uwẽ norĩ ma, te te tãma 're i'anhomri mono da u.

²² Ãne 're danomro wasété mono õ di za, 'Re ihâimana u'âsi mono pẽ'ẽzani nhimiwada'uri zarina 're danomro mono wamhã. Te za da te 're dazawi pese za'ra. Duré dapẽ'ẽ 're datoi u'âsi, te za 're dahâimana za'ra. Duré dapẽ'ẽ toi u'âsi, te za 're dahâimana za'ra. Duré dawara sina dasisada 're dazahi za'ra mono õ di za. Duré danhimizawi pese na te za 're dahâimana za'ra. Duré marĩ iwẽ na te za dama 're danhoprub za'ra. Duré tô sena wa, ropisutu wẽ na, te za da te dama ãma 're rob'manharĩ wẽ za'ra.

²³ Duré dawaimri te za dama 're dahâimana za'ra. Duré dawasété wi, dasina 're danhiptete za'ra mono sina, te za 're dahâimana za'ra. Ãne 're dahâimana za'ra mono tõ da, 'Re ihâimana u'âsi mono nhimiroti hã baba uptabi di.

²⁴ Cristu Zezusihi nhib'a'uwẽ 're idahâimana za'ra mono norĩ hã, tiwasédé hã aré te te 're 'manharĩ ze za'ra mono nherẽ, duré tiwasété zô aré te te 're rowasutu za'ra mono nherẽ, 'râwi te za tô oto te te siwi 're wẽ'õ pese za'ra, te te 're 'manharĩ za'ra mono tõ da hã oto.

²⁵ 'Re ihâimana u'âsi mono pẽ'ẽzani hã ma tô wama tisõ, wahâimanazép té hã iwẽ hã. Tahawa, ma'ãpé isimiwada'uri zarina si, 're wanomro wẽ wa'aba mono oto.

²⁶ Danhipai u, wapire na 're wahâimana za'ra mono newa, 'râwi wapẽ'ẽ na wasina 're wawata za'ra mono õ di za, da te wama 're nharĩ za'ra mono tõ da. Duré wanhipai u, dapire na 're idahâimana za'ra mono na, wa te 're da'ruiwapari za'ra mono õ di za.