Galata 4 - ꞌRe Ihâimana Uꞌâsi Mono Zadawa Wasuꞌu

^1-2 Ãne wa za duré marĩ hã aima waihu'u za'ra wa'wa, romnhimiré'é na iwaihu'u za'ra wa'aba zéb da hã. Ãté ai'uté mama tõ hã te 're 'maihâimana, 'watébrémi hã. Prédu wapsi, ite hã za, imama hã dâ'â õ ré, tinhibrom na te te tãma ãma iropisutuzé hã. Tane nherẽ, uburé timama nhibrob ré, za 're hâimana mono nherẽ, prédub õ ré te za danhimarĩ ãna te te dama 're iromhuri za'ra mono norĩ ne, 're hâimana. Te za a'â da te dasiwi 're 'madâ'â, hâimana wẽ na 're hâimana mono zô. Imama nhibro hã te za duré da te tãma 're 'madâ'â pese, 'watébrémi ma. Ãne te za a'â i'ra hã 're hâimana, ãma iwahubzé hã bâdâ hã iwa waptã'ã õ ré, imama tinhibrom na te te tãma iropisutuzém na hã.

³ Tane wa norĩ hã, ai'uté ne, roti sena hã wama iwaihu'u pese za'ra õ zarina, wa tô aré 're wahâimana za'ra, roti da te wama 're iwaihu'u za'ra mono zéb zarina si.

⁴ Tawamhã bâdâ oto iwa waptã'ã wamhã, 'Re ihâimana u'âsi mono hã ti'ra ãma te te irotizéb zarina, ti'ai u we te te isatõrĩ da hã. We te te satõrĩ wamhã, ma tô pi'õi ma i'ra hã tãma podo oto, zudeu na. Zudeu na poto wa, pire na ma tô tãma 're hâimana, 'Re ihâimana u'âsi mono nhimiroti hã, Mozésihi ma te te 're i'awaihu'u mono hã.

⁵ E marĩ da, ma tô ti'ra hã we satõ, 'Re ihâimana u'âsi mono hã. Wanho'reptuzé hã wa te wasina 're uwaimrami za'ra mono da, isimiroti na rob'ui'éré 'rata zarina, wa te 're irob'manharĩ za'ra mono na 're iwanhopré za'ra mono norĩ hã te te wa'awa'âbâ da, ma tô we satõ, wa'ãma 're 'ra za'ra mono da oto, 'Re ihâimana u'âsi mono hã.

⁶ Tawamhã i'ra oto 're iwanomro mono na 'râwi 're wasiwaihu'u za'ra mono da, ma tô we ti'ra pẽ'ẽzani hã te te wama 're anhomri, wapẽ'ẽ mono bâ wama 're hâimana za'ra mono da, 'Re ihâimana u'âsi mono hã Wamama na, wa te 're sisi za'ra mono da oto.

⁷ Tahawa, robzei'õ na danhimiwada'uri zarina si, dapawa'âbâ ãna 're ihâimana za'ra mono norĩ ne, 're aihâimana za'ra wa'aba mono õ di oto. 'Re ihâimana u'âsi mono 'ra si, te oto 're anomro aba mo. Ãne wa, uburé marĩ wẽ na ti'ra norĩ ma, te te iropisutuzéb zarina, te za tô te te aima ãma 're a'uwaimrami 'wa, Aimama 'wa hã.

⁸ Zudeu'õ norĩ, aima sa'rese za'ra wa'aba õ di aré, 'Re ihâimana u'âsi mono hã. Tahawa, ma tô i'upana aimawi nhimiwada'uri na 're aihâimana za'ra wa'aba mo danhimiwada'uri zarina si, pawa'âbâ ãna 're ihâimana za'ra mono norĩ ne, robzei'õ na.

⁹ 'Re ihâimana u'âsi mono hã ma tô oto Aimama na asiwi iwaihu'u za'ra wa'wa. Tahawa, aima 're rowẽ za'ra wa'aba mono di oto. Taha nhipai u, ti'ra na te te oto sina ai'awaihu'u aba wa, aima 're rowẽ uptabi za'ra wa'aba mono di. Ãne wamhã, e niha te za bété apâ aipizari za'ra wa'wa, asimizazezéb 'rata u hã, taha zarina asina uwaimrami za'ra wa'aba õ nherẽ, asõ'reptu za'ra wa'aba zé hã, duré taha zarina rowẽ si aima 're hâimana za'ra wa'aba mono õ nherẽ. E niha te za bété asima iwẽ za'ra wa'wa, danhimiwada'uri zarina si pawa'âbâ ãna 're ihâimana za'ra mono norĩ ne, apâ 're aihâimana za'ra wa'aba mono da, robzei'õ na hã.

¹⁰ Bâdâ ipire hã marĩ 'manharĩzéb da hã, te oto zudeu norĩ zarina 're i'madâ'â za'ra wa'aba mo, a'amo zama, duré wahub zama.

¹¹ Ãne wa, wa ai'ãma 're ĩhâtâ'â za'ra wa'wa. E marĩ wa. Wanhib'apito wasu'uwẽ na 're ĩsiwasutu wẽ mono nherẽ, te 're aipawaptob za'ra wa'aba mono zé hã, e taré te za ãhã wamhã 're hâimana.

¹² Ĩsisãnawã norĩ, wa hã zudeu nherẽ, ai'rata ĩnhamra aba ré, wa tô zudeu'õ newa asine 're ĩmorĩ 'wa. Tahawa, ma'ãpé ĩsine 're anomro aba mono. Atẽme amo ĩmorĩ 'rata aba wamhã, marĩ hã ĩma 'manharĩ wasété za'ra wa'aba õ di, ĩhâiba na hã.

¹³ Ĩhâzé si ĩ'ãma watobro wa, wa tô ai'rata ĩnhamra za'ra wa'wa. Ãhã wa, wa tô Zezu Cristuhu wasu'uwẽ na aima rowasu'u na'rata za'ra wa'wa. Ãne na ma tô ĩ'ãma iwaihu'u za'ra wa'wa.

¹⁴ Tawamhã ĩhâzé ré, atẽme ĩwisi za'ra wa'aba nherẽ, ĩhâzé wa, asiwi ĩwẽ'õ za'ra wa'aba õ di. Mare di. Hâiwa ãma 'Re ihâimana u'âsi mono ma romhuri'wa, wẽ na asiwi i'âri aba ne, niha wamhã, Cristu Zezusi, wẽ na asiwi i'âri aba ne, ma tô wẽ na asiwi ĩ'âri 'wa.

¹⁵ E niha bété oto ãhã na hã. Aré aima 're rowẽ za'ra wa'aba mono di, ai'rata ĩnhamra aba wa. Ãhã wa, duré aima waihu'u pese za'ra wa'aba 'wa'âhã, te aré ato hã isani za'ra wa'wa, ĩma sõmri za'ra wa'aba da, ato hã.

¹⁶ E niha te bété oto ãhã na hã ĩ'ãma irosa'rata za'ra wa'wa. E aiwẽ'õ wa'aba 'wa na si, te za oto ĩ'ãma irosa'rata za'ra wa'wa, rowasu'u tô sena na si te aima 're rowasu'u za'ra wa'aba mono nherẽ.

¹⁷ Aibâ norĩ, aimawi rowasu'u'wa norĩ hã te sima aiwẽ za'ra wa'wa, ta norĩ nhimirowasu'u si asima 're wẽ za'ra wa'aba mono da, tô sena tinhimirowasu'u wẽ na te te 're aipawaptob za'ra wa'aba mono da newa. E marĩ da. Ĩnhimirowasu'u nhiti, asina 're aipahâ za'ra wa'aba mono da itẽme, ĩnhimiroti nhipai u, õ norĩ nhimiroti si asima 're wẽ uptabi za'ra wa'aba mono da oto.

¹⁸ Roti iwẽ na si, da te 're aipawaptob za'ra wa'aba mono da, da te dasima 're aiwẽ za'ra wa'aba mono wamhã, tô ĩma hã wẽ di za ãne hã, ai'rata ĩnhamra aba ré hã, duré niha wamhã tô ĩhâiba za're'ra wamhã.

¹⁹ Ĩ'ra norĩ, ĩma asawi pese za'ra wa'aba norĩ, pi'õ tiwasã te te 're isépata za'ra mono ne, wa tô wa hã ĩpẽ hã te ai'ãma 're sépata za'ra wa'wa, Zezu Cristu 're imorĩzém na 're anomro aba mono õ wa. Ãma 're anomro wẽ wa'aba mono wapsi, ĩma 're rowẽ mono di za.

²⁰ Ãhã na hã ĩhâtâ'â di, ai'ãma za'ra wa'aba hã. Ãhã wa, ĩnhimirosa'rada hã ahâ di, ai'ãma za'ra wa'aba hã. Ai'rata ĩhâimana za'ra wa'aba neza, ĩwaimri te oto aima rowaihu'u za'ra wa'aba da.

Sara norĩ wasu'u hã, Agaha wasu'u me

²¹ Uburé õ nherẽ, ma tô asima iwẽ za'ra wa'wa, 'Re ihâimana u'âsi mono nhimiroti 'rata na rob'ui'éré zarina, 're rob'manharĩ za'ra wa'aba mono da, taha zarina si 'Re ihâimana u'âsi mono hã te te 're asõ'reptu za'ra wa'aba mono da newa. E aima waihu'u za'ra wa'aba õ di bété, 'Re ihâimana u'âsi mono wasu'uwẽ hã, Abra'ãhã 'ra norĩ ãma hã.

²² Ãne ta norĩ wasu'u na, rob'ui'éré hã: Abra'ãhã 'ra norĩ hã, maparane aibâ te tãma 're hâimana zahuré. Imorĩ'rada hã Agaha 'ra, iwada'uri zarina si pawa'âbâ ãna 're ihâimana mono 'ra. Duré ihâiba amo hã Saraha 'ra wada'uri ãna 're ihâimana mono zé're hawimhã, te 're hâimana.

²³ Dasi'uihâ na dahâimanazém na 're ida'ra za'ra mono na ma i'ra hã tãma podo, romhuri'wai ma. Abra'ãhã 'ra hâiba amo hã 'Re ihâimana u'âsi mono te te tãma iropisutuzéb zarina, ma duré i'ra hã tãma podo, wada'uri ãna 're ihâimana mono ma hã, Saraha ma. Ãne Abra'ãhã 'ra norĩ wasu'u hã.

²⁴ Ta hã marĩ te sina wasu'u. 'Re ihâimana u'âsi mono te te sima da'ãma irotizé hã te pi'õ norĩ wasu'u zahuré. Maparane te te sima da'ãma irotizé hã. Imorĩ'rada hã Sina'i na ẽtẽ 'rãihâ nhisi ãma, 'Re ihâimana u'âsi mono te te sima da'ãma irotizé. Ta hã, Aga te wasu'u. Agaha 'ra hã ma tô tina zabâdâ danhimiwada'uri zarina 're hâimana, robzei'õ na. Tane Sina'i ãma 'Re ihâimana u'âsi mono, te te sima da'ãma irotizém niwĩ 're idanomro mono norĩ hã, Agaha 'ra ne, danhimiwada'uri zarina pawa'âbâ ãna 're idahâimana za'ra mono ne, te robzei'õ na 're dahâimana za'ra, ãhã na hã.

²⁵ Arabia na daza'ru nhisi ãma, Sina'i na ẽtẽ 'rãihâ nhisi hã, Aga te wasu'u. Zeruzalẽ na 'ri nho'õmo nhisi, Aga hã te tô duré wasu'u. E marĩ wa. Zeruzalẽ 're, 're idahâimana za'ra mono norĩ hã danhimiwada'uri zarina, dapawa'âbâ ãna 're idahâimana za'ra mono norĩ ne, te robzei õ na 're dahâimana za'ra.

²⁶ Ãnei õ di, Zeruzalẽ ihâiba amo hã, hâiwa ãma 're isa mono hã. Rowẽ na si, te iwa 're dahâimana za'ra. Zeruzalẽ hã hâiwa ãma 're isa mono hã, wana Sara aihĩni dana te wasu'u.

²⁷ Duréihã, ma tô pi'õ i'ra õ na ãma romnhimiré'é 'Re ihâimana u'âsi mono hã, Zeruzalẽ 're, 're ihâimana za'ra mono norĩ ãma. Ãne te 'mahâ: “Pi'õ, ai'ra hã niwa aima 'maipoto õ nherẽ, ma'ãpé 're atoi u'âsi mono, aipẽ'ẽ 're. Aimro hã te te airẽme nherẽ, ai'ra ahâ di za. Pi'õ mro ré, 're ihâimana mono nhipai u, ai'ra ahâ di za. Tahawa, te za rowẽ te, 're atoi u'âsi mo.”

²⁸ Ĩsisãnawã norĩ, ãhã wasu'u zarina, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã. Izaqui hã ma tô podo, 'Re ihâimana u'âsi mono hã Abra'ãhã ma, te te iropisutuzéb zarina. Tane te te tãma iropisutuzéb zarina, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã.

²⁹ Abra'ã hã 're morĩ ré, ma tô Izaquihi ma nharĩ wasété, dasi'uihâ na dahâimanazém na 're ida'ra za'ra mono na ipodo hã. 'Re ihâimana u'âsi mono pẽ'ẽzani, te te ipawaptobzém na ipoto ma, ma tô nharĩ wasété. Tane duré ãhã na hã te za 're romhâimana.

³⁰ E niha tawamhã duréi wasu'u na rob'ui'éré hã. Ãne iwasu'u hã: “I'ra ré satõrĩ, pi'õ hã romhuri'wa hã. Imama, tinhibrom na tãma ãma sipo'o zahuré õ di za, danhimiwada'uri zarina 're ihâimana mono õ 'ra me.”

³¹ Ãhã wa, ĩsisãnawã norĩ, wa za oto marĩ hã iwasu'u na waihu'u za'ra ni. 'Re ihâimana u'âsi mono hã Agaha nhihudu na te te 're wa'anhisi mono õ di za oto, danhimiwada'uri zarina 're imorĩ nhihudu, 're iwahâimana za'ra mono na hã. Mare di. Danhimiwada'uri zarina 're ihâimana mono õ nhihudu, 're iwahâimana za'ra mono na, te oto te te 're wa'anhisi, 'Re ihâimana u'âsi mono hã, Saraha nhihudu uptabi na. Tahawa, wa norĩ hã wama 're rowẽ uptabi za'ra mono di oto.