Galata 3 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono te te 're ida'awẽsãmri mono zém na rowasu'u

¹ Galata nhihudu norĩ, e niha te rosa'rata waihu'u ãna 're anomro aba mo. Zezu Cristu hã wedepo'o nhonhi'rãmi na wazada idâ'âzém na, wa tô te aima ãma 're rowasu'u pese za'ra wa'wa aré. E 'wa hã ma tô aiwi udâ za'ra wa'wa, taré waihu'u prã za'ra wa'aba da hã.

² Ma'ãpé we ĩma waihu'u za'ra wa'aba. E marĩ wa, ma tô 'Re ihâimana u'âsi mono hã Tipẽ'ẽzani hã we aima sõmri za'ra wa'wa, aipẽ'ẽ 're. E isimiroti 'rata na rob'ui'éré zarina, 're irob'manharĩ za'ra wa'aba mono zéb zarina, ma tô we Tipẽ'ẽzani hã aima sõmri za'ra wa'wa. Mare di. E Zezu Cristuhu wasu'uwẽ hã aipo're na wapari za'ra wa'aba pari, tô sena iwasu'uwẽ na asina 're saze za'ra wa'aba mono wa, ma tô we aima sõmri za'ra wa'wa. Ĩhe. Tahawa tô, ma tô we Tipẽ'ẽzani hã aima sõmri za'ra wa'wa, aipẽ'ẽ za'ra wa'aba 're, 're sãmra mono da oto.

³ E niha te bété oto rosa'rata waihu'u ãna, 're anomro aba mo. 'Re ihâimana u'âsi mono, Tipẽ'ẽzani te te aima isõmri za'ra wa'aba zarina, ma tô aihâimanazép tém na ãma isãna'rata za'ra wa'wa, iwẽ na. E niha te bété oto 'râwi 're asi'madâ'â za'ra wa'aba mo asi'uihâ na, asina uwaimrami za'ra wa'aba da newa, asisõ'reptu za'ra wa'aba zé hã.

^4-5 E taré ma tô iwẽ hã asina 're iwaihu'u za'ra wa'aba mo, marĩ hã ãma waihu'u za'ra wa'aba ãna. 'Re ihâimana u'âsi mono si, ma tô we Tipẽ'ẽzani hã aipẽ'ẽ 're aima sõmri za'ra wa'wa. Ma tô duré marĩ dama i'manharĩ waihu'u'õ hã te te aima 're 'manharĩ wẽ za'ra wa'wa, tiwaihu'u pese na. E marĩ wa. E isimiroti na rob'ui'éré 'rata zarina 're rob'manharĩ za'ra wa'aba mono wa. Mare di. Taha zarinai õ di. Zezu Cristuhu wasu'uwẽ hã aipo're na wapari za'ra wa'aba pari, Cristu Danho'reptui'wa na asina 're umnhasi za'ra wa'aba mono wa, ma tô we Tipẽ'ẽzani hã aima sõmri za'ra wa'wa, 'Re ihâimana u'âsi mono hã. Taha zarina si, ma tô duré marĩ dama i'manharĩ waihu'u'õ hã te te aima 're 'manharĩ wẽ za'ra wa'wa, tiwaihu'u pese na.

⁶ Tane Abra'ã hã. Ta hã ma tô 'Re ihâimana u'âsi mono hã te te sina 're umnhasi pese, te te tãma iropisutuzé za te te tãma ãma i'uwaimrami na hã. Tahawa, 'Re ihâimana u'âsi mono hã ma tô te te 're wẽsãmri, Abra'ã hã. Duréihã ãne Abra'ãhã wasu'u na ma tô rob'ui'éré ibaihâ na, 'Re ihâimana u'âsi mono zadawa 'mahârâ'wa hã.

⁷ Tawamhã Cristu Danho'reptui'wa na, da te dasina 're umnhasi za'ra mono wamhã, simisutu Abra'ãhã nhihudu na, te za oto te te 're da'anhisi, 'Re ihâimana u'âsi mono hã. Ãne hã wa tô aima waihu'u za'ra wa'wa, waihu'u za'ra wa'aba da asina hã.

⁸ Zahadu romhâ uptabi nherẽ, ma tô zudeu'õ norĩ ãma sima roti, 'Re ihâimana u'âsi mono hã. Ãne isimiroti hã: Zudeu'õ norĩ hã, Cristu Danho'reptui'wa na te te sina 're umnhasi za'ra mono wamhã, ta norĩ ma zama te za duré tãma 're irowẽ za'ra mono zéb da hã te te tãma 're apisutu, 'Re ihâimana u'âsi mono hã. Iwasédé hã te te oto ãma 're i'ab'madâ'â mono õ zéb zarina, te za te te 're awẽsãmri. Taha zarina wasété za'ra 'ru te, te te ahâ za'ra õ di za, rob'rãsutuzéb ãma hã. Ãne isimiroti hã zudeu'õ norĩ ãma hã. Tahawa, ma tô ãne Abra'ãhã ma waihu'u siro, 'Re ihâimana u'âsi mono hã: “Te aima iropisutuzém na asina ĩzazei pese zéb zarina, wa za dama 're irowẽ za'ra mono zéb da hã te dama 're apisutu, dapoto mono bâ.” Ãne ma tô iwasu'uwẽ na romhâ ré ãma po're pu'u siro.

⁹ Abra'ã hã ma tô 'Re ihâimana u'âsi mono hã te te sina 're sazei pese, te te tãma iropisutuzém na. Tahawa, rowẽ te te tãma ipisutuzéb zarina, ma tô rowẽ uptabi na 're hâimana. Tane duré Cristu Danho'reptui'wa na, da te dasina 're saze za'ra mono wamhã, Abra'ãhã ma te te ipisutu ne, te za dama 're irowẽ za'ra mono zéb da hã te te dama 're apisutu, 'Re ihâimana u'âsi mono hã.

¹⁰ Tane nherẽ, isimiroti na rob'ui'éré 'rata zarina, da te 're irob'manharĩ za'ra mono zém na 're danhopré mono wamhã, taha zarina, 'Re ihâimana u'âsi mono te te 're da'anho'reptui mono da newa, e niha te za tawamhã dama 're romhâimana za'ra. Õne haré, isimiroti mono bâ da te dasina tãma ãma 're uwaimrami za'ra mono õ wa, te za tô te te siwi 're da'awẽ'õ, 'Re ihâimana u'âsi mono hã. Duréihã ma tô ãne na rob'ui'éré ni: “'Re ihâimana u'âsi mono nhimiroti mono bâ, taha na rob'ui'éré hã te ibaihâ na dama 're hâimana, da te dasina tãma ãma 're uwaimrami za'ra mono da. Ãne zarina, isimiroti mono bâ, da te dasina tãma ãma 're uwaimrami za'ra mono õ wamhã, te za te te siwi 're da'awẽ'õ, 'Re ihâimana u'âsi mono hã.”

¹¹ E ãne te za te te dama 're awaihu'u, 'Re ihâimana u'âsi mono hã: “Ĩnhimiroti na rob'ui'éré 'rata zarina, 're irob'manharĩ za'ra wa'aba mono zéb zarina, te ai'ãma 're ab'madâ'â aba mono õ di za oto, aiwasété 'wa hã. Wa za oto te 're ai'awẽsãmri 'wa. Taha zarina, duré aiwasété za'ra wa'aba 'ru te, te aihâ za'ra wa'aba õ di za.” E ãne te za te te dama 're awaihu'u. Mare di. Duréihã ma tô ãne na rob'ui'éré ni: “'Re ihâimana u'âsi mono, Danho'reptui'wa na da te dasina 're i'umnhasi za'ra mono zéb zarina si, dawasédé hã te te da'ãma 're ab'madâ'â mono õ di za. Ãne wamhã, te za rowẽ uptabi na 're dahâimana u'âsi za'ra.” Ãne na da te ãma rob'ui'éré wa, wa tô waihu'u za'ra ni tô.

¹² Duréihã ma tô duré ãne na rob'ui'éré ni: “'Re ihâimana u'âsi mono nhimiroti mono bâ, da te dasina tãma ãma 're uwaimrami u'âsi za'ra mono wamhã, rowẽ uptabi na te za 're dahâimana u'âsi za'ra.” Tane nherẽ, Cristuhu wasu'u zô, te zahadu 're rob'é'é, Cristu Danho'reptui'wa na da te dasina 're umnhasi za'ra mono da, dama 're irowẽ za'ra mono zéb da hã.

¹³ Wa norĩ hã wa te dame wasina tãma ãma 're uwaimrami za'ra mono õ di, 'Re ihâimana u'âsi mono nhimiroti mono hã. Tahawa, te aré duré te te siwi 're wa'awẽ'õ, 'Re ihâimana u'âsi mono hã. Tawapsi hã te aré duré wahâ za'ra, wawasété za'ra 'ru te. Tane nherẽ, te te 're wahâ za'ra mono tõ da, ma tô Cristu hã wẽ nherẽ, wazada sisõ, wa'upana 'Re ihâimana u'âsi mono te te azâri da. Taha na ma tô wa'awa'â, Cristu hã. Duréihã ma tô ãne na ãma rob'ui'éré ni: “Ni'wa hã wasété uptabi wa, te za dasiwi wĩrĩ ni. Taha pari, wede na te za dasiwi sasõmri ni, da te ãma waihu'u za'ra da, wasété uptabi wa, 'Re ihâimana u'âsi mono ma iwẽ õ na.” Tawamhã ãma irob'ui'érézéb zarina, Cristu hã wẽ nherẽ, wedepo'o nhonhi'rãmi na sa'o ré, ma tô siwi wẽ'õ, 'Re ihâimana u'âsi mono hã. Wa'upana ma tô azâ, wasété õ nherẽ.

¹⁴ Ãne ma tô Cristu Zezusi hã wa'awa'âbâ pa. E marĩ da. Simisutu isib'a'uwẽ ãma 're wanomro mono wa, zudeu'õ norĩ ma zama, iwẽ na 'Re ihâimana u'âsi mono te te tãma ãma 're a'uwaimrami mono da, Abra'ãhã ma te te iropisutuzéb zarina, duré wahâiba mono bâ wapẽ'ẽ 're, Tipẽ'ẽzani hã te te wama 're anhomri mono da, te te wama iropisutu za'ra zéb zarina, Zezu Cristu hã Danho'reptui'wa na, wa te wasina 're umnhasi za'ra mono wa.

'Re ihâimana u'âsi mono nhimiroti 'rata na rowasu'u, Abra'ãhã ma iwẽ na te te tãma iropisutuzém na rowasu'u me

¹⁵ Ĩsisãnawã norĩ, ãne wa za oto aima ãma romnhimiré'é za'ra wa'wa, 're iwahâimana za'ra mono zém na. Ãté ni'wam norĩ hã te za marĩ iwẽ na sima roti zahuré. Tawamhã tô sena za te te sima ãma i'uwaimrami zahuré pibu ma, te za danho'a rob'ui'éré zahuré tinhisi na, da te ãma waihu'u zahuré da. Taha parimhã, te te sima ãma uwaimrami zahuré tõ da, ni'wa hã te te tiwi isizâri zahuré da hã, waihu'u õ di. Duré, ni'wa hã timreme na te te ãma sipa zahuré õ di za. E marĩ wa. Ma tô ãma sisazei pari zahuré.

¹⁶ Tane Abra'ãhã ma, isipai u isihudu na zama, 'Re ihâimana u'âsi mono te te iropisutuzé hã. Ãhã wasu'u na, da te ãma rob'ui'éré wamhã, isihudu norĩ hã da te wasu'u za'ra õ di. Isihudu norĩ hã da te wasu'u za'ra 'wa'âhã, te aré isihudu ahâ na dasiwi wasu'u ni. Isihudu misi, te wasu'u. Ta hã Cristu.

¹⁷ Wa za oto aima rowasu'u pese za'ra wa'wa, te aima ãma isimiré'é za'ra wa'aba zém na. 'Re ihâimana u'âsi mono hã ma tô Abra'ãhã ma iwẽ na ropisutu. Tô sena te te tãma ãma uwaimrami da, ma tô tãma siwasu'u. Taha pari, te te tãma iropisutuzém na hã ma tô da'ãma tiwahub ahâ uptabi, 430 na. Tawamhã ma tô tinhimiroti mono bâ dama waihu'u 'rata. E tahawa, iwẽ na te te dama ãma uwaimrami õ di za, Abra'ãhã ma, te te iropisutuzém na hã. E tahawa, te za tinhimiropisutu na ãma saprĩ, te te dama ãma uwaimrami tõ da. Mare di. Te za tô te te dama ãma 're a'uwaimrami u'âsi, Abra'ãhã ma, te te iropisutuzéb zarina.

¹⁸ Abra'ãhã ma, iwẽ na te te tãma ropisutu wa, taha zarina ma tô ãma tãma uwaimra. Tane iwẽ na te te dama ropisutu wa, taha zarina si, te za tô te te ãma dama 're a'uwaimrami, sô 're simipari mono ãna, marĩ na isimiroti hã a'â da te dasina tãma ãma 're i'uwaimrami za'ra mono zéb zô.

¹⁹ Abra'ã hã 're hâimana mono ré, ma tô iwẽ na tãma ropisutu siro 'Re ihâimana u'âsi mono hã, isipai u isihudu ma, te te tãma ãma 're a'uwaimrami mono da. Abra'ãhã za'u si, ma tô oto tinhimiroti mono bâ dama waihu'u, 'Re ihâimana u'âsi mono hã. E marĩ da. Dawasété na 're danomro mono wa, 'Re ihâimana u'âsi mono ma, dawasété na 'râwi 're dasiwaihu'u za'ra mono da. Taha da, ma tô tinhimiroti hã dama waihu'u. Abra'ãhã nhihudu, ti'ai u we imorĩzéb u si, te za pire na 're hâimana, 'Re ihâimana u'âsi mono nhimiroti zarina, zudeu norĩ te te 're irob'manharĩ za'ra mono zéb da hã. 'Re ihâimana u'âsi mono hã tinhimiroti hã te te dama 're awaihu'u mono da, ma tô tinhimiroti na rob'ui'éré hã hâiwa ãma tãma iromhuri'wa norĩ ma tisõ, aibâ ma te te siwi sõmri da, isipai u.

²⁰ Ni'wa hã ti'ai ãma si'uihâ na tinhimiroti hã te te dama waihu'u wamhã, ni'wa hã isãna'remhã hâimana õ di, isimiroti hã te te dama iwaihu'u da hã. Tane 'Re ihâimana u'âsi mono hã. Si'uihâ na ma tô Abra'ãhã ma waihu'u, iwẽ na za te te tãma ãma 're i'a'uwaimrami mono na hã.

'Re ihâimana u'âsi mono nhimiroti 'rata na, Mozési te te ãma irob'ui'érézé wasu'u

²¹ Abra'ãhã za'u si, ma tô oto tinhimiroti mono bâ dama waihu'u, 'Re ihâimana u'âsi mono hã. E taha wa, te te dama ãma uwaimrami õ di za iwẽ na, Abra'ãhã ma, aré te te iropisutuzéb zarina. Mare di. Te za tô te te dama ãma 're a'uwaimrami u'âsi. Uburé marĩ hã isimiroti zarina, da te dasina tãma ãma 're i'uwaimrami za'ra mono da hã, dama waihu'u za'ra 'wa'âhã, 'Re ihâimana u'âsi mono te aré te te dama 're apisutu, rowẽ uptabi na 're dahâimana za'ra mono da.

²² Tane nherẽ, daro mono bâ te dawasété na 're danomro. Dasi'uihâ na dawasété wi 're dasipizari waihu'u za'ra mono õ di tô. Ãne, da te iwaihu'u za'ra zéb da hã, ma tô 'Re ihâimana u'âsi mono zadawa 'mahârâ'wa hã ãma rob'ui'éré. E marĩ da. Zezu Cristu Danho'reptui'wa na, da te dasina 're umnhasi za'ra mono da, tawapsi 'Re ihâimana u'âsi mono iwẽ hã te te dama ãma 're uwaimrami mono da, te te dama iropisutuzéb zarina.

²³ Bâdâ iwa waptã'ã õ ré, Zezu Cristu Danho'reptui'wa na da te dasina 're umnhasi za'ra mono õ ré hã, ãne aré dahâimanazé hã. 'Re ihâimana u'âsi mono hã ma tô zudeu norĩ hã tinhimiroti 'rata na te te 're a'uwati, Cristuhu wasu'uwẽ hã sõ'awi te te wama waihu'u za'ra õ ré hã, Cristu Danho'reptui'wa na wa te wasina 're i'umnhasi za'ra mono zéb da hã oto.

²⁴ 'Re daprédub za'ra mono õ ré, da'madâ'â'wa hã te te dama 're iroti mono ne, ma tô 'Re ihâimana u'âsi mono hã tinhimiroti 'rata na te te 're wa'a'uwati aré, Cristu hã datẽme wei morĩ õ ré. Ta hã te we oto datẽme mo, te te dawa'âbâ da, Danho'reptui'wa na wa te wasina 're isaze za'ra mono zéb zarina, wawasédé hã te te wa'ãma 're ab'madâ'â tõ mono da oto, 'Re ihâimana u'âsi mono hã, taha zarina te te 're wa'awẽsãmri mono da oto duré.

^25-26 Ma tô oto bâdâ hã iwa waptãrã, Cristu hã wa te wasina 're i'umnhasi za'ra mono zéb da hã. Tahawa, 'Re ihâimana u'âsi mono nhimiroti 'rata na rob'ui'éré zarina, wa te 're irob'manharĩ za'ra mono zéb da hã, pire na wama 're hâimana za'ra mono õ di oto, Mozési te te ãma irob'ui'éré hã. E marĩ wa. A norĩ wa'wa hã ma tô Cristu Zezusi hã Danho'reptui'wa na asina 're isaze za'ra wa'aba mo. Tahawa, te oto simisutu 'Re ihâimana u'âsi mono 'ra, 're anomro aba mo, aihĩni.

²⁷ Ma tô duré â dawabzuri hã i'manharĩ za'ra wa'wa, Cristu 're imorĩzém na si oto ãma 're anomro wẽ wa'aba mono da, simisutu Cristuhu nhib'a'uwẽ 're anomro aba mono wa.

^28-29 Taha zarina, 'Re ihâimana u'âsi mono hã te te siwi 're da'aba'a waihu'u mono õ di, zudeu norĩ hã, duré zudeu'õ norĩ hã, iwada'uri zarina si, pawa'âbâ ãna dama romhuri'wa norĩ hã, duré wada'uri ãna si'uihâ na 're ihâimana za'ra mono norĩ hã, aibâ norĩ hã, duré pi'õ norĩ hã. Simisutu Cristu Zezusihi nhib'a'uwẽ si, te 're aihâimana za'ra wa'aba mo. Tahawa, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã. Ãhã wa, iwẽ na si, Abra'ãhã ma te te iropisutuzéb zarina, te za iwẽ na si te te aima ãma 're a'uwaimrami 'wa, Aimama 'wa hã.