Filipu 4 - ꞌRe Ihâimana Uꞌâsi Mono Zadawa Wasuꞌu

Paulu hã te te dama iroti 'rãsutuzé wasu'u

¹ Tahawa, ĩsisãnawã norĩ, ĩma asawi pese za'ra wa'aba norĩ hã, ma'ãpé Wanhib'apito ãma asiptete sina 're aihâimana u'âsi za'ra wa'aba mono za. Ai'ãma ĩpẽ'ẽzé uptabi za'ra wa'aba wa, 'râwi te asabu za'ra wa'aba neza. Romhâ na nherẽ, te asina ĩma 're irowẽ zani za'ra wa'aba mo. Tahawa, wa tô te dama 're aiwasu'u wẽ za'ra wa'wa, ĩto sina. Ãne wa, te za asiptete sina õhõ ãma si 're aihâimana u'âsi za'ra wa'aba mo.

² Ĩhidiba norĩ, Evodia, Sĩtiquihi me, ãne wa za aima roti wa'wa, asisada 're aihâimana wasété aba mono wa. A norĩ wa'wa hã Wanhib'apito nhib'a'uwẽ, 're aihâimana aba mono wa, ma'ãpé rowẽ na si apâ asiré 're aihâimana aba mono, asisada 're aihâimana wasété aba mono ãna.

³ Duré a hã ĩpawapto wẽ 'wa na 're i'aihâimana mono hã, ma'ãpé ã pi'õ norĩ hã pawaptob zahuré na. Ta norĩ hã ma tô ĩsiré te te 're romhuri pese zahuré, Cristuhu wasu'uwẽ na wa te dama ãma 're iropéi mono na hã. Clemetihi siré zama ma tô te te 're romhuri zahuré, duré uburé ĩsiré romhuri'wa norĩ siré zama. Uburé te ã norĩ nhisi hã dame 're hâimana za'ra ibaihâ na hã, 'Re ihâimana u'âsi mono 'rata za 're idahâimana u'âsi za'ra mono norĩ nhisi ré, ibaihâ 're ihâimana mono na hã.

⁴ Ma'ãpé atoi u'âsi 're aihâimana za'ra wa'aba mono, Wanhib'apito ãma oto 're anomro aba mono na dâ'âsina. Wa za duré aima ãma sahu za'ra wa'wa. Ma'ãpé atoi u'âsi ãma 're aihâimana za'ra wa'aba mono za.

⁵ Aiwaimri te za dama 're aihâimana za'ra wa'aba mo, iwẽ na. E marĩ wa. Wanhib'apito hã za we apâ morĩ su'u na dâ'âsina.

⁶ Marĩ na 're aihâtâ'â za'ra wa'aba mono ãna, te za oto 're aihâimana za'ra wa'aba mo. 'Re ihâimana u'âsi mono ma, 're aimreme zusi aba mono zép sidâpâsi, te za duré tiwi 're irowaptẽrẽ za'ra wa'aba mo, uburé marĩ zô aiwi 're irowaptâ'â za'ra wa'aba mono zém na hã. Aipẽ'ẽ 're, ãma 're aiwata za'ra wa'aba mono sina, te za asi'ãma duré tãma 're aimreme zusi aba mo.

⁷ Rowẽ hã 'Re ihâimana u'âsi mono te te wama 're i'apisutu mono hã, iwẽ uptabi hã te wama 're hâimana za'ra, da te 're iwaihu'u za'ra mono õ hã. Taha si te za te te 're aipẽ'ẽ nomri wẽ za'ra wa'wa, marĩ na 're aihâtâ'â za'ra wa'aba mono ãna 're aihâimana za'ra wa'aba mono da, Cristu Zezusihi ãma oto 're anomro aba mono zéb zarina. Ãne hã 'Re ihâimana u'âsi mono hawi rowẽ hã aima 're hâimana za'ra wa'aba mono da, te za asi'ãma tãma 're aimreme zusi u'âsi aba mo.

⁸ Ĩsisãnawã norĩ, ĩnhimiroti na wa za oto ãma aima 'rãsutu za'ra wa'wa, ãhã na te ãma aipo're pu'u za'ra wa'aba zém na hã. Uburé marĩ hã tô sena 're ihâimana za'ra mono na si te za asima 're irosa'rata za'ra wa'aba mo, duré marĩ hã da te dasima 're iwazéb za'ra mono na hã, duré uburé marĩ hã 'Re ihâimana u'âsi mono ma iwẽ uptabi na hã, duré marĩ hã wasété ãna 're ihâimana za'ra mono na hã, duré uburé marĩ iwẽ hã da te 're isawi pese za'ra mono na hã, duré uburé marĩ hã wẽ wa, ãma 're idatob'uzu za'ra mono na hã. Ãne na si te za uburé marĩ iwẽ uptabi na asima 're irosa'rata za'ra wa'aba mo, da te dasima 're iwasu'u wẽ za'ra mono na si.

⁹ Te aima 're rowasu'u za'ra wa'aba mono ré, aipo're na 're ĩwapari za'ra wa'aba mono zéb zarina, ma tô 'Re ihâimana u'âsi mono nhimiroti hã iwaihu'u pese za'ra wa'wa. Duré ai'rata 're ĩnhamra aba mono ré, atõmo na asiwi 're ĩ'madâ'â aba mono na, ma tô duré iwaihu'u pese za'ra wa'wa. Ãne na uburé marĩ na aima 're ĩsisanho za'ra wa'aba mono zéb zarina, te za 're aihâimana wẽ za'ra wa'aba mo. Ãne wamhã, 'Re ihâimana u'âsi mono hã wama rowẽ nhomri'wa hã te za 'râwi asiré 're hâimana u'âsi za'ra wa'wa.

Paulu hã danhoprubzé wa'rãmi, da'ãma iwatazé wasu'u

¹⁰ Ãne wa, aima ĩtoi uptabi za'ra wa'aba di ãhã na hã, aré ai'ãma 're rob'é'é hâ za'ra wa'aba mono nherẽ, apâ ĩ'ãma asipo're pu'u za'ra wa'aba wa, we ĩma asõprub za'ra wa'aba zém na hã. Tahawa, wa Wanhib'apito ãma ĩwata, ĩtoi uptabi wa, aima za'ra wa'aba hã. Ãté ĩ'ãma 're aipo're pu'u u'âsi za'ra wa'aba mono nherẽ, marĩ hã aima 're hâimana za'ra wa'aba mono õ di, we ĩma asõprub za'ra wa'aba zém na asiwi ĩzawi za'ra wa'aba zéb da hã. Tane nherẽ, ma tô ĩ'ãma 're aipo're pu'u u'âsi za'ra wa'aba mo tô.

¹¹ E tawamhã, nimahã na marĩ zô ĩwi iro'wanhi'riti zarina, ĩsina 're ĩhâtâ'â mono wa, wa ãne aima ĩsiwasu'u za'ra wa'wa, ãhã na hã. Mare di. Taha wab õ di. Ãté nimahã na marĩ zô ĩwi 're ro'wanhi'riti mono nherẽ, duré niha ĩma 're romhâimana mono nherẽ, wa ĩsina 're ĩhâtâ'â mono ãna 're ĩhâimana u'âsi tô.

¹² Ãne hã ĩma waihu'u pese di, marĩ zô dawi 're iro'wanhi'riti za'ra mono zém na 're idahâimana za'ra mono zé hã. Ãne hã wa hã te dame pibui ahâ di. Duré danhimarĩ ahâ na 're idahâimana za'ra mono zé hã ĩma waihu'u pese di. Niha ĩma 're romhâimana mono nherẽ, wa tô waihu'u, robzei u'âsi 're ĩhâimana mono zém na hã. Nimahã na hã ĩsai ahâ wamhã, duré mra te 're sépata mono nherẽ, tane nherẽ, ĩma 're rowẽ u'âsi mono di, ãne hã aiwabre wa ĩma hã. Nimahã na hã marĩ zô ĩwi 're ro'wanhi'riti mono õ wamhã, duré ãté marĩ zô ĩwi 're ro'wanhi'riti mono nherẽ, ĩma 're rowẽ mono di. Ãne wa, wa ĩto sina 're ĩhâimana. E marĩ wa. Ĩma 're iromhâimana mono zé hã aiwa wa.

¹³ Ãne hã niha ĩma 're romhâimana mono nherẽ, wa sada 're ĩnhiptete mono. E marĩ wa. Cristu hã ĩnhiptetezé te te ĩma sada 're anhomri u'âsi mono wa.

¹⁴ Tane nherẽ, ĩma wẽ uptabi di, we asiwi ĩpawaptob za'ra wa'aba zé hã, ãhã na ãme te robzépata ré hã.

¹⁵ Filipu ãma 're aihâimana za'ra wa'aba mono norĩ, tame duréihã ĩnhimirowasu'u zarina, Cristuhu wasu'uwẽ hã wapari na'rata za'ra wa'aba wamhã, a norĩ wa'aba si ma tô ĩ'ãma ana wẽ wa'wa, ĩma asõprub za'ra wa'aba zém na hã, rowahutu u asiré 're asi'rã'õtõ aba mono norĩ hã. Masédonia na asipti'a nho'õmo nhisi hawi wa'aba oto ĩmorĩ wamhã, isazei'wa norĩ hã daza'rui amoi ãma 're ihâimana za'ra mono norĩ hã ĩ'ãma sina za'ra õ di, asine za'ra wa'aba hã. A norĩ wa'aba si ma tô asiwi ĩpawapto wẽ wa'wa tô, ãma ĩhâimanazéb da hã. Ãne hã aima waihu'u pese za'ra wa'aba di.

¹⁶ Duré aihawi za'ra wa'aba ĩmorĩ wa, Tesalonita na 'ri nho'õmo nhisi ãma ĩnhamra ré hã, ma tô duré ĩpawaptobzéb da hã nasi asiwi isõmri za'ra wa'wa, ĩma, marĩ zô nasi ĩwi rowaptâ'â sidâpâsi.

¹⁷ E asõprub za'ra wa'aba zém na ĩma ãma sahu za'ra wa'aba da, wa tô ãne hã aima waihu'u za'ra wa'wa. Mare di. Isãna'rata hawi ĩ'ãma 're ana wa'aba mono zéb zarina, 'Re ihâimana u'âsi mono si, iwẽ na za te te aipawa'âbâ za'ra wa'aba zéb da na te te aima ãma sa'ẽtẽ za'ra wa'aba da si, wa tô te ai'ãma 're 'madâ'â u'âsi za'ra wa'wa.

¹⁸ Ãme wa tô uburé marĩ hã ĩsima waibui wẽ, we asiwi ĩpawaptob za'ra wa'aba zé hã. Epafroditu hã ma tô we ĩma ãwisi wẽ, we ĩma asõprub za'ra wa'aba zé hã. Tahawa, marĩ zô ĩwi rowaptâ'â õ di oto. Sa'ẽtẽ na te za oto marĩ hã ĩma tihâiba. Ãne wa, wa ĩsina ai'uze za'ra wa'wa, we ĩma asõprub za'ra wa'aba zém na hã. Asõprub za'ra wa'aba zé hã wẽ uptabi di, 'Re ihâimana u'âsi mono ma hã. Wedewati isadaze hã 'Re ihâimana u'âsi mono ma, da te 're izata za'ra mono zéb zarina, tãma ãma 're irowẽ pusi mono ne, tãma wẽ uptabi di duré ãhã na hã, we ĩma asõprub za'ra wa'aba zé hã.

¹⁹ A norĩ wa'aba ma zama, te za 'Re ihâimana u'âsi mono hã Ĩnhib'apito hã uburé marĩ hã iwẽ uptabi hã te te aima 're sõmri za'ra wa'wa sa'ẽtẽ na, marĩ zô aiwi 're rowaptâ'â za'ra wa'aba mono wamhã, duré aiwi 're robzei'õ za'ra wa'aba mono wamhã. Tinhibro hã te za sa'ẽtẽ na te te aima 're sõmri za'ra wa'wa iwẽ hã, Cristu Zezusihi ãma tô sena 're anomro aba mono zéb zarina.

²⁰ Tahawa, Wanhib'apito 'Re ihâimana u'âsi mono ãma si, 're wawata u'âsi za'ra wa'aba mono, Wamama ãma si. Tane tô.

Paulu hã te te idazawi 'rãsutu zé wasu'u

²¹ Ma'ãpé uburé ĩma ãma sawi za'ra wa'aba, 'Re ihâimana u'âsi mono nhib'a'uwẽ oto 're ihâimana za'ra mono norĩ hã tamemhã, Cristu Zezusi, Danho'reptui'wa na te te sina 're i'umnhasi za'ra mono norĩ hã. Ãme ĩsisãnawã norĩ hã, ĩsiré romhuri'wa norĩ hã ĩ'rata 're ihâimana za'ra mono hã te duré ãma asawi za'ra wa'wa, ĩsiré.

²² Uburé 'Re ihâimana u'âsi mono nhib'a'uwẽ norĩ, ãme 're ihâimana za'ra mono norĩ hã te duré ãma asawi za'ra wa'wa. Apito Sézaha nhorõwa ãma 'ri 'rãihâ 're, romhuri'wa norĩ zama te duré ãma asawi za'ra wa'wa dame, wasiré isazei'wa norĩ hã.

²³ Wanhib'apito Zezu Cristuhu ma, wa ai'ãma 're ĩmreme u'âsi za'ra wa'wa, ta hã te te 're asawi pese za'ra wa'aba mono wa, te te 're aipawaptob u'âsi za'ra wa'aba mono da.