Filipu 3 - ꞌRe Ihâimana Uꞌâsi Mono Zadawa Wasuꞌu

Dasihawim na dasisõ'reptuzé da te dasina 're i'uwaimrami waihu'u za'ra mono õ zé wasu'u

¹ Ĩsisãnawã norĩ, ma'ãpé asima 're atoi u'âsi za'ra wa'aba mono za, Wanhib'apito ãma oto 're anomro aba mono wẽ te. Te aima irob'ui'éré 'rata za'ra wa'aba zém na, te ãma aima isisiwi za'ra wa'aba zém na hã, te ĩsiwi ãma ro'wa'ré õ di za. Mare di. Ai'udâna za'ra wa'aba, wa za tô ĩnhimi'ui'éré na aima ãma sahu za'ra wa'wa, te ãma aima irob'ui'éré 'rata za'ra wa'aba zém na hã, tô sena Cristuhu wasu'uwẽ hã 're isaze za'ra wa'aba mono zém na, asina 're asiptete u'âsi za'ra wa'aba mono da.

² Tahawa, te za a norĩ wa'wa hã 're asi'madâ'â pese za'ra wa'aba mo, wapsã dazada 're isiwamnarĩ za'ra mono ne, rosa'rata wasété na dazada 're ihâimana za'ra mono norĩ wi. Marĩ iwasété si te ta norĩ hã te te 're 'manharĩ za'ra. Ãne te ta norĩ hã te te dama 're rowasu'u za'ra: “Aibâ norĩ hã Cristu te te 're saze za'ra mono da, te te sima 're wẽ za'ra mono wamhã, te za da te 're sihâiwata nhihâri za'ra, taha zarina 'Re ihâimana u'âsi mono hã ãma 're sib'a'uwẽ za'ra mono da.” Ãne te ta norĩ hã te te dama 're roti za'ra, senai'õ na. Tane nherẽ, te ta norĩ hã dahâiba hã taré te te dawi 're wamnarĩ za'ra, taha zarina 'Re ihâimana u'âsi mono hã ãma 're sib'a'uwẽ za'ra mono da newa.

³ Ta norĩ hã sena na 're hâimana za'ra mono õ di, 'Re ihâimana u'âsi mono nhib'a'uwẽ na hã. Wa norĩ si, wa 'Re ihâimana u'âsi mono nhib'a'uwẽ uptabi hã 're wahâimana za'ra, Ipẽ'ẽzani nhimipawaptobzém na ãma 're wawata za'ra mono wa. Tahawa, marĩ hã wasi'uihâ na wa te 're i'manharĩ za'ra mono zém na 'râwi 're wasi'umnhasi za'ra mono õ di, wasihawim na wanho'reptuzé hã wa te wasina ãma 're i'uwaimrami za'ra mono da hã. Cristu Zezusi, iwẽ te te wama i'manharĩ za'ra zém na si, wa tô wa te wasima ãma 're rowẽ za'ẽtẽ uptabi za'ra, taha zarina si te te oto 're wa'anho'reptui mono wa, 'Re ihâimana u'âsi mono hã.

⁴ Ni'wam norĩ hã te tô 'râwi 're si'madâ'â ze za'ra, marĩ hã si'uihâ na te te 're i'manharĩ za'ra mono zém na hã, taha zarina, 'Re ihâimana u'âsi mono hã ãma 're sib'a'uwẽ za'ra mono da newa. Marĩ hã wasihawi wasi'uihâ na wa te 're i'manharĩ za'ra mono zém na, 'Re ihâimana u'âsi mono hã te te 're wa'anho'reptui mono 'wa'âhã, tô ibâre wa aré wa hã danhipai u 're ĩsi'umnhasi, marĩ hã ĩsihawi te 're i'ab'manharĩ mono zém na hã, taha zarina, ĩsi'uihâ na ĩsisõ'reptuzé hã te ĩsina ãma uwaimrami da.

⁵ E marĩ wa. Ĩwaptã'ãzém na 8 na bâdâ hã ĩ'ãma ne parimhã, ma tô ĩnhihâiwata nhizâri ni, zudeu norĩ 're ihâimana za'ra mono zéb zarina. Wa hã Izaraéu nhihudu 're ĩhâimana mono. Duré i'ra Bẽzamihĩ nhihudu 're ĩhâimana mono. Wa hã duré hebreu uptabi. E marĩ wa. Ĩhi'rata norĩ hã uburé hebreu uptabi 're hâimana za'ra mono wa, da te 're wa'ru za'ra mono ãna. Duré farizeu na dame 're ĩhâimana mono wa, wa tô 'Re ihâimana u'âsi mono nhimiroti 'rada hã te 're 'madâ'â pese, Mozési te te ãma irob'ui'éré hã, isimiroti na hã.

⁶ Wasiré zudeu norĩ hâimanazém na, 'Re ihâimana u'âsi mono ma, 're ĩhâimana mono da, wa tô 're ĩsiwasutu u'âsi aré. Tahawa, Zezusihi zazei'wa norĩ ma, wa tô te tãma 're rob'manharĩ wasété za'ra, Zezusi hã 'Re ihâimana u'âsi mono 'ra õ newa, ta norĩ hã te 're i'ruiwapari za'ra mono zéb zarina, te te 're robzépata za'ra mono da. Uburé 'Re ihâimana u'âsi mono nhimiroti 'rada hã wa tô duré te 're 'madâ'â pese tô, taha zarina 'Re ihâimana u'âsi mono te te ĩwẽsãmri da newa. Tahawa, nima hã isimiroti te ãma i'upa na da te dasiwi ĩwaihu'u õ di.

⁷ Ãne na 're ĩhâimana 'rata mono zém na aima ĩsi'rãzarõtõ za'ra wa'aba zé hã ĩma wẽ di aré, taha si ĩma pire wa, taha zarina 'Re ihâimana u'âsi mono te te ĩwẽsãmri da newa. Tane nherẽ, Cristuhu ma oto 're ĩhâimana mono wamhã, tarére oto ĩma hã, 're ĩhâimana 'rata mono zé hã.

⁸ 'Re ihâimana u'âsi mono te te ĩwẽsãmri da, uburé marĩ hã ĩsihawim na te 're i'ab'manharĩ mono zé hã taré uptabi oto ĩma hã. Misi te ipire uptabi hã ĩma 're hâimana oto. Ĩnhib'apito, Cristu Zezusi hã 'râwi te iwaihu'u pese da si, te ĩma 're hâimana oto, taha si. Marĩ zô 're ĩnhimipari mono õ di oto, ta hã ĩma tarére wa. Roprum ne, te ta hã ĩma 're hâimana oto, 're ĩhâimana 'rata mono zé hã. Tahawa, Cristuhu niwĩ ĩhâiba na te isaprĩ wẽ da si, wa 're ĩsi'madâ'â wẽ u'âsi.

⁹ Misi haré Cristuhu ãma si oto 're ĩhâimana mono da, wa tô ĩhâimanazéb 'rada hã 'râwi ĩsiwi wẽ'õ pese. 'Re ihâimana u'âsi mono nhimiroti na Mozési te te ãma irob'ui'éré hã, ĩsi'uihâ na te 're i'madâ'â pese mono na 'Re ihâimana u'âsi mono te te ĩwẽsãmri da, ĩsina 're ĩnhimipari mono õ di oto. Cristu hã te ĩsina 're i'umnhasi mono zéb zarina si, 'Re ihâimana u'âsi mono te te ĩwẽsãmrizéb ré si, wa oto 're ĩhâimana, taha si te te ĩpisutu wa oto.

^10-11 Cristu hã 'râwi te iwaihu'u pese da si, wa tô oto ĩsima wẽ, wa hã. Ta hã dâ'â nherẽ, apâ hâiwa'utu wa, te oto siptete sina 're hâimana u'âsi. Tane duré, wa hã 're ĩhâimana 'rata mono zé hã oto ĩma si'utõrĩ wa, duré taha wa'rãmi ĩhâimanazép tém na si oto 're ĩhâimana mono wa, wa ĩsima wẽ, ĩnhiptete sina taha ãma si oto 're ĩhâimana mono da, isimipawaptobzé iwẽ ré si. Ãne hã wa tô duré ĩsima wẽ, Cristu hã ti'ab ré te te 're irobzépata mono ne, te 're irobzépata mono da si, isine. Cristu hã dazada idâ'â ne, 're ĩhâimana 'rata mono zé hã ĩma isi'utõrĩ da si, wa tô ĩsima wẽ, 'Re ihâimana u'âsi mono hã te te sima ĩwẽ wamhã, te te ĩma pisutu da, isiré 're ĩhâimana u'âsi mono zéb da hã.

Dawara na romnhimiré'ézé wasu'u

¹² Wa hã uburé marĩ hã 'Re ihâimana u'âsi mono te te ĩma ipisutuzéb zarina, 're ĩhâimana mono zém na te ĩsina 're i'uwaimrami mono na, 're ĩsi'madâ'â mono õ di. Mare di. Zahadu te ĩsina uwe õ di, wa hã. Tane nherẽ, wa tô taha zô 're ĩsiwasutu u'âsi, iwẽ uptabi hã nimahã na te ĩsina sõ'õtõ da. Ãhã da, ma tô Cristu Zezusi hã ĩ'ãma tinhib'a'uwẽ.

¹³ Ĩsisãnawã norĩ, wa hã 'râwi 're ĩsi'madâ'â mono õ di tô, 'Re ihâimana u'âsi mono te te ĩma ipisutuzéb zarina, 're ĩhâimana mono zém na te ĩsina i'uwaimrami na hã. Dawara na 're dasirẽme za'ra mono da, 're dasipibu za'ra mono wamhã, dasibabarãi u apâ da te 're rob'madâ'â za'ra mono õ di. Dasisõwap si te da te 're rob'madâ'â za'ra, õne haré. Tane duré, wa hã marĩ te 're i'ab'manharĩ mono zém na 're ĩsipo're pu'u zahu mono õ di. Mare di. E marĩ wa. Õne haré marĩ iwẽ hã ĩnhowa 're ihâimana mono zô si, wa tô te 're rob'ruiwapari u'âsi.

¹⁴ Marĩ iwẽ hã da te dasina 're sõ'õtõ za'ra mono da, sô 're dasirẽme za'ra mono wa, awa'awi u'âsi 're idasisa'rei mono ne, wa marĩ iwẽ uptabi zô 're ĩsiwasutu u'âsi, Cristu Zezusihi dâ'âzém na 'Re ihâimana u'âsi mono, 're ĩhâimana mono zép té, za te te ĩma isõmri zô si.

¹⁵ Wa norĩ hã 'Re ihâimana u'âsi mono pẽ'ẽzani te te wama 're i'awaihu'u mono zém na si, waprédup sina ãma 're iwahâimana za'ra mono norĩ hã, ãne zô wa za tô wa te ãma 're rosa'rata u'âsi za'ra. Wa za tô ãhã zô si wasima wa te 're rob'ruiwapari u'âsi za'ra. Tane nherẽ, ni'wam norĩ hã asiré 're ihâimana za'ra wa'aba mono hã rosa'rada aimawi na i'upana te te 're rosa'rata za'ra mono wamhã, 'Re ihâimana u'âsi mono hã te za te te tãma 're waihu'u za'ra, tô õhõ na si wasiré te te ãma 're rosa'rata za'ra mono da oto.

¹⁶ 'Re ihâimana u'âsi mono pẽ'ẽzani te te wama 're i'awaihu'u mono zém na si, wa za ãma 're wahâimana za'ra, tô õhõ na si.

¹⁷ Ĩsisãnawã norĩ, ma'ãpé ĩsine 're ĩmorĩ wẽ ne, 're anomro wẽ wa'aba mono za. Ni'wam norĩ ma, tãma ãma 're iwasisanho za'ra mono zéb zarina, wasine 're ihâimana wẽ za'ra mono norĩ ne, te za a norĩ wa'aba zama ãma 're aihâimana wẽ za'ra wa'aba mo.

¹⁸ Ni'wam norĩ hã ahâ na Cristuhu zazei'wa 're hâimana za'ra mono newa, te tihâimana wasété zarina, Cristu hã wedepo'o nhonhi'rãmi na dazada idâ'âzé wasu'u da, 're hâimana za'ra. Ã norĩ wasu'u na hã ahâ na wa tô te ãma aima 're rowasu'u za'ra wa'wa. Tane nherẽ, ãhã na wa duré aima ãma sahu za'ra wa'wa, ĩwawa sina te ãma aima rowasu'u za'ra wa'aba nherẽ, rob'ui'éré na hã.

¹⁹ Ta norĩ hã 'Re ihâimana u'âsi mono nhiti, dapẽ'ẽ 're dadâ'â u'âsi ne 're idahâimana za'ra mono zéb u, te za 're nomro, ropipa u. E marĩ wa. Ta norĩ hã te te sima 're iwẽ za'ra mono zéb uwaibaba si, te marĩ hã tihâiba ma te te 're 'ruiwapari za'ra, 'Re ihâimana u'âsi mono upana. E ta norĩ hã tihâimana wasété na 'râwi 're siwẽ'õ za'ra mono ã bâ, te bété sina 're wata za'ra, 're ihâimana wẽ uptabi za'ra mono na hã. Ti'ai ãma uburé marĩ hã iwasété na si, te ta norĩ hã te te sima 're rosa'rata wasété u'âsi za'ra.

²⁰ Tane nherẽ, wa norĩ ma hã ti'ai ãma waza'rui uptabi hã wama 're hâimana za'ra mono õ di. Hâiwa ãma si te waza'rui uptabi hã wama 're hâimana za'ra. Ta hawi za wei wazô imorĩ zô si, wa wato sina wasina sô 're wanhimipari u'âsi za'ra, Wanho'reptui'wa zô, Wanhib'apito Zezu Cristuhu zô si.

²¹ Taha si te uburé marĩ hã tiwaihu'u pese na te te 're ab'madâ'â, siptete uptabi wa. Tahawa, tiwaihu'u pese na te za wahâiba itém na wama ãma saprĩ za'ra, wahâiba isib'uware ré 're iwanomro 'rata mono zém hawi, isi'utõrĩ pese hawimhã. Tawamhã wahâiba itéb ré, Cristuhu hâiba ne iwẽ uptabi ré, wa za oto 're wahâimana u'âsi za'ra, i'rata.