Filipu 1 - ꞌRe Ihâimana Uꞌâsi Mono Zadawa Wasuꞌu

¹ Wa hã Paulu, Timotiuhu me, Cristu Zezusihi ma romhuri'wa norĩ, wa ãma aima rob'ui'éré za'ra wa'aba ni, Filipu na 'ri nho'õmo nhisi ãma uburé 'Re ihâimana u'âsi mono nhib'a'uwẽ 're i'aihâimana za'ra wa'aba mono norĩ ma. Uburé Cristu Zezusihi ãma si 're anomro aba mono norĩ ma, wa ãma aima rob'ui'éré za'ra wa'aba ni, duré isazei'wa norĩ 'madâ'â'wa 're ihâimana za'ra mono norĩ ma zama, duré dapawapto'wa na 're ihâimana za'ra mono norĩ ma zama hã.

² Wamama 'Re ihâimana u'âsi mono ma, wa ai'ãma 're ĩmreme u'âsi za'ra wa'wa, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da.

Paulu hã 'Re ihâimana u'âsi mono ma, Filipu norĩ ãma 're imreme mono zé wasu'u

³ Ai'ãma 're ĩpo're pu'u za'ra wa'aba mono sidâpâsi, wa 'Re ihâimana u'âsi mono ãma 're ĩwata u'âsi, Ĩnhib'apito ãma.

⁴ Duré 'Re ihâimana u'âsi mono ma, ai'ãma 're ĩmreme za'ra wa'aba mono sidâpâsi, wa ãma aima 're ĩtoi u'âsi za'ra wa'wa, aihâiba mono bâ wa'aba.

⁵ Cristuhu wasu'uwẽ hã 're iwapari na'rata za'ra wa'aba mono zém hawim haré, te oto ĩsiré ãma 're iromhuri u'âsi za'ra wa'aba mo, wa te dama ãma 're iropéi mono zém na hã. Tahawa, wa ĩto sina ai'ãma 're ĩmreme u'âsi za'ra wa'wa, 'Re ihâimana u'âsi mono ma hã.

⁶ Ta hã te te asõ'reptu za'ra wa'aba zém na, iwẽ na te te ai'ãma isãna'rata za'ra wa'aba zéb zarina, te za te te 're aipawaptob u'âsi za'ra wa'wa õne u'â, ti'ai u apâ we imorĩzéb u, Cristu Zezusi hã. Taha õ ré, te te aiwi sazâri waihu'u za'ra wa'aba õ di za, te te 're aipawaptob za'ra wa'aba mono zé hã. Iwẽ si te za tô te te aima 're 'manharĩ u'âsi za'ra wa'wa, ãma 're anomro wẽ u'âsi aba mono da. Ãne wa tô ai'ãma waihu'u za'ra wa'wa, tô sena na.

⁷ I'uwaibaba wa tô ãne na hã ai'ãma waihu'u za'ra wa'wa. E marĩ wa. Ĩpẽ'ẽ 're, ĩma asawi za'ra wa'aba zé hã ĩma 're hâimana u'âsi mono wa. Romhuri iwẽ uptabi hã, 'Re ihâimana u'âsi mono, tinhimizawi pese zéb zarina te te ĩma ipisutuzém na, ma tô ĩsiré tãma 're iromhuri za'ra wa'aba mo, tô. Ãhã na dazazéb 're, 're ĩhâimana mono ré, ma tô a norĩ wa'aba zama 're iromhuri za'ra wa'aba mo ĩsiré. Duré dazazéb 're, 're ĩhâimana mono õ ré hã ma tô duré ĩsiré dama 're iwasu'u za'ra wa'aba mo, Cristu hã. Taha wasu'uwẽ hã senai õ newa da te ĩma 're inharĩ za'ra mono ma, te dama 're anharĩ mono ré hã, ma tô ĩsiré 're iromhuri za'ra wa'aba mo, duré sena na da te 're waihu'u za'ra mono da, te dama 're wasu'u mono ré hã, damreme wa'rãmi.

⁸ 'Re ihâimana u'âsi mono ma si, tãma ĩwaihu'u pese di, sena na ĩma asawi uptabi za'ra wa'aba na hã, duré ai'ãma 're ĩpẽ'ẽzé uptabi za'ra wa'aba mono na zama. Cristu Zezusihi ma, tãma asawi uptabi za'ra wa'aba ne, wa tô duré wa hã te 're asawi pese za'ra wa'wa duré.

⁹ 'Re ihâimana u'âsi mono ma, wa duré ai'ãma 're ĩmreme u'âsi za'ra wa'wa, te te 're aipawaptob u'âsi za'ra wa'aba mono da, 're idazawi za'ra wa'aba mono zé hã aima 're sa'ẽtẽ u'âsi za'ra wa'aba mono da, duré 'Re ihâimana u'âsi mono nhimirowaihu hã 're waihu'u pese za'ra wa'aba mono da. Duré uburé marĩ hã iwẽ na ãma 're waihu'u za'ra wa'aba mono da, wa ai'ãma 're ĩmreme u'âsi za'ra wa'wa, duré iwasété na ãma 're waihu'u za'ra wa'aba mono da, asiwi 're wẽ'õ za'ra wa'aba mono da.

¹⁰ Tawapsi te za iwẽ si asima 're ipisutu u'âsi za'ra wa'aba mo, ãma 're anomro wẽ wa'aba mono da hã. Ãne wapsi, 'râwi aiwasété na 're asi'marõpãrĩ za'ra wa'aba mono õ di za, nimahã na Cristu apâ we imorĩzéb u hã. Ãhã zarina si, te za aiwasété wi, aihâimana nhiptete sina 're anomro u'âsi aba mo.

¹¹ Tahawa, te za iwẽ si 're i'manharĩ u'âsi za'ra wa'aba mo, Zezu Cristuhu nhimipawaptobzéb zarina si. Ãne na ãma 're aihâimana wẽ za'ra wa'aba mono zém na da te 're aiwaihu'u za'ra wa'aba mono wamhã, 'Re ihâimana u'âsi mono ãma si te za 're dawata za'ra. Tane da, wa ai'ãma 're ĩmreme u'âsi za'ra wa'wa, 'Re ihâimana u'âsi mono ma hã.

Paulu hã Cristuhu ma si, 're isisõmri mono zé wasu'u

^12-13 Ĩsisãnawã norĩ, e ãme ropipa hã ĩma ihâimanazéb zarina, ma tô Cristuhu wasu'uwẽ na te te datẽme iropézé hã mazazâ. Mare di. Ãne ĩma romhâimana nherẽ, ma tô da'ahâ na da te 're saze za'ra, Wanhib'apito wasu'uwẽ hã. Ãne na ĩ'ãma waihu'u za'ra wa'aba da, wa tô ĩsima aiwẽ za'ra wa'wa. Dazazéb 're ĩhâimanazém na, ma tô da'wapéi'wa norĩ hã danhib'apito nhorõwa 'madâ'â'wa norĩ hã siwi ĩwaihu'u uburé, Cristuhu ma romhuri'wa 're ĩhâimana mono 'ru te, da te dasiwi ĩnherẽzém na hã. Da'ahâ na ma tô duré ãne na ĩwaihu'u za'ra ni, ãhã 'remhã. Dazazéb 're, da te dasiwi ĩnherẽ õ 'wa'âhã, ta norĩ hã Cristuhu wasu'uwẽ hã te te wapari za'ra õ di aré.

¹⁴ Duré dazazéb 're ĩhâimana wa, te oto wasisãnawã norĩ hã ahâ na te te sina 're umnhasi u'âsi za'ra Wanhib'apito hã, taha si te te 're ĩpawaptob u'âsi mono wa. Tahawa, pahi ãna te oto 'Re ihâimana u'âsi mono wasu'u hã te te dama 're wasu'u za'ra, te te sina 're danhimimnhasi za'ra mono nherẽ, ta norĩ hã.

¹⁵ Ni'wam norĩ hã isiniwĩ da'ahâ na 're dahâimana za'ra mono da si, te Cristuhu wasu'uwẽ hã te te dama 're wasu'u za'ra, ĩnhimiromhuri wẽ zarina, da'ahâ na da te 're saze za'ra mono 'ru te, te te ãma 're ĩ'ruiwapari za'ra mono wa, ta norĩ hã. Ni'wam norĩ si te i'uwaibaba te te dama ãma 're rowasu'u za'ra, te te ãma 're ĩpawaptob za'ra mono da, sena na ta norĩ si te te sima 're wẽ uptabi za'ra mono wa.

¹⁶ Ta norĩ ma, tãma ĩzawi za'ra zarina, te Cristu hã te te dama 're wasu'u za'ra, 'Re ihâimana u'âsi mono hã romhuri te te ĩma isõmri na te te ãma ĩwaihu'u za'ra wa, Cristuhu wasu'uwẽ hã senai õ newa da te ĩma 're inharĩ za'ra mono norĩ ma, tô sena na te dama 're i'anharĩ mono na hã, damreme wa'rãmimhã.

¹⁷ Tane nherẽ, ĩnhimiromhuri na te te 're ĩ'ruiwapari za'ra mono norĩ hã simirosa'rata wẽ na te te dama 're wasu'u za'ra mono õ di, Cristu hã. Sima si te te 're irosa'rata za'ra mono zéb zarina si, te ta norĩ hã te te dama ãma 're rowasu'u za'ra, taré da'ahâ na isimirowasu'u wẽ niwĩ 're dahâimana za'ra mono da. Ma tô duré te te 're rosa'rata za'ra, ãne hawi te ãma 're robzépata za'ẽtẽ mono da, dazazéb 're, 're ĩhâimana mono ré.

^18-19 Tane nherẽ, wẽ di tô, ĩma hã. Ni'wam norĩ hã simirosa'rata wẽ na Cristu te te dama 're wasu'u za'ra mono wamhã, duré ni'wam norĩ hã sima si te te 're irosa'rata za'ra mono zéb zarina, Cristu te te dama 're wasu'u za'ra mono nherẽ, wẽ di duré tô ĩma hã. E marĩ wa. Cristuhu si te te dama 're wasu'u za'ra mono wa, ta norĩ hã. Taha si tô ipire uptabi hã te tô wama 're hâimana. Tahawa, ãma ĩto ti, wa hã. Ĩ'ãma 're aimreme zusi aba mono zéb zarina, duré Zezu Cristuhu pẽ'ẽzani nhimipawaptobzéb zarina, wa za rowẽ na watobro, ãne na ĩma iromhâimana wasété zém hawi. Ãne hã ĩma waihu'u pese wa, wa rowẽ u'âsi 're ĩhâimana tô.

²⁰ Tahawa, wa tô wa hã ĩpẽ'ẽ 're, 're ĩsi'madâ'â pese, niwamhã ĩnhimiromhuri na 'Re ihâimana u'âsi mono ma, te ãma 're i'uwaimrami mono zém na ĩzô 're robaba tõ mono da, õne u'âsi ĩpahi ãna te tãma 're romhuri u'âsi mono da, ãhã na zama. Ãne wa, wa 'râwi te ĩsima 're 'ruiwapari u'âsi. Ãne na tô sena ãma 're ĩhâimana mono zém na da te 're ĩwaihu'u za'ra mono wamhã, te za Cristuhu ãma si 're dawata za'ra, ĩhâiba ré, ãma 're ĩhâimana mono na hã, duré ãté ĩdâ'â da nherẽ, ãma 're ĩhâimana u'âsi mono na zama.

²¹ E marĩ da, wa za 're ĩhâimana, ĩhâiba ré hã. Cristuhu ãma si 're ĩmorĩ da. Duré tô ĩdâ'â da wamhã, marĩ õre di, ta hã tô duré ĩma wẽ uptabi di.

²² E ma hã wa za tawamhã ĩsima wẽ. E da te dasiwi ĩwĩrĩ su'u da. E ĩhâiba ré 're ĩhâimana mono da si a'â. Wa hã 'râwi te ĩsima pisutu waihu'u õ di, ĩsi'uihâ na hã. Tane nherẽ, aré tô ĩma iwẽ ta hã, ĩhâiba ré a'â 're ĩhâimana siroptu mono da hã. E marĩ wa. Ãne wamhã, romhuri iwẽ hã wa aré te tãma 're ab'manharĩ u'âsi a'â, Cristuhu ma, te tãma 're ida'awaibui mono zém na hã.

²³ Ĩnhimirosa'rada hã maparane te 're si'wapé zahuré, ĩpẽ'ẽ 'remhã. Ti'ai ãma 're ĩmorĩzé hã te rẽme da hã, wa ĩsima te 're wẽ tô, Cristuhu siré 're ĩhâimana mono da oto, hâiwa ãma. Ãne wamhã, ĩma 're rowẽ uptabi mono di aré, ti'ai ãma 're ĩhâimana mono zém nhipai u hã.

²⁴ Tane nherẽ, ai'udâna za'ra wa'aba, a'â ti'ai ãma 're ĩhâimana mono da hã, ĩma wẽ uptabi di, te 're aipawaptob za'ra wa'aba mono da hã a'â.

²⁵ Ãne na hã wa tô, tô sena na ĩsina waihu'u. Tahawa, 'râwi wa tô duré ĩsina waihu'u, za a'â asiré 're ĩhâimana za'ra wa'aba mono na hã, ĩnhimipawaptobzéb zarina 'Re ihâimana u'âsi mono hã asina 're i'umnhasi za'ra wa'aba mono zém na asima ãma 're sa'ẽtẽ za'ra wa'aba mono da, duré ato sina ãma 're anomro aba mono da.

²⁶ Ãne wamhã, nimahã na apâ ãma atẽme ĩmorĩ za'ra wa'aba wamhã, te za Cristu Zezusihi ãma aiwata za'ra wa'wa, ĩzabu za'ra wa'aba zém na.

²⁷ Niha za ĩma romhâimana nherẽ, te za Cristuhu wasu'uwẽ zarina si 're anomro wẽ wa'aba mo, taha si aima pire za'ra wa'aba wa, ãma 're aihâimana za'ra wa'aba mono zéb da hã. Ãne 're aihâimana za'ra wa'aba mono ré, ãma atẽme ĩmorĩ za'ra wa'aba wamhã, wa za ai'ãma waihu'u za'ra wa'wa, simisutu asiptete sina asitob'ru norĩ da, 're aihâimana za'ra wa'aba mono zém na hã, asimirosa'rata misi na, taha zarina 'Re ihâimana u'âsi mono, da te dasina 're umnhasi za'ra mono da, Cristuhu wasu'uwẽ hã da te 're isaze za'ra mono zéb zarina. Duré ãté ãma atẽme ĩmorĩ za'ra wa'aba õ nherẽ, wa za tô õhõ na si ai'ãma waihu'u za'ra wa'wa, simisutu asiptete sina ãma 're aihâimana za'ra wa'aba mono na hã.

²⁸ Asitob'ru norĩ ma, 're aipahi za'ra wa'aba mono da hã, mare di, Cristuhu zazei'wa norĩ 'ruiwapari'wa norĩ ma hã. Ãne hã aipahi ãna sada 're aihâimana za'ra wa'aba mono wamhã, te za ta norĩ hã 'râwi 're siwaihu'u za'ra, 'Re ihâimana u'âsi mono za te te i'uprosizém na hã, duré a norĩ wa'aba si za te te i'asõ'reptu za'ra wa'aba zém na hã.

²⁹ Tinhoprubzéb zarina ma tô aima pisutu za'ra wa'wa, Cristuhu si asina 're umnhasi za'ra wa'aba mono da, Danho'reptui'wa na. Ma tô duré aima pisutu za'ra wa'wa, Cristu dama 're wasu'u za'ra wa'aba mono wa, da'ãma 're irobzépata za'ra wa'aba mono zém hawi, Cristuhu si da te 're saze za'ra mono da hã.

³⁰ Tame ai'rata ĩnhamra za'ra wa'aba ré, ma tô asiwi ĩ'madâ'â za'ra wa'wa, rowasédé hã da te i'manharĩ na ĩma, te robzépata da. Taha na, zahadu te irobzépata u'âsi na ma tô ãhã na hã ĩwasu'u hã iwapari za'ra wa'wa. Tane te za duré a norĩ wa'wa hã 're irobzépata za'ra wa'aba mo ĩsine, rowasédé hã da te aima 're i'manharĩ za'ra wa'aba mono zém na hã.