Ezodu 8 - ꞌRe Ihâimana Uꞌâsi Mono Zadawa Wasuꞌu

Maparane ãma rob'manharĩzé wasu'u, uti zarãpré na

¹ Tawamhã Uburé Danhib'apito, te duré taha parimhã Mozésihi ma tinha ãne: — Apito Fara'oho u duré aimorĩ, ãne na tãma ĩzadawa wasu'u da. “Ĩnhib'a'uwẽ norĩ ma, te za irowairé, ã hã ti'ai wa'õtõ nho'õmo hawi wairébé da, ĩ'ãma 're wata za'ra mono da.

² Tãma waprosi waré za'ra õ wamhã, wa za wa hã ã hã ti'ai wa'õtõ nho'õmo ma rob'manha. Uti zarãpré hã te za nemo te te rob'rãi'ré za.

³ Tawamhã Nilu na panho'õmo nhisi 'remhã uti zarãpré hã ahâ uptabi di za. Ta norĩ hã â hawi rob u iwairébé hã te za asimiwaptâ u, aima romhuri'wa norĩ nhorõwa u hã, asib'a'uwẽ norĩ nhorõwa u hã, marĩ zebrezéb u hã, duré i'u'ẽtẽ wai'ozéb u hã uburé sisisi.

⁴ Tawamhã duré uti te za asisiwimhã 're sarõtõ za'ra, asib'a'uwẽ norĩ nhisiwimhã, duré aima romhuri'wa norĩ nhisiwimhã.”

⁵ Tawamhã te duré zahadu Mozésihi ma tinha ãne: — Ma'ãpé Arãhã ma nharĩ, pa nho'õmo mono nhisiwi, isipti mono nhisiwi, duré pu'u mono nhisiwi, tinhiwã hã te te wẽ mono da, uti hã ta norĩ hawi wairébé mono da rob u, Ezitu ti'a hã te te siwi i'ubu da hã.

⁶ Tawamhã Arã, Ezitu ãma â nhisiwi tinhiwã te te wẽ wamhã, ma tô uti zarãpré rob u wairébé. Tahawa, ma tô uburé ti'ai wa'õtõ nho'õmo 'remhã nemo te te suwa.

⁷ Tane nherẽ, marĩ 'manharĩ waihu'u nhipese'wa norĩ, tô õne tinhimiromhõ hã ma tô siwi 'manha, Ezitu ti'ai u uti zarãpré iwairébé da hã.

⁸ Tawamhã apito Fara'o, Mozési norĩ zô Arãhã me hã ma tô sô tihârâ zahuré, te te ãne tãma nharĩ zahuré da: — Ma'ãpé, asib'apito 'Re ihâimana u'âsi mono ma tãma aimreme aba, uti zarãpré hã ĩnhiti, duré ĩnhib'a'uwẽ norĩ nhiti te te satõrĩ za'ra da. Tawamhã wa hã wa za asib'a'uwẽ norĩ ma hã waprosi za'ra, za si'aba'ré da, Uburé Danhib'apito uptabi ma, abaze da te 're izata za'ra mono na tãma 're sõprub za'ra mono da hã.

⁹ Tawamhã Mozési ma te ãma tãma wa'rã ãne: — Wẽ di tô. Ma'ãpé bâdâ hã ai'ãma tãma ĩmremezéb da hã, aima dama roti'wa norĩ ãma tãma ĩmremezéb da hã, asib'a'uwẽ norĩ ãma tãma ĩmremezéb da hã, a'â ĩma pisutu, asimiromhurizé 'ri 'remhã, duré danhorõwa 'ri 'remhã te te uprosi da, apâ â wapsi 're hâimana za'ra mono da.

¹⁰ Tawamhã apito Fara'o ma te ãma tãma wa'rã ãne: — Awẽpsi te za ĩ'ãma aimre, asib'apito ma. Tawamhã Mozési te tãma tinha ãne: — Apito, asima iwẽzé iwaptẽrẽzé hã wa za 'manha. Ãhã wamhã, a hã te za iwaihu, Uburé Danhib'apito ne, aimawi i'maihâimana õ na hã.

¹¹ A hã, aima romhuri'wa norĩ me, duré asib'a'uwẽ norĩ me te za oto uti zarãpré ãna hã asima iwẽ na aihâimana za'ra wa'wa. Nilu â na si te za oto uti zarãpré hã tihâimana za'ra.

¹² Tawamhã Mozési norĩ Arãhã me ma tô apito nhimiromhurizé 'ri hawimhã oto tipusi zahuré. Tawamhã Mozési ma tô 'Re ihâimana u'âsi mono ma hã mre, apito 're ihâimana mono zéb 'remhã uti zarãpré te te uprosi da, apito nhorõwa u te te aré tãma ĩrob'ru za'ra hã.

¹³ Tawamhã Uburé Danhib'apito, tãma imremezé hã ma tô wapa. Tahawa uti zarãpré 'ri 're ihâimana za'ra hã, duré 'ri zahâpâ na ihâimana za'ra hã ma tô ai'utõ.

¹⁴ Tawamhã ezipsiu norĩ, ma tô nemo te te sa'wari uti zarãpré hã, sa'wari 'rãihâ na. Tahawa ti'ai wa'õtõ nho'õmo mono bâ ma tô i'uzé hã te te ropé.

¹⁵ Tawamhã apito, uti zarãpré dâ, te te a'madâ'â wamhã, ma tô duré tipẽ'ẽ tete na tihâimana na hã apâ ãma uzusi, Uburé Danhib'apito te te iwaihu'uzéb zarina. Mozési norĩ Arãhã me, te te tiwi irowaptẽrẽ zahuré hã te te wapari õ di.

Si'ubdatõ ãma dama rob'manharĩzé wasu'u, da'u na

¹⁶ Tawamhã Uburé Danhib'apito te Mozésihi ma, duré tãma tinha ãne: — Ma'ãpé Arãhã ma nharĩ, tinhiwã na ti'a te te azâri da, te te i'azâri hawi Ezitu ti'ai 'remhã uburé ti'a zaprum nherẽ, da'u na si'manharĩ za'ra da.

¹⁷ Tawamhã Arã tinhiwã na ti'a te te azâri wamhã, ma tô Ezitu ãma ti'a zaprum nherẽ, da'u na hã uburé si'manha. Ta hã ma tô nemo te te dazuwa za'ra. Duré danhimizama norĩ zama ma tô nemo te te suwa za'ra.

¹⁸ Tawamhã marĩ 'manharĩ waihu'u nhipese'wa norĩ, ma tô aré da'u na asa te te rob'manharĩ za'ra da hã siwi pibu. Tane nherẽ, te te oto tawamhã siwi ãma uwaimrami õ di, tinhimiromhõsi na hã. Tawamhã te zahadu a'uwẽ norĩ hã, duré danhimizama norĩ hã, da'u te te isuwa za'ra na hã tihâimana za'ra.

¹⁹ Tawamhã marĩ 'manharĩ waihu'u nhipese'wa norĩ, te apito ma nharĩ za'ra ãne: — 'Re ihâimana u'âsi mono nhib'rata hawim na ma tô ãne hã tiromhâiba. Tane nherẽ, apito Fara'o tipẽ'ẽ tete na tihâimana na hã ma tô ãma uzusi, 'Re ihâimana u'âsi mono te te iwaihu'u siromo zéb zarina. Tahawa Mozési norĩ Arãhã me te te tiwi irowaptẽrẽ zahuré zém na hã te te wapari zahuré õ di.

Maparane si'uiwa na ãma dama rob'manharĩzé wasu'u, upu na

²⁰ Tawamhã Uburé Danhib'apito, Mozésihi ma, te tinha ãne: — Awẽ mararé, apito padawa u morĩ wamhã isõ'rãmi aimorĩ, wa hã Uburé Danhib'apito ãne na te ĩnharĩzém na tãma ĩzadawa wasu'u da: “Ĩnhib'a'uwẽ norĩ ma, ti'ai wa'õtõ nho'õmo hawi wairébé da hã te za tãma iwaprosi su'u za'ra, ĩ'ãma 're wata za'ra mono da.

²¹ Tãma waprosi su'u za'ra õ wamhã, wa hã wa za upu na te aima rob'manharĩ da hã, aima romhuri'wa norĩ ma, te rob'manharĩ da hã, duré ate a'uwẽ norĩ ma, te rob'manharĩ da hã ãma tãma rob'ru za, wairébé da. Tawamhã ezipsiu norĩ nhorõwa 'remhã ubu hã 'masisi mono di za. Duré ti'a nemo te za te te upsibi.

²² Tane nherẽ, taha bâtâ na, ĩnhib'a'uwẽ Gosẽ na rowamri ãma 're ihâimana za'ra mono zéb ãma wa za tãma ba'a za'ra, taha ti'ai 'remhã ubu hâimana tõ da. Ãne wa, te za a hã ĩwaihu, wa hã Uburé Danhib'apito ã hã ti'ai wa'õtõ nho'õmo 're ĩhâimana na hã.

²³ Ĩnhib'a'uwẽ norĩ, asib'a'uwẽ me, aiwa tãma iromhâimana zahuré õ zém na wa za ĩsima ãma rowairébé. Tawamhã ã hã romhõsi pipa na rob'manharĩzé hã te za awẽ mararé si tihâiba.”

²⁴ Tawamhã ãne Uburé Danhib'apito, 'Re ihâimana u'âsi mono te te rob'manharĩ wamhã, ma tô apito nhimiromhurizé 'ri 'rãihâ u ubu hã asisi. Duré tãma romhuri'wa norĩ nhorõwa u zama ma tô sisisi. Ahâ uptabi wa, te duré nemo 're si'ré. Tahawa uburé Ezitu ãma hã ma duré te te siwi rowamnarĩ.

²⁵ Tawamhã apito, Mozési norĩ zô, Arãhã me sô hârâ zahuré wamhã, te ãne tãma nharĩ zahuré: — Te za oto ai'aba'réi wa'wa, danhimizama zata na ate 'Re ihâimana u'âsi mono ma, ãma tãma asõprub za'ra wa'aba da. Tane nherẽ, danhimizama zata na Ezitu 're te za asõprubzé hã asiwi i'manharĩ 'wa.

²⁶ Tawamhã Mozési ma te ãma tãma wa'rã ãne: — Mare di, i'uwaibaba õ di tane hã. E marĩ wa. Uburé Danhib'apito, wate 'Re ihâimana u'âsi mono ma, wanhimizama zata na za tãma 're iwanhoprub za'ra mono zé hã, ezipsiu norĩ ma iwazéb zahi, tãma hâimana za'ra wa. Tawamhã wanhimizama wa te 're simroi mono ré, te te duré 're wa'madâ'â za'ra mono wamhã, te za ẽtẽ na te te siwi 're wanhimro.

²⁷ Wa za tô rop si 're irosa'wari mono u si'ubdatõ bâtâ 'remhã wazâmorĩ ni, tô Uburé Danhib'apito te te wama iwaihu'uzéb zarina danhimizama zata na ãma tãma 're wanhoprub za'ra mono da, ro te te ipisutu tẽme iwasihutuzéb u.

²⁸ Tawamhã apito te duré tãma nharĩ zahuré ãne: — Romhâ na ai'aba'réi wa'aba dai õ wamhã, wa za rop si 're irosa'wari mono u danhimroi wa'aba mono da hã aima waprosi wa'wa, Uburé Danhib'apito, ate za'ra wa'wa 'Re ihâimana u'âsi mono ma asimizama zata na ãma tãma asõprub za'ra wa'aba da hã. Tawamhã te za duré ĩ'ãma zama 're aimreme aba mo.

²⁹ Tawamhã Mozési, ma duré ãma tãma wa'rã ãne: — Wẽ di. Ã hawi ĩwatobro wi, wa za tô 'Re ihâimana u'âsi mono ma hã ai'ãma mre, ubu hã te te aima sate mono da, aima romhuri'wa norĩ ma hã, duré ate a'uwẽ norĩ ma hã. Tane nherẽ, oto wama asadawa nhipese na sahu õ di za. Amanawi taré wama ropisutu tõ. Te za tô oto a'uwẽ norĩ hã ai'aba'ré, ropsi 're iropsa'wari mono ãma, Uburé Danhib'apito ma, danhimizama zata na tãma 're sõprub za'ra mono hâ.

³⁰ Tawamhã Mozési, apito nhimiromhurizé 'ri hawi watobro wamhã, ma tô Uburé Danhib'apito ma hã mre.

³¹ Tawamhã Uburé Danhib'apito, Mozési te te tiwi iwaptẽrẽzé hã ma tô 'manha. Tahawa apito hawimhã ubu hã ma tô te te sate, duré tãma iromhuri'wa norĩ hawimhã, duré ite a'uwẽ norĩ hawimhã. Tahawa, 'maihâimana õ pese na te tiromhâiba oto.

³² Tane nherẽ, apito pẽ'ẽ tete na tihâimana na hã ma tô duré apâ ãma uzusi. Tahawa dasi'aba'ré da hã te te duré dama waprosi za'ra õ di.