Ezodu 3 - ꞌRe Ihâimana Uꞌâsi Mono Zadawa Wasuꞌu

Mozésihi ma, 'Re ihâimana u'âsi mono te te inharĩzé wasu'u

¹ Tawamhã Mozési te oto pone'ẽrebâ te te 're a'madâ'â, timaprebaba ma, Zetru sasedoti Midiã na romnhisi ãma 're isãmra mono ma. Tawamhã nimahã bâtâ na ma tô pone'ẽrebâ te te simro, ti'a zada'ré amoi u, rop si 're irosa'wari mono wa'wai baba. Taha wamhã, ẽtẽ 'rãihâ iwazéb zahi, Sina'i na isisi na 're ihâimana mono u ma tô oto wi.

² Tawamhã tame hâimana ré, ma wede zapore hã ãro, Mozésihi 'rata. Ro'o nherẽ, zata õ di. Taré te ãro. Taha wa'wa te 'Re ihâimana u'âsi mono hã za. Mozésihi ma, sihâi'ré da, te iwa'wab za.

³ Tawamhã Mozési te sima tinha: “E niha wede ro'o nherẽ, zata õ di. Wa za pé itẽme ĩsina rotété, te 'madâ'â da.”

⁴ Tawamhã Uburé Danhib'apito, Mozési 'râwi itẽme te te sina irotété na te te 'madâ'â wamhã, ma tô wede iro'o wa'wa hawi 'mahâ ãne: — Mozési! Mozési! Tawamhã awa'awi ma sada'â ãne, Mozési hã: — E marĩ. Ãhãta, ãme wa za.

⁵ Tawamhã 'Re ihâimana u'âsi mono hã te tãma tinha ãne: — Tame asimizazâri. 'Râwi we ĩtẽme aimorĩ tõ! Ma'ãpé aipara'uza hã sani na. E marĩ wa. Ta ti'a iwa i'asa hã iwazéb zahi wa. Te duré tãma nharĩ na sahu ãne, 'Re ihâimana u'âsi mono hã:

⁶ — Wa hã aihi'rata norĩ nhib'apito 'Re ĩhâimana u'âsi mono, Abra'ãhã nhib'apito, Izaquihi nhib'apito, duré Zacoho nhib'apito. Tawamhã Mozési ma tô si'ubu zuwa, pahi wa, 'Re ihâimana u'âsi mono te te i'madâ'â da hã.

⁷ Tawamhã Uburé Danhib'apito te ãne duré tãma tinha: — Ezitu ãma ĩnhib'a'uwẽ norĩ ma, da te tãma 're irob'manharĩ wasété za'ra mono zém na hã wa tô te 're 'madâ'â za'ra. Duré tiwada'uri'wa norĩ wi, da te pawaptob za'ra da, te te 're irowaptẽrẽ za'ra mono zé hã wa tô te 're wapari. Wa hã ĩma waihu'u pese di, te te tô 're irobzépata za'ra mono zé hã.

⁸ Tahawa wa tô we si'ra, ezipsiu norĩ siptete na 're ihâimana za'ra mono hawi te dawazere da, ta hawi duré ti'a ĩsa'ẽne iwẽ u te danhimro mono da, ti'a iwẽ ãma cananeu norĩ, hitita norĩ, amoreu norĩ, perizeu norĩ, heveu norĩ, duré zebuzeu norĩ iwa 're ihâimana za'ra mono zéb u.

⁹ Sena na da te pawaptob za'ra da, ĩnhib'a'uwẽ nhimirowaptẽrẽ zahi za'ra zé hã wa tô te 're wapari. Ezipsiu norĩ te te tãma 're irob'manharĩ wasété za'ra mono zém na hã wa tô duré te 're 'madâ'â za'ra.

¹⁰ Tahawa ma'ãpé aimorĩ. Wa hã wa za Ezitu te apito u hã asatõ, ĩnhib'a'uwẽ Izaraéu nhihudu norĩ, isipti'ai hawi sani za'ra da hã.

¹¹ Tane nherẽ, ãne te Mozési hã tãma tinha: — E 'wa hã wa hã bété, Ezitu te apito u, ĩmorĩ da hã, ta hawi za Izaraéu nhihudu norĩ, te isani za'ra da hã.

¹² Tawamhã 'Re ihâimana u'âsi mono, ma duré ãma sada'â ãne: — Wa hã wa za asiré ĩhâiba. Niwa nimahã na Ezitu hawi ĩnhib'a'uwẽ awazere wamhã, a norĩ wa'wa te za ã hã ẽtẽ ãma hã ĩ'ãma 're aiwata za'ra wa'aba mo. Tawamhã ãne na te i'asatõrĩzém na te za a hã tô sena na hã iwaihu.

¹³ Tane nherẽ Mozési, te 'Re ihâimana u'âsi mono ma ãne tãma tinha: — Izaraéu nhihudu norĩ u ĩmorĩ wamhã, duré ãne te tãma rowasu'u za'ra wamhã: “Aihi'rata norĩ te, 'Re ihâimana u'âsi mono hã ma tô we atẽme ĩzatõrĩ za'ra wa'wa”, te za siwi ĩzadanha, ãne: “E niha tawamhã isisi.” Tawamhã e niha wa za ãma tãma wa'rãmi za'ra za.

¹⁴ Tahawa, 'Re ihâimana u'âsi mono te ãne sina tãma tinha: — WA HÃ, tô WA HÃ 'RE ĨHÂIMANA U'ÂSI MONO. Te duré zahadu tãma tinha ãne: — Te za duré tãma inharĩ za'ra za ãne: “Tô WA HÃ 'RE ĨHÂIMANA U'ÂSI MONO, ma tô we atẽme ĩzatõrĩ za'ra wa'wa.

¹⁵ Uburé Danhib'apito, 'Re ĩhâimana u'âsi mono aihi'rata norĩ te, Abra'ãhã te, Izaquihi te, Zacoho te, ma tô we atẽme za'ra wa'aba hã ĩzatõ. Taha nhisi hã te õne u'â 're hâimana. Tahawa, taha nhisi na te za õne u'â a norĩ wa'wa hã ãma 're asipo're pu'u za'ra wa'aba mo.”

¹⁶ Tawamhã taha pari te 'Re ihâimana u'âsi mono duré ãne tãma tinha: — Aimorĩ, Izaraéu norĩ ma, i'rãnho'u 'rã'õtõ da. Tawamhã te za ãne tãma ĩzadawa wasu'u za'ra. Wa hã Uburé Danhib'apito aihi'rata norĩ te, 'Re ihâimana u'âsi mono, Abra'ãhã nhib'apito, Izaquihi nhib'apito, duré Zacoho nhib'apito. Wa tô aima ĩsihâi'ré. Duré wa tô aima waihu'u, ãne na tãma ĩzadawa wasu'u za'ra da: “Wa hã 're irobzépata za'ra wa'aba mono zé hã wa tô te 're 'madâ'â. Duré ezipsiu norĩ te te aima 're irob'manharĩ wasété za'ra wa'aba mono zé hã ĩma waihu'u pese di.

¹⁷ Wa hã wa tô rowairébé, Ezitu ãma da te tãma 're irob'manharĩ wasété za'ra mono zém hawi te sani za'ra da hã. Tahawa wa za te simro ti'ai wẽ u, duré ti'a simarĩ pese na 're isa'wari mono u, cananeu norĩ iwa 're ihâimana za'ra mono zéb u, hitita, amoreu, perizeu, heveu, duré zebuzeu.”

¹⁸ — Tawamhã duré ãne tãma ĩzadaihu'u za'ra wamhã, te za ĩnhib'a'uwẽ norĩ aiwapari za'ra. Taha pari te za Izaraéu nhihudu norĩ ma i'rãnho'õmo norĩ me hã ai'aba'réi wa'wa, Ezitu te apito ma, nharĩ za'ra wa'aba da hã. Tahawa, te za ãne tãma inharĩ za'ra wa'wa za: “Uburé Danhib'apito, hebreu norĩ te 'Re ihâimana u'âsi mono, ma tô wama za'ra hã sihâi'ré. Tahawa, wama rowairébé za'ra na, a'ubuni wi rop si 're irosa'wari mono u wasi'aba'ré da. Tawamhã wasi'aba'réi ré te za si'ubdatõ bâdâ hã wa'ãma tineb za'ra, Uburé Danhib'apito wate 'Re ihâimana u'âsi mono ma, wanhimizama zata na tãma ãma wanhoprub za'ra da hã.”

¹⁹ Wa tô waihu'u siro, Ezitu te apito ma, 'Re ihâimana u'âsi mono te te tãma pẽtẽ õ nherẽ, za te te aima iwaprosi za'ra wa'aba õ na, aiwairébé aba da hã.

²⁰ Tahawa wa za ĩnhiptete na ezipsiu norĩ ma rob'manharĩ wasété za'ra, te ãma hâ za'ra da hã. Taha parip si, te za apito Ezitu hawi aiwairébé aba da hã aima waprosi za'ra wa'wa, azâmorĩ aba da oto.

²¹ — Tawamhã wa za duré ezipsiu norĩ ma 'manharĩ za'ra, za te te aiwazéb za'ra wa'aba da hã. Tahawa nimahã na oto aiwairébé aba da wamhã, asib'rata baba na hã ai'aba'réi wa'aba õ di za.

²² Tahawa te za hâiba mono bâ Izaraéu nhihudu norĩ nhipi'õ, ezipsiu nhipi'õ norĩ isõrõwa 're, 're ihâimana za'ra mono wi hã, duré iwaptoma 're ihâimana za'ra mono wi hã, marĩ hã, ẽtẽ waipo prã prata hã, ẽtẽ waipo pré oru hã, duré i'uza ãma 're isi'uza za'ra mono da hã, i'ra si aibâ norĩ hã, duré i'ra sipi'õ norĩ hã tiwi tãma waptẽrẽ za'ra za. Tawamhã ãne te za ezipsiu norĩ wi isimarĩ hã tiwi iwaibu za'ra wa'wa za.