Ezodu 2 - ꞌRe Ihâimana Uꞌâsi Mono Zadawa Wasuꞌu

Mozésihi waptã'ãzé wasu'u

¹ Tawamhã Levihi nhihudu zahuré ma tô sina timro zahuré aibâ norĩ hã, pi'õi me.

² Tawamhã pi'õ wasã wamhã, ma tô i'ra hã tãma podo. Tahawa, ina 'watébrémi na te te 'madâ'â wamhã, iwẽ uptabi, i'madâ'â ze. Tahawa ma tô si'ubdatõ a'amoi 'remhã dawi simi'u.

³ Tawamhã te te oto dawi simi'uri waihu'u õ wa, ma tô ina, sé'waza'are ne nhamri si'õno hã ti'â. Tahawa, isapu hã ma tô te te sada anhito wedewa'u tom na, â sisisi tõ da, si'õtõ ne 're. Tawamhã ma tô ti'ra hã tisẽ, iwa. Taha pari ma tô iré tihi, â zada'ré 'rõ'rõ wa'wa.

⁴ Tahawa, te 'watébrémi hidiba romhâ hawi 'madâ, niha marĩ tãma ihâimana zô.

⁵ Tawamhã Apito Fara'oho 'ra sipi'õ te âi ba mo, si'upte da. Taha ré, tãma romhuri'wa norĩ sipi'õ te âibabamhã 're nomro. Tawamhã si'õno 'rõ'rõ wazari 're iwara hã ma tô tisã, Apito Fara'oho 'ra hã. Te te sãmri wi, ma tô tãma iromhuri'wa norĩ ma 'ru za'ra, sô 'maimorĩ da.

⁶ Tawamhã Apito Fara'oho 'ra, ma isidâzé sa'o. Te te sa'o wamhã, ma tô ai'utére hã 'madâ, wawai ré. Tahawa ma tô ãma tipẽ'ẽzé. Tawamhã te tinha ãne: — Ã hã 'watébrémi, Izaraéu nhihudu 'ra.

⁷ Tawamhã ai'uté hidiba te ãma sadanha, apito Fara'oho 'ra hã ãne: — E asima wẽ õ di, Izaraéu nhihudu nhipi'õ zô aima ĩmorĩ da hã, te te aima 'maiwapsõmri da, duré te te a'â aima 'maiprédub da.

⁸ Tawamhã ma te ãma sada'â ãne: — Ma'ãpé, sô aimorĩ, we 'mazaprõni da. Tawamhã azarudu ai'uté hidiba ma tô sô mo. Tahawa, ai'uté 'watébrémi na uptabi hã ma tô itẽmemhã saprõ, apito 'ra u.

⁹ Tawamhã apito Fara'oho 'ra te ai'uté na uptabi ma tinha ãne: — Ai'uté 'watébrémi hã ma'ãpé ãma subzari, ĩma warahu da a'â. Tawamhã wa hã wa za iwarahuzém na asimiromhuri hã aima wa'â. Tawamhã ma tô ina hã subza apâ, tinhorõwa u. Duré ma tô warahu oto, apito 'ra ma.

¹⁰ Tawamhã 'watébrémi oto prédu wamhã, ma tô apito 'ra u oto saprõ, te te ãma tãma irotizéb zarina te te tãma sõmri da oto. Tahawa, ma tô ãma ti'ra oto, ti'ra uptabi nai õ nherẽ. Ma tô sisi, Mozési na. Tawamhã te sima tinha ãne: — Wa hã wa tô â hawimhã waze, ai'utére hã. Tahawa, wa tô sisi, Mozési na.

Mozési, Ezitu hawi isimanizé wasu'u

¹¹ Tawamhã Mozési ma tô oto si'aibâ. Tahawa te nimahã bâtâ na tisiré norĩ te te sabu da oto mo. Morĩ wamhã, ma tô ab'madâ, romhuri pire na te te rob'ma'wamarĩ ré hã. Tahawa ezipsiu norĩ siré hã, isiré Izaraéu nhihudu te te i'mai'azâri zama hã ma tô 'madâ.

¹² Tawamhã Mozési si'wawi ni'wai õ zô, te te 're rob'madâ'â mono wamhã, ni'wa hã te te 'madâ'â õ di. Tahawa ma tô tiwĩ, ezipsiu hã. Te te wĩrĩ wamhã, supara na ma tô hâiba zuwa, da te dasiwi sãmri tõ da.

¹³ Tawamhã awẽm na rowa'a wi apâ te te sina siri wa, ma tô Izaraéu nhihudu norĩ isi'ahâri hã 'madâ'â zahuré. Tahawa tisiré te te i'azâri ma te tãma tinha ãne: — E marĩ da, ma tô asiré nherẽ i'azâ.

¹⁴ Tawamhã te tãma tinha asa ãne: — E 'wa hã ma tô wanhib'apito da hã wa'ãma 're i'arowairebé mono da hã aipisutu. Duré e ma tô asima iwẽ, ĩwĩrĩ da, ezipsiu iwĩrĩ ne. Tawamhã Mozési ma tô tipahi. Tahawa te tipẽ'ẽ na 'râwi sima tinha ãne: “Ma tô oto dasiwi ĩ'upsibi me ni, te i'manharĩ wasété zém na hã.”

^15-16 Tawamhã apito Fara'o, Mozési te te ida'maiwĩrĩzé hã ma tô waihu'u. Tahawa ma tô ãma sima rosa'rata, te te wĩrĩ da. Tane nherẽ, tahawa Mozési ma tô aimani. Simani wamhã, ma tô mo, Midiã ãma 're hâimana mono da. Tawamhã Zetru sasedoti, te Midiã na romnhisi ãma 're sãmra, 7 na i'ra sipi'õ hã. Tawamhã nimahã bâtâ na Mozési â zô ab're 'rata sãmra ré, ma tô i'ra norĩ â te te amrami za'ra da hã ai'aba'ré, pone'ẽrebâ te te 're i'âhuri mono zéb 're te te â hã tãma aza'wari za'ra da, timama nhimizama ma.

¹⁷ Tawamhã pone'ẽrebâ 'madâ'â'wa norĩ hã ma tô duré ãma aihutu, â zô ab're u. Sihutu wamhã, ma tô timreme te te tãma 'morõwĩrĩ za'ra sina pi'õ norĩ si'aba'ré da â nhiti sãmra. Tane nherẽ, Mozési ma tô ãma sisaprĩ za'ra, pi'õ norĩ ãma, pone'ẽrebâ 'madâ'â'wa norĩ wi. Tahawa ma tô nasi tãma amrami za'ra â hã, pone'ẽrebâ te te i'âhuri da hã.

¹⁸ Tawamhã pi'õ norĩ, imama 're isãmra mono zéb u apâ sihutu wamhã, ma tô imama hã sadanharĩ za'ra ãne: — Oro ma we apâre aihutu 'wa.

¹⁹ Tawamhã ma sada'âbâ za'ra ãne: — Ezipsiu norĩ siré hã ma tô wa'ãma sisaprĩ za'ra, pone'ẽrebâ 'madâ'â'wa norĩ wi. Tahawa, ma tô nasi â hã wama amrami za'ra asimizama ma, te te i'âhuri da hã.

²⁰ Tawamhã Zetru imama za'ra hã te ãma sadanharĩ za'ra ãne asa: — E mame te tawamhã nhamra. Zapre we asiwi saprõni aba õ di. Sô aihârâ aba, we morĩ da, wame sa za'ra da.

²¹ Tawamhã Zetru, Mozési te hâiba waptẽ, i'rata 're hâimana mono da. Tahawa, ma tô sina saze, tô i'rata 're hâimana mono da hã. Tawamhã Zetru ma tô ti'ra Zipora na isisi Mozésihi ma tisõ, ãma mro da.

²² Tawamhã oto 'ra wamhã, ma tô sisi Mozési hã, Gésõ na. Te te sisi wamhã, ãne te tinha: — Wa hã ĩsiré a'uwẽ'õ nhipti'ai ãma wa oto 're ĩhâimana.

²³ Tawamhã ãma wahub ahâ pari, ma tô Ezitu te apito hã dârâ. Tane nherẽ, te i'uirĩ na zahadu Izaraéu nhihudu norĩ hã te te 're robzépata za'ra, ezipsiu norĩ te te 're iwada'uri pese za'ra mono zéb zarina. Tahawa te mreme 'rãihâ na 'Re ihâimana u'âsi mono wi, te te 're rowaptẽrẽ za'ra, te te 're pawaptob za'ra mono da hã. Tahawa, ma tô isimirowaptẽrẽ za'ra zé hã itẽmemhã 're simasisi, 'Re ihâimana u'âsi mono u.

²⁴ Tawamhã 'Re ihâimana u'âsi mono, Izaraéu nhihudu norĩ 're iwazidi za'ra mono zé hã ma tô wapa. Tahawa Abra'ãhã ma, Izaquihi ma, duré Zacoho ma, tinhimiropisutu zahi te te i'manharĩzém na hã, ma tô sina po're puru.

²⁵ Izaraéu nhihudu norĩ, pawa'âbâ ãna te te 're iromhuri za'ra mono zé hã ma tô 'madâ. Tahawa oto ãma hâtâ'â za'ra di.