Ezodu 16 - ꞌRe Ihâimana Uꞌâsi Mono Zadawa Wasuꞌu

Mana na i'u'ẽtẽ wapu ne ibaihâire wasu'u, 'ri'ripire zebre wasu'u me

¹ Tawamhã uburé Izaraéu nhihudu norĩ, Erĩ na rowamri hawi oto wairébé wamhã, ma tô Sĩ na rop si 're irosa'wari mono nhisi u hã ai'aba'ré, Eri na rowamri norĩ wa'wa, ẽne Sina'i na isisi wa'wa ihâimana u hã. Tamomo a'amo isãna're wãiwa dia 15 na ma tô oto aihutu, Ezitu hawi wairébé parimhã.

² Tame rop si 're irosa'wari mono ãma, uburé Mozésihi ma, duré Arãhã ma, siwapsari za'ra wamhã,

³ ma tô ãne tãma nharĩ zahuré ni: — Ezitu ãma, Uburé Danhib'apito te te wa'uprosi 'wa'âhã, aré tô iwẽ! Tamemhã wa wazahâ na 're wasi'ubumro, romnhi duré aimawi dasa hã wasima iwẽ na wa te 're huri mono da hã. Tane nherẽ, a norĩ wa'wa, ã hã rop si 're irosa'wari mono u hã ma tô we iwanhimroi wa'aba mo, ã hã uburé norĩ hã mram na si uprosi aba da.

⁴ Tahawa, Uburé Danhib'apito te Mozésihi ma tinha ãne: — Hâiwa hawi dasa, tã ne aima 're a'a za'ra wa'aba mono da hã wa za te aima ab'manharĩ 'wa. Tahawa, awẽ sidâpâsi te za uburé pese rob u hã sô 're dawairébé, misi bâtâ na dahâiba mono bâ da te dasisa 're ubumroi mono da. Ãne wa za dapibu za'ra, dama ĩnhimiroti za'ra zé, da te 're wapari pese za'ra mono zô.

⁵ Tawamhã romhuri 'rãsutu bâtâ ãma, te za dasisa da te 're 'rã'õtõ, ãma isisiwi na bâtâ amoi u da zama.

⁶ Tawamhã Mozési norĩ, Arãhã me, te dama nharĩ zahuré ãne: — Ãhã na hâiwahâ te za Uburé Danhib'apito Ezitu hawi te te i'asani za'ra wa'wa hã asiwi iwaihu'u 'wa.

⁷ Awẽ wi mararé te za Uburé Danhib'apito hâiba na rowa'a hã i'madâ'â za'ra wa'wa, iwẽ uptabi hã. E marĩ wa. Sada aihâimana za'ra wa'aba wa, tãma i'aiwapsari za'ra wa'aba zé hã te te wapari wa. Wazada hã aihâimana za'ra wa'aba õ di. Õhõ da, aihâimana za'ra wa'aba wa, ma tô aiwapsari za'ra wa'wa. E marĩ 'manharĩ'wa pâ bété, wa norĩ hã wama i'aiwapsari za'ra wa'aba da hã.

⁸ Tawamhã te zahadu Mozési dama tinha ãne: — Uburé Danhib'apito, te za hâiwahâ sidâpâsi romnhi 're ihuri aba mono da hã te te aima 're sõmri za'ra wa'wa, duré mararé sidâpâsi i'u'ẽtẽ wapu asima iwẽ na 're ihuri aba mono da zama. E marĩ wa. Uburé Danhib'apito zada, aihâimana za'ra wa'aba wa, i'aiwapsari za'ra wa'aba zé hã te te wapari wa. Wazada hã aihâimana za'ra wa'aba õ di. Õhõ zada aihâimana za'ra wa'aba wa, ma tô tãma aiwapsari za'ra wa'wa. E marĩ 'manharĩ'wa pâ bété wa norĩ hã wama i'aiwapsari za'ra wa'aba da hã.

⁹ Tawamhã Mozési, Arãhã ma, te tinha ãne: — Ma'ãpé uburé dama nharĩ, we ãwa dasi'aba'ré da hã, Uburé Danhib'apito nho're dahâimana za'ra da. E marĩ wa. Õ hã tãma idasiwapsari za'ra zé hã ma tô wapa.

¹⁰ Tawamhã Arã te te dama nharĩ za'ra ré, ma tô rop si 're irosa'wari mono u hã rob'mâdâ'â za'ra ni. Taha ré, Uburé Danhib'apito hawi rowa'a hã ma tô hâiwa'a na sihâi'ré.

¹¹ Tawamhã Uburé Danhib'apito, te Mozésihi ma tinha ãne:

¹² — Wa tô wapa Izaraéu nhihudu norĩ siwapsari za'ra zé hã. Tãma nharĩ za'ra na, hâiwahâ robza'rã wana ré, za romnhi te te ihuri na hã, duré za awẽ wi mararé i'u'ẽtẽ wapu sima iwẽ na te te ihuri na hã. Tawamhã te za siwi ĩwaihu'u za oto, wa hã Uburé Danhib'apito, ite za'ra 'Re ihâimana u'âsi mono na hã.

¹³ Tawamhã hâiwahâ 'ri'ripire hã ahâ uptabi na ma tô sihâi'ré za'ra. Ahâ uptabi wa, ma tô 'ri awã te te siwi upsibi. Duré awẽm na mararé ma tô 'ri awã monoi baba hã atébré hã te te rowaihi.

¹⁴ Oto atébré 'ré mono parimhã, rop si 're irosa'wari mono ãma ma tô marĩ pe'a hâ ne hã ibaihâ pesere ti'a nhisiwimhã simi'wara, â i'u'ẽtẽ baihâi pesere ne hã.

¹⁵ Izaraéu nhihudu norĩ ã hã te te 'madâ'â za'ra wamhã, te te waihu'u za'ra õ di marĩ hã. Tahawa, te ãma sisada nharĩ za'ra ãne: — E marĩ. Tawamhã Mozési te ãma tãma rowasu'u za'ra ãne: — Ã hã dasa huri aba da, Uburé Danhib'apito we te te aima isõmri za'ra wa'wa.

¹⁶ Ãne, ma tô roti itede aima 'manharĩ za'ra wa'wa: “Aihâiba mono bâ te za asisa i'rã'õtõ aba mo, asai wabre aba mono bâ, asõrõwa 're ai'rã za'rata za'ra wa'aba zarina, maparane litru na aihâiba mono bâ wa'aba na.”

¹⁷ Tawamhã ãne ma tô Izaraéu nhihudu norĩ hã te te waibu, ni'wam norĩ hã ahâ na duré ni'wam norĩ umro na.

¹⁸ Tawamhã te te oto pibu za'ra wamhã, ni'wam norĩ ahâ na te te iwaibui mono hã, ibâre ma te tô te te sima waibu, iwẽzéb zarina. Duré suru na nherẽ, te te iwaibui mono wi hã tiwi sô ro'wanhi'riti waihu'u za'ra õ di. Hâiba mono bâ ma tô ibâre sisa te te waibu, te te huri mono da hã.

¹⁹ Tawamhã Mozési te ãma tãma nharĩ za'ra ãne: — Ni'wa hã awẽ bâtâ u da, te te sisa 'maihiri õ di za.

²⁰ Tane nherẽ, ni'wam norĩ, Mozési te te iwaihu'uzé te te wapari za'ra õ wa, ma tô dasa hã te te sisa sa'ra. Tawamhã ãma i'awẽ za'ra mono na hã, ma tô ubu hã ãma tiwi tizasu'u za'ra. Ma duré tiwi tiware za'ra. Tahawa, Mozési, ma te ta norĩ zada tinhiti'ru za'ra.

²¹ Tawamhã awẽ sidâpâsi ma tô dahâiba mono bâ hã nasi da te waibu, dasai wabre tô taha bâtâ mono na dasa da te nasi ihuri mono da hã. Tawamhã bâtâ ro nasi te te wa'ro za'ra wamhã, ma tô nasi ti'uwa za'ra, ti'ai wa isimi'wara mono hã.

²² Tawamhã duré hâiba mono bâ maparane si'uiwa na litru na ãma isisiwi na hã ma tô te te waibu. Tawamhã danhib'ihâ'a norĩ ma tô ai'aba'ré, Mozésihi ma te te tãma wasu'u za'ra da, da te iwaibui mono zé hã.

²³ Mozési te ãne tawamhã tãma nharĩ za'ra: — Awẽmhã dawa'utuzé, sabadu romhuri 'rãsudu iwazéb zahi, Uburé Danhib'apito aimawi te te ipisudu. Tahawa, ma ãne tinhimiroti aima sõmri za'ra wa'wa: “Ni'wam norĩ ã hã dasa sebre za'ra wa'aba da wamhã, ma'ãpé asima sebre za'ra wa'aba; duré ãma asima api za'ra wa'aba da wamhã, ma'ãpé ãma asima asipi za'ra wa'aba. Duré isi'mairẽme hã awẽ bâtâ u da, asisa sa'ra wa'aba mono za.”

²⁴ Tawamhã Mozési te te dama iwaihu'u za'ra zéb zarina, ma tô isi'mairẽme norĩ hã da te dasisa sa'ra awẽ bâtâ u da, 'roi mono ãna, duré ubu hã ãma dawi sasu'u za'ra mono ãna.

²⁵ Te tãma nharĩ za'ra ãne duré, Mozési hã: — Ma'ãpé huri aba mono, ã bâtâ na hã. E marĩ wa. Uburé Danhib'apito sabadu dawa'utuzé, aimawi te te ipisutu wa, duré ã bâtâ na hã ti'ai wa isimi'wara mono na 'masãmri za'ra wa'aba dai õ wa, ihuri aba mono da hã.

²⁶ 6 si bâtâ 'remhã ã hã dasa te za tô iwaibui wa'aba mo. Tane nherẽ, 7 bâtâ ãma dawa'utuzé bâtâ na ti'ai wamhã dasa hã hâimana zahu õ di za.

²⁷ Tawamhã 7 bâtâ ãma ni'wam norĩ dasa te te waibui mono da hã, ma tô sô wairé aré. Tane nherẽ, te te siwi 'masãmri zahu za'ra õ di.

²⁸ Tahawa, Uburé Danhib'apito te Mozésihi ma tinha ãne: — E momo te za ĩnhimirowaihu'u na, duré ĩnhimiroti na ĩwapari za'ra wa'aba õ zém na i'aihâimana za'ra wa'aba zé hã i'rãsutu za'ra wa'wa.

²⁹ Ãma aipo're pu'u za'ra wa'aba, wa hã Uburé Danhib'apito, dawa'utuzé bâdâ te aima isõmri za'ra wa'aba zém na hã. Tahawa 6 bâtâ ãma wa tô dasa na hã aima sisiwi za'ra wa'wa, maparane bâtâ 'reb da hã. 7 bâtâ ãma te za uburé pese i'aihâimana za'ra wa'aba zép 'remhã aihâimana za'ra wa'wa, ni'wa rob u hã watobro ãna.

³⁰ Ãne wa, Izaraéu nhihudu norĩ 7 bâtâ ãma hã te te romhuri za'ra õ di.

³¹ Tawamhã Izaraéu nhihudu norĩ, ã hã dasa hã ma tô siwi sisi, mana na. Ta hã aiwa romnhamare ne hã irã uptabi, duré ise hã aiwa ropĩni na bolu 'manharĩ ne hã.

³² Tawamhã Mozési te tãma nharĩ za'ra ãne: — Uburé Danhib'apito ma tô wama 'ru za'ra, mana hã maparane litru na niwa apto'oré wab da, wa te wasiwi hiri da wasisa hã, wanhihudu norĩ dasa wa te huri da, supara 'ré si ro 're iropsa'wari mono ãma te te wama isõmri hã te te 're 'madâ'â za'ra mono da, Ezitu hawi we te te wa'awazere wamhã.

³³ Mozési, te tawamhã Arãhã ma tinha ãne: — Simhi hã âri, maparane litru na mana hã iwa 'manherẽ da, Uburé Danhib'apito nho're duré iré sãrĩ da, wanhihudu norĩ ma ropibu ma, iré 're sa mono da.

³⁴ Tawamhã Arã, Mozésihi ma, Uburé Danhib'apito te te tãma iwaihu'uzéb zarina ma tô 'manha. Simhi mana ré hã ma tô 'Re ihâimana u'âsi mono te, wedehâ're nho'remhã tisã, tame 're sa mono da, iré hã.

³⁵ Izaraéu nhihudu norĩ hã 40 na wahub 're, ma tô mana hã te te 're huri, ti'ai wa, 're idahâimana siromo za'ra mono 're isihutuzéb u, Cana'ã ti'a zada'ré ãma u.

³⁶ Tawamhã mana hã dahâiba mono bâ ma da, ma tô 10 sina isa'rata ãma 20 litru na i'masisi na hã tihâiba.