Ezodu 12 - ꞌRe Ihâimana Uꞌâsi Mono Zadawa Wasuꞌu

Pascowa na, 'Re ihâimana u'âsi mono, Mozési norĩ ma, te te iroti zahuré zé wasu'u

¹ Tawamhã Ezitu ãma, Mozési norĩ zahadu simasisi zahuré ré, te duré 'Re ihâimana u'âsi mono hã tãma roti zahuré, ãne Arãhã me:

² — Ã a'amo hã te za oto wahum na'rata za'ratazém na hã aima 're hâimana za'ra wa'wa.

³ Tawamhã te za ãne uburé Izaraéu nhihudu norĩ ma, tãma ĩzadawa wasu'u za'ra wa'wa: Tô ã hã a'amo na, dia 10 na te za damama mono bâ tinhimizama hã misi si te te pisutu, pone'ẽrebâ zéré mapure 'ra hã, niha wamhã, pone'ẽrebâ zéré uzé 'ra hã.

⁴ Tawamhã ni'wam norĩ hã 'ri 're umro na 're ihâimana za'ra mono norĩ, wahuré romnhi te te siwi 'rẽne waihu'u õ wamhã, te za duré siwaptoma 'ri tãma 're isimasa mono norĩ me sitẽme tisa hã ãma tihu. Tawamhã isai'mahâpãrĩ su'u õ norĩ mono bâ te za tãma te te wa'õtõ za'ẽtẽ za'ra, tite bâ tisa te te ãma huri mono da hã. Duré tisa te te 're i'mahâpãrĩ su'u za'ra mono norĩ ma hã te za suru na te te wa'õtõ za'ra, te te ihuri mono da hã.

⁵ Tinhimizama pone'ẽrebâ zéré mapure 'ra hã, niha wamhã, pone'ẽrebâ zéré uzé 'ra hã te za misi ãma iwahu mono hã te te pisutu, 'ri mono bâ, iwẽ si isiwamnarĩ'õ si.

⁶ Tawamhã dia 14 bâdâ ipisutu pe ihâimanazéb u te za aimawi isõré wa'wa, simasab da. Duré tô taha bâtâ na te za hâiwahâ pesere, uburé Izaraéu nhihudu norĩ hã tinhimizama te te simro.

⁷ Tawamhã te za iwapru na te te ãma 'ridawa zapré za'ra, rowi hawi 'ridawa zada'réi baba isada'ré si'uiwa na duré hâimomhã, tinhimizama na tisa 'ri 're, te te ãma ihuri mono zéb ãma si.

⁸ Tawamhã tô taha mara na te za romnhi hã te te sebre, unhama na. Taha na te za tisa te te huri, duré i'u'ẽtẽ duptoi'õ na zama. Duré, wesuirã te te 're idazadai'ré wa're za'ra mono na zama, te za tisa hã te te huri.

⁹ Tawamhã romnhi hã téb ré, 're huri aba mono õ di za. Duré â na hã isebre nai õ di za. Unhama na te za wahuré si isebre aba mo, hu ãna, 'rãi ré, para ré, duré prub ré.

¹⁰ Romnhi isi'azahâri mono na hã ãma awẽ mono õ di za. Uburé pese te za izata za'ra wa'aba mo unhama na, zata pro'a mono da.

¹¹ Tawamhã te za asi'uza wẽ siromo aba mo. Te za duré asipara'uza wẽ siromo aba mo. Duré te za asiwã asib'ratamhã itété siromo za'ra aba mo, ai'aba'ré na iré asaihuri aba mono da, õne haré marĩ zô apâ a'ãsi za'ra wa'aba ãna aiwairébé aba da. Ãne te za Pascowa na asa hã ihuri aba mo ĩma, Uburé Danhib'apito uptabi ma.

¹² — Tawamhã tô taha mara na wa za Ezitu na romnhisi nhisi baba 're mo. 'Re ĩmorĩ wamhã, aibâ dama ipoto'rata za'ra mono hã wa za te dawi hâ za'ra, dawi si'utõrĩ mono da. Duré danhimizama zama wa za te dawi hâ za'ra, aibâ na dama ipoto'rata za'ra mono hã, taha zama dawi si'utõrĩ mono da. Tawamhã hâiwa ãma, waihu'u pese uptabi newa, ãma 're idawata za'ra mono norĩ zama wa za hâ za'ra. E marĩ wa, wa za hâ za'ra. Tô sena, wa hã 'Re ihâimana u'âsi mono, Uburé Danhib'apito uptabi wa.

¹³ Tahawa, Izaraéu nhihudu norĩ, pone'ẽrebâire wapru na ãma i'ridawa zapré za'ra wa'aba mono, ta hã te ãma i'a pibui pese mono zéb da hã, taha 'ri 're, 're i'aihâimana za'ra wa'aba mono zém na, te awaihu'u da. Tawamhã ĩma pibui pese na, wa za te asa'réi waré za'ra wa'wa, Ezitu nhisi baba 're ĩmorĩ wamhã, ezipsiu norĩ te hâ za'ra mono wamhã. Dazu ai'utõrĩ aba mono tõ da, wa za ĩnhimihâzé hã aima ba'a za'ra wa'wa, Izaraéu nhihudu norĩ ma hã.

¹⁴ Tawamhã taha bâtâ na te za ĩnhimi'manharĩzém na 're ato za'ra wa'aba mo, wahup sidâpâsi ãma 're asipo're pu'u u'âsi za'ra wa'aba mono da. Tawamhã ãne te za ãma asima 're iromhu'u u'âsi za'ra wa'aba mo, Pascowa na dasaihurizém nhisi na hã. Asihudu norĩ zama te za ai'uirĩ na za'ra wa'aba hã ãma 're toi u'âsi za'ra, ĩnhimihâzé te tãma iba'a za'ra zém na.

Datoi wa, i'u'ẽtẽ duptoi'õ da te 're ihuri mono zé wasu'u

¹⁵ Tawamhã te duré Mozési norĩ ma, 'Re ihâimana u'âsi mono hã waihu'u zahuré ãne: — Ãne te za duré Izaraéu nhihudu norĩ ma, ĩzadawa wasu'u wa'wa. Tawamhã bâdâ 7 na si'utõrĩ mono ré, te za asa hã ihuri aba mo, i'u'ẽtẽ duptoi'õ na. Tahawa te za dia 1 bâdâ isãna'rata hawi, i'u'ẽtẽ duptozé hã rob u isani za'ra wa'aba mo, 'ri para isimi'wara mono hã. E marĩ wa, te za rob u isa'ra aba mo. Ni'wa hã bâdâ 7 mara u, romhâimana õ ré, i'u'ẽtẽ duptoi ré hã te te 'rẽne wamhã, za Izaraéu nhihudu siré 're hâimana mono õ dâ'âsina.

¹⁶ Tawamhã dia 1 bâdâ imorĩ'rata na duré dia 7 bâdâ te ipisutu amo na hã te za asi'rã'õtõ 'wa, ĩ'ãma aiwata za'ra wa'aba da hã. Tawamhã ni'wa hã taha bâtâ na romhuri amoi u hã te te romhuri õ di za. Mram 'manharĩ na si te za iromhuri za'ra wa'aba mo, bâdâ hã te ipisutu amoi u.

¹⁷ Tawamhã ato te za 're i'manharĩ za'ra wa'aba mo wahup sidâpâsi, i'u'ẽtẽ duptoi'õ na asa 're ihuri aba mono zém na. Ezitu hawi te asani za'ra wa'aba zé bâtâ na te za asa hã 're ihuri u'âsi aba mo, uburé a norĩ wa'wa hã, Izaraéu 'ra nhihudu mono bâ. Asihudu za'ra wa'aba mono sidâpâsi te za te te siwi 're 'manharĩ u'âsi, ãma 're sipo're pu'u u'âsi za'ra mono da hã.

¹⁸ Tawamhã a'amo za'ratazém na'rata na, dia 14 bâtâ na hâiwahâ pesere te za i'u'ẽtẽ duptoi'õ na asa 're ihuri na'rata aba mo. Bâdâ te ipisutu amoi u te za duré ihuri 'rãsutu aba mo, dia 21 bâtâ u. Tô taha bâtâ na hâiwahâ pesere te za asa hã ihuri 'rãsutu 'wa, i'u'ẽtẽ duptoi'õ na hã.

¹⁹ Tawamhã 7 bâdâ hâimana ré, i'u'ẽtẽ wapu duptobzé hã asõrõwa aba 're mono hã isimi'wara mono da hã mare di za. Rob u te za isani za'ra wa'aba mo za. E marĩ wa. Ni'wa hã, i'u'ẽtẽ wapu duptobzém na i'manharĩ te te 'rẽne wamhã, oto ti'ai wa'õtõ nho'õmo ãma Izaraéu nhihudu norĩ siré 're ihâimana mono da hã mare wa za. Duré ni'wa asiré aba õ nherẽ, Izaraéu nhihudu norĩ siré 're ihâimana mono i'u'ẽtẽ wapu duptobzém na i'manharĩ te te 'rẽne wamhã, oto duré Izaraéu nhihudu norĩ siré 're ihâimana mono da hã mare di za. Te za oto duré tiwi 're isawi za'ra wa'aba mo za ihâimanazé hã.

²⁰ Tahawa, ã bâtâ na hã i'u'ẽtẽ duptobzém na i'manharĩ hã huri aba mono õ di za. Tawamhã asõrõwa mono bâ hã te za tô i'u'ẽtẽ duptoi'õ na i'manharĩ na si 're asaihuri aba mo.

Pascowa na dasa da te ihuri na'rata zé wasu'u

²¹ Tawamhã Mozési hã ma tô Izaraéu nhihudu norĩ ma, ipire norĩ zô hã tihârâ za'ra. Tawamhã te tãma roti za'ra, Pascowa na za dasa da te ihuri na'rata zém na: — Ãhã na hã asimizama te za ipisutu aba mo, pone'ẽrebâ 'ra hã, duré pone'ẽrebâ zéré uzé 'ra hã. Ta hã te za ipisutu aba mo, simroi wa'aba mono da, asõrõwa mono bâ wa'aba, asa ãma huri aba mono da, Pascowa na datozém nhisi na.

²² Tawamhã piza'a 're nho'a iwaprui ré isimasa mono na te za wesuirã suiro hã nasi sada ãma isuti'i za'ra wa'aba mo, rowi hawi 'ridawa zada'ré baba, ãma 'ridawa zapré za'ra wa'aba mono da. Tawamhã bara na hã ai'maiwatobro aba õ di za, rob u hã.

²³ Tawamhã 'Re ihâimana u'âsi mono hã te za we 're mo, Ezitu nhisi baba, ezipsiu norĩ te te 'mapãrĩ mono da hã. Tawamhã we 're morĩ wamhã, 'ridawa zapré te te ab'madâ'â mono wamhã, te za te te asa'rei waré za'ra wa'wa. Tawamhã hâiwa ãma tãma iromhuri'wa hã dapãrĩ'wa na iwaptẽrẽ hã te za ai'ãma uwati za'ra wa'wa, asõrõwa u asô za'ra wa'aba, zasi tõ mono da, te te asimroi aba mono tõ da, romhuri'wa hã.

²⁴ Tawamhã Pascowa na asaihuri aba mono zéb da hã te aima ipisutu za'ra wa'aba zéb zarina, te za 're i'manharĩ u'âsi za'ra wa'aba mo. Asihudu norĩ aba zama, te za ai'uirĩ na za'ra wa'aba hã te te 're 'manharĩ u'âsi za'ra.

²⁵ Tawamhã 'Re ihâimana u'âsi mono, airob za'ra wa'aba da, te te aima iropisutu aba zéb u, aihutu aba wamhã, tame oto 're airob za'ra wa'aba mono wamhã, te za Pascowa na dasaihurizé hã 're i'manharĩ u'âsi za'ra wa'aba mo, õne u'âsi.

²⁶ Tawamhã ai'ra za'ra wa'aba mono hã Pascowa na dasaihurizém nhisi marĩ te te iwasu'u na hã, te te ãma 're asadanharĩ za'ra wa'aba mono wamhã,

²⁷ ãhã wa, te za ãne duré ãma tãma 're irowasu'u za'ra wa'aba mo za: “Ã hã, danhimizama zata na Pascowa na dato nhisi hã 'Re ihâimana u'âsi mono, ezipsiu norĩ te te 'mapãrĩ mono da, Ezitu nhisi baba 're morĩ wa, te te iwa'aza'rei waré mono zé, duré tinhimihâzé te te wama iba'a za'ra zé. Ta hã, ã hã Pascowa, iwasaihurizé, duré 'Re ihâimana u'âsi mono ma, wanhimizama, wa te 're isimroi mono zé.” Ãne te za ãma tãma 're irowasu'u za'ra wa'aba mo za romhutu'õmhã. Tawamhã te te wapari za'ra pari, ma tô Izaraéu nhihudu norĩ hã asimro hi'rãtitõ, ãma tãma wata za'ra da, Uburé Danhib'apito uptabi ãma.

²⁸ Tawamhã taha pari oto apâ si'aba'réi wamhã, ma tô Mozési norĩ ma, Arãhã me, 'Re ihâimana u'âsi mono te te tãma iwaihu'u zahuré zé hã siwi 'manha, Izaraéu nhihudu norĩ hã.

10 ãma dama rob'manharĩ zé wasu'u, aibâ dama ipoto'rata za'ra mono, dawi isi'utõrĩ mono zém na

²⁹ Tawamhã mara wa'wa ma tô 'Re ihâimana u'âsi mono hã te te dawi uprosi, aibâ dama ipoto'rata za'ra mono hã, Ezitu ãma 'ri mono bâ 're ihâimana za'ra mono norĩ 'ra hã, apito 'ra, timama uirĩ na za dama pire na 're ihâimana mono tẽme, dazazéb 're, imama 're isãmra mono 'ra u. Da'upsãtã mono bâ ma tô uburé pese da'ra hã aibâ dama ipoto'rata za'ra mono hã te te dawi uprosi. Duré danhimizama aibâ na ipoto'rata za'ra mono zama ma tô te te dawi uprosi, 'Re ihâimana u'âsi mono hã.

³⁰ Tawamhã 'ri mono bâ da'ra hã dawi si'utõrĩ mono wa, ma tô dawara sina ta'utu za'ra ni, danhimiwaptâ hawi, ezipsiu norĩ hã. Duré Apito Fara'oho zama ma tô wara sina udu. Tãma iromhuri'wa norĩ zama, ma tô duré ti'utu za'ra. Tawamhã aihĩni pese te 'ri mono bâ aiwa'õ za'ra ni. Dazadari 'rãihâ na te sa'ẽtẽ aiwa'õ za'ra ni.

³¹ Tawamhã tô ta bara na te apito Fara'o hã Mozési norĩ zô tihârâ zahuré, Arãhã me. Tawamhã te oto tãma rob'ru zahuré, sa'ẽtẽ ãne: — Ã hawi mo oto aiwairébé aba, uburé a norĩ wa'wa hã Izaraéu nhihudu norĩ me! Ĩte ti'ai wa'õtõ nho'u te za oto asiwi ĩré irẽme 'wa. A'ubuni u te za oto ai'aba'réi wa'wa, nasi ĩwi iwaptẽrẽ aba zéb zarina Uburé Danhib'apito uptabi ãma aiwata za'ra wa'aba da hã.

³² Tahawa te za asimizama pone'ẽrebâ zéré mapure, pone'ẽrebâ zéré uzé, duré powawẽ norĩ hã asiré wa'aba isimroi wa'aba mo. Tawamhã 'Re ihâimana u'âsi mono wi, te za ĩ'ãma irowaptẽrẽ 'wa, iwẽ te te ĩma zama 're anhomri mono da.

³³ Tawamhã ezipsiu norĩ hã ma tô Izaraéu nhihudu norĩ ma hã tãma rob'ru za'ra, ti'ai wa'õtõ nho'õmo hawi isa'ru za'ra hawi hã si'aba'ré na oto wairébé da. Tahawa te ãne tãma nharĩ za'ra: — Aiwairébé aba õ wamhã, wa norĩ hã wa za uburé ai'utõrĩ ni. Taha õ ré, te za oto aiwairébé 'wa.

³⁴ Tawamhã Izaraéu nhihudu norĩ hã ma tô 'ri mono bâ i'u'ẽtẽ da iwai'oi wari hã te te ubumro, piza'a 're nho'a 're, u'ẽtẽ dupto da, da te 're iwazari za'ra mono zéb õ na. Tawamhã ma tô te te ubu, zazahâi wawẽ na, sisa te te 'wasari da tinhisé, õne haré wairébé da.

³⁵ Tawamhã Izaraéu nhihudu norĩ hã ma tô oto rowaptẽrẽ za'ra, ezipsiu norĩ wi. Mozési te te tãma iwaihu'u za'ra zéb zarina ma tô tiwi rowaptẽrẽ za'ra, marĩ hã da te tãma sõmri za'ra da, niha wamhã, ẽtẽ waipo pré oru 'manharĩ hã, ẽtẽ waipo prã prata 'manharĩ hã, duré da'uza hã.

³⁶ Tawamhã 'Re ihâimana u'âsi mono, ma tô ezipsiu norĩ ma tãma 'manharĩ za'ra, Izaraéu nhihudu norĩ hã te te wazéb za'ra da, taha zarina uburé marĩ te te tiwi iwaptẽrẽ za'ra zé hã te te tãma sõmri za'ra da. Ãne zarina ma tô oto marĩ iwẽ hã te te sima waibu, Izaraéu nhihudu norĩ hã, ezipsiu norĩ wi.

Izaraéu nhihudu norĩ, Ezitu hawi oto iwairébézé wasu'u

³⁷ Tawamhã Izaraéu nhihudu norĩ hã ma tô oto wairé, Ramesé na 'ri nho'õmo nhisi hawi. Para na te zâmo. Tawamhã Sucoti na 'ri nho'õmo nhisi u ma tô zâwi. Ãne, Izaraéu nhihudu norĩ za'rata za'ra hã, 600 miu na aibâ si hã, isa'rata na. Pi'õ norĩ hã sa'rata õ di. Duré ai'uté norĩ zama sa'rata za'ra õ di. Duré ihi norĩ zama sa'rata za'ra õ di.

³⁸ Tawamhã Izaraéu nhihudu norĩ oto wairébé wamhã, ma tô ni'wam norĩ hã Izaraéu nhihudu õ norĩ hã dazu wairé. Ma tô duré tinhimizama hã te te siré simro, Izaraéu nhihudu norĩ hã. Simizama ahâ uptabi za'ra di, pone'ẽrebâ norĩ na hã, pone'ẽrebâ zéré uzé norĩ na hã, duré powawẽ norĩ na hã.

³⁹ Tawamhã Izaraéu nhihudu norĩ hã ma tô i'u'ẽne hã te te sebre, Ezitu hawi te te i'wasari hã, iwai'oi wari na hã. U'ẽtẽ dupto da, da te 're iwazari za'ra mono zéb õ na, ma tô tisa te te huri, rowãiwa isimizahâri za'ra mono zéb ãma. E marĩ wa, ma tô i'u'ẽtẽ wapuzém na wazari ãna tisa te te huri. Ezipsiu norĩ waptu na te te tãma rob'ru za'ra wa, duré tãma bâtâ za'ra õ wa. Tahawa, ma tô ti'ai wa'õtõ nho'u Ezitu hawi, wazarizéb ãna iwai'oi wari na iwaptẽrẽ si siré 'wasa. Tahawa, te oto taha na si tisa te te huri.

⁴⁰ Ezitu ãma 're hâimana za'ra mono ré, ma tô 430 na ãma tiwahub za'ra, Izaraéu nhihudu norĩ ãma hã.

⁴¹ Tawamhã tô ta bâtâ na ãma iwahub za'ra hã waptã'ã wi, ma oto Ezitu hawi wairé, 'Re ihâimana u'âsi mono nhib'a'uwẽ norĩ hã, Zacoho 'ra norĩ nhihudu mono bâ.

⁴² Tawamhã tô ta bara na ma tô 'Re ihâimana u'âsi mono hã te te pibu za'ra, te te sani wẽ za'ra da, Ezitu hawi. Tahawa, te za õne u'â ãma 're sipo're pu'u u'âsi za'ra, wahup sidâpâsi. Tô ta bara na wam ne te za tito te te 're 'manharĩ za'ra 'Re ihâimana u'âsi mono ma, uburé pese Izaraéu nhihudu norĩ hã.

Pascowa na 'Re ihâimana u'âsi mono nhimirotizé wasu'u

⁴³ Uburé Danhib'apito hã ãne te Mozésihi norĩ ma, Arãhã me hã tãma roti zahuré: — Ã hã Pascowa na rotizé hã aima wa'aba hã ãne: Asiré a'uwẽ'õ norĩ hã Pascowa na dasa nhisi na 're isaihuri mono da hã mare di za, zudeu'õ norĩ hã.

⁴⁴ Tane nherẽ, pawa'âbâ ãna te te dama 're romhuri za'ra mono da, da te 're i'uipra za'ra mono norĩ hã 're sisihâiwata nhihâri za'ra mono parip si, te za ãma 're saihuri, asiré wa'aba hã.

⁴⁵ Asiré a'uwẽ'õ norĩ hã ti'ai wa'õtõ nho'u asipti'ai wa'aba ãma, 're ihâimana hutu za'ra mono norĩ hã duré pawa'âbâ ré asiré wa'aba 're ihâimana za'ra mono norĩ hã ãma 're saihuri mono õ di za, Pascowa na dasa nhisi na hã.

⁴⁶ Ta hã 'ri 'rep si te za tisa hã te te ãma 're huri, Pascowa na dasa nhisi na ãma 're idanhipi za'ra mono zéb 'rep si. Dasa hã rob u hã te te sima 're isani za'ra mono da hã, mare di. Duré asimizama za'ra wa'aba hi hã asima 're isi'ẽi wa'aba mono da hã, mare di za duré.

⁴⁷ Uburé te za Izaraéu nhihudu norĩ hã to sina te te 're 'madâ'â za'ra, Pascowa hã.

⁴⁸ Aibâ norĩ hã sihâiwata nhihâri õ nherẽ, dasiré ãma 're isaihuri mono da hã mare di za, ã hã dasa na hã. Tane nherẽ, asiré a'uwẽ'õ norĩ, nima norĩ hã asiré za'ra wa'aba 're ihâimana za'ra mono hã 'Re ihâimana u'âsi mono te te 're iwazéb za'ra mono zéb zarina, Pascowa na 're saihuri mono da, te te sima 're wẽ za'ra mono wamhã, tawamhã a norĩ wa'wa hã imorĩ'rata na te za a'â 're isihâiwata nhihâri za'ra wa'aba mo, uburé isisãnawã norĩ zama, duré i'ra norĩ zama. Taha parip si te za oto Pascowa na dasa nhisi hã te te 're huri, asiré za'ra wa'aba. Duré Izaraéu nhihudu norĩ nhipti'ai 're, 're ipoto za'ra mono ne, te za tawamhã oto 're hâimana za'ra.

⁴⁹ Tô õhõ na si, 'Re ihâimana u'âsi mono nhimiroti hã, Izaraéu nhihudu norĩ ma hã, ti'ai wa'õtõ nho'õmo 're, 're ipoto za'ra mono norĩ ma hã duré zudeu'õ norĩ ma zama asiré za'ra wa'aba, 're ihâimana za'ra mono ma hã.

⁵⁰ Tawamhã uburé Izaraéu nhihudu norĩ hã ma tô te te 're wapari pese za'ra, 'Re ihâimana u'âsi mono hã Mozési norĩ ma, Arãhã me, te te iroti zahuré zéb zarina.

⁵¹ Tô taha bâtâ na ma tô Uburé Danhib'apito hã Ezitu hawi sani za'ra, Izaraéu nhihudu norĩ hã.