Ezodu 11 - ꞌRe Ihâimana Uꞌâsi Mono Zadawa Wasuꞌu

Mozési 10 ãma dama rob'manharĩzém na te te ãma idapo're pu'u za'ra zé wasu'u

¹ Tawamhã Uburé Danhib'apito te Mozésihi ma tinha ãne: — Ĩnhimihâzé ipipa na wa za Ezitu ãma apito hã azâ oto, ĩnhimihâzé 'rãsutu na. Duré ite a'uwẽ norĩ hã wa za hâ za'ra oto, ĩnhimihâzé 'rãsutu na. Taha parip si te za aima rowairébé za'ra wa'wa, isa'rui hawi ai'aba'réi aba da hã. Aihĩni pese te za tô ai'aba'réi wa'aba da aima rob'ru za'ra wa'wa.

² Tahawa ma'ãpé Izaraéu nhihudu norĩ aibâ ma, duré pi'õ norĩ ma, waihu'u za'ra na, siwaptoma ezipsiu norĩ 're ihâimana za'ra mono norĩ wi, marĩ te te tiwi waptẽrẽ za'ra mono da, niha wamhã ẽtẽ waipo prã prata na marĩ 'manharĩ norĩ hã, duré ẽtẽ waipo pré oru na marĩ 'manharĩ norĩ hã.

³ Tawamhã Uburé Danhib'apito, ma tô ezipsiu norĩ hâimanazém na hã ãma tiwi saprĩ za'ra, Izaraéu nhihudu norĩ te te hâiba wazéb za'ra da hã. Tahawa sena na apito ma romhuri'wa norĩ, duré uburé a'uwẽ ezipsiu norĩ 're ihâimana za'ra mono, ma tô Mozési aibâ isa'ẽtẽ na hã siwi hâimanazé wẽsã.

⁴ Tawamhã Mozési, apito ma, te ãne 'Re ihâimana u'âsi mono hã tãma sadawa wasu'u: — Uburé Danhib'apito te ãne tinha: “Mara wa'wa, Ezitu nhisi babamhã wa za we 're mo.

⁵ Tawamhã we 're ĩmorĩ 'remhã, ti'ai wa'õtõ nho'u Ezitu ãma uburé daza'rui mono bâ te za da'ra dama 're ipoto 'rata za'ra mono hã dawi si'utõrĩ, apito 'ra, timama uirĩ na za dama pire na 're ihâimana mono tẽme, pi'õ, pawa'âbâ ãna marĩ zum na te te 're iromhuri za'ra mono norĩ 'ra u. Tawamhã duré danhimizama da te 're itébré za'ra mono norĩ 'ra zama aibâ na 're ipoto 'rata za'ra mono hã te za dawi si'utõrĩ.

⁶ Tawamhã Ezitu ãma daza'rui mono bâ te za niwa dahâzé iwana ré ihâimana'õ te te idaduri mono zé te hã 're dazadari za'ra. Niwamhã ãne hã ihâimana da hã mare di za.

⁷ Tane nherẽ, Izaraéu nhihudu norĩ 'remhã marĩ sô iwatobro za'ra õ zarina, wapsã norĩ, da'ãma, duré danhimizama norĩ ãma i'ru'ru da hã mare di za. Ãne wamhã, te za a norĩ wa'wa iwaihu'u za'ra wa'wa, wa hã Uburé Danhib'apito, ezipsiu norĩ 'remhã, Izaraéu nhihudu norĩ 're me aiwa romhâimanazéb'õ hã te tãma i'manharĩ zahuré zém na.”

⁸ Tawamhã Mozési, te te tãma inharĩzém na hã ma ãma tãma uzusi ãne: — Ã hã uburé aima romhuri'wa norĩ we ĩtẽme isi'aba'ré hã, te za ĩpapara hi'rãtitõ ĩnho'remhã asimro, ĩnhib'a'uwẽ norĩ te oto isimroi mono zé te te ĩwĩ waptẽrẽ za'ra da ãne: “Ã hawimhã te za a hã oto aiwato, asib'a'uwẽ norĩ aime si'aba'ré da.” Ãne te te ĩma nharĩ za'ra parip si, wa za wa hã ĩsi'uihâ na watobro. Tawamhã Mozési, apito Fara'oho hawimhã ma tô sahi sina watobro.

⁹ Tawamhã Uburé Danhib'apito, te Mozésihi ma tinha ãne: — Apito te te duré aiwapari aba õ di za, Ezitu ãma ĩnhimiromhõ ipipa te nasi dama i'manharĩzém na hã a'â.

¹⁰ Tawamhã Mozési norĩ Arãhã me, ma tô nasi Ezitu te apito nho'remhã ipipa uptabi na nasi tãma romhõsi zahuré. Tane nherẽ, Uburé Danhib'apito, pẽ'ẽ tete na tihâimanazém na te te uzusi da hã ma tô 'rãnhito. Tahawa Izaraéu nhihudu norĩ ti'ai wa'õtõ nho'õmo hawi wairébé da hã te te tãma waprosi za'ra õ di.