Esdra 9 - ꞌRe Ihâimana Uꞌâsi Mono Zadawa Wasuꞌu

Esdra, dasiré õ na damrozém na 'Re ihâimana u'âsi mono ma, imremezé wasu'u

¹ Tawamhã ãne hã uburé da te 'manharĩ za'ra pari, ni'wam norĩ Izaraéu nhihudu norĩ ma i'rãnho'u hã ma tô we ĩtẽme ai'aba'ré, te te ĩma rowasu'u za'ra da, ãne: “A'uwẽ Izaraéu nhihudu norĩ, sasedoti norĩ, duré levita norĩ, tisiré a'uwẽ'õ norĩ 're ihâimana siwamnarĩ za'ra mono zé wi 're sisawi za'ra mono õ di, cananeu norĩ wi, hitita norĩ wi, perizeu norĩ wi, zebuzeu norĩ wi, amonita norĩ wi, moabita norĩ wi, ezipsiu norĩ wi, duré amoreu norĩ wimhã.

² Izaraéu nhihudu si'aibâ norĩ, ma tô tisiré a'uwẽ'õ norĩ nhipi'õ na ãma 're mro za'ra. Ãhã zarina ma tô 'Re ihâimana u'âsi mono, tinhib'a'uwẽ da, te te ipisutu za'ra norĩ hã ibâi õ na ãma 're sihâimana wamnarĩ za'ra. Tawamhã danhib'ihâ'a norĩ, duré dama i'rãnho'õmo norĩ, ma tô dawasété na danhowamhã dama ãma tihâimana na'rata za'ra.”

³ Tawamhã ãne na wa hã te wapari wamhã, wa tô robzei'õzé te, ĩ'uza hã hâiwazu. Tahawa, wa tô duré ĩzéré sano. Wa tô duré ĩsiwatasu zano. Ãhã wa, wa tô duré ĩhâimana zei'õ pese na hã ĩhâiba, tãma ĩsi'rãmi zép te, ãne ma.

⁴ Tawamhã tame wa tô ĩhâimana zei'õ na hã a'â nhamra, hâiwahâ tẽme danhoprub zata zéb u. Tawamhã ni'wam norĩ ma tô oto si'rã'õtõ da hã siwi ĩ'uirĩ, Izaraéu nhihudu norĩ te 'Re ihâimana u'âsi mono, Babilonia hawi isi'aba'ré norĩ tiwasédé te te 're i'manharĩ za'ra mono zém na te te inharĩzé ma, ipahi za'ra norĩ hã.

⁵ Tawamhã oto hâiwa hâ te, danhoprub zatazéb da, bâdâ iwa waptã'ã wamhã, wa tô oto udu, ĩwi irobzei'õzé ĩma sipari wa. Tawamhã ĩhi'rãtitõ wa tô duré 'Re ihâimana u'âsi mono ma, ĩmreme da hã nhamra, ĩ'uza te ihâi wazui ré. Ãhã wa, Uburé Danhib'apito, ĩte 'Re ihâimana u'âsi mono ma, ĩnhib'rada te tãma wẽ sina,

⁶ wa tô tinha ãne: — 'Re ihâimana u'âsi mono, ĩma rowazéb uptabi di. Tahawa, tô asõ're ĩ'rãiwahutu da hã, ĩma rowazéb uptabi di. 'Re iwawasété za'ra mono zém na hã wa tô ãma 're wasi'rã ubu pese za'ra. Duré 're wawasété za'ra mono wa, wawasédé wa'ãma 're i'aza'ra za'ra mono zé hã te hâiwa u te te sina 're hâimo u'âsi.

⁷ Wahi'rata norĩ hawim haré, wa wa norĩ asib'a'uwẽ hã ãhã na zama 're wawasété ahâ za'ra. Taha zarina, wa tô wa norĩ hã wate apito norĩ me hã, duré sasedoti norĩ me hã wasiré a'uwẽ'õ norĩ nhib'apito nhib'ratamhã warere'e ni. Tahawa, danhi'wa na ma tô duré da te dasiwi 're wanhimro. Ma tô duré wawi da te 're romnhimi'uri za'ra. Nimomo ma tô duré da te dasiwi 're wanhimro. Tahawa, te ãhã na zama zahadu dama hã tarére wa, da te wama 're rob'manharĩ wasété u'âsi za'ra.

⁸ Tane nherẽ, Uburé Danhib'apito, wate 'Re ihâimana u'âsi mono, ãhã na awa'awi na ma tô nimosi prã na iwẽ na wama 're i'ab'manharĩ mono na hã isãna'ra. Taha zarina ma tô ni'wam norĩ ma, wasimani za'ra da hã wama irowairébé za'ra, ãme ro iwazéb zahi ãma wasima iwẽ na 're iwahâimana za'ra mono da hã. Duré wapawa'âbâ ãna danhimiwada'uri zarina 're iwahâimana za'ra mono zém hawi wasimani za'ra da hã ma tô wama irowairébé za'ra. Ma tô duré wahâimanazép té hã wama isõmri za'ra.

⁹ Wa norĩ hã wa tô aré danhib'a'uwẽ wa, wapawa'âbâ ãna wa te 're romhuri za'ra. Tane nherẽ, taha 'remhã warẽme za'ra õ di. A hã ma tô Persia nhib'apito norĩ hã i'rãipizari za'ra, iwẽ si te te wama 're 'manharĩ za'ra mono da. Taha zarina ma tô asõrõwa 'ri hã apâ wa te wasiwi wahutu da hã wama sa'ré za'ra, da te aré dasiwi i'ri pru pe hã. Ma tô duré wama sa'ré za'ra, ãme Zuda ãma, duré Zeruzalẽ ãma wasima iwẽ na 're wahâimana za'ra mono da, 'ri 'wawi wa'ra 'rãihâ 'rem ne.

¹⁰ — 'Re ihâimana u'âsi mono, e niha uburé marĩ hâimana parim nherẽ, wa za bété nharĩ za'ra ni, niha na, ãhã awa'awi na hã. Wa norĩ hã wa tô uburé asimiroti hã rẽme za'ra ni,

¹¹ asadawa 'mahârâ'wa norĩ nho'õmoi baba wama isõmri za'ra hã. Ta norĩ hã ma tô te te 're wapo're pu'u siromo za'ra, ãma wanhipti'a za'ra da, ti'ai u za iwanhisisi hã iwẽ'õ 're isa'wari mono na hã. E marĩ wa. Taha 're, a'uwẽ norĩ ti'a zada'ré si'uiwa na tinhimi'manharĩ wasété uptabi na ro hã te te siwi 're sito mono wa.

¹² Ta norĩ hã ma tô duré te te wama 're nharĩ za'ra, niwamhã õ norĩ a'uwẽ na hã ãma 're wamro za'ra mono tõ da. Ma tô duré wama te te 're nharĩ za'ra, õ norĩ hã niwamhã tãma 're irowẽ za'ra mono zéb da, duré sibro pese na 're hâimana za'ra mono da hã, wa te 're pawapto za'ra mono tõ da. Tawapsi wa za, u, ãhã ti'ai 're rob'rã norĩ hã wa te 're huri, wasima iwẽ na. Tawapsi wa za duré, u, wanhihudu norĩ ma, wasi'uirĩ na ãhã ti'a hã wa te tãma 're sõmri za'ra, ãma 're sipti'a za'ra mono da hã.

¹³ Wawasété u'âbâ, duré wa te ãma 're i'upa za'ẽtẽ za'ra mono u'âbâ, niha na marĩ na 're wa'ahâ za'ra mono wa, ma tô ãne na uburé marĩ hã wama 're hâimana za'ra, robzépata za'ẽtẽ zé hã. Tane nherẽ, ã hã wa tô wasina waihu'u za'ra ni, a hã, 'Re ihâimana u'âsi mono, ãne 're wahâimana za'ra mono nherẽ, suru na wama 're irob'manharĩ za'ra mono zém na hã. Duré ma tô wama irowairébé za'ra, a'â wahâiba ré 're wahâimana za'ra mono da.

¹⁴ E niha ãhã nherẽ, wa za duré apâ asimiroti wa te 're iwapari za'ra mono õ zém na hã 're wahâimana za'ra, a'uwẽ iwasété uptabi te te 're i'manharĩ za'ra mono norĩ na 're iwamro za'ra mono hã. Ãne hã wa te tô 're 'manharĩ za'ra mono wamhã, a hã te za duré apâ wazada 're asahi mo za, õne haré wa'uprosi da hã, aiwi hã wa'masimani ãna.

¹⁵ Uburé Danhib'apito, Izaraéu nhihudu norĩ te 'Re ihâimana u'âsi mono, a hã tô sena i'uwaibaba na si te dama 're i'arowairébé u'âsi mo. Tahawa, duréi hawim haré ã bâtâ u zahadu wahâiba ré na 're wahâimana za'ra mono da hã ma tô duré a hã wama irowairébé za'ra. Wa norĩ hã wa te ãma 're i'upa za'ra mono zém na hã, wa ãhã na aima hã 're wasiwẽ'õ za'ra. Tane nherẽ, atõmo nho'a 're iwasimasa mono da hã, ibâi õ di.