Esdra 8 - ꞌRe Ihâimana Uꞌâsi Mono Zadawa Wasuꞌu

Apâ a'uwẽ, Babilonia hawi isi'aba'ré norĩ nhisi wasu'u

¹ Ã norĩ hã, Izaraéu nhihudu wa'õtõ nhib'ihâ'a norĩ Babilonia hawi Zeruzalẽ u apâ Esdraha siré isi'aba'ré, apito Artazesi danhib'ihâ'a na 're hâimana mono ré hã:

^2-14 Finéaha hawi a'uwẽ, Gésõ; duré Itamahã hawi a'uwẽ, Daniéu; duré Secaniasihi 'ra Hatusi, Dawihi hawi a'uwẽ; Paroho hawi a'uwẽ, Zacaria, 150 na isib'a'uwẽ wa'õtõ norĩ aibâ me (ã norĩ nhisi za'rata na rob'ui'éré iré hã); Zeraiaha 'ra, Elioena'i, Paate-Moabihi hawi a'uwẽ hã 200 na isiré aibâ norĩ ihâimana za'ra siré hã; Zazi'éhé 'ra, Secaniasi, Zacuhu hawi a'uwẽ hã, isiré 300 na aibâ norĩ ihâimana za'ra siré hã; duré Zonataha 'ra, Ebede hã, Adĩhĩ hawi a'uwẽ hã isiré 50 na aibâ norĩ ihâimana za'ra me hã; Atariasihi 'ra, Zesaiasi, Elãhã hawi a'uwẽ hã, isiré 70 na aibâ norĩ ihâimana za'ra siré hã; Micaéhé 'ra, Zebadiasi, Sefatiaha hawi a'uwẽ hã, isiré 80 na aibâ norĩ ihâimana za'ra siré hã; Zei'éhé 'ra, Obadia, Zoabihi hawi a'uwẽ hã, 218 na isiré aibâ norĩ ihâimana za'ra siré hã; Zosifiaha 'ra, Selomite, Banihi hawi a'uwẽ hã, isiré 160 na aibâ norĩ ihâimana za'ra siré hã; Beba'ihi 'ra, Zacaria, Beba'ihi hawi a'uwẽ hã, 28 na isiré aibâ norĩ ihâimana za'ra siré hã; Hacatãhã 'ra, Zuãna, Azgadehe hawi a'uwẽ hã, isiré 110 na aibâ norĩ ihâimana za'ra siré hã; Eripéréti, Zeiel, duré Semaia, Adonicãhã hawi a'uwẽ norĩ hã, 60 na isiré za'ra aibâ norĩ ihâimana za'ra hã. Tawamhã ã norĩ hã ma tô da'rãsutu u si aihutu. Duré Biva'ihi hawi a'uwẽ norĩ hã, Uta'i, duré Zabude, isiré zahuré 70 na aibâ norĩ ihâimana za'ra hã.

Levita norĩ zô, Esdra te te ida'mazatõrĩzé wasu'u

¹⁵ Tawamhã wa hã Esdra, 'rinho'u Aava na isisi tẽme â hã 're ipraba mono 'rata, wa tô uburé a'uwẽ norĩ hã 'rã'õtõ. Tame wa tô si'ubdatõ bâtâ na wa te wasima i'ri nhoré mono zéb ãma ai'ubumro ni. Tawamhã duré tame a'uwẽ norĩ, atãma na te ab'madâ'â pese mono wamhã, wa tô sasedoti norĩ dawazari isi'ubumro hã sãmri za'ra. Tane nherẽ, levita norĩ dasiré hã 'maihâimana õ di.

¹⁶ Tahawa, 9 na dama i'rãnho'õmo norĩ hã wa tô waibu, ã norĩ hã: Eriézé, Ari'é, Semaia, Elnatã, Zaribe, Elnatã ihâiba amo, Natã, Zacaria, duré Mesulã. Tawamhã duré maparane dama romnhoré'wa norĩ hã wa tô timra, Zoiaribe norĩ hã Elnatãhã me, rowaihu'u pese 'wa norĩ hã.

¹⁷ Tahawa, Casifia na romnhisi ãma danhib'ihâ'a Idoho zô, wa tô satõrĩ zahuré, sô rĩtĩ zahuré mono da, te te sõpẽtẽ zahuré wa, duré isiré 'Re ihâimana u'âsi mono ãma 're idawata za'ra mono zé 'ri 're, te te aré 're iromhuri za'ra mono norĩ ma, te te tãma nharĩ za'ra da, tô ãme ãhã 'ri 're romhuri'wa da, te te we watẽme 'mazatõrĩ za'ra da.

¹⁸ Tawamhã 'Re ihâimana u'âsi mono iwẽ na te te wapawaptob za'ra wa, ma tô aibâ Serebia na isisi marĩ tãma iwaihu'u pe hã wei watẽme satõrĩ za'ra, levita Malihi hawi a'uwẽ hã. Tahawa, ma tô 18 na i'ra norĩ hã duré isisãnawã norĩ hã we isiré ai'aba'ré.

¹⁹ Tawamhã ma tô we tãma rob'ru za'ra Hasabiasihi ma hã, duré Zesaiasi, Merarihi hawi a'uwẽ ma hã, duré 20 na i'ra norĩ ma hã, duré isisãnawã norĩ ma hã.

²⁰ 220 na 'ri 're romhuri'wa norĩ zama ma tô isiré we ai'aba'ré, apito Dawi duré tãma da'madâ'â'wa norĩ hã levita norĩ pawaptob za'ra 'wa da, te te ipisutu za'ra nhihudu norĩ hã. Tahawa, uburé ta norĩ nhisi na hã ma tô ãma rob'ui'éré za'ra.

Dasai ãna dahâimana za'ra ré, idamreme zusizé wasu'u

²¹ Tawamhã Aava na panho'õmo 'rata, wa tô wasai ãna misi bâtâ na wahâimana za'ra da hã dama pisutu, taha ré uburé wa norĩ hã wate 'Re ihâimana u'âsi mono nho'remhã wahi'rãtitõ tãma wasisimro da, wa'ra norĩ ré, duré uburé wanhimarĩ ré, wasi'aba'réi ré we te te wanhimroi wẽ mono da, wa te tiwi waptẽrẽ za'ra da hã.

²² Wa hã wa tô apito ma tinha, wate 'Re ihâimana u'âsi mono, uburé te te sina 're i'umnhasi za'ra mono norĩ te te 're i'madâ'â pese za'ra mono na hã, duré te te 're irẽme za'ra mono norĩ da, isiptetezé, duré isiti'ruzé sada 're ihâimana za'ra mono na hã. Tahawa, wa hã ĩnhiséb di, apito wi, awaru na dasi'wapéi 'manharĩ'wa norĩ wasi'aba'réi ré te te wa'madâ'â za'ra mono da, te tiwi iwaptẽrẽ da hã.

²³ Tahawa, wa tô wasai ãna wamreme zusi ni, 'Re ihâimana u'âsi mono ma, te te wa'madâ'â za'ra mono da, wasi'aba'réi ré. Tawamhã ma tô wa te tiwi irowaptẽrẽ za'ra zém na hã wawapari za'ra.

Danhoprubzé da te isõmri za'ra zé wasu'u

²⁴ Tawamhã wa hã, sasedoti ipire norĩ 'remhã wa tô pisutu za'ra, ã norĩ hã: Serebia, Hasabiasi, duré 10 na isiré norĩ hã.

²⁵ Tawamhã wa tô ẽtẽ waipo prã prata hã, oru hã, apito norĩ, duré apito timreme na te te 're i'rãiwaptob za'ra mono norĩ hã, duré tãma romhuri'wa norĩ hã, duré Izaraéu nhihudu norĩ marĩ te te isõmri za'ra hã, 'Re ihâimana u'âsi mono nhorõwa 'ri 're marĩ 'manharĩzéb da. Ta hã wa tô uburé sasedoti norĩ ma sõmri za'ra.

^26-27 Tawamhã ãne marĩ mono hã wa tô sõmri za'ra: Ẽtẽ waipo prã prata hã 22 miu na ipire pibuzém na; duré 100 na prata na marĩ 'manharĩ mono hã 70 na ipire pibuzém na; duré ẽtẽ waipo pré oru hã 3.500 na ipire pibuzém na; duré 20 na oru na piza'a 're nho'a 'reptõ 'manharĩ mono hã, 8 aiwa ãma isipo'o na ipire pibuzém na; duré maparane ẽtẽ topsada brõzi na marĩ 'manharĩ hã, aiwa oru iwa'âbâ za'ẽtẽ na hã.

²⁸ Tawamhã wa tô tãma nharĩ za'ra ãne: — A norĩ wa'wa hã Uburé Danhib'apito, aihi'rata norĩ te 'Re ihâimana u'âsi mono ma si, tãma 're romhuri za'ra wa'aba mono da hã te oto aimawi 're aihâimana za'ra wa'aba mo. Ma te duré aimawi uburé marĩ mono hã tãma isa'ra wa'wa Uburé Danhib'apito ma, prata hã, duré oru hã, we asiwi i'ãwisi 'wa hã, õhõ ma, dasima iwẽ na ãma tãma idanhoprub za'ra zéb da hã.

²⁹ Tahawa, ma'ãpé asiwi sa'ra wẽ wa'aba, 'Re ihâimana u'âsi mono nhorõwa 'ri u, i'aihutu aba zéb u hã. Tawamhã tame 'ri 're wa'wa 're, te za ipire pibu za'ra wa'wa za. Taha pari te za duré sasedoti ipire norĩ ma, duré levita norĩ ma, duré Izaraéu nhihudu norĩ nhib'ihâ'a Zeruzalẽ ãma 're ihâimana za'ra mono norĩ ma, uburé tãma isõmri za'ra wa'wa, marĩ mono hã.

³⁰ Tawamhã sasedoti norĩ hã, duré levita norĩ hã ma tô prata hã, duré oru hã, duré marĩ mono hã waibu za'ra, Zeruzalẽ ãma 'Re ihâimana u'âsi mono nhorõwa 'ri, 're isa mono u te te oto 'wasari da hã.

Zeruzalẽ u apâ idasi'aba'rézé wasu'u

³¹ Tawamhã a'amo imorĩ'rata ãma 12 bâtâ na wa tô Zeruzalẽ u apâ wasi'aba'ré da hã, Aava na pa nho'õmo nhisi hawimhã wawairébé ni. Tahawa, ma tô wasi'aba'réi ré, wate 'Re ihâimana u'âsi mono hã wasiré hâimana. Taha ré, ma tô duré wanhitob'ru isipãrĩ ze dazô 're iwairébé za'ra mono norĩ wi hã te te wa'madâ'â u'âsi za'ra.

³² Tawamhã oto Zeruzalẽ u wasihutu wamhã, wa tô si'ubdatõ bâtâ na hã a'â wawa'utu za'ra ni.

³³ Taha pari maparane si'uiwa na bâtâ ãma wa tô duré oto 'Re ihâimana u'âsi mono nhorõwa 'ri u hã ai'aba'ré ni. Tahawa, prata norĩ hã, oru hã, duré marĩ 'manharĩ mono hã wa tô pire pibu za'ra ni. Taha pari wa tô duré sasedoti Meremote, Uriaha 'ra ma sõmri za'ra ni. Taha siré te ã norĩ hã oto tihâimana za'ra: Finezaha 'ra Eriaza hã; duré maparane levita norĩ hã: Zesuaha 'ra Zozabade hã, duré Binu'ihi 'ra, Noadiasi hã.

³⁴ Tawamhã uburé marĩ mono hã ma tô dasiwi sa'rata ni. Ma tô duré dasiwi pire pibu za'ra ni. Ãhã wa, ma tô uburé ipire pibu za'ra zé hã dasiwi sihâtâ ni.

³⁵ Tawamhã Babilonia hawi apâ uburé dasi'aba'réi parip si, ma tô danhimizama norĩ hã Izaraéu nhihudu norĩ te 'Re ihâimana u'âsi mono ma, da te izata za'ra da hã sõmri za'ra ni. Tahawa, 12 na powawẽ iba'õmo na, duré 96 na pone'ẽrebâ zéré mapure si'aibâ na, duré 77 na pone'ẽrebâ 'ra na, ma tô ãma tanhoprub za'ra ni, Izaraéu nhihudu norĩ u'âbâmhã. Ma tô duré 12 na pone'ẽrebâ zéré uzé si'aibâ hã siwi zata za'ra, dawasété parizéb da hã. Ã hã uburé abaze norĩ hã ma tô Uburé Danhib'apito ma, ãma tãma danhoprub za'ra zéb da hã dasiwi zata pese za'ra ni.

³⁶ Tawamhã apito nhimirowaihu'uzém na romnhihâdâ ma tô duré dama i'rãnho'õmo norĩ ma, tisõ, duré daza'rui wa'õno Eufrati bâtâ zasizém niwĩ da'madâ'â'wa norĩ ma zama. Tawamhã ma tô duré ta norĩ hã 'Re ihâimana u'âsi mono nhorõwa 'ri 're romhurizém na hã dapawaptob za'ra.