Esdra 6 - ꞌRe Ihâimana Uꞌâsi Mono Zadawa Wasuꞌu

Apito Ciru, 'ri te te dama i'ruzém na romnhihâdâ, da te isõpẽtẽzé wasu'u

¹ Tawamhã apito Dariu ma tô dama ti'ru, Babilonia ãma ibaihâ nhimi'warazéb ãma dahi'rata norĩ wasu'u na romnhihâtâ mono na sô darĩtĩ za'ra da hã, Ciru hã 'ri te te dama i'ruzéb zô tinhimiromnhihâtâ na.

² Tahawa, 'ri nho'u Ecbatana na isisi, daza'rui wa'õno Média na romnhisi ãma 're ihâimana mono ãma, ma tô taha na romnhihâdâ isinhai ré hã dasiwi sõpẽtẽ ni. Ãne na ãma iromnhihâtâ ré hã:

³ “Apito Ciru isi'i'rãnho'õmozém na imorĩ'rata na ãma iwahub ãma, ma tô Zeruzalẽ ãma 'Re ihâimana u'âsi mono nhorõwa 'ri apâ da te dasiwi iwahutu da hã dama ti'ru, danhimizama na danhoprubzé da te iwa 're izata za'ra mono zéb da hã. Tawamhã 'ri na'rata pibuzé 27 metru na hâimo hã, duré 27 metru na 'ri zadarata hâiba amoi u ipibuzé hã.

⁴ Tawamhã si'ubdatõ ẽtẽ na 'ri na'rata 'manharĩ sisõré nhisiwimhã te za wedepo'o na misi isõré na hã dasiwi 'manharĩ ni za. Duré uburé pese marĩ norĩ wa'âbâzé hã za dama i'rãnho'õmo norĩ hawip si.

⁵ “Uburé ẽtẽ waipo prã prata na duré ẽtẽ waipo pré oru 'manharĩ na piza'a norĩ hã apito Nabucodonozo Zeruzalẽ ãma 'Re ihâimana u'âsi mono nhorõwa 'ri hawi te te isani za'ra, Babilonia u te te we iduri hã apâ wa za sõmri za'ra, 'ri 're, 're isimi'warazé mono bâ da te dasiwi sa'ra da apâ.”

Apito Dariu, 'ri na romhurizém na te te dama i'ruzé wasu'u

⁶ Tawamhã ãne te te ãma isada'âbâ za'ra zé, ma te apito Dariuhu ma hã tãma me za'ra: “Ã hã apito Dariu te te iwaihu'uzé, Tatena'i daza'rui wa'õno Eufrati bâtâ zasizém niwĩ dama i'rãnho'õmo ãma ma hã, Seta-Bozena'ihi ma hã, duré daza'rui wa'õno bâtâ zasizém niwĩ isiré dama ipire norĩ 're ihâimana za'ra mono norĩ ma hã: “'Re ihâimana u'âsi mono nhorõwa 'ri nhiti ma'ãpé ai'ré za'ra wa'aba.

⁷ Da te dasiwi i'ri za'ra zé hã ma'ãpé dawi sawi za'ra wa'aba tõ. Zuda ãma i'rãnho'õmo norĩ ma, duré zudeu norĩ nhib'ihâ'a ma, ma'ãpé sa'ré za'ra wa'aba, 'Re ihâimana u'âsi mono nhorõwa 'ri, duréihã da te dasiwi i'ri prubzéb ãma tô apâ te te siwi 'ri nharĩ da.

⁸ Tawamhã romnhihâtâ na hã wa ãma aiwada'uri za'ra wa'wa, 'ri na a norĩ wa'wa hã dapawaptob za'ra wa'aba da. Uburé 'ri da, marĩ wa'âbâ mono hã duré dasai wa'âbâ mono hã te za õne haré we tihâiba, romhuri hã simizazâri tõ da. Ãhã da hã te za dama i'rãnho'õmo te, rob'uiprazé ubumrozém hawimhã da te 're sani, daza'rui wa'õno Eufrati bâtâ zasizém niwĩ dapawa'âbâ arĩ, da te 're iwaibui mono hawimhã, rob'uiprazé hã.

⁹ Tawamhã sasedoti Zeruzalẽ ãma 're ihâimana za'ra mono norĩ ma hã te za bâtâ bâre sô 're ro'wanhi'riti za'ra mono ãna, uburé marĩ te te 're iwaptẽrẽ za'ra mono zéb zarina tãma 're isõmri za'ra wa'aba mo, ã norĩ hã: powawẽ iba'õmo zapu hã, pone'ẽrebâ hã, duré pone'ẽrebâ 'ra hã, 'Re ihâimana u'âsi mono hâiwa ãma 're isãmra mono ma, 're sõprub za'ra mono wa, te te tãma 're izata za'ra mono da hã. Tawamhã amnho trigu zama te za duré tãma 're isõmri za'ra wa'aba mo, dasai warĩrĩzé sa hã, uwa 'rãi wa'u isé hã, duré azeitona wa'u to hã.

¹⁰ Ãne te za ta norĩ hã te te 're 'manharĩ za'ra, 'Re ihâimana u'âsi mono hâiwa ãma 're isãmra mono ma, 're isõprub za'ra mono zé te te 're i'awẽsãmri mono zéb da hã. Duré ĩ'ãma 're mreme zusi mono da, ĩ'ra norĩ ãma zama, rowẽ na 're wahâimana za'ra mono da hã, te za te te 're 'manharĩ za'ra.

¹¹ Ni'wa, ã hã ĩnhimirob'ruzé te te wapari õ wamhã, wa za dama hâiba 'ru za, isõrõwa hawi wedepo da te iwazere 'rã'wa na da te ãma hâiba 'razâri da hã, duré taha pari ti'a na da te ãma romnhihâtâ haré iré sab da. Tahawa, te za duré isõrõwa hã dasiwi 'morõwĩrĩ ni, isõrõwa siprup si sa'wari 'rãihâ na 're sa'wari mono da.

¹² 'Re ihâimana u'âsi mono hã, Zeruzalẽ, ãma 're idawata za'ra mono zéb da 'ri hã te te pisutu siromo wa, siwa'ru apito norĩ hã, duré siwa'ru dawamri mono 'remhã ĩnhimirob'ruzé te te 're iwapari za'ra mono õ, te te 're i'a'uprosi mono da si iwẽ hã, 'ri te te 're prub za'ra mono da, te te sima 're ipibu za'ra mono norĩ hã. Wa hã Dariu, wa tô ãne dama rob'ru. Ã hã da te dasiwi 're iwapari pese za'ra mono da si, i'ruzahi hã.”

'Re ihâimana u'âsi mono nhorõwa isi'utõrĩzém na, da te dasiwi isaiwĩrĩzé wasu'u

¹³ Tawamhã dama i'rãnho'u Tatena'i hã, Seta-Bozena'i hã, duré isiré dama ipire norĩ hã ma tô apito te te iwaihu'uzéb zarina si siwi 'manha.

¹⁴ Tawamhã zudeu norĩ nhib'ihâ'a hã ma tô 'ri na romhuri na te te ãma siwi uzusi, wẽ na. Taha siwaprã ma tô 'Re ihâimana u'âsi mono zadawa 'mahârâ'wa Ageu norĩ nhimirowasu'u, Idoho 'ra Zacariaha nhimirowasu'u me hã tãma tipẽ'ẽ to za'ra. Tawamhã ma tô 'ri hã siwi uprosi oto, Izaraéu nhihudu norĩ te, 'Re ihâimana u'âsi mono te te iwaihu'uzéb zarina, duré Persia nhib'apito norĩ Ciru, Dariu, Artazesi, ã norĩ hã te te iwaihu'u za'ra zéb zarina.

¹⁵ Ãhã wa, ada na a'amo nhisi ãma bâdâ si'ubdatõ ihâimana ãma, ma tô oto 'ri hã ai'utõrĩ pese, Dariuhu ãma 6 na ãma iwahubzéb ãma dama i'rãnho'õmo na 're ihâimana mono zém na hã.

¹⁶ Tawamhã Izaraéu nhihudu norĩ, sasedoti norĩ, levita norĩ, duré uburé isiré norĩ apâ Babilonia hawi isi'aba'ré hã ma tô 'ri te te siwi isaiwĩrĩzé hã siwi 'manha. Ãhã wamhã, 'Re ihâimana u'âsi mono ãma 're idawata za'ra mono zéb da hã ma tô dato sina tãma hã sõmri za'ra ni.

¹⁷ Tawamhã 'ri saiwĩrĩzéb da hã ma tô 100 na powawẽ iba'u hã, 200 na pone'ẽrebâ hã, duré 400 na pone'ẽrebâ 'ra te te izata za'ra da hã sõmri za'ra. 12 na pone'ẽrebâ zéré uzé si'aibâ, ãma tãma sõprub za'ra wa, dawasédé te te dama ãma i'apari za'ra zéb da hã, ma tô ta norĩ hã duré sõmri za'ra, Izaraéu nhihudu norĩ wa'õtõ wamri mono bâ, pone'ẽrebâ zéré uzé hã.

¹⁸ Tawamhã sasedoti norĩ hã, duré levita norĩ hã ma tô Zeruzalẽ ãma 'ri 're, te te 're iromhuri za'ra mono da zama siwi danhisi nhihâtâ za'ra, Mozésihi nhimiroti na ãma iromnhihâtâzéb zarina.

Pascowa na dato nhisi na da te dasima iromhu'u za'ra zé wasu'u

¹⁹ Tawamhã Izaraéu nhihudu norĩ, Babilonia ãma sito pese na 're ihâimana za'ra mono zém hawi apâ isi'aba'ré norĩ hã ma tô Pascowa na dato isa'ẽtẽ nhisi na hã sima romhu'u za'ra, bâdâ 14 na ihâimana ãma a'amo imorĩ'rata te na.

²⁰ Tawamhã uburé sasedoti norĩ, duré levita norĩ hã ma tô si'upsõ za'ra, 'Re ihâimana u'âsi mono ma, iwẽ na hâimana za'ra da hã. Taha pari levita norĩ ma tô abaze norĩ hã siwi simro, Pascowa na dato isa'ẽtẽ wa ãma isõprub za'ra zéb da hã, uburé a'uwẽ te te sina isiri za'ra hâiba u'âbâmhã, isiré sasedoti norĩ apâ te te sina isiri za'ra zé hâiba norĩ u'âbâmhã, duré sihâiba u'âbâb za'ra zama hã.

²¹ Tawamhã uburé Izaraéu nhihudu norĩ, Babilonia hawi apâ te te sina isiri za'ra norĩ hã ma tô danhimizama na ãma 're idanhoprub za'ra mono nhi hã tihu. Duré a'uwẽ iwasédé Cana'ã ãma 're ihâimana za'ra mono norĩ hâimanazé te te irẽme za'ra, duré Uburé Danhib'apito, Izaraéu nhihudu norĩ te 'Re ihâimana u'âsi mono ãma oto 're wata za'ra mono da, tihâimanazém na te te isaprĩ za'ra norĩ zama hã ma tô duré romnhi hã dame tihu.

²² Tawamhã 7 bâtâ 're, ma tô i'u'ẽtẽ duptoi'õ na dato hã siwi 'manha, to za'ẽtẽ za'ra sina. Tahawa, tãma hã rowẽ uptabi za'ra di, Uburé Danhib'apito hã, Asiriaha nhib'apito, niha oto te te 'rãi pi'rai wa, õ norĩ zawi na si oto 're hâimana mono da, taha zarina 'Re ihâimana u'âsi mono nhorõwa 'ri apâ te te siwi iwahutu na te te pawaptob za'ra da hã.