Esdra 4 - ꞌRe Ihâimana Uꞌâsi Mono Zadawa Wasuꞌu

Izaraéu nhihudu nhitob'ru norĩ, 'ri 'manharĩ na romhuri te te nasi siwi i'wa'rutuzé wasu'u

¹ Tawamhã Zudaha nhihudu norĩ nhitob'ru, Bẽzamihĩ nhihudu norĩ nhitob'ru me, ma tô Uburé Danhib'apito, Izaraéu nhihudu norĩ te, 'Re ihâimana u'âsi mono nhorõwa 'ri, Babilonia hawi apâ isi'aba'ré norĩ te te siwi i'ri téb za'ra zé hã waihu'u za'ra.

² Tawamhã ma tô Zorobabé u, duré dawa'õtõ nhib'ihâ'a norĩ u hã ai'aba'ré. Tahawa te ãne tãma nharĩ za'ra: — Wa wasima wẽ za'ra ni, 'ri na wa te aipawaptob za'ra wa'aba da hã. Tô ate za'ra wa'wa 'Re ihâimana u'âsi mono na wa 're wawata za'ra. Õhõ ma si, wa duré wanhimizama zata na wanhoprubzém na hã ãma tãma 're wanhoprub za'ra, Asiriaha nhib'apito Hasa-Hadõ ãme 're wasi'ubumroi mono da, te te we iwanhimroi mono zém hawim haré.

³ Tane nherẽ, Zorobabé, Zozué, duré isiré Izaraéu nhihudu wa'õtõ nhib'ihâ'a norĩ hã ma tô ãne asa ãma sada'âbâ za'ra: — Wa te ai'ãma rosa'rata za'ra wa'aba õ di, Uburé Danhib'apito, wate 'Re ihâimana u'âsi mono te 'ri 'manharĩ na wapawaptob za'ra wa'aba da hã. Ãne si wa za tô wasiwaprosi wasiwi 'ri ni, Persiaha nhib'apito Ciru te te i'ruzéb zarina.

⁴ Tawamhã õhõ ti'ai ãma a'uwẽ norĩ hã ma tô Izaraéu nhihudu norĩ wi, te te ãma tiwi irobzei'õ za'ra da hã nasi niha na hã tãma rob'manharĩ za'ra. Ma tô duré nasi tãma rob'rãmi za'ra, pahi za'ra da, 'ri 'manharĩ na te te ãma uzusi za'ra tõ da.

⁵ Dama i'rãnho'õmo hawi tipawa'âbâ zô te te iromhuri za'ra norĩ ma hã, ma tô duré rob'uiprazé hã pi'uriwi tãma sõmri za'ra, Izaraéu nhihudu norĩ te te sima ãma irowa'õtõ za'ra zé hã te te tiwi ãma 'wa'rutu za'ra da. Ãne hã ma tô Persia nhib'apito Ciru 're hâimana mono ré, duré Persia ãma apito Dariu 're ihâimana mono zéb u hã uburé isitob'ru norĩ hã te te siwi 're 'manharĩ.

Apito ma, da te iromnhihâtâzé wasu'u

⁶ Tawamhã Zersi dama i'rãnho'õmo na ihâimana na'ratazéb ãma, ma tô Izaraéu nhihudu nhitob'ru norĩ hã, Zuda ãma 're ihâimana za'ra mono norĩ na, duré Zeruzalẽ ãma 're ihâimana za'ra mono norĩ na te te ãma iwasété za'ra na ãma rob'ui'éré za'ra, apito ma.

⁷ Tawamhã nimahã na ma tô Bisrã hã, Mitredate hã duré Tabe'é hã tisiré norĩ me Persiaha nhib'apito Artazesihi ma tãma romnhihâtâ za'ra. Rob'ui'éré hã aramaicu mremezém na. Duré ãma isaprĩzé hã Persia ãma a'uwẽ mreme u.

⁸ Tawamhã dama i'rãnho'u Reum, Sĩsa'ĩ dama romnhihâtâ 'manharĩ'wai me ma tô apito Artazesihi ma hã duré tãma romnhihâtâ zahuré, Zeruzalẽ ãma 're idahâimana za'ra mono norĩ na iwasédé te te siwi ãma ihirizém na hã. Tawamhã ãne romnhihâdâ hã:

⁹ “Ã romnhihâdâ hã, Reum dama i'rãnho'õmo norĩ, Sĩsa'ĩ dama romnhihâtâ 'manharĩ'wai me hã, tisiré 're ihâimana za'ra mono zu, te te da'ãma 're irowairébé za'ra mono zu, uburé aimawi pawa'âbâ zô Erequi na tiza'ru nhisi ãma te te 're iromhuri za'ra mono zu, Babilonia ãma 're idahâimana za'ra mono zu, Susã ãma 're idahâimana za'ra mono zu, duré Elã na romnhisi ãmab zu zama ma tô siwi time,

¹⁰ apito isiptede Assurbanipa'u, a'uwẽ ihâiba amo norĩ te, ti'ai wa'õtõ nho'õmo hawi te te isani za'ra, 'ri nho'u Samaria ãma oto 're hâimana za'ra mono da, duré daza'rui wa'õno Eufrati bâtâ zasizém niwĩ 're hâimana za'ra mono da, 're ihâimana za'ra mono norĩ zu.”

¹¹ Tawamhã ãne romnhihâdâ ãma i'uzu hã duré: “Apito Artazesi, daza'rui wa'õno Eufrati â bâtâ zasizém niwĩ aima romhuri'wa 're iwahâimana za'ra mono, wa ãma aima romnhihâtâ za'ra ni, ãne na:

¹² “Apito, wa ãma aima wasu'u za'ra ni, asadawa para we zudeu norĩ isi'aba'ré, we isihudu Zeruzalẽ u ma tô apâ 'ri nho'u isimipari'õ iwasété uptabi siwi 'ri. Ma tô duré 'ri 'wawi wa'ra wahutu na hã ãma siwi sãna'rata. Taha romhuri na te za duré siwi uprosi su'u za.

¹³ Apito ãhã nhipai u ihâiba amo niha hã iwaihu'u da hã aima i'ruzahi. Ã hã 'ri nho'u apâ te te siwi 'ri wamhã, duré apâ 'ri 'wawi wa'ra te te siwi wahutu wamhã, ã norĩ a'uwẽ tipawa'â aima te te 're i'arĩ za'ra mono da hã mare di za. Ãne wamhã, te za rob'uiprazé 're i'a'ubumroi mono zé hã aiwi sina ti'awi.

¹⁴ Tahawa, wa norĩ aima romhuri'wa, wa te wasiwi 're ai'umnhasi mono na 're aihâimana mono nherẽ, te te siwi i'asisi uptob da hã, wa te wasima wẽ za'ra õ di, wa norĩ hã. Tahawa ãne romreme hã wa aima me za'ra ni,

¹⁵ dama 'ru da, aihi'rata norĩ wasu'u ré ibaihâ mono hã da te sabu za'ra mono da. Ãne 'manharĩ wamhã, te za i'upsibi me, 'ri nho'u Zeruzalẽ ãma a'uwẽ õne u'â tinhib'apito te te siwi 're iwapari õ u'âsi za'ra mono na, duré duréi romna'rata hawi, apito norĩ ma, duré daza'rui wa'õtõ mono bâ dama i'rãnho'õmo norĩ ma, we marĩ te te 're isani za'ra mono na. Tawamhã duré nimahã na taha zarina ma tô dasiwi 'ri prum ni.

¹⁶ Tahawa, apito, wa ãne aima wasu'u zahi za'ra ni: Apâ 'ri nho'u hã te te siwi 'manharĩ té wamhã, duré i'wawi wa'ra te te siwi 'manharĩ téb 'rãsutu wamhã, a hã Eufrati bâtâ zasizém niwĩ daza'rui wa'õno ihâimana ãma te za asiptetezé hã isimini.”

Apito, romnhihâdâ te te isada'âbâzé wasu'u

¹⁷ Tawamhã apito Artazesi, ma te ãne asa romnhihâtâ na sada'âbâ za'ra: “Reum dama i'rãnho'u, duré Sĩsa'ĩ dama romnhihâtâ 'manharĩ'wa, duré asiré Samaria ãma 're ihâimana za'ra mono norĩ, duré Eufrati bâtâ zasizém niwĩ daza'rui wa'õtõ ãma 're ihâimana za'ra mono norĩ me, simisutu wa ãma asawi za'ra wa'wa.

¹⁸ “Romnhihâdâ we ĩma asiwi isõmri 'wa hã, ma tô Persia norĩ mreme u ãma isaprĩ na ĩma sõré ni.

¹⁹ Tawamhã wa tô, dama ti'ru, ibaihâi 're Zeruzalẽ wasu'uzéb ré zô, darĩtĩ za'ra da. Tahawa, duréi romna'rata hawi, Zeruzalẽ ãma apito norĩ zada 're idahâimana za'ra mono zé wasu'u hã, duré marĩ wasété téb ré u'âsi 'wa na ahâ uptabi na we 're ihâimana u'âsi za'ra mono zé wasu'u hã ma tô dasiwi upsibi me ni.

²⁰ Apito isiptete norĩ tamemhã ma tô te te 're da'madâ'â za'ra. Ta norĩ hã ma tô duré uburé Eufrati bâtâ zasizém niwĩ daza'rui wa'õtõ ãma dama i'rãnho'õmo na hã 're hâimana za'ra. Tahawa, ma tô dapawa'âbâ arĩre hã te te dawi 're awaibu.

²¹ Tahawa, ma'ãpé aibâ norĩ ma, waihu'u za'ra wa'aba, 'ri nho'õmo na tinhimiromhuri te te sahâri za'ra da. 'Ri nho'u, wa hã te 'rui õ nherẽ, apâ da te dasiwi i'ri da hã mare uptabi di.

²² Ma'ãpé ã hã rowaihu'uzé hã, uburé ãma asiwi uwaimrami wẽ za'ra wa'aba, te te siwi ãma uzusi tõ da, duré ĩnhimi'madâ'âzém hawimhã te 're romnhimini tõ mono da.”

²³ Tawamhã apito Artazesihi nhimiromnhihâdâ hã ma tô Reum norĩ ma, dama romnhihâtâ 'manharĩ'wa Sĩsa'ĩhĩ me, duré isiré norĩ me hã tãma sõré za'ra ni. Tahawa awa'awi ma tô ta norĩ hã Zeruzalẽ u ai'aba'ré. Si'aba'réi wamhã, ma tô zudeu norĩ ma, tisi'wapézém na hã tãma amhâzépa za'ra, tinhimiromhuri te te sahâri za'ra da.

'Re ihâimana u'âsi mono nhorõwa 'ri wahutuzé wasu'u apâ

²⁴ Tawamhã 'Re ihâimana u'âsi mono nhorõwa 'ri 'manharĩ na romhuri ma tô aré dasiwi sazâri ni. Taha haré ma tô aré we ãma 're ropsa'wari, Persia ãma Dariu dama i'rãnho'õmo na maparane ãma iwahubzéb u hã.