Esdra 10 - ꞌRe Ihâimana Uꞌâsi Mono Zadawa Wasuꞌu

Dasiré a'uwẽ'õ norĩ sipi'õ na damro, da te dasiwi iwano'õzé wasu'u

¹ Tawamhã Esdra, 'Re ihâimana u'âsi mono nhorõwa 'ri nho're hi'rãtitõ sãmra sina, ma tô tãma mre, wawa sina, dawasété u'âbâ. Taha ré, ma tô Izaraéu nhihudu norĩ ahâ uptabi na imana wawimhã si'rã'õtõ, aibâ norĩ hã, pi'õ norĩ hã, duré ai'uté norĩ hã. Ma tô duré ta norĩ zama ti'ru'ru.

² Tawamhã Zei'éhé 'ra, Secaniasi, Elãhã hawi a'uwẽ hã te Esdraha ma tinha ãne: — Wa norĩ 'Re ihâimana u'âsi mono wi, wa tô wawasété za'ra ni, wasiré a'uwẽ'õ norĩ wasété na 're ihâimana za'ra mono sipi'õ na 're iwamro za'ra mono hã. Tane nherẽ, te zahadu Izaraéu nhihudu norĩ, marĩ iwẽ zô sima 're isõpré mono zé hã tãma 're hâimana za'ra.

³ Tahawa, ãhã na awa'awi na wa za ipire na ropisutu za'ra ni, wate 'Re ihâimana u'âsi mono nho'remhã, pi'õ norĩ ma, 'ra ré si'aba'ré da, wa te tãma irob'ru za'ra zéb zarina. Ãne wa za asimiroti hã duré wate 'Re ihâimana u'âsi mono nhimiroti te te 're iwazéb za'ra mono norĩ mreme zama wasiwi 'manharĩ ni. Ãne wa za tô 'Re ihâimana u'âsi mono nhimiroti te te i'ruzé hã 'manharĩ za'ra ni.

⁴ Hâiwi ma'ãpé asa na, a hã ãne na hã 'manharĩ hâ. Wa norĩ hã wa za wasiwi ai'upari ni za. Tahawa, ma'ãpé sada asiptete. Ma'ãpé õne haré niha na we 'manharĩ!

⁵ Tawamhã Esdra, hâiwi oto sa wamhã, ma tô sasedoti ipire norĩ ma hã, levita ipire norĩ ma hã, duré uburé a'uwẽ norĩ ma hã tãma 'ru za'ra, Secaniasi te te tãma inharĩ za'ra zéb zarina te te siwi 'manharĩ da, te te siwi iropisutu da hã. Tahawa, ma tô ropisutu za'ra oto.

⁶ Tawamhã Esdra, 'Re ihâimana u'âsi mono nhorõwa 'ri nho're hawi ma tô watobro. Watobro wamhã, ma tô Eriasibehe 'ra si'aibâ Zoãnahã za'warizéb u mo. Tame ma tô ãma timara. Ma tô duré ãma ti'awẽ, sai ãna, duré te te hâ'rẽne ãna, tãma robzei'õ uptabi wa, Babilonia hawi a'uwẽ norĩ apâ te te sina isiri za'ra, 'Re ihâimana u'âsi mono ãma si 're nomro mono õ wa.

⁷ Taha pari Zeruzalẽ ãma, duré Zuda ãma, uburé Babilonia ãma sito pese na 're ihâimana za'ra mono zém hawi apâ isi'aba'ré norĩ, Zeruzalẽ ãma isi'rã'õtõzéb na ma tô rowasu'u na ãma ropé za'ra ni.

⁸ Tawamhã ma tô dama i'rãnho'õmo norĩ nhimirowaihu'u na duré danhib'ihâ'a nhimirowaihu'u na dapo're pu hã dasiwi 'manharĩ ni, ni'wa hã si'ubdatõ bâtâ pisutu pese upana wisi wamhã, za tinhimarĩ te te isiminizém na hã, duré za Izaraéu nhihudu norĩ hawimhã da te dasiwi iwazere na hã.

⁹ Ãne wa, Zuda ãma, duré Bẽzami ãma uburé aibâ norĩ 're ihâimana za'ra mono si'ubdatõ bâtâ 're a'amo hã 9 ãma, duré bâdâ hã 20 na ihâimana ãma ma tô Zeruzalẽ u aihutu. Tahawa, ma tô si'rã'õtõ, 'Re ihâimana u'âsi mono nhorõwa nho'remhã, sõ'awi. Tawamhã taha siwaprã, tã ipini nhiptede ta'a wa, duré roti ipire zô isi'rã'õtõ siwaprã, ma tô uburé tipopo'o za'ra.

¹⁰ Tawamhã sasedoti Esdra hã ma tô hâiwi za, para na. Sa wamhã, te tinha ãne: — A norĩ wa'wa hã 'Re ihâimana u'âsi mono ãma si 're i'anomro aba mono õ zarina, ma tô Izaraéu nhihudu norĩ te te 're i'upa za'ra mono zém na hã tiwi ãma 're ihâimo za'ra wa'aba mo, duré asiré a'uwẽ'õ norĩ sipi'õ na 're i'aimro za'ra wa'aba mono u'âbâmhã.

¹¹ Tahawa, ma'ãpé ãhã na, Uburé Danhib'apito, aihi'rata norĩ te, 'Re ihâimana u'âsi mono ma, aiwasété aba na tãma asiwẽ'õ za'ra wa'aba. Duré tãma iwẽ hã ma'ãpé 're 'manharĩ za'ra wa'aba mono. Ma'ãpé duré wasiré a'uwẽ'õ wanhipti'ai 're, 're ihâimana za'ra mono ma, 're asa'o hâ za'ra wa'aba mono. Duré ma'ãpé asiré a'uwẽ'õ sipi'õ na ãma 're i'aimro za'ra wa'aba mono hã satõrĩ za'ra wa'aba, si'aba'ré da oto aihawib za'ra wa'aba.

¹² Tawamhã uburé a'uwẽ norĩ timreme 'rãihâ na, ma te ãma sada'âbâ za'ra ãne: — Ĩhe! Wa za tô uburé wama i'ru za'ra zé hã wasiwi 'manharĩ zahi ni!

¹³ Tane nherẽ, wa'ahâ uptabi di. Te duré tã hã pĩni nhiptete na we tita'a, ãhã na hã. Tahawa, ãme rowi iwasi'ubumro da hã mare di za. Duré ã hã wama i'ru za'ra hã, misi bâtâ na niha wamhã, duré maparane bâtâ na wa te wasiwi i'manharĩ da hãi õ di. E marĩ wa. Ã hã wawasédé, wa te 're i'manharĩ za'ra mono na wa te 're i'upa za'ra mono hã wa'ahâ uptabi wa.

¹⁴ Ma'ãpé wanhib'ihâ'a norĩ, Zeruzalẽ ãma a'â hâimana za'ra, niha na te te siwi rowairébé da, uburé da'ãma. Tawamhã aibâ mono bâ wate 'ri nho'õmo ãma 're ihâimana za'ra mono, wasiré a'uwẽ'õ sipi'õ na 're imro za'ra mono hã te za bâdâ ipisutu pese ãma we ai'aba'ré, tite 'ri nho'õmo ãma dama i'rãnho'õmo norĩ siré, duré da'ãma rowairébé'wa norĩ siré zama. Ãne wamhã, te za 'Re ihâimana u'âsi mono wazada isiti'ruzé hã wama ai'ré za'ra.

¹⁵ Tawamhã Azaéu 'ra Zonataha norĩ si Ticvaha 'ra Zazéiaha me si te te dazaze zahuré õ di ãma, rosa'rata 'manharĩ na. Tahawa, Mesulã norĩ hã, levita Sabeta'ihi me ma tô simirosa'rata waptob zahuré.

¹⁶ Tane nherẽ, Babilonia hawi apâ isi'aba'ré norĩ hã ma tô rosa'rata 'manharĩzé hã siwi wẽsã. Tahawa, sasedoti Esdra, ma tô ni'wam norĩ a'uwẽ wa'õtõ mono bâ danhib'ihâ'a 'remhã pisutu za'ra. Taha pari ma tô isisi za'ra duré sihâtâ za'ra. Tawamhã ta norĩ hã ma tô a'amo 10 na ihâimana ãma bâdâ imorĩ'rata hawi sima asimro, aibâ norĩ hâiba na niha na te te siwi ãma rowairébé da.

¹⁷ Tahawa, si'ubdatõ a'amoi 'remhã ma tô uburé aibâ norĩ, pi'õ dasiré'õ na 're imro za'ra mono na hã oto sima ãma rowairébé za'ra.

Pi'õ dasiré a'uwẽ'õ na imro za'ra norĩ nhisi na rob'ui'érézé wasu'u

¹⁸ Ã hã pi'õ dasiré a'uwẽ'õ na imro za'ra norĩ nhisi na rob'ui'éré za'ra ãne: Sasedoti norĩ, a'uwẽ wa'õtõ mono bâ ãne: Zozadaquihi 'ra Zozuéhé hawi a'uwẽ norĩ, duré isisãnawã norĩ ãne: Maaséia, Eriézé, Zaribe, duré Gedalia.

¹⁹ Ã norĩ ma tô timro te te irẽme za'ra da hã ropisutu za'ra. Ma tô duré pone'ẽrebâ zéré mapure si'aibâ na tiwasété za'ra parizéb da, hâiba mono bâ ãma tinhoprub za'ra, izata na hã.

²⁰ Imehe hawi a'uwẽ norĩ hã: Hanani norĩ, Zebadiasihi me.

²¹ Harĩhĩ hawi a'uwẽ norĩ hã: Maaséia, Eliasi, Semaia, Zei'é, duré Uzia.

²² Pasuhu hawi a'uwẽ norĩ hã: Elioenai, Maaséia, Ismaeu, Netaneu, Zozabade, duré Elasa.

²³ levita norĩ 'remhã, ã norĩ hã: Zozabade, Simei, duré Quelaia (Quelita na isisi amo hã), Petaia, Zuda, duré Eriézé.

²⁴ Dama isõ're nhamra'wa hã: Eriasibe. Duré 'Re ihâimana u'âsi mono nhorõwa 'ri 'madâ'â'wa norĩ hã: Salu, Terẽ, duré Uri.

²⁵ Ihâiba amo norĩ: Paroho hawi a'uwẽ norĩ hã: Ramia, Zezia, Malquia, Mi'ami, Eriaza, Malquia, Benaia.

²⁶ Elãhã hawi a'uwẽ norĩ hã: Matania, Zacaria, Zei'é, Abdi, Zerimote duré Eliasi.

²⁷ Zatuhu hawi a'uwẽ norĩ hã: Elioenai, Eriasibe, Matania, Zerimote, Zabade duré Aziza.

²⁸ Beba'ihi hawi a'uwẽ norĩ hã: Zeoãna, Hanania, Zaba'i duré Atla'i.

²⁹ Banihi hawi a'uwẽ norĩ hã: Mesulã, Maluque, Adaia, Zasube, Seal duré Zerimote.

³⁰ Paate-Moabihi hawi a'uwẽ norĩ hã: Adna, Quelal, Benaia, Maaséia, Matania, Bezareu, Binu'i duré Manasé.

^31-32 Harĩhĩ hawi a'uwẽ norĩ hã: Eriézé, Zosia, Malquia, Semaia, Simiã, Bẽzami, Maluque duré Semaria.

³³ Hasuhu hawi a'uwẽ norĩ hã: Matenai, Matata, Zabade, Eripéréti, Zeremai, Manasé duré Simei.

^34-37 Banihi hawi a'uwẽ norĩ hã: Maadai, Anrã, Uel, Benaia, Bedia, Quelui, Vania, Meremote, Eriasibe, Matania, Matenai duré Za'asau.

^38-42 Binu'ihi hawi a'uwẽ norĩ hã: Simei, Selemia, Natã, Adaia, Macnadebai, Sasai, Sarai, Azareu, Selemia, Semaria, Salu, Amaria duré Zuzé.

⁴³ Neboho hawi a'uwẽ norĩ hã: Zeiel, Matitia, Zabade, Zebina, Zadai, Zuéu duré Benaia.

⁴⁴ Ã norĩ ma tô uburé pi'õ dasiré'õ na hã aré timro za'ra. Tawamhã ta norĩ hã ma tô oto timro hã siwi wẽ'õ pese za'ra. Taha zarina ma tô tãma rob'ru za'ra, si'aba'ré da hã 'ra ré.