Éfézu 6 - ꞌRe Ihâimana Uꞌâsi Mono Zadawa Wasuꞌu

Da'ra norĩ ma, damama norĩ ma, duré dana norĩ ma zama rotizé wasu'u

¹ Da'ra norĩ, Wanhib'apito nhimiroti 're iwapari pese za'ra wa'aba mono zarina, te za aimama nhimiroti hã duré ana wa'aba nhimiroti zama hã 're iwapari pese za'ra wa'aba mo.

^2-3 'Re asimipari pese za'ra wa'aba mono sina, te za 're aihâimana wẽ za'ra wa'aba mo aimama ma, duré ana wa'aba ma zama, rowẽ na 're aihâimana za'ra wa'aba mono da, duré 're aihâimana hâ za'ra wa'aba mono da, ti'ai ãma hã. Ãne 'Re ihâimana u'âsi mono nhimiroti 'rada hã te 're hâimana, taha zarina marĩ iwẽ hã za te te dama ãma 're i'a'uwaimrami mono na hã. Duréihã ma tô ãne na 'Re ihâimana u'âsi mono hã dama roti: “Aimama nhimiroti hã te za 're iwapari pese za'ra wa'aba mo, duré ana nhimiroti zama. Ta norĩ nhimiroti hã 're wapari pese za'ra wa'aba mono wamhã, aima 're rowẽ za'ra wa'aba mono di za. Duré 're atâ'â su'u za'ra wa'aba mono õ di za. Te za 're asi'ihi pese za'ra wa'aba mo.” Tahawa, te za aimama nhimiroti hã 're iwapari pese za'ra wa'aba mo, ana nhimiroti zama.

⁴ Damama norĩ, ai'ra ma hã 're 'manharĩ wasété za'ra wa'aba mono õ di za, asada 're sahi za'ra wa'aba mono tõ da. Te za asimiroti wẽ na si 're ipawapto wẽ za'ra wa'aba mo, Wanhib'apito nhimiroti zarina, ai'ra norĩ wa'wa hã 're nomro wẽ mono da.

Pawa'âbâ ãna dama romhuri'wa norĩ ma, duré danhib'apito norĩ ma, rotizé wasu'u

⁵ Aipawa'âbâ ãna aiwada'uri zarina si dama romhuri'wa norĩ, asib'apito mreme hã te za 're iwapari pese za'ra wa'aba mo, 're wazéb za'ra wa'aba mono sina. Cristuhu ma 're iromhuri za'ra wa'aba mono ne, te za tô sena na asib'apito mreme hã 're iwapari pese za'ra wa'aba mo.

⁶ E asib'apito nho'a si te za romhuri hã tãma 're i'madâ'â pese za'ra wa'aba mo. Mare di. Isa're'ra nherẽ, te za romhuri hã tãma 're i'madâ'â pese za'ra wa'aba mo, te te 're aiwẽsãmri za'ra wa'aba mono da, asimiromhuri na hã. Cristuhu ma 're iromhuri za'ra wa'aba mono ne, te za duré ti'ai ãma asib'apito aba ma zama romhuri hã 're i'madâ'â pese za'ra wa'aba mo, 'Re ihâimana u'âsi mono te te sima 're iwẽ mono zéb zarina.

⁷ Ato sina te za tãma 're iromhuri za'ra wa'aba mo, asib'apito za'ra wa'aba ma, Asib'apito uptabi aba ma 're iromhuri za'ra wa'aba mono ne.

⁸ Wapawa'âbâ ãna wawada'uri zarina si dama romhuri'wa 're iwahâimana za'ra mono norĩ, duré wawada'uri ãna wasi'uihâ na 're iwahâimana za'ra mono norĩ me zama, wa te dama 're i'manharĩ wẽ za'ra mono wa'rãmi, te za Wanhib'apito hã te te wama 're wa'âbâ za'ra. Ãhã wasu'u na te za 're asipo're pu'u u'âsi za'ra wa'aba mo.

⁹ Danhib'apito norĩ, aima romhuri za'ra wa'aba 'wa norĩ ma hã, wa tô tãma roti za'ra, romhuri hã te te aima 're 'madâ'â pese za'ra wa'aba mono da, to sina. Tahawa, te za aima romhuri'wa norĩ ma 're i'manharĩ wẽ za'ra wa'aba mo. Tãma 're ropipa za'ra wa'aba mono õ di za. Misi Asib'apito wa'wa te oto aima 're hâimana za'ra wa'wa hâiwa ãma, aima romhuri'wa norĩ nhib'apito na zama. Aiwapsi te za te te aima 're wa'âbâ za'ra wa'wa, 're iromhuri wẽ za'ra wa'aba mono zéb zarina.

'Re ihâimana u'âsi mono hã wa'rui'wa zada, tiwaihu'u pese na te te 're ida'apawapto mono zé wasu'u

¹⁰ Wa za oto roti na aima 'rãsutu za'ra wa'wa. A norĩ wa'wa hã Wanhib'apito siré si te 're aihâimana za'ra wa'aba mo. Tahawa, Wanhib'apito ma si iwaihu'upe hã sa'ẽtẽ na tãma 're hâimana mono wa, te za iwaihu'u pese zarina aihâimana nhiptete sina 're anomro aba mo.

¹¹ Dasi'wapé 'manharĩ'wa norĩ hã te za sisada 're si'uza za'ra. Tane te za 'Re ihâimana u'âsi mono nhimipawaptobzéb ré, 're anomro aba mo, Wa'uburé nhimiroti da, asiptete sina sada 're aihâimana za'ra wa'aba mono da.

¹² Wa norĩ hã wasiré 're iwahâimana za'ra mono norĩ me, 're wasi'wapé za'ra mono õ di. Wa'uburé norĩ me si, wa za 're wasi'wapé za'ra, hâiwa nho're ãma simiroti wasété na 're ihâimana za'ra mono norĩ me. Wa'uburé norĩ hã ti'ai ãma dapo're'õ na 're idanomro mono norĩ ma hã, simiroti pire di, Wanhib'apito nhimiroti waihu'u'õ'wa ta norĩ hã 're nomro mono wa.

¹³ Tahawa, 'Re ihâimana u'âsi mono nhimipawaptobzéb ré, te za 're aihâimana za'ra wa'aba mo. Tawamhã wa'uburé norĩ hã nimahã bâtâ na asô 're sihutu aba mono wamhã, te za 're i'wapé za'ra wa'aba mo. Tawamhã 're i'wapé za'ra wa'aba mono na, ãma 're ai'uté za'ra wa'aba mono wamhã, te za ta norĩ wi 're aiwairébé aba mo.

¹⁴ Tahawa, te za asimiza'rese sina 're aihâimana za'ra wa'aba mo. Da'usisizé isa'ẽtẽ na, te za 're asi'usisi za'ra wa'aba mo. Da'usisizé isa'ẽne hã tô sena 're idahâimana za'ra mono zé, te wasu'u. Duré danho'utu'ubuzé itete na te za 're asisõ'utu ubu za'ra wa'aba mo. Danho'utu'ubuzé itede hã 're idanomro wẽ mono zé, te duré ta hã wasu'u.

¹⁵ Duré dapara'uza itete na te za 're asipara'uza za'ra wa'aba mo. Dapara'uza itede hã iwasu'uwẽ na datoi u'âsi da te 're idapo're pu'u za'ra mono zé, te duré ta hã wasu'u, rowẽ u'âsi Wamama siré oto ãma 're idanomro mono zéb da hã.

¹⁶ Duré ibaihâ 'manharĩ zapodo, dasimapazé te za asiré 're i'wasari aba mo, da te 're aihâzup tõ wa'aba mono da, po'o 'wa ro'o na. Dasimapazé hã wa te wasina 're i'umnhasi za'ra mono zé, te wasu'u, ibaihâ 'manharĩ hã. Po'o 'wa ro'o hã Wa'uburé nhimihâzé, te wasu'u.

¹⁷ Da'rãzaza itete na te za 're asi'rãzaza za'ra wa'aba mo. Da'rãzaza itede hã wanho'reptuzé, te duré ta hã wasu'u. Duré sib'ézé 'wa pa hã te za asiré 're i'wasari u'âsi aba mo. Sib'ézé 'wa pa hã 'Re ihâimana u'âsi mono zadawa wasu'u, te duré ta hã wasu'u, Ipẽ'ẽzani te te wama 're awaihu'u mono da, isimiroti hã.

¹⁸ Te aima iroti za'ra wa'aba zéb zarina, te za uburé 're i'manharĩ u'âsi za'ra wa'aba mo. Duré ipẽ'ẽzani te te wama 're i'awaihu'u mono zéb zarina, te za Wamama ma 're aimreme zusi aba mo. Te za tiwi 're irowaptẽrẽ u'âsi za'ra wa'aba mo, te te 're aipawaptob za'ra wa'aba mono da. Asimiza'rese sina te za 're aihâimana za'ra wa'aba mo, tãma 're aimreme zusi aba mono da. Aiwi 're robzei'õ za'ra wa'aba mono õ di za. 'Re ihâimana u'âsi mono nhib'a'uwẽ 're ihâimana za'ra mono norĩ ma, te za duré tiwi 're irowaptẽrẽ u'âsi za'ra wa'aba mo, te te 're apawaptob u'âsi mono da, daro mono bâ.

¹⁹ Ĩma zama te za duré tiwi 're irowaptẽrẽ za'ra wa'aba mo, timreme te te ĩma 're awaihu'u u'âsi mono da, wẽ na te dama 're sadawa wasu'u mono da, ĩpahi ãna, Cristuhu wasu'uwẽ hã aré dama iwaihu'u'õ hã, da te 're waihu'u za'ra mono da oto.

²⁰ Cristu hã te te datẽme ĩzatõrĩ wa, wa oto isadawa wasu'u'wa 're mo, dazazéb 're, 're ĩza mono nherẽ. Tahawa, ĩpahi ãna te dama 're sadawa wasu'u mono da, te za tiwi 're irowaptẽrẽ u'âsi za'ra wa'aba mo, Wamama wi.

Paulu te te dama iroti 'rãsutu zéb ãma, te te ida'azawizé

²¹ Tiquicu hã te za aima ĩwasu'u za'ra wa'wa, waihu'u za'ra wa'aba da, ĩhâimanazé hã. Ta hã wapawapto wẽ 'wa na 're ihâimana mono, Wanhib'apito ma romhuri'wa, wama isawi pe hã.

²² Ãme iwahâimana za'ra na te te aima rowasu'u za'ra wa'aba da, wa tô atẽme satõrĩ za'ra wa'wa, rowasu'u wẽ zarina, rowẽ na 're aihâimana za'ra wa'aba mono da oto.

²³ 'Re ihâimana u'âsi mono Wamama wi, duré Wanhib'apito Zezu Cristuhu wi, wa za aima za'ra wa'aba te tiwi 're rowaptẽrẽ u'âsi, te te 're aipawaptob u'âsi za'ra wa'aba mono da, rowẽ u'âsi ãma 're anomro aba mono da, duré 're asisawi pese za'ra wa'aba mono sina 're anomro aba mono da, ta norĩ hã waihu'u pese zahuré wa, asina 're 'madâ'â u'âsi za'ra wa'aba mono da.

²⁴ Uburé Wanhib'apito Zezu Cristuhu zawi pese 'wa norĩ ma, wa za te tiwi 're rowaptẽrẽ u'âsi, ta norĩ hã Wanhib'apito tô sena te te 're sawi pese za'ra mono wa, Wamama hã iwẽ na te te 're apawaptob u'âsi mono da.