Éfézu 5 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono 'ra na oto 're idanomro mono zé wasu'u

¹ A norĩ wa'wa hã 'Re ihâimana u'âsi mono 'ra oto 're anomro aba mono wa, tãma asawi za'ra wa'aba di. Tahawa, te za isirã zarina si oto 're anomro aba mo.

² Cristu te te 're iwa'azawi pese mono zéb zarina, te za oto 're idazawi pese za'ra wa'aba mo. Ta hã te te 're wa'azawi pese mono wa, ma tô sisawi ãna, wazada za'ra hã sisõ, dâ'â da. Tahawa, 'Re ihâimana u'âsi mono ma 're idanhoprub za'ra mono zéb zarina, sisawi ãna sisõmri wa, Wamama ma wẽ uptabi di, wazada idâ'âzé hã.

³ A norĩ wa'wa hã 'Re ihâimana u'âsi mono nhib'a'uwẽ 're anomro aba mono nherẽ, siwa'ru aiwasédé hã 're 'manharĩ za'ra wa'aba mono õ di za, pi'õ na, duré aibâ na zama. Duré aihâimana nhiséb'õ na 're anomro aba mono õ di za. Duré danhibrom na 're da'ruiwapari za'ra wa'aba mono õ di za, ta hã i'uwaibaba õ wa 're idahâimana wasété za'ra mono zé hã.

⁴ Duré aimreme nhiséb'õ na asima 're rowasu'u wasété za'ra wa'aba mono õ di za. Aimreme to na duré asima 're rowasu'u wasété za'ra wa'aba mono õ di za, ãne hã i'uwaibaba õ wa, Wamama nhib'a'uwẽ 're iwanomro mono norĩ ma hã. Wama 're isõpru mono zém na si, te za oto asima 're irowasu'u za'ra wa'aba mo, Wamama ãma si 're aiwata za'ra wa'aba mono da.

⁵ Tahawa, te za oto iwaihu'u za'ra wa'wa, ãne: Sina 're isimisaihuri za'ra mono norĩ hã, duré dahâimana nhiséb'õ na 're inomro mono norĩ hã itẽme 're sisisi mono õ di za, 'Re ihâimana u'âsi mono u hã, duré Cristuhu u hã, da'ãma 're isib'a'uwẽ zahuré mono zéb u hã. Duré danhibrom na te te 're ida'ruiwapari za'ra mono norĩ zama itẽme 're sisisi mono õ di za, marĩ zô si te te sima 're rosa'rata u'âsi za'ra mono wa ta norĩ hã, 'Re ihâimana u'âsi mono upana. Tahawa, duré ta norĩ hã marĩ iwẽ na tinhib'a'uwẽ norĩ ma te te iropisutuzéb ré, 're hâimana za'ra mono õ di za.

⁶ Ta norĩ hã po're'õ u'âsi 're nomro mono wa, te za nimahã na tãma rob'manharĩ za'ra ipipa na, 'Re ihâimana u'âsi mono hã. Tane nherẽ, ãté ni'wam norĩ hã te za sadawa nhipese na te te aima 're rowasu'u za'ra wa'wa, za te te idahâ za'ra õ na hã. Ãne na te te aima 're rowasu'u za'ra wa'aba mono nherẽ, 're wapari za'ra wa'aba mono õ di za, isimirowasu'u tô senai'õ wa, ta norĩ hã.

⁷ Tahawa, ipo're'õ norĩ siré marĩ hã 're 'manharĩ wasété za'ra wa'aba mono õ di za oto.

^8-9 A norĩ wa'wa hã roti sena hã aré waihu'u za'ra wa'aba õ di, Cristuhu nhimiroti hã. Tahawa, datob'a na 're idanomro mono ne, ma tô aré robra na 're anomro aba mo, aiwasété na. Cristuhu ãma oto 're anomro aba mono wa, rowa'a na damorĩ wẽ na 're idanomro mono ne, te oto isimiroti ré 're anomro aba mo. Tahawa, te za oto ãma 're anomro wẽ wa'aba mono sina, 're aihâimana za'ra wa'aba mo. Ni'wam norĩ hã Wanhib'apito nhimiroti na 're nomro mono wamhã, te za te te dama 're rob'manharĩ wẽ za'ra. Te za duré 're nomro wẽ. Duré tô sena na si te za te te dama 're rowasu'u za'ra. Dahâimanazé tô sena na si te za dama 're hâimana za'ra. Tahawa, a norĩ wa'wa hã roti sena zarina si te za oto 're anomro wẽ wa'aba mo, Cristuhu nhimiroti na.

¹⁰ Ãne te za 'râwi asima 're inharĩ za'ra wa'aba mo, asimirosa'rata na: “E niha wa za 're mo, Wanhib'apito te te ĩwẽsãmrizéb da hã.” Ãne te za 'râwi asima 're inharĩ za'ra wa'aba mo, ãma 're anomro wẽ wa'aba mono da.

¹¹ Isazei'õ'wa norĩ siré, marĩ iwasédé hã 're 'manharĩ za'ra wa'aba mono õ di za oto, ipẽ'ẽ 're, robra u'âsi 're inomro mono norĩ siré hã. Ta norĩ ma, te za 're iroti pese za'ra wa'aba mo, te te 're sahâri za'ra mono da, tinhimi'manharĩ wasété za'ra zé hã.

¹² Ipo're'õ norĩ hã te marĩ iwasédé hã pi'uriwi te te 're 'manharĩ za'ra. Ta norĩ nhimi'manharĩ wasété zé hã wasété uptabi wa, taha na si ãma wanhiséb uptabi za'ra di, wa te ãma wasima 're irowasu'u za'ra mono zéb da hã. Tahawa, te za ta norĩ ma 're iroti pese za'ra wa'aba mo, te te 're sahâri za'ra mono da, tinhimi'manharĩ wasété za'ra zé hã.

^13-14 Robra wa, wa te ro'o wamhã, wa za marĩ hã wa te 're waihu'u za'ra, tô sena na ihâimanazém na. Tane bâdâ te te dama 're rob'uiwẽ za'ra mono wamhã, dama hã rob'madâ'â pese di za. Duréihã wahi'rada, ma tô ãne na roti: “A hã i'asõno hã, ma'ãpé ai'utu. Ma'ãpé aiwahutu, 're idadâ'â u'âsi za'ra mono zém hawi. Tawamhã Cristu hã te te dama 're irob'uiwẽ mono ne, te za roti sena hã aima waihu'u.”

¹⁵ Tahawa, wa za aima roti za'ra wa'wa, 'râwi asina 're asõpré u'âsi aba mono da, 're i'anomro wẽ wa'aba mono zéb da na hã. Sena na roti wẽ waihu'u'õ'wa ne, 're anomro wasété aba mono õ di za oto. Roti sena hã oto aima waihu'u pese za'ra wa'aba wa, te za ãma 're anomro wẽ wa'aba mo, tô sena roti wẽ zarina si.

¹⁶ Ãhã na uburé dawasédé hã te daro mono bâ 're hâimana. Tahawa, wama 're hâimana za'ra mono ré bâdâ hã, wa za wa te 're dapawapto wẽ za'ra.

¹⁷ Tawamhã danhimiza'rese ãna 're idanomro mono ne, 're anomro aba mono õ di za. Wanhib'apito te te sima 're i'ai'awẽ wa'aba mono zéb zô si, te za 're asõpré u'âsi aba mo, asina tãma 're uwaimrami za'ra wa'aba mono da.

¹⁸ Âzé na 're asi'rãiwamnarĩ za'ra wa'aba mono õ di za oto, taha zarina siwa'ru 're anomro wasété aba mono tõ da. Wanhib'apito pẽ'ẽzani nhimiwada'uri na si te za oto 're aihâimana za'ra wa'aba mo, robze sina ãma 're anomro aba mono da oto.

¹⁹ Aima ãma 're irobze za'ra wa'aba mono zéb da hã, te za 're asõ're za'ra wa'aba mo, Wanhib'apito pẽ'ẽzani te te aima 're iwaihu'u za'ra wa'aba mono zéb zarina. Wanhib'apito hã sõpru wa, te za rowẽ zarina tãma 're asõ're za'ra wa'aba mo, ãma 're aiwata za'ra wa'aba mono da, asõ're na.

²⁰ Wamama hã sõprub di, 'Re ihâimana u'âsi mono hã. Tahawa, uburé marĩ wẽ na wama 're isõprub za'ra mono zéb zarina, te za ãma 're aiwata u'âsi za'ra wa'aba mo, Wanhib'apito Zezu Cristuhu zadawa para.

²¹ A norĩ wa'wa hã ma tô Cristu hã 're iwapari pese za'ra wa'aba mo, Asib'apito wa'wa hã. Taha zarina, te za 're asiwapari pese za'ra wa'aba mo.

Imro ré norĩ ma, rotizé wasu'u

²² Pi'õ norĩ, aimro nhimiroti te za 're iwapari pese za'ra wa'aba mo, Wanhib'apito nhimiroti 're iwapari pese za'ra wa'aba mono zéb zarina.

²³ E marĩ wa. Aimro za'ra wa'wa hã asipai u 're hâimana za'ra wa'aba mono wa, Cristu tinhib'a'uwẽ norĩ nhipai u 're ihâimana mono ne, ta norĩ nho'reptui'wa 're hâimana mono wa ta hã.

²⁴ Isib'a'uwẽ norĩ hã Cristuhu nhimiroti te te 're iwapari pese za'ra mono ne, te za pi'õ norĩ hã aimro nhimiroti 're iwapari pese za'ra wa'aba mo.

²⁵ Aibâ norĩ, Cristu hã tinhib'a'uwẽ norĩ te te 're i'azawi pese mono ne, te za aimro hã 're isawi pese za'ra wa'aba mo, tihâiba hã sawi ãna te te isõmri ne, sada dâ'â za'ra da.

²⁶ Marĩ hã â na da te 're i'upsõ za'ra mono ne, ma tô tinhimiroti na wawasété hawi te te 're wa'a'upsõi wẽ wapẽ'ẽ 're, 're wanomro wẽ mono da, isib'a'uwẽ si oto 're wahâimana za'ra mono da tãma.

²⁷ Ãne ma tô sina uwaimra dama, zazahâ ihâi uptob õ ne, duré ihâ'rã'ru'õ ne zama, hâimana wẽ uptabi na 're hâimana za'ra mono da, isib'a'uwẽ norĩ hã.

²⁸ Aibâ norĩ, Cristu te te 're iwa'azawi pese mono zéb zarina, te za aimro hã 're isawi pese za'ra wa'aba mo. 'Re sawi pese za'ra wa'aba mono wa, marĩ iwẽ zô asima 're asõpré wa'aba mono ne, te za duré aimro ma zama iwẽ zô 're asõpré wa'aba mo. Tawamhã marĩ hã iwẽ zô aimro ma 're asõpré wa'aba mono zém na, te za marĩ hã iwẽ zô asima zama 're asõpré wa'aba mo.

^29-30 Ni'wam norĩ hã sima 're sipese u'âsi za'ra mono wamhã, 're saihuri mono ãna 're si'ubumroi u'âsi mono õ di za. Te za 're saihuri u'âsi. Te za duré 're si'madâ'â pese za'ra, Cristu te te wama 're i'ab'manharĩ wẽ mono ne, tinhib'a'uwẽ norĩ ma.

³¹ Ãne iwasu'u na rob'ui'éré hã: “Dasina 're damro za'ra mono wamhã, dahâiba maparane nherẽ, te za oto dahâiba misi ne damro me si dasiré 're dasi'ubumro.”

³² Ãhã wasu'u hawi wa tô ãne na, wa norĩ hã oto waihu'u za'ra ni, aré dama waihu'u õ na 're hâimana mono nherẽ. Aibâ imro hã, Cristu te wasu'u. Duré pi'õ imro hã isib'a'uwẽ norĩ, te wasu'u.

³³ Aima za'ra wa'aba zama, te rowasu'u hã 're hâimana, ãma 're i'aihâimana za'ra wa'aba mono zéb da hã oto. Tahawa, aibâ norĩ, te za aimro 're isawi pese za'ra wa'aba mo. 'Re isawi pese za'ra wa'aba mono zéb zarina, marĩ iwẽ zô asima 're asõpré wa'aba mono ne, te za duré aimro ma zama 're asõpré wa'aba mo, iwẽ zô hã. Duré pi'õ norĩ, aimro hã te za 're iwazéb za'ra wa'aba mo.