Éfézu 4 - ꞌRe Ihâimana Uꞌâsi Mono Zadawa Wasuꞌu

Misi Cristuhu hâiba ne, aihĩni isazei'wa norĩ 're ihâimana za'ra mono zém na rowasu'u

¹ Tahawa, wa za aima roti za'ra wa'wa, Wanhib'apito ma romhuri'wa 're ĩmorĩ 'ru te, dazazéb 're da te dasiwi 're ĩzai mono wa, 're ĩza mono ré. Ma'ãpé dama 're aihâimana wẽ za'ra wa'aba mono za, 'Re ihâimana u'âsi mono te te sima 're i'aiwẽ za'ra wa'aba mono zéb uwaibaba. Taha da, ma tô te te sima 're aipisutu za'ra wa'wa.

² Ãne te za 're anomro aba mo. Aipire na asina 're asõpré wa'aba mono õ di za. Duré aiwamri aihâimana atãma na te za dama 're aihâimana za'ra wa'aba mo, aihâimana wẽ sina.

³ Wamama hã ma tô Tipẽ'ẽzani na te te wama 're anharĩ, rowẽ na oto wasiré 're wanomro mono da. Tahawa, ãne 're aihâimana u'âsi za'ra wa'aba mono da, te za 'râwi asina 're asõpré u'âsi aba mo.

⁴ Cristuhu nhib'a'uwẽ mono bâ misi dahâiba ne, wa simisutu oto 're wahâimana za'ra. Misi te Ipẽ'ẽzani hã 're hâimana. Taha si te wama 're hâimana za'ra, wapẽ'ẽ mono bâ. Duré õhõ zô si wa 're wanhimipari za'ra oto, rowẽ uptabi zô. Taha zô 're asimipari za'ra wa'aba mono da, ma tô tinhib'a'uwẽ da, aipisutu za'ra wa'wa, 'Re ihâimana u'âsi mono hã.

⁵ Õhõ si, te Danhib'apito 're hâimana. Misi te dama i'umnhasi uptabi 're hâimana, da te ãma 're isaze za'ra mono zéb da hã. Õhõ zadawa parap si, te â dawabzuri hã da te 're 'manharĩ za'ra.

⁶ Õhõ si uburé Damama te 're hâimana, 'Re ihâimana u'âsi mono hã. Õhõ si te duré danhipai u ropâ 're hâimana. Te duré wapẽ'ẽ mono bâ wapẽ'ẽ 'reb za'ra hã oto 're sãmra.

⁷ Cristu hã ma tô marĩ iwẽ na i'madâ'â waihu'u õ na wama 're sõprub za'ra, wahâiba mono bâ, te te wama 're i'apisutu mono zéb zarina, wa te tãma 're idapawaptob za'ra mono zéb da hã.

⁸ Duréihã ma tô ãne na rob'ui'éré ni, ibaihâ na hã: “Hâimo oto dawi watobro wa, morĩ wamhã, ma tô sisarina da'ahâ na te te danhimro. Marĩ iwẽ na ma tô duré dama 're sõpru.”

⁹ E marĩ te tawamhã wasu'u, hâimo imorĩzé hã. Ãne te wasu'u: Ma tô si'ra ti'ai 'rowi uptabi, adâ 're ihâimana za'ra mono zéb u.

¹⁰ Ti'ai u we imorĩ hã ma tô apâ mo, hâiwa nhipai u ropâ uburé da'madâ'â'wa dama 're hâimana mono da.

¹¹ Cristu hã ma tô ni'wam norĩ hã pisutu za'ra, isadawa wasu'u'wa 're nomro mono da. Ni'wam norĩ ma, ma tô duré pisutu za'ra, marĩ te te tãma iwaihu'u za'ra zéb zarina, 'Re ihâimana u'âsi mono te te 're sadawa wasu'u za'ra mono da, isazei'wa norĩ ma. Duré ni'wam norĩ hã ma tô pisutu za'ra, iwasu'uwẽ na te te 're dapo're pu'u za'ra mono da. Duré ni'wam norĩ hã ma tô pisutu za'ra, dama rowahutu'wa da, isimiroti na te te 're dapawaptob za'ra mono da, ãma 're dahâimana wẽ za'ra mono da.

¹² Ãne ma tô Cristu hã da'apisutu, 'Re ihâimana u'âsi mono nhib'a'uwẽ norĩ te te 're pawaptob za'ra mono da, taha zarina 're sipawapto pese za'ra mono wa, siptete sina duré oto 're hâimana za'ra mono da.

¹³ Tawamhã aihĩni wa za oto wanhimirosa'rata na wasina wa te 're sazei pese za'ra, Wanhib'apito wasu'uwẽ hã wa te ãma 're isaze za'ra mono zém na hã. Duré aihĩni wa za oto 'râwi wa te 're waihu'u za'ra, 'Re ihâimana u'âsi mono 'ra hã, niha 're ihâimana mono na. Ãne wamhã, wahâimana wẽ zé, wa za wasima wa te 're sa'ẽtẽ za'ra. Tawamhã wa za oto wasina wa te 're uwaimrami za'ra, Cristuhu ne 're iwanomro wẽ uptabi mono zé hã.

¹⁴ Ãne wamhã, ai'uté ne wanhimiza'rese ãna 're wanomro mono õ di za oto. Tawamhã dazadawa nhipese na da te wama 're roti za'ra mono nherẽ, roti tô senai'õ hã wa te 're wapari za'ra mono õ wa, roti tô senai'õ niwĩ 're wasipizari za'ra mono õ di za.

¹⁵ Wa norĩ hã roti tô sena na si, wa za wasima wa te 're roti za'ra, 're wasisawi pese za'ra mono sina. Ãne wamhã, wahâimana wẽ na, wa za wa te 're sa'ẽtẽ za'ra. Tawamhã wa za oto wa te wasina 're uwaimrami za'ra, Cristuhu ne 're iwanomro wẽ uptabi mono zé hã, Wanhib'apito ne.

¹⁶ Marĩ mono bâ wahâiba bâ wama 're hâimana za'ra mono nherẽ, wa za wa'rã zadawa para si marĩ hã wa te 're 'manharĩ za'ra. Tane wa norĩ hã Wanhib'apito zadawa para si marĩ hã wa te 're 'manharĩ za'ra mono wamhã, rowẽ na wa za wasiré 're wahâimana za'ra. Tawamhã 're iwasisawi pese za'ra mono zéb zarina, wa za 're wasipawaptob za'ra, wa te wasima 're sa'ẽtẽ za'ra mono da, wahâimana wẽ zé hã.

Cristuhu ãma oto 're idanomro mono zép té wasu'u

¹⁷ Tahawa, tô sena Wanhib'apito zadawa para wa za oto aima roti za'ra wa'wa, Wanhib'apito zazei'õ'wa norĩ ne 're anomro aba mono tõ da, ta norĩ nhimirosa'rada hã tô senai õ wa.

¹⁸ Tob'a na 're inomro mono norĩ ma, rob'madâ hã tãma iwaihu'u za'ra õ ne, 'Re ihâimana u'âsi mono nhimiroti uwaibaba rosa'rada hã tãma waihu'u za'ra õ di, isazei'õ'wa norĩ ma hã. Ta norĩ hã te te sima 're wẽ za'ra mono õ wa, isimiroti hã te te 're wapari za'ra mono da, te za tiwasété na siwaihu'u ãna 're hâimana za'ra. Tahawa, rowẽ na ãma 're idahâimana za'ra mono zéb ré, 're hâimana za'ra mono õ di za.

¹⁹ Siséb ãna te ta norĩ hã te te sina 're rob'manharĩ wasété za'ra, tihâimana wasété na. Tiwasété zô si te duré sima 're sõpré, marĩ iwasété na si 're hâimana za'ra mono da.

²⁰ E ãne 're aihâimana za'ra wa'aba mono da, ma tô Cristu hã ihâimanazém na 're iwaihu'u za'ra wa'aba mo. Mare di.

²¹ A norĩ wa'wa hã ma tô Cristuhu wasu'uwẽ hã aipo're na 're iwapari za'ra wa'aba mo. Oto isiré 're aihâimana za'ra wa'aba mono wa, Zezusihi hawi roti tô sena hã aima waihu'u pese za'ra wa'aba di.

²² 'Re anomro wasété aba mono da si, te aré asima 're irosa'rata za'ra wa'aba mo. Tahawa, te aré aiwi 're si'utõrĩ za'ra wa'wa, 're anomro wẽ wa'aba mono zé hã. Tane nherẽ, te za oto irẽme pese za'ra wa'wa, 're aihâimana wasété za'ra wa'aba mono zé hã.

²³ Asimirosa'rata wẽ na si te za oto 're irosa'rata za'ra wa'aba mo, taha zarina 're aihâimana wẽ za'ra wa'aba mono da oto.

²⁴ Da'uza hã ihâ tém na 're idasi'uza za'ra mono ne, te za oto aihâimanazép tém na si 're aihâimana za'ra wa'aba mo, iwẽ na si. Taha da, ma tô 'Re ihâimana u'âsi mono hã aipoto téb za'ra wa'wa aipẽ'ẽ 're, isine 're anomro wẽ wa'aba mono da, tô sena na duré dama 're aihâimana wẽ za'ra wa'aba mono da oto.

²⁵ Tahawa, dama 're asadawa nhipese za'ra wa'aba mono õ di za oto. Aihâiba mono bâ te za tô sena na si asima 're irowasu'u za'ra wa'aba mo.

^26-27 Nimahã na 're asiti'ru za'ra wa'aba mono wamhã, 're aiwasété za'ra wa'aba mono õ di za, aiwasédé hã 're 'manharĩ za'ra wa'aba mono tõ da. Duré asiti'rui ré bâdâ hã wahuré ai'ãma 're si'utõrĩ za'ra wa'aba mono tõ da, te za asiwi 're iwẽ'õ za'ra wa'aba mo, Wa'uburé nhimiwada'uri zarina aiwasédé hã 're 'manharĩ za'ra wa'aba mono tõ da dama.

²⁸ Danhibrom na dawi 're i'asimisaihuri za'ra wa'aba mono zém na hã, duré oto 're asimisaihuri za'ra wa'aba mono na hã ãma 're sahu za'ra wa'aba mono õ di za. Te za oto asib'rata na 're iromhuri za'ra wa'aba mo, aihâimana wẽ na oto 're aihâimana za'ra wa'aba mono da, duré asimiromhuri na isibrob'õ norĩ hã 're pawaptob za'ra wa'aba mono da, ãne na si hã wẽ wa.

²⁹ Aimreme wasété na dama 're aimreme zusi aba mono õ di za oto. Aimreme wẽ na si te za oto dama 're aimreme zusi aba mo, asimiroti wẽ na si 're dapawaptob za'ra wa'aba mono da ãma.

³⁰ 'Re aihâimana wasété za'ra wa'aba mono õ di za, aihâimanazém na Wamama pẽ'ẽzani wi 're robzei'õ tõ za'ra wa'aba mono da. E marĩ wa. Ipẽ'ẽzani hã te wapẽ'ẽ 're, wama 're hâimana za'ra, wapibui pese zéb da hã, 'Re ihâimana u'âsi mono te, tãma 're iwahâimana za'ra mono na, bâdâ iwa waptã'ã õ ré, te te iwa'anho'reptuzéb da hã.

³¹ Tahawa, te za oto 're irẽme pese za'ra wa'aba mo, aipẽ'ẽ na 're ida'ruiwapari za'ra wa'aba mono zé hã. Asiti'ru na 're i'aihâimana za'ra wa'aba mono zéb zama te za 're irẽme pese za'ra wa'aba mo, asahi duré 're i'aihâimana za'ra wa'aba mono zéb zama. Aimreme 'rãihâ sina, duré dama 're nharĩ za'ra wa'aba mono õ di za. Da'ãma zama duré 're wasété za'ra wa'aba mono õ di za. Duré dama 're rob'manharĩ wasété za'ra wa'aba mono õ di za oto.

³² Marĩ iwẽ na te za dama 're asõprub za'ra wa'aba mo, da'ãma 're aipẽ'ẽzé za'ra wa'aba mono sina. 'Re ihâimana u'âsi mono hã Cristu dazada dâ'â wa, te te ai'ãma 're 'madâ'â za'ra wa'aba mono õ di oto, 're i'manharĩ wasété za'ra wa'aba mono zé hã. Tahawa, a norĩ wa'aba ma, iwasédé hã da te aima 're 'manharĩ za'ra wa'aba mono nherẽ, isine dawasédé hã duré oto da'ãma 're 'madâ'â za'ra wa'aba mono õ di za.