Éfézu 3 - ꞌRe Ihâimana Uꞌâsi Mono Zadawa Wasuꞌu

Paulu hã zudeu'õ norĩ ãma te te 're iromhuri mono zé wasu'u

¹ Tahawa, wa hã Paulu, wa 'Re ihâimana u'âsi mono wi hã, te tiwi 're rowaptẽrẽ u'âsi, aima za'ra wa'aba. Zudeu'õ norĩ, wa hã, Cristu Zezusihi zadawa wasu'u'wa wa 're mo, iwasu'uwẽ na te 're aipawaptob za'ra wa'aba mono da. Taha 'ru te, ma tô dasiwi ĩnherẽ ni, dazazéb 're, ĩzab da.

² 'Re ihâimana u'âsi mono hã simizawi pese wa, ma tô romhuri hã ĩma tisõ, aima 're irowẽ za'ra wa'aba mono zéb da hã. Ãne na ma tô iwapari za'ra wa'wa, tô.

^3-4 Duréihã te te sima da'ãma irotizé hã aré dama iwaihu'u'õ hã ma tô ĩma waihu'u, 'Re ihâimana u'âsi mono hã. Nimosi wa tô suru na ãma aima rob'ui'éré za'ra wa'wa, waihu'u za'ra wa'aba da.

⁵ Zudeu'õ norĩ ãma te te sima irotizé hã te te dama waihu'u õ di aré, 'Re ihâimana u'âsi mono hã. Ãhã na si duréihé ma tô Cristuhu zadawa wasu'u'wa norĩ ma waihu'u, te te sima da'ãma irotizé hã, Tipẽ'ẽzani na ta norĩ ma te te iwaihu'uzéb zarina. Duré marĩ hã te te tãma iwaihu'u za'ra zéb zarina, dama isadawa wasu'u'wa norĩ ma zama, ma tô tãma waihu'u za'ra, te te sima da'ãma irotizé hã.

⁶ Rowasu'u wẽ hã aré dama iwaihu'u'õ hã 're ihâimana mono hã, ãne. Zudeu'õ norĩ hã Cristuhu wasu'uwẽ te te 're saze za'ra mono wa, marĩ iwẽ na zudeu norĩ ma 're isõpru mono zéb da hã, 'Re ihâimana u'âsi mono te te tãma 're iropisutu za'ra mono zéb ré, te za 're hâimana za'ra. Simisutu te za oto 're hâimana za'ra, dahâiba misi ne. Cristu Zezusihi ãma oto 're nomro mono wa, 'Re ihâimana u'âsi mono hã tinhib'a'uwẽ norĩ ma, marĩ iwẽ na te te tãma iropisutu za'ra zéb zarina, te za zudeu'õ norĩ ma zama te te tãma ãma 're a'uwaimrami, zudeu norĩ zu. Ãne zudeu'õ norĩ ãma te te sima irotizé hã.

⁷ 'Re ihâimana u'âsi mono hã simizawi pese wa, ma tô ĩpisutu, tãma iromhuri'wa 're ĩmorĩ da, Cristuhu wasu'uwẽ hã te dama 're wasu'u mono da, tiwaihu'u pe hã te te ĩma sõmri na dâ'âsina.

⁸ Ĩwana isazei'wa norĩ hã ĩwẽ na te sipa za'ra õ di. Ta norĩ si ma tô tiwẽ na ĩnhipa za'ra. Tane nherẽ, ma tô ĩpisutu, zudeu'õ norĩ ma te tãma 're wasu'u za'ra mono da, iwẽ hã sa'ẽtẽ na Cristuhu ma 're ihâimana mono hã dama ãma 're isõpru mono zéb da hã.

⁹ Ropoto mono 'wa hã ma tô aré pisutu, ropoto na'rata hawimhã dama waihu'u ãna a'â 're hâimana mono da, te te da'ãma sima irotizé hã. Duréihé ma tô ĩpisutu, te dama 're rowasu'u mono da, za oto te te dama ãma i'uwaimramizém na hã te te sima da'ãma irotizéb zarina.

^10-11 Ta hã ma tô sima wẽ, hâiwa ãma pire na 're ihâimana za'ra mono norĩ hã te te waihu'u za'ra da oto, hâiwa hawi dahâimanazém na rowaihu'u wẽ hã ahâ na tãma 're ihâimana mono na hã. Simisutu isib'a'uwẽ norĩ hã oto tãma 're hâimana za'ra mono wa, te za oto ãne na waihu'u za'ra, duréihã te te sima da'ãma irotizé hã te te da'ãma uwaimrami wa, Wanhib'apito Cristu Zezusi te te ida'anho'reptuzéb zarina.

¹² Tahawa, Wanhib'apito ãma oto 're wanomro mono wa, duré isimipawaptobzém na wa te wasina 're i'umnhasi za'ra mono zéb zarina, wa za wasina wapahi ãna itẽme 're wasihutu wanhimirosa'rata na, 'Re ihâimana u'âsi mono u, robze na tãma 're wamreme zusi mono da.

¹³ Ãne wa, wa hã te irobzépata na ĩ'ãma 're rosa'rata za'ra wa'aba mono wa, aiwi 're robzei'õ za'ra wa'aba mono õ di za. Cristuhu wasu'uwẽ hã wa tô te aima 're wasu'u za'ra wa'wa, aima 're irowẽ za'ra wa'aba mono zéb da hã. Tahawa, Cristuhu wasu'uwẽ hã te dama 're wasu'u mono 'ru te, iwasédé hã da te ĩma 're 'manharĩ za'ra mono nherẽ, ĩma 're rowẽ mono di. Ãne wa, te irobzépata na ĩ'ãma 're rosa'rata za'ra wa'aba mono wa, aiwi 're robzei'õ za'ra wa'aba mono õ di za.

Cristuhu nhimizawi pese zé wasu'u

¹⁴ Tahawa, ĩhi'rãtitõ, wa 're ĩsimasisi, Wamama wi te tiwi 're rowaptẽrẽ u'âsi mono da, aima za'ra wa'aba.

¹⁵ Õhõ si Wamama wa, wa i'ra 're wahâimana za'ra isazei'wai mono bâ, hâiwa ãma ti'ai ãma zama 're iwahâimana za'ra mono norĩ hã.

^16-19 Wamama te hã iwaihu'upe hã, te sa'ẽtẽ na 're hâimana tãma. Ãne wa, wa tiwi te 're rowaptẽrẽ u'âsi, aima za'ra wa'aba, Tipẽ'ẽzani na te te 're aipawaptob u'âsi za'ra wa'aba mono da, aihâimana nhiptete sina, ãma 're aihâimana u'âsi za'ra wa'aba mono da, Cristu hã aipẽ'ẽ 're, 're sãmra u'âsi za'ra wa'aba mono da, iwaihu'u pese na asina 're i'umnhasi za'ra wa'aba mono zéb zarina. Wa duré aima za'ra wa'aba, te tiwi 're rowaptẽrẽ u'âsi, te te 're aipawaptob u'âsi za'ra wa'aba mono da, dazawizé hã aima 're ihâimana za'ra wa'aba mono zéb zarina, dama 're 'manharĩ wẽ u'âsi za'ra wa'aba mono da. Dazawizé hã sa'ẽtẽ uptabi na, te Cristuhu ma 're hâimana. Ãne wamhã, uburé asiré isazei'wa norĩ me, te te 're asawi pese za'ra wa'aba mono na, 'râwi asina 're waihu'u za'ra wa'aba mono da, wa ĩsima te 're aiwẽ za'ra wa'wa, ti'ab ré wa te wasina 're waihu'u uptabi za'ra mono õ nherẽ, Cristu te te 're iwa'azawi pese mono zé hã. E marĩ da. Uburé marĩ iwẽ si, 'Re ihâimana u'âsi mono ma 're ihâimana za'ra mono ne, aima zama 're hâimana za'ra wa'aba mono da, dazawizé hã, duré dahâimanazém na rowaihu'u wẽ zéb zama hã.

²⁰ 'Re ihâimana u'âsi mono hã waihu'u pese di, te te wama ãma 're i'a'uwaimrami mono zéb da hã, marĩ iwẽ zô wa te 're irosa'rata za'ra mono zém nhipai u, duré marĩ iwẽ hã wa te tiwi 're iwaptẽrẽ za'ra mono zém nhipai u zama. Tiwaihu'u pese na te te 're iwa'apawapto mono zéb zarina, tãma waihu'u pese di, iwẽ na te te wama ãma 're i'a'uwaimrami mono zéb da hã.

²¹ Tahawa, isazei'wai mono bâ Zezu Cristuhu ãma 're iwanomro mono norĩ, Wamama ãma si 're wawata u'âsi za'ra wa'aba mono!