Éfézu 1 - ꞌRe Ihâimana Uꞌâsi Mono Zadawa Wasuꞌu

¹ Wa hã Paulu, Cristu Zezusihi zadawa wasu'u'wa, wa 're ĩhâimana, 'Re ihâimana u'âsi mono te te sima ĩwẽzéb zarina. Tahawa, wa ãma aima rob'ui'éré za'ra wa'wa, Éfézu na 'ri nho'õmo nhisi ãma, 'Re ihâimana u'âsi mono nhib'a'uwẽ, 're i'aihâimana za'ra wa'aba mono norĩ ma. A norĩ wa'wa hã ma tô õne u'â Zezusihi ãma si 're anomro aba mo, aihâimana nhiptete sina.

² Wamama 'Re ihâimana u'âsi mono ma, wa ai'ãma 're ĩmreme u'âsi za'ra wa'wa, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da.

Cristuhu ãma 're idanomro mono norĩ ma, 'Re ihâimana u'âsi mono nhoprubzé wasu'u

³ 'Re ihâimana u'âsi mono hã sõpru uptabi di, Wanhib'apito Zezu Cristuhu mama hã. Ta hã Cristuhu ãma 're wanomro mono wa, ma tô marĩ mono bâ wama ãma 're sõpru, uburé marĩ iwẽ na, hâiwa hawi. Tahawa, wama 're sõprub za'ra mono wa, ãma 're wawata u'âsi za'ra wa'aba mono za.

⁴ Ta hã ti'a te te poto õ ré, ma tô romhâ ré te te 're wa'apisutu siro, tinhib'a'uwẽ da, Cristuhu ãma za 're wanomro mono wa, wawẽ uptabi na ãma 're wanomro mono da, marĩ, wa te 're 'manharĩ wasété za'ra mono ãna. Ta hã te te 're wa'apoto mono õ ré, ma tô romhâ ré te te 're wa'azawi pese.

⁵ Tãma rowẽ wa, ma tô wa'ãma sima roti siro, wa'ãma 're 'ra za'ra mono da, Zezu Cristu za te te iwawa'âbâzéb zarina. Te te sima 're wa'awẽ uptabi mono wa, ma tô ãne na sima roti siro, wa'ãma za'ra.

⁶ Wamama hã te te 're wa'azawi pese mono wa, ma tô oto wa'ãma uwaimrami wẽ za'ra, i'ra tãma isawi hã te te iwa'awa'âbâ za'ra zéb zarina. Tahawa, wa za ãma 're wawata u'âsi za'ra.

^7-8 Cristu hã wedepo'o nhonhi'rãmi na wazada dâ'â wamhã, ma tô tidâ'âzém na wa'awa'â. Marĩ, wa te 're i'manharĩ wasété za'ra mono zé hã ma tô duré te te wama 're apari, wawasédé hã te te wa'ãma 're ab'madâ'â tõ mono da oto. Ãne wamhã, ma tô Wamama hã wa'ãma uwaimrami wẽ, sa'ẽtẽ na tãma 're hâimana mono wa, te te 're iwa'azawi pese mono zé hã.

^9-10 Te te da'ãma sima irotizé hã dama waihu'u ãna ma tô dawi 're hâimana aré. Tane nherẽ, rosa'rata wẽ waihu'uzé hã sa'ẽtẽ na tãma 're ihâimana mono zéb zarina, ma tô oto wama waihu'u za'ra, Cristu za te te da'ãma tãma i'uwaimramizém na. Tawamhã niwapsi bâdâ te te sima ipisutuzém na te za da'ãma uwaimra, te te da'ãma sima irotizé hã. Tawapsi te za uburé tinhimipoto ma nharĩ za'ra, hâiwa ãma, ti'ai ãma zama, simisutu Cristuhu nhimiroti na 're dahâimana za'ra mono da, ta hã da'madâ'â'wai uptabi, dama 're hâimana mono wa.

^11-12 'Re ihâimana u'âsi mono hã marĩ na te te sima 're aroti mono wamhã, te za tô te te ãma 're a'uwaimrami. Ta hã ma tô wa'apisutu siro, isib'a'uwẽ 're wanomro mono da, Cristuhu ãma za 're wanomro mono wa. Ãne duréihã te te wa'ãma sima irotizéb zarina, ma tô wa'ãma uwaimrami za'ra, danho'reptui'wa zô 're iwanhimipari 'rata za'ra mono norĩ ma, ãma 're iwawata u'âsi za'ra mono zéb da hã.

¹³ A norĩ wa'aba zama te oto wasiré Cristuhu ãma 're anomro aba mo. Danho'reptui'wai wasu'uwẽ hã ma tô iwapari za'ra wa'wa, asi'uihâ na. Tô sena Cristuhu wasu'uwẽ hã. Tawamhã wapari za'ra wa'aba wamhã, ma tô Danho'reptui'wa na asina 're i'umnhasi za'ra wa'aba mo, Cristu hã. Taha zarina ma tô 'Re ihâimana u'âsi mono hã Tipẽ'ẽzani hã we aima sõmri za'ra wa'wa, 'râwi asina 're waihu'u za'ra wa'aba mono da, isib'a'uwẽ oto 're anomro aba mono na. Ãne ma tô ai'ãma uwaimrami wẽ za'ra wa'wa, te te dama iropisutuzéb zarina.

¹⁴ Tawamhã niwapsi te za uburé marĩ iwẽ hã te te wama 're anhomri, tizazei'wai mono bâ. Duré isib'a'uwẽ 're wahâimana za'ra mono wa, te za rowasété hawi wa'awaibui pese. Tawapsi wama 're rowẽ uptabi za'ra mono di za. Ãne tô sena za te te wama ãma i'a'uwaimramizém na, wa te ãma waihu'u za'ra da, ma tô Tipẽ'ẽzani hã te te wama 're anhomri. Tahawa, ãma 're wawata u'âsi za'ra wa'aba mono.

Isazei'wa norĩ ma, Paulu te te irowaptẽrẽzé wasu'u, 'Re ihâimana u'âsi mono wi

¹⁵ Aiwasu'u wẽ za'ra wa'wa hã ma tô we ĩtẽme tiwisi 'wa, Wanhib'apito Zezusihi zazei'wa oto 're anomro aba mono na, duré asiré isazei'wa norĩ 're isawi pese za'ra wa'aba mono na zama.

¹⁶ Taha zarina, wa õne u'âsi 're ĩto, 'Re ihâimana u'âsi mono ma, ai'ãma za'ra wa'aba. Duré tãma 're ĩmreme mono wamhã, aima za'ra wa'aba zama wa tô te tiwi 're rowaptẽrẽ u'âsi, hâiwa u ai'ãma 're ĩpo're si'âri za'ra wa'aba mono ãna.

¹⁷ Wamama hã waihu'u pese za'ẽtẽ na dâ'âsina, wa aima za'ra wa'aba te tiwi 're rowaptẽrẽ u'âsi, hâiwa hawi dahâimanazém na rowaihu hã Tipẽ'ẽzani na te te aima 're sõmri u'âsi za'ra wa'aba mono da, duré Wamama hã ihâimanazém na 'râwi 're waihu'u za'ra wa'aba mono da, 'Re ihâimana u'âsi mono hã, Wanhib'apito Zezu Cristuhu 'madâ'â'wa hã.

^18-19 Wa hã wa ĩsima wẽ, 'Re ihâimana u'âsi mono te te 're aipawaptob za'ra wa'aba mono da, isimiroti hã 're waihu'u pese za'ra wa'aba mono da, duré rowẽ uptabi zô te te i'aipisutu za'ra wa'aba zé wasu'u hã, 're waihu'u za'ra wa'aba mono da. Duré uburé marĩ iwẽ uptabi na wama 're isõprub za'ra mono zéb da hã tinhib'a'uwẽ norĩ ma, te te iropisutuzéb zarina, taha wasu'u zama 're waihu'u za'ra wa'aba mono da, wa ĩsima te 're aiwẽ za'ra wa'wa.

²⁰ Wa duré aima za'ra wa'aba te tiwi 're rowaptẽrẽ u'âsi, te te 're aipawaptob u'âsi za'ra wa'aba mono da, iwaihu'u pe hã asina 're waihu'u za'ra wa'aba mono da. Tiwaihu'u pese na ma tô Cristu hã ab're hawi hâiwa'utu, dâ'â nherẽ. Taha pari, ma tô pisutu, pire na isimire niwĩ 're sãmra mono da oto, hâiwa ãma.

²¹ Tame te pire uptabi na dama 're hâimana, pire na hâiwa ãma 're ihâimana za'ra mono norĩ ma, duré tame siptete na 're ihâimana za'ra mono norĩ ma zama. Taha na dâ'âsina wa, ti'ai ãma duré hâiwa ãma zama tipire na te te ãma siwi wabzu za'ra õ di, dama ipire za'ra norĩ hã. Õne u'â te za tipire na te te 're da'a'rãnhipai u'âsi.

^22-23 'Re ihâimana u'âsi mono hã ma tô Cristu hã pisutu, dama pire na 're hâimana mono da, isimipoto mono bâ. Ma tô duré Cristu hã pisutu, ropâ tinhib'a'uwẽ norĩ 'madâ'â'wa da, õhõ si uburé Danhib'apito dama 're hâimana mono wa. Wahâiba hã misi nherẽ, wahâiba na marĩ mono bâ wama 're ihâimana za'ra mono ne, te Cristu hã hâiba wasu'u, isib'a'uwẽ norĩ hã. Isib'a'uwẽ norĩ hã tãma 're hâimana za'ra mono wa, marĩ zô tiwi 're rowaptâ'â mono õ di, Cristuhu wi hã. Ta hã te ropâ 're hâimana u'âsi, uburé marĩ hã 're ihâimana za'ra mono zéb da hã, isadawa para.