Daniéu 9 - ꞌRe Ihâimana Uꞌâsi Mono Zadawa Wasuꞌu

Daniéu, tinhib'a'uwẽ norĩ ãma imremezé wasu'u

¹ Dariu hã, Zersihi 'ra, Média na ti'ai wa'õtõ nho'õmo nhisi hawi a'uwẽ, Babilonia na daza'ru nhisi ãma, te apito na dama 're hâimana.

² Isi'apitozém na zahadu misi ãma iwahub ãma, wa hã Daniéu wa tô ibaihâ iwazéb zahi na hã ãma romnhoré. Uburé Danhib'apito, tizadawa 'mahârâ'wa Zeremiaha ma, te te inharĩzéb zarina Zeruzalẽ 'ri siprum haré za 70 na ãma iwahubzém na hã wa tô duré ãma rosa'rata.

³ Ĩma robzei'õ zarina, da'uza ihâi hâza'õtõ na wa tô ĩsi'uza. Taha wa, wa tô duré 'ru'a wa nhamra. Ĩsa hã wa tô duré tirẽ. Wa tô Uburé Danhib'apito 'Re ihâimana u'âsi mono ma, sa'ẽtẽ mre, te tiwi iwaptẽrẽzé te te ĩma 'manharĩ da.

⁴ Ãne wa tô Ĩnhib'apito, ĩte 'Re ihâimana u'âsi mono ma ĩsiwẽ'õ sina hã tãma mre: — Uburé Danhib'apito 'Re ihâimana u'âsi mono, a hã asa'ẽtẽ uptabi di, duré asiptete uptabi di! A hã ma tô asimiropisutu zahi hã te te 're i'asawi pese za'ra mono norĩ ma, duré asimiroti te te 're iwapari pese za'ra mono norĩ ma, tãma 're i'madâ'â u'âsi za'ra mo. Õne u'â te duré ta norĩ ma asimizawizé hã tãma 're ihâi'ré u'âsi za'ra mo.

⁵ Tane nherẽ, wa norĩ hã wa tô wawasédé wa te 're 'manharĩ za'ra. Wawasété za'ra wa, duré aiwi wasipizari za'ra wa, wa tô asimiroti wi wasina 're wasi'ré za'ra.

⁶ Duré asib'a'uwẽ asadawa 'mahârâ'wa norĩ, wa te wasiwi 're wapari za'ra mono õ di, asisi na wama i'rã nho'õmo norĩ ma, duré wama ipire norĩ ma, duré wahi'rata norĩ ma, duré uburé Izaraéu nhihudu norĩ ma, te te 're irowasu'u za'ra mono zém na hã.

⁷ Uburé Danhib'apito, a hã te õne u'â i'uwaibaba na si dama 're i'arowairébé mo. Tane nherẽ, ãhã na wa norĩ asib'a'uwẽ Zudéa na romnhisi ãma, duré Zeruzalẽ ãma, duré daza'ru 'râwi 're ihâimana za'ra mono u, duré romhâ na daza'ru 're ihâimana za'ra mono u ãma i'aropéi mono norĩ zama ti'ai wa'õtõ nho'õmo 'remhã, wa tô uburé ta norĩ me simisutu na aima 're wanhiséb zara. Ãne hã ma tô wama i'manharĩ za'ra, apâ aiwi 're wasipizari za'ra mono wa.

⁸ Wanhib'apito, wama i'rã nho'õmo norĩ me, duré wama ipire norĩ me, duré wahi'rata norĩ me, duré uburé wa norĩ hã wa tô wawasédé hã apâ wa te aiwi 're 'manharĩ za'ra. Tahawa, tô uburé aima 're wanhiséb za'ra mono di.

⁹ Tane nherẽ, a hã da'ãma 're aiwamri pese mono di. Duré dawasété pari 'wa na te 're aihâimana mo, wa norĩ hã aiwi 're wasipizari za'ra mono nherẽ.

¹⁰ Uburé Danhib'apito, wate 'Re ihâimana u'âsi mono, wa te wasiwi 're aiwapari mono õ di. Duré asib'a'uwẽ asadawa 'mahârâ'wa norĩ asimiroti na te te ãma wama 're irowasu'u za'ra mono na hã ãma 're wanomro mono õ di.

¹¹ Uburé Izaraéu nhihudu norĩ hã ma tô tihâimanazém na asimiroti hã siwi pru. Ma duré asimiroti nhiti apa za'ra. Wawasédé hã wa te aiwi 're 'manharĩ za'ra mono wa, ma tô wama ipisutu za'ra, ropire hã duré romhâimanazé ipipa hã Mozési te te ãma irob'ui'éré zarina wanhisiwib za'ra waptã'ã da hã.

¹² A hã wama 're i'amhâzépa mono zém na hã ma tô wama ãma i'uwaimrami za'ra, wama i'rã nho'õmo norĩ ma zama. Tahawa, tô itete na ma tô iwahâ za'ra. Niwamhã ãne hã ropipa ihâimana'õ, Zeruzalẽ nhisiwi iwaptã'ã sine hã.

¹³ Ãne na Mozési hã te te ãma irob'ui'éré zarina, ma tô oto marĩ ipipa hã wazô tiwatobro za'ra. Ãne nherẽ, wa norĩ wawasédé, wa te rẽme waihu'u za'ra õ di. Duré a hã Uburé Danhib'apito, wate 'Re ihâimana u'âsi mono apâ 're iwa'awẽsãmri mono zô hã, wasima 're wanhopré mono õ di, wawasété nhiti 're iwasi'ré za'ra mono zarina, duré sena na asimiroti hã wa te 're iwapari pese za'ra mono zéb da hã.

¹⁴ Tahawa, Uburé Danhib'apito, za ãma iwahâ za'ra zéb da, wa'ãma i'madâ'â za'ra zarina, ma tô wanhisiwi waptã'ã za'ra da hã i'manha. A hã Uburé Danhib'apito, wate 'Re ihâimana u'âsi mono, i'uwaibaba na si te uburé marĩ na dama 're i'arowairébé mo. Tane nherẽ, asimiroti na wama 're i'arowaihu'u mono zé hã wa te wasiwi 're 'madâ'â pese mono õ di.

¹⁵ Uburé Danhib'apito, wate 'Re ihâimana u'âsi mono, a hã ma tô Ezitu hawi asib'a'uwẽ norĩ i'awazere na asiptede isa'ẽtẽ na 're i'aihâimana mono zé hã ihâi'ré. Tahawa, te duré asisi za'ẽne hã ãhã na zama zahadu 're hâimana u'âsi. Tane nherẽ, wawasédé, wa tô wa te 're 'manharĩ za'ra. Tahawa tô wa norĩ, aiwi i'upai'wa na wa tô 're wahâimana za'ra.

¹⁶ Uburé Danhib'apito, a hã da'ãma 're aiwamri pese mono di. Tahawa, ma'ãpé Zeruzalẽ da, asiti'ru na 're i'aihâimana mono zém na hã ãma uzusi u'âsi mono tõ, ate 'ri nho'õmo zada hã duré ate sa'a iwazéb zahi zada zama. Wawasété u'âbâb za'ra hã, duré wahi'rata norĩ wasété u'âbâ hã te uburé a'uwẽ ti'ai wa'õtõ nho'õmo mono bâ, Zeruzalẽ waptoma 're ihâimana za'ra mono norĩ hã ãma 're wa'ẽ za'ra, Zeruzalẽ ãma a'uwẽ ãma hã, duré uburé asib'a'uwẽ norĩ ãma zama.

¹⁷ Wate 'Re ihâimana u'âsi mono, ma'ãpé wapari, te ãma aiwi iwaptẽrẽzé hã. Prédu ma, asib'a'uwẽ te te ãma aiwi iwaptẽrẽzé hã ma'ãpé wapari. Danhib'apito, asisi za'ẽtẽ ma ropibu ma, ma'ãpé asõrõwa 'ri 'rãihâ apâ wẽsãmri, da te dasiwi irẽme hã.

¹⁸ Ĩte 'Re ihâimana u'âsi mono, ãma aima ĩmremezé hã, ma'ãpé wapari. Duré ma'ãpé ato hã 'ridawa, wama iropsiwamnarĩ za'ra zé hã ãma 'madâ'â da, ate 'ri nho'õmo ãma hã. Ãne wa tô wanhimirowaptẽrẽzé hã aima 'manharĩ za'ra ni, a hã da'ãma 're aiwamri pese mono zarina, wawẽ na, duré sena na 're wahâimana za'ra mono õ nherẽ.

¹⁹ Wanhib'apito ma'ãpé wawapari za'ra na! Wanhib'apito, duré wawasédé hã wa'ãma 'madâ'â za'ra õ di za! Wanhib'apito, ãma aima iwamreme zusizé hã ma'ãpé wapari. Duré ma'ãpé we wapawaptob za'ra na. 'Re ihâimana u'âsi mono na, a hã uburé da te dasiwi aiwaihu'u da, duré za iwanho'reptu za'ra na hã ronomro tõ, ĩte 'Re ihâimana u'âsi mono. E marĩ wa. Wa norĩ asib'a'uwẽ wa, duré Zeruzalẽ hã ate 'ri nho'õmo wa.

Gabriéu, rosawẽrẽ na te te ãma isaprĩzé wasu'u

²⁰ Tawamhã wa zahadu tãma mre. Zahadu wa duré ĩwasété na tãma ĩsiwẽ'õzém na, duré ĩnhib'a'uwẽ norĩ wasété za'ra zém na zama hã te tiwi irowaptẽrẽ na ãma uzusi, Uburé Danhib'apito, ĩte 'Re ihâimana u'âsi mono wi, sa'a ite iwazéb zahi ma ropibu ma.

²¹ Zahadu te rowaptẽrẽ ré, tô õ hã hâiwa ãma romhuri'wa Gabriéu, ĩnhotõ 'rowim ne ĩtõmo na te i'madâ hã, ma tô hâiwa hawi sa'ẽtẽ we wara. Ma tô ĩ'rata mazazâ 'râwi, si'ubdatõ ãma bâtâ za'ratazéb ãma, marĩ zata na 're idanhoprub za'ra mono zé bâtâ ãma hâiwahâ.

²² Ãne te ĩma tinha: — Daniéu, asõtõ 'rowim ne marĩ i'a'madâ'âzém na te ãma aima saprĩ da, wa we atẽme mo.

²³ A hã tiwi irowaptẽrẽzém na ãma sãna'rata wi, ma tô 'Re ihâimana u'âsi mono hã ãma asada'â. Tãma hã asawi uptabi di. Tahawa, ma tô we ĩma rob'ru, marĩ i'a'madâ'â mono zém na te ãma aima saprĩ da. Tahawa, ma'ãpé ĩwapari pese, te aima ãma isaprĩzé hã waihu'u pese da.

²⁴ — Daniéu, asib'a'uwẽ ma, duré ate 'ri nho'u iwazéb zahi ma, 'Re ihâimana u'âsi mono nhimihâzé ai'ãma za'ra wa'aba ihâimanazéb ãma hã te za ãma tiwahu, 70 x 7 na ãma iwahum na, õhõ wi 're i'aiwasété za'ra wa'aba mono zé hã isi'utõrĩzéb u. Tahawa, te za isib'a'uwẽ norĩ, 'Re ihâimana u'âsi mono, iwasédé te te oto ãma 're i'ab'madâ'â mono õ zé hã te te sina 're uwaimrami za'ra. Te za duré 'Re ihâimana u'âsi mono, i'uwaibaba na te te dama 're i'arowairébé mono zé isi'utõrĩ'õ hã dama pisutu. Duré uburé marĩ we i'a'madâ'â mono zém na, duré 'Re ihâimana u'âsi mono zadawa 'mahârâ'wa nhimirowasu'u na te za te te ãma a'uwaimrami. Te za duré isõrõwa 'ri 'rãihâ iwazéb zahi na apâ ãma da te dasima 're romhu'u za'ra.

²⁵ Daniéu, marĩ waihu'u da, ma'ãpé ĩwapari pese. Zeruzalẽ apâ za da te dasiwi 'ri da, te te dama 'rui parimhã, te za 7 x 7 na wahu hã ai'utõ, 'Re ihâimana u'âsi mono dama i'rã nho'õmo da hã te te ipisutuzéb u. Tawamhã Zeruzalẽ 're, 'ri nhi'ridi ité ihâimana za'ra ãma hã, duré 'ri 'wawi wa'ra 'rãihâ ãma hã te za wahu hã ai'utõ, 62 x 7 na. Tane nherẽ, taha ré hã te za we romhâimana mono, robzépata za'ẽtẽ na hã.

²⁶ Tawamhã ã hã romhâimanazé oto isi'utõrĩ ãma, 'Re ihâimana u'âsi mono dama i'rã nho'õmo da, te te ipisudu hã te za dasiwi wĩrĩ ni, marĩ iwasédé te te 'manharĩ õ nherẽ. Taha pari te za danhib'ihâ'a hã tite dasi'wapéi 'manharĩ'wa norĩ siré 'ri nho'u hã duré 'Re ihâimana u'âsi mono nhorõwa 'ri 'rãihâ hã siwi te te prub za'ra. Tawamhã romhâimana 'rãsutuzé hã 're i'âpusi mono ne te za datẽme wi. Tahawa, te za dasi'wapé hã duré datẽme ãwisi, 'Re ihâimana u'âsi mono te te sima irowairébézéb zarina, marĩ te te i'uprosi da hã.

²⁷ Duré ã hã apito, dapoto mono bâ dasiwazari da'ahâ uptabi na idahâimana za'ra mono ma, te za marĩ na dasisazezé hã dama 'manha. Tawamhã ãhã ré hã te za 7 na da'ãma tiwahu. Duré 7 wahub u aiwa ãma isipo'o ãma, te za abaze zata na 're idanhoprub za'ra mono zé hã, duré 'Re ihâimana u'âsi mono nhorõwa 'ri 'rãihâ 're, amnho na 're idanhoprub za'ra mono zé hã oto dawi sizâ. Duré “marĩ ipipa iwasété uptabi hã” te za 'Re ihâimana u'âsi mono nhorõwa 'ri 'rãihâ 're hâimo tisã. Tawamhã tame te za a'â za, ã hã apito hã 'Re ihâimana u'âsi mono te te i'uprosizéb u, te te ãma sima irowairébézéb zarina.