Daniéu 5 - ꞌRe Ihâimana Uꞌâsi Mono Zadawa Wasuꞌu

Apito Béusaza, dasa isa'ẽne te te i'manharĩzé wasu'u

¹ Nimahã mara na Babilonia ãma apito Béusaza hã, ma tô dasa isa'ẽne hã 'manha. Tahawa, ti'ai wa'õtõ nho'õmo 'remhã daza'rui mono bâ te dama ipire norĩ zô hã miu na ihâiba za'ra zô hã hâ. Tawamhã ta norĩ siré te uwa 'rãi wa'u isé hã nasi hâsi.

² Tawamhã te te nasi hâsi ré, Béusaza hã Zeruzalẽ ãma 'Re ihâimana u'âsi mono nhorõwa 'ri 'rãihâ hawi, ẽtẽ waipo pré oru 'manharĩ na duré ẽtẽ waipo prã prata 'manharĩ na hâsizé hã imama Nabucodonozo te te iwaibu hã, da te itẽme 'wasari da hã ma tô dama ti'ru. E marĩ wa. Taha hâsizéb 're, dama ipire, sô ihârâ za'ra norĩ hã, imro norĩ hã duré imro prã tãma 're ihâimana za'ra mono norĩ hã uwa 'rãi wa'u isé hã te te iwa âhuri da, isiré.

³ Tawamhã oru 'manharĩ na hâsizé hã 'Re ihâimana u'âsi mono nhorõwa 'ri 'rãihâ hawi da te iwaibu za'ra hã ma tô oto tãma 'wasari ni. Tawamhã apito duré dama ipire norĩ hã duré imro prã tãma 're ihâimana za'ra mono norĩ me ma tô isiré taha hâsizéb 'remhã nasi âhu.

⁴ Ma tô ẽtẽ waipo pré oru 'manharĩ na, ẽtẽ waipo prã prata 'manharĩ na, ẽtẽ topsada brõzi 'manharĩ na, isi'uwazi tede ferru 'manharĩ na, wede 'manharĩ na, duré ẽtẽ 'manharĩ na ropodo ihâiba'õ norĩ ãma hã tiwata za'ra.

⁵ Taha ré, waptu na danhib'rada hã ma tô sihâi'ré. Tahawa 'ri're wa'wa za'ẽtẽ wa, dasa iwa ihâimana 're, ma tô danhib'rada 'ri na'rata hâ su'u na hã rob'ui'éré, rob'uiwẽzé te te irowa'a pese zém niwĩ, ba'a na. Tawamhã apito, danhib'rada hã ma tô 'madâ, te te rob'ui'éré ré.

⁶ Tahawa, ma tô tãma ti'ubu'a pese. Ma tô tipahi pese. Tahawa ma tô ihi'rãti hã nasi si'ahâri zahuré. Ma tô rẽrẽ, i'rãi hawi ipara u.

⁷ Tawamhã sa'ẽtẽ mreme 'rãihâ na ma tô marĩ 'manharĩ nhipese 'wa norĩ zô, rowaihu'u pese 'wa norĩ zô, duré wasi na romnhoré'wa norĩ zô dahãsi da hã dama ti'ru. Tawamhã ta norĩ sihutu wi, ma tô Béusaza hã tãma nharĩ za'ra ãne: — Ã hã 'ri na'rata na rob'ui'éré, ni'wa hã te te sõré waihu'u wamhã, duré marĩ te te iwasu'uzém na te te ãma ĩma saprĩ waihu'u wamhã, da'uza ihâ prépe iwa'âbâ za'ẽtẽ na te za ãma uza ni. Oru 'manharĩ na danho'rebzum na zama te za duré ãma sõ'rebzu ni za. Tahawa, wa za duré tãma pisutu, si'ubdatõ ãma dama ipire na ĩzahâpâmhã 're hâimana mono da, ĩnhimi'madâ'âzéb 'remhã.

⁸ Tawamhã uburé rowaihu'u'wa norĩ 'ri're wa'wa za'ẽne ihâimana u ma tô oto asisi. Tane nherẽ, 'ri na'rata na rob'ui'éré hã ta norĩ te te 'manhoré waihu'u õ di. Duré apito ma, marĩ te te iwasu'uzé te te ãma tãma saprĩ waihu'u za'ra õ di.

⁹ Tahawa, ma tô duré oto apito hã tãma a'rãmi pese. Ma tô duré ti'ubu'a pese oto. Tawamhã dama ipire norĩ hã, marĩ te te 'manharĩ waihu'u za'ra õ di.

¹⁰ Tawamhã apito sipi'õ, apito zadari, duré sô ihârâ za'ra norĩ zadari te te wapari wa, 'ri para u sébré wamhã, ma tô apito ma tinha ãne: — Apito, 're i'aihâimana u'âsi mono da si, iwẽ hã! A'rãmi tõ. Duré ai'ubu'a pese tõ.

¹¹ E tihai wa. Ãme asimi'madâ'âzéb ãma te ihâiba'õ norĩ pẽ'ẽzani ré aibâ hã tihâiba. Aimama Nabucodonozo, apito na 're hâimana mono ré hã, ma tô aibâ hã da te 're waihu'u za'ra, i'rã nhimiza'rese wẽ na hã, duré rowaihu'u pese 'wa na hã, ihâiba'õ norĩ ne. Tawamhã ta hã ma tô apito Nabucodonozo pisutu, rowaihu'u pese 'wa norĩ nhib'ihâ'a na, tiha 'manharĩ nhipese 'wa norĩ nhib'ihâ'a na, simi'â na romhuri'wa norĩ nhib'ihâ'a na, duré wasi na romnhoré'wa norĩ nhib'ihâ'a na tãma 're hâimana za'ra mono da hã.

¹² Ã hã aibâ hã Daniéu, apito, Béutésaza na te te isisi amo hã simirosa'rata waihu'u pese di. Simirowaihu'u pese di. Duré rosawẽrẽ na hã te te ãma saprĩ waihu'u pese di, tiha te te iwasu'uzém na hã. Tiha dama iwaihu'u'õ ipire na hã te te duré ãma saprĩ waihu'u pese di. Tahawa, ma'ãpé Daniéu zô aihârâ. Tawamhã te za 'ri na'rata na rob'ui'éré na hã aima ãma saprĩ.

Daniéu, rob'ui'éré iwaihu'u'õ na te te ãma isaprĩzé wasu'u

¹³ Tawamhã Daniéu, ma tô apito hâimanazéb u dasiwi saprõni ni. Tahawa, ma tô ãne sadanha: — E a hã Daniéu, zudeu norĩ siré hã, ĩmama apito Nabucodonozo, Zuda hawi, da te ai'ãma ai'uté za'ra wa'aba wa, we te te i'asaprõni dasiré.

¹⁴ Ma tô ĩma aiwasu'u ni, ihâiba'õ norĩ pẽ'ẽzani ai'ãma 're ihâimana mono na hã, duré aima irosa'rata waihu'u pese na hã, duré aima irowaihu'u pese na hã.

¹⁵ Nimosi prã na ma tô rowaihu'u pese 'wa norĩ hã, duré wasi na romnhoré'wa norĩ hã we ĩtẽme da te simro, 'ri na'rata na rob'ui'éré te te aré ĩma sõré za'ra da, duré aré marĩ te te iwasu'uzém na te te ãma ĩma saprĩ za'ra da. Tane nherẽ, te te ĩma ãma saprĩ waihu'u za'ra õ di, ta norĩ hã.

¹⁶ Tane nherẽ, ma tô ni'wa hã ĩma aiwasu'u, a hã dama iwaihu'u'õ ipire hã za ãma isaprĩ waihu'u pese na hã. Tahawa, a hã 'ri na'rata na rob'ui'éré sõré waihu'u pese wamhã, duré ãma ĩma saprĩ waihu'u pese wamhã, te za da'uza ihâ prépe iwa'âbâ za'ẽtẽ na ai'uza ni za. Te za duré ẽtẽ waipo pré oru 'manharĩ na hã ãma asõ'rebzum ni za. Tawamhã wa za duré ĩte i'rãnho'õmo na si'ubdatõ ãma dama aipire na 're aihâimana mono da hã aima pisutu.

¹⁷ Tawamhã Daniéu ma asa ãma sada'â ãne: — Apito, aré ĩma i'asõprubzéb da hã tô aima hâimana za'ra. Niha wamhã duré ni'wai ma, sõmri za'ra na, ĩ'upana. Ãne nherẽ, 'ri na'rata na rob'ui'éré hã wa za aima sõré. Wa za duré ãma aima saprĩ, marĩ te te iwasu'uzé hã.

¹⁸ Apito, danhipai u isiptede 'Re ihâimana u'âsi mono, ma tô aimama ma, Nabucodonozoho ma hã pisutu, siptete na duré pire uptabi na dama i'rãnho'õmo na 're hâimana mono da hã.

¹⁹ 'Re ihâimana u'âsi mono, da'madâ'â nhiptetezé te te aré tãma isõmri hã sa'ẽtẽ uptabi wa, ma tô uburé daro mono bâ isõ'remhã aré tãma 're darẽrẽ'ẽ za'ra. Tawamhã te te sima wẽ wamhã, te za ni'wa hã tiwĩ. Niha wamhã duré te te sima wẽ wamhã, te za tô ãma rosazâ, hâiba ré 're sãmra mono da. Duré ni'wa isimiromhuri zarina te za tô ãma hâimo, te te sima iwẽ hã. Te za duré ni'wai ãma hã ãma ti'awi, te te sima iwẽzéb zarina.

²⁰ Tane nherẽ, ma tô tipẽ'ẽ na hã 're si'madâ'â ze. Ma tô duré si'rep si pẽ'ẽ tete na 're hâimana. Taha zarina ma tô da'madâ'â nhiptetezé hã tiwi sina ti'awi pese.

²¹ Tahawa, a'uwẽ 're ihâimana za'ra mono zém hawimhã ma tô wazere ni. Ma tô duré ti'rãiwaihu hã simini, abaze ne oto 'rã nhimiza'rese ãna 're hâimana mono da. Tawamhã te duré oto awaru po're pore norĩ siré 're hâimana. Te duré du hã te te 're 'masi, powawẽ rom na du sima iwẽ na te te 're ihuri mono ne. Romnhiwasi te duré 're sõtõ. Ma tô duré atébré hã te te 're hâiba waihi. Tawamhã uburé danhipai u isiptede 'Re ihâimana u'âsi mono, daro mono bâ uburé da'rãnho'õmo nhimi'madâ'âzém nhipai u siptete na te te 're ida'a'madâ'â mono na, duré da'rãnho'õmo nhimi'madâ'âzéb da, te te sima iwẽzéb zarina te te dama 're i'apisutu mono na te te tinhimirosa'rata na sina siri õ ré, ma tô ãne ré hã 're hâimana siwa'ru.

²² — Apito Béusaza, a hã õhõ 'ra 're aihâimana mono wa, ãne hã uburé aima waihu'u pese nherẽ, te 'râwimhã 're asi'madâ'â zei u'âsi mono na hã 're aihâimana siroptu mo.

²³ Tane nherẽ, hâiwa ãma Uburé Danhib'apito da, i'aihâimanazéb zarina, ma tô hâsizé 'Re ihâimana u'âsi mono nhorõwa 'ri 'rãihâ 're, 're isimasa mono, da te iwaibu za'ra hã dama i'ru, da te we 'wasari da, sô i'aihârâ za'ra dama ipire norĩ hã duré aimro norĩ, duré aimro prã aima 're ihâimana za'ra wa'aba norĩ te te uwa 'rãi wa'u isé iwa âhuri da hã, asiré. Taha nhipai u ma tô duré ihâiba'õ norĩ ãma hã aiwa, ẽtẽ waipo prã prata 'manharĩ na, ẽtẽ waipo pré oru 'manharĩ na, ẽtẽ topsada brõzi 'manharĩ na, isi'uwazi tete 'manharĩ na, wede 'manharĩ na, duré ẽtẽ 'manharĩ na, te te 're irob'madâ'â waihu'u mono õ na, duré 're isimipari waihu'u mono õ na, marĩ te te 're iwaihu'u za'ra mono õ na. Tane nherẽ, a hã, 'Re ihâimana u'âsi mono dapãrĩ waihu'u pese 'wa na duré dahâiba ré na te te 're ida'arẽme mono ãma aiwata õ di, uburé marĩ aima 're hâimana mono da, te te sima 're irowairébé mono ãma hã.

²⁴ Tahawa, ma tô danhib'rada 'ri na'rata na ãne damreme na te te ãma rob'ui'éré da hã tãma ti'ru:

²⁵ “MENE, MENE, TEQUEL, PARSIM”.

²⁶ — Ãne damreme na rob'ui'éré na isaprĩzé hã. MENE na damreme hã ãne hã te wasu'u. 'Re ihâimana u'âsi mono, ma tô dama i'rãnho'õmo na asimi'madâ'âzém na bâdâ hã sa'rata pese. Taha zarina ma tô sima rowairébé, asimi'madâ'âzé hã te te aiwi 'rãtõ da.

²⁷ TEQUEL na damreme hã te duré ãne hã wasu'u. Marĩ pire pibuzém na da te aipire pibui wamhã, aiwapu na aihâimana wa, za da te i'ai'upsibi mezé.

²⁸ PERES na damreme hã, dama i'rãnho'õmo na asimi'madâ'âzé hã za sima isipo te wasu'u. Média norĩ ma, te za sõmri zahuré ni, Persiaha me hã.

²⁹ Tawamhã apito Béusaza, te Daniéu hã dama ti'ru, da'uzazé ihâ prépe iwa'âbâ za'ẽtẽ na da te dasiwi uza da, duré ẽtẽ waipo pré oru na da te dasiwi sõ'rebzu da hã. Tawamhã ma tô duré Daniéu hã pisutu, Babilonia ãma dama i'rãnho'õmo na si'ubdatõ ãma dama ipire na 're hâimana mono da.

³⁰ Tawamhã tô taha mara na, Béusaza Babilonia ãma apito hã ma tô wĩrĩ ni.

³¹ Tahawa, Dariu, Média na ti'ai wa'õtõ nho'õmo nhisi ãma apito, 62 na ãma iwahu hã ma tô isõwa're'remhã si'i'rãnho'u, Babilonia ãma hã.