Daniéu 4 - ꞌRe Ihâimana Uꞌâsi Mono Zadawa Wasuꞌu

Nabucodonozo te te duré irosawẽrẽzé wasu'u

¹ Tawamhã apito Nabucodonozo, ma tô uburé dapoto mono bâ daro mono bâ damreme na 're idamreme zusi mono ma hã ãma ropé, timreme na ãne: — Rowẽ na uburé 're aihâimana za'ra wa'aba mono!

² Wa tô ĩsima wẽ, 'Re ihâimana u'âsi mono danhipai u isiptete uptabi, marĩ dama i'manharĩ waihu'u'õ iwẽ uptabi te te ĩma ihâi'rézé hã uburé waihu'u za'ra wa'aba da.

³ Isimiromhõsizé hã wẽ uptabi di. Duré uburé marĩ iwaihu'u'õ te te dama 're i'a'manharĩ mono zé hã siptete uptabi di! Ta hã Uburé Danhib'apito, si'utõrĩ ãna 're ihâimana mono. Tahawa, te za dama i'rãnho'õmo na 're hâimana u'âsi.

⁴ Ma ãma uzusi ãne: — Wa hã Nabucodonozo, ĩhâimana prédup sina ĩsima iwẽ na ĩhâtâ'â ãna wa tô aré 're ĩnhamra, ĩnhimiromhurizé 'ri 'rãihâ 'remhã, ĩma rowẽ uptabi na.

⁵ Tane nherẽ, nimahã mara na te irosawẽrẽzé hã ma tô ĩhâtâ'â za'ẽne hã ĩma sina waze. Ĩnhotõ 'rowi, marĩ te i'madâ'âzé hã duré ãma ĩnhimirosa'ratazé hã ma tô ipipa ĩma tisõ.

⁶ Tahawa, Babilonia ãma rowaihu'u pese 'wa norĩ zô, wa tô sô ĩhârâ za'ra, te irosawẽrẽzé te te ĩma ãma saprĩ za'ra da.

⁷ Tahawa rowaihu'u pese 'wa norĩ hã, marĩ 'manharĩ nhipese 'wa norĩ hã, wasi na romnhoré'wa norĩ hã, duré simi'â na romhuri'wa norĩ hã ma tô we ĩtẽme ai'aba'ré. Tahawa, wa tô tãma wasu'u za'ra aré, te irosawẽrẽzé hã. Tane nherẽ, te te ĩma ãma saprĩ waihu'u za'ra õ di.

⁸ Tame Daniéu, da'rãsutu ãma ma tô ĩhâimanazéb u hã we ãzé, Béutésaza na isisi amo hã, ĩte ihâiba'õ nhisi ne hã. Ihâiba'õ norĩ pẽ'ẽzani hã te iwamhã 're hâimana. Tahawa, wa tô tãma wasu'u, te irosawẽrẽzé hã.

⁹ Wa tô tãma tinha ãne: “Béutésaza, marĩ 'manharĩ nhipese 'wa norĩ nhib'ihâ'a, ĩma waihu'u pese di, ihâiba'õ norĩ pẽ'ẽzani aiwa ihâimana na hã. Duré ĩma waihu'u pese di, nima hã ipire dama iwaihu'u'õ hã ãma dama saprĩ da, aima ipire õ na hã. Tahawa, wa za aima wasu'u, te irosawẽrẽzé hã ãma ĩma saprĩ da, marĩ te te iwasu'uzé hã.

¹⁰ Ãne wa tô ĩnhotõ 'rowim ne hã 'madâ, ĩnhimiwaptâ wa, ĩnomro ré. Rowede hã i'rãihâ uptabi hã wa tô 'madâ, rowa'wa 're isa mono hã.

¹¹ Tawamhã ta hã ma tô wede si'ré hâimo, hâiwa te te sina i'upizéb u. Tawamhã iwede hã sa'ẽtẽ uptabi wa, daro mono bâ uburé dama 'madâ'â waihu'u pese di.

¹² Isu hã 'madâ'â zei uptabi di. Duré 're 'rãi pese mono wa, te daro mono bâ dasa hã da te ãma 're huri. Te duré abaze norĩ hã iwede awã zahâpâ sima iwẽ na 're wa'utu za'ra. Si norĩ hã te duré ipanhipti na te te sima 're sasi za'ra. Uburé ropoto mono bâ te i'rã na 're saihuri, abaze norĩ, si norĩ hã, duré a'uwẽ norĩ zama.

¹³ Zahadu te rosawẽrẽ ré, wa tô hâiwa ãma romhuri'wa hâiwa hawi we te te si'rai ré hã 'madâ, 're isõpré u'âsi mono hã sõtõ ãna.

¹⁴ Ta hã ma tô mreme 'rãihâ na tinha ãne: ‘Ma'ãpé wede hã asiwi 'morõwĩrĩ aba. Asiwi 'morõwĩrĩ aba wamhã, te za ipanhipti asiwi isihâri aba mo. Te za duré isu hã asiwi isinarĩ aba mo. Duré i'rã asiwi sãmra aba wamhã, te za ãma asiwi iropéi wa'aba mo. Iwede awã zahâpâ abaze norĩ 're iwa'utu za'ra mono hã te za duré ta hawi asiwi iwano'õ aba mo, si norĩ ipanhipti na 're isimasa mono norĩ zama.

¹⁵ Tane nherẽ, isãna'rata si isari ré te za asiwi irẽme 'wa. Tawamhã te za isi'uwazi tete na, duré ẽtẽ topsada brõzi na ãma asiwi iwasisi zahuré wa'wa za, rom na siwazari du 're ihâimana za'ra mono wa'wa. Tawamhã te za wede nhana'rada hã atébré te te 're waihi, ã hã aibâ hã tô. Tahawa, te za tô aibâ hã du te te 're 'masi, abaze ne oto.

¹⁶ Tahawa te za duré a'uwẽ nhimirosa'ratazé hã oto tiwi aimani. Te za oto abaze norĩ nhimirosa'rata ne na 're hâimana. Tawamhã ãne na 're hâimana mono ré, te za 7 na ãma tiwahu.

¹⁷ Ã hã ma tô hâiwa ãma romhuri'wa, sõtõ ãna 're isõpré u'âsi mono norĩ hã siwi ãma rowairébé, uburé danhipai u isiptede 'Re ihâimana u'âsi mono, daro mono bâ uburé da'rãnho'õmo nhimi'madâ'âzém nhipai u siptete na te te 're ida'a'madâ'â mono na, da te ãma waihu'u za'ra da hã. Ta hã te za da'rãnho'õmo na da'madâ'âzéb da hã, te te sima 're ida'awẽ mono zéb zarina te te dama 're apisutu, dama wapu na ni'wa 're hâimana mono nherẽ, oto dama pire da.’ ”

¹⁸ Tawamhã Nabucodonozo timreme na te te ãma tãma i'rãsutu na hã, te ãne Daniéu ma tinha: — Ãne te irosawẽrẽzé. Ni'wa hã ĩte rowaihu'u pese 'wa norĩ te te ĩma ãma saprĩ waihu'u za'ra õ di, marĩ te te iwasu'uzém na hã. Tane nherẽ, Béutésaza, aima si waihu'u pese di, ãma ĩma isaprĩ da hã, ihâiba'õ norĩ pẽ'ẽzani aiwa sébré wa. Tahawa, ma'ãpé ãma ĩma saprĩ na, te irosawẽrẽzé marĩ te te iwasu'u hã.

Daniéu, rosawẽrẽ na te te ãma isaprĩzé wasu'u

¹⁹ Tawamhã Daniéu, Béutésaza na isisi amo ãne hã te te wapari wa, ma tô tãma a'rã. Tahawa, te a'â rosa'rata ma za, ari'iwi. Tawamhã te apito tãma tinha ãne: — Béutésaza, aihâtâ'â tõ, rosawẽrẽ na hã duré za marĩ te te iwasu'uzém na hã. Tane nherẽ, ma tô Daniéu ãne ãma tãma wa'rã: — Apito, asimirosawẽrẽzé iwasu'u hã aré tô iwẽ ĩma hã, aihâiba upana asitob'ru norĩ hâiba u ihâimana da hã. Tane nherẽ, ta norĩ hâiba hã te te wasu'u õ di.

²⁰ A hã ma tô wede, hâiwa te te sina i'upi hã, hâimo iwede si'ré mono hã i'madâ, sa'ẽtẽ uptabi wa, daro mono bâ uburé dama i'madâ'â waihu'u pe hã.

²¹ Isu hã 'madâ'â zei uptabi di. Duré 're 'rãi pese mono wa, te daro mono bâ dasa hã da te ãma 're huri. Abaze norĩ hã te iwede awã zahâpâ sima iwẽ na 're wa'utu za'ra. Si norĩ hã te duré ipanhipti mono na te te sima 're sasi za'ra.

²² — Apito, wede hã, a hã te aiwasu'u. E marĩ wa. A hã asiptete 'manharĩ na asina 're hâimo u'âsi mono wa. Duré asiptete na 're i'aihâimana mono zé hã te te sina 're hâimo pese mono wa, ma tô hâiwa u hã wi. Taha wa, ma tô uburé pese 're ida'a'madâ'â mo, daro mono bâ.

²³ Tawamhã ma tô duré hâiwa ãma romhuri'wa we te te si'rai ré hã i'madâ. Ta hã ãne te te inharĩ hã: “Ma'ãpé wede hã asiwi mei wa'aba. Duré asiwi panhipti nhihâri aba mono. Tane nherẽ, isãna'rata si isari ré te za asiwi irẽme 'wa. Tawamhã te za isi'uwazi tete na, duré ẽtẽ topsada brõzi na ãma asiwi iwasisi zahuré wa'wa, rom na siwazari du 're ihâimana za'ra mono wa'wa 're sa mono da. Tawamhã te za ã hã aibâ nhisi wi atébré hã 're rere'e. Tahawa, te za aibâ hã abaze sazém na si oto 're sa. Tawamhã ãne na 're hâimana mono ré hã te za 7 na ãma tiwahu.”

²⁴ — Awa'awi na hã wa za oto ãma aima saprĩ. Apito, ã hã asimirosawẽrẽ te te iwasu'u hã, 'Re ihâimana u'âsi mono te te sima ai'ãma irowairébézé.

²⁵ Tawamhã a'uwẽ 're ihâimana za'ra mono zém hawimhã te za aiwazere ni. Tahawa, te za oto abaze norĩ siré 're aihâimana mo. Te za du na 're asai mo oto, powawẽ du te te 're ihuri mono ne. Duré romnhiwasi te za 're asõtõ mo. Te za atébré hã te te 're aihâiba waihi. Ãne na 're aihâimana mono ré hã, te za 7 na ai'ãma tiwahu. Taha parip si, te za a hã asimirosa'rata na apâ asina isi, uburé danhipai u isiptede 'Re ihâimana u'âsi mono, daro mono bâ uburé da'rãnho'õmo norĩ nhimi'madâ'âzém nhipai u siptete na te te 're ida'a'madâ'â mono na hã, duré da'rãnho'õmo norĩ nhimi'madâ'âzéb da, te te sima iwẽzéb zarina te te dama 're i'apisutu mono na hã.

²⁶ Tawamhã duré hâiwa ãma romhuri'wa, wede nhana'rada sari ré te te siwi rẽme da, te te iwaihu hã, a hã 'Re ihâimana u'âsi mono uburé danhipai u siptete na te te 're ida'a'madâ'â mono na sazei wapsi, apâ i'asi'apito da hã te wasu'u.

²⁷ Tahawa apito, ma'ãpé ĩnhimirotizé hã asina saze na. Duré ma'ãpé rẽme, 're aiwasété mono zé hã, i'uwaibaba si oto marĩ hã 're ab'manharĩ mono da. Duré ma'ãpé sazâri, aiwasédé hã. Duré ma'ãpé isimarĩ'õ norĩ ãma 're aiwamri mono. Ãne wapsi, te za ãté rowẽ na 're i'aihâimana mono zém na hã ãma 're i'uzusi mo.

²⁸ Tawamhã ãne ma tô apito Nabucodonozoho zô hã uburé marĩ hã tô wairébé.

²⁹ Tawamhã 12 na a'amo si'utõrĩ pari, 'ri nho'u Babilonia ãma tinhimiromhurizé 'ri 'rãihâ hâpâ na hâimo 're morĩ ré,

³⁰ ma tô ãne sima tinha: — E niha 'ri nho'u Babilonia hã dama isa'ẽtẽ uptabi! Wa hã wa tô ĩnhiptete na 'ri nho'u hã 'manha, iwa apito na 're ĩnhamra mono zéb da hã, uburé dama ĩpire na duré ĩnhiptete na te 're ida'a'madâ'â mono zé hã te dama hâi'ré da.

³¹ Tawamhã ãne na apito zahadu te te sima rob'anhoré ré, ma tô hâiwa hawi damreme hã tãma tinha ãne: — Apito Nabucodonozo, ĩwapari! Atei õ di za oto, dama i'rãnho'õmo na 're i'aihâimana mono zé hã.

³² A'uwẽ na 're idahâimana za'ra mono zém hawimhã te za aiwazere ni oto, abaze norĩ siré 're aihâimana mono da, du hã 're 'masi mono da, powawẽ te te 're ihuri mono ne. Ãne na 're aihâimana mono ré, te za 7 na ai'ãma tiwahu. Taha parip si, te za a hã asimirosa'rata na asina isi, uburé danhipai u isiptede 'Re ihâimana u'âsi mono, daro mono bâ uburé da'rãnho'õmo norĩ nhimi'madâ'âzém nhipai u siptete na te te 're ida'a'madâ'â mono na hã, duré da'rãnho'õmo norĩ nhimi'madâ'âzéb da, te te sima iwẽzéb zarina te te dama 're i'apisutu mono na hã.

³³ Tame timreme hã te te tãma i'rãsutuzéb ãma, awa'awi ma tô Nabucodonozoho ma timreme na hã ãma tãma uwaimra. Tahawa, a'uwẽ 're ihâimana za'ra mono zém hawimhã ma tô dasiwi wazere ni. Tahawa, te oto powawẽ, du te te 're ihuri mono ne, du si te te 're 'masi. Te duré romnhiwasi 're sõtõ. Tawamhã te duré atébré hã te te 're hâiba waihi. Tame ma tô duré oto tizéré pa pese, si wawẽ zaripi ne. Ma tô duré tinhipo'o pa pese, si'õmo para nhipo'o ne.

Apito Nabucodonozo, 'Re ihâimana u'âsi mono ãma iwatazé wasu'u

³⁴ Tawamhã te apito hã tinha ãne: — 7 na oto ĩ'ãma wahu pari, hâiwa u wa hã te rob'madâ'â wamhã, ma tô apâ ĩnhimiza'rese wẽ hã ĩma wi. Tahawa, wa tô uburé danhipai u isiptede 'Re ihâimana u'âsi mono ãma hã ĩwata, dâ'â ãna õne u'â 're ihâimana mono ãma. Tawamhã wa hã wa tinha ãne: “Danhipai u 'Re ihâimana u'âsi mono nhiptetezé hã si'utõrĩ õ di. Duré Danhib'apito na te te 're ida'a'madâ'â mono zé hã si'utõrĩ waihu'u õ di.

³⁵ Õhõ nhiptetezé ma hã tarére marĩ dai õ di, daro mono bâ 're idahâimana za'ra mono hã. Ta hã te duré uburé hâiwa ãma romhuri'wa norĩ hã, duré ti'ai ãma 're idahâimana za'ra mono norĩ hã pire na te te 're ab'madâ'â. Ni'wa hã te te duré tiwi 're rosawi waihu'u mono õ di, te te sima iwẽzéb zarina marĩ te te 're i'a'manharĩ mono da hã. Duré ni'wa hã te te tãma 're a'rui waihu'u mono õ di, marĩ te te 're i'ab'manharĩ mono zé hã te te ãma dama 're i'arowasu'u mono da hã.”

³⁶ — Tawamhã tô awa'awi ĩnhimiza'rese wẽ zé hã apâ ĩma wisi wamhã, wa tô apâ ti'â, i'rãnho'õmo na ĩpire na duré dama ĩwazém na 're ĩhâimana mono zé hã. Duré ĩte dama roti'wa norĩ hã duré ĩte dama ipire norĩ hã ma tô apâ hã siwi ĩ'âri wẽ. Tahawa, wa tô duré ĩsi'apito apâ, ĩnhiptede hã imorĩ'rata na ĩsi'apitozém nhipai u.

³⁷ Tahawa, wa hã apito Nabucodonozo, wa tô hâiwa ãma apito 'Re ihâimana u'âsi mono ãma hã ĩwata. Uburé marĩ te te 're i'ab'manharĩ mono zé hã i'uwaibaba si. Duré õ hã te za siwa'ru a'uwẽ norĩ 're isi'madâ'â ze za'ẽtẽ za'ra mono norĩ hã te te 're anhisém nomri.