Daniéu 3 - ꞌRe Ihâimana Uꞌâsi Mono Zadawa Wasuꞌu

Ropodo ẽtẽ waipo pré oru na i'manharĩ wasu'u

¹ Tawamhã apito Nabucodonozo, ropodo 27 metru na i'rãihâ pibuzém na duré 2,70 metru na i'a're si'uiwa u ipibuzém na da te dasiwi 'manharĩ da hã, ma tô dama ti'ru. Ta hã, Babilonia na daza'rui wa'õtõ nhisi ãma Dura na ti'ai haré nhisi wa, da te dasiwi sãrĩ da hã, ma tô duré dama waihu'u.

² Taha pari ma tô dama i'rãnho'õmo norĩ ma, 'ri nho'õmo 're, dama ipire norĩ ma, daza'rui wa'õtõ mono bâ dama i'rãnho'õmo norĩ ma, te te da'ãma 're irowairébé za'ra mono norĩ ma, rob'uiprazé ubumroi'wa norĩ ma, damrami'wa 'madâ'â'wa norĩ ma, dama roti'wa norĩ ma, duré uburé aimawi dama ipire norĩ ma, ma tô tãma waihu'u za'ra, ropoto saiwĩrĩ u hã sitẽme sitob da.

³ Tahawa, ma tô uburé ta norĩ sitẽme isitom norĩ hã ropoto nho're hâiwimhã aimasa para na, ropoto saiwĩrĩ ãma hã.

⁴ Tawamhã apito mreme 'mahârâ'wa ma tô oto mreme 'rãihâ na dama sadawa 'mahâ ãne: — Uburé a'uwẽ norĩ daro mono bâ, dapoto mono bâ duré aimreme mono bâ i'aihâimana za'ra wa'aba norĩ, ãhãta apito te za ãhã na hã aima waihu'u za'ra wa'wa!

⁵ Tawamhã danhimnhihârâzé isadawazare hârâ hã, ibuhârâ hã, wedehâpâ 'manharĩ nhorõ wamreme hã, isõrõ ta'are hã, duré ihâiba amo da te ãma 're irowamreme za'ra mono norĩ ta hã wapari za'ra wa'aba wamhã, te za uburé aihi'rãtitõ asimroi wa'wa, ropodo ẽtẽ waipo pré oru na da te dasiwi 'manharĩ da, apito Nabucodonozo te te i'rui ãma aiwata za'ra wa'aba da.

⁶ Tawamhã ni'wa, ropoto ãma dame wata da, hi'rãtitõ tãma sãmra õ wamhã, te za tô awa'awi dasiwi me ni, 'ri're wa'wa unhama ro'o u.

⁷ Tawamhã rowamreme sãna'rata wi, ma tô uburé tame idahâimana za'ra hã dahi'rãtitõ asimro ni, ropodo ẽtẽ waipo pré oru na i'manharĩ ãma dawata za'ra da.

Daniéu siwaihu'u norĩ, ropoto ãma iwata za'ra õ zé wasu'u

⁸ Tawamhã taha siwaprã ma tô ni'wam norĩ wasi na romnhoré'wa hã apito u sina rotété za'ra, zudeu norĩ ãma iwasété na te te wati'i za'ra da.

⁹ Tahawa, ma tô apito Nabucodonozoho ma nharĩ za'ra ãne: — Apito, rowẽ na si 're aihâimana u'âsi mono!

¹⁰ A hã ma tô ãne irowaihu'u mo: “Danhimnhihârâzém hârâ duré rowamremezép ta hã wapari za'ra wa'aba wamhã, te za uburé pese aihi'rãtitõ tãma asimroi wa'wa, ropodo ẽtẽ waipo pré oru na i'manharĩ ãma aiwata za'ra wa'aba da hã.

¹¹ Ni'wa hã ãne na roti te te wapari õ wamhã, te za 'ri're wa'wa unhama ro'o u dasiwi me ni.”

¹² Ãne nherẽ, ni'wam norĩ zudeu Babilonia daza'rui wa'õtõ 're, rob'madâ'â'wa na dama 're hâimana za'ra mono da, a hã ipisutu za'ra hã, Sadraqui norĩ, Mezaqui, Abide-Negu, ta norĩ hã asimiroti na hã te te siwi aiwazéb õ di. Ate ihâiba'õ ãma, duré ropodo ẽtẽ waipo pré oru na da te dasiwi 'manharĩ da, i'rui ãma dame ãma wata za'ra õ di.

¹³ Tawamhã Nabucodonozo ãne hã te te wapari wa, ma tô ab'rui pese. Tahawa, ma tô 'ru za'ra, sô dahãsi da hã, Sadraqui norĩ zô, Mezaqui, Abide-Negu. Tahawa, apito hâimanazéb u ma tô da te dasiwi simro.

¹⁴ Tawamhã te ãne tãma nharĩ za'ra: — E tô sena ĩte ihâiba'õ ãma duré ropodo oru na da te dasiwi 'manharĩ da, te i'rui ãma bété dame aiwata za'ra wa'aba õ di.

¹⁵ E tawamhã te za oto ãhã na hã aihi'rãtitõ tãma asimroi wa'wa, ropoto ãma aiwata za'ra wa'aba da hã, danhimnhihârâzé hârâ hã duré rowamremezép ta hã sãna'rata wi. Mare wamhã, tô awa'awi te za unhama ro'o u hã dasiwi asãmra aba ni. E 'wa hã ihâiba'õ 're hâimana mono bâ, te te i'asõ'reptu za'ra wa'aba da hã.

¹⁶ Tawamhã ãne ma te Sadraqui, Mezaqui, Abide-Negu norĩ hã ãma sada'âbâ za'ra: — Apito, wa norĩ hã wamreme na wasimapa za'ra dai õ di.

¹⁷ 'Ri're wa'wa 're, unhama ro'o u, da te wanhamra wamhã, 'Re ihâimana u'âsi mono ãma 're iwawata za'ra mono ma hã waihu'u pese di, unhama ro'o wi te te iwazani za'ra da hã, duré wama irob'manharĩ za'ra zém hawi te te iwanho'reptu za'ra da hã.

¹⁸ Tawamhã duré wate, 'Re ihâimana u'âsi mono za te te wanho'reptu za'ra õ nherẽ, te za a hã iwawaihu'u za'ra, ate ihâiba'õ ãma duré ropodo ẽtẽ waipo pré oru na da te dasiwi 'manharĩ da, i'rui ãma za dame iwawata za'ra dai õ na hã tô.

Unhama ro'o wa'wa, aibâ ipréduptém norĩ si'ubdatõ isimasabzé wasu'u

¹⁹ Tawamhã Nabucodonozo ãne te te wapari wamhã, ma tô, si'ubdatõ aibâ ipréduptém norĩ zada hã ab'rui pese. Sada sahi za'ra wa, ma siwapré nhizuri pese. Tahawa, ma tô unhama ro'o na 'ri're wa'wa hã, da te sada wa'ro pese za'ra da hã dama ti'ru, 7 na ãma isahuzém na da te 're iwa'ro u'âsi za'ra mono zém nhipai u.

²⁰ Taha pari, ma tô tite dasi'wapéi 'manharĩ'wa norĩ, tisiré norĩ nhiptete nhipai u isiptete za'ra ma hã tãma 'ru za'ra, Sadraqui norĩ hã, Mezaqui, Abide-Negu te te pawasisi za'ra da, te te siwi sãmra da, unhama ro'o wa'wa u.

²¹ Tawamhã aibâ si'ubdatõ ipréduptém norĩ, i'uza hâpa ré, isi'ubuzéb ré, i'rãzaza za'ra ré, duré uburé aimawi na isi'uza za'ra ré ma tô pawasisi za'ra ni, unhama ro'o wa'wa 'ri're wa'wa 're, da te dasiwi sãmra da hã.

²² Tawamhã apito nhimiroti sipai waihu'u õ wa, unhama ro'o na 'ri're wa'wa hã wa'ro uptabi di. Tahawa, dasi'wapéi 'manharĩ'wa norĩ, ma tô unhama ro'o nhoto hã uprosi, si'ubdatõ aibâ ipréduptém norĩ te te siwi isãmra za'ra norĩ hã.

²³ Tawamhã Sadraqui norĩ, Mezaqui, Abide-Negu pawasisi ré, ma tô oto rere, unhama ro'o u hã.

²⁴ Tame Nabucodonozo ma tô si'aba'ré na wahudu. Wahutu wamhã, ma tô pẽ'ẽwara sina tite dama roti'wa norĩ hã sadanharĩ za'ra ãne: — Oro si'ubdatõ õm ne aibâ ipréduptém norĩ, pawasisi ré unhama ro'o u wa te wasiwi isãmra hã. — Ĩhe, e niha tane nherẽ hã tô, apito! — Ãne ma te asa ãma sada'âbâ za'ra.

²⁵ Tahawa apito te duré ãma sadanharĩ za'ra ãne: — E niha bété maparane si'uiwa na aibâ norĩ, pawasisi ãna sima iwẽ na unhama wa'wa 're inomro mono na hã wa 'madâ'â za'ra. Unhama wa'wa hâtoi ãna te sima iwẽ na i'remhã 're nomro. Misi maparane si'uiwa na ãma aibâ te te ihâiba waptob za'ra hã aiwa ihâiba'õ ne hã.

²⁶ Tawamhã apito, unhama ré hã 'ri're wa'wa 'ridawa u 'râwi wisi wamhã, ma tô hârâ 'rãihâ na 'mahârâ za'ra ãne: — Sadraqui, Mezaqui, Abide-Negu, 'Re ihâimana u'âsi mono danhipai u isiptete nhib'a'uwẽ norĩ, we aiwairébé aba ãwa! Tawamhã si'ubdatõ aibâ norĩ, unhama wa'wa hawi ma tô oto wairé. Wairébé wamhã,

²⁷ ma tô uburé dama ipire õme ihâimana za'ra 'râwi itẽme isihutu norĩ hã 'madâ'â za'ra, unhama ro niha te te ihâiba wamnarĩ za'ra õ na hã. Tawamhã duré unhama ro hã te te séré hõmo za'ra õ di. I'uza za'ra te te duré tiwi hâzata za'ra õ di. Duré hâiba uzé za'ra õ di, unhama nhizédé na hã.

²⁸ Tahawa, te apito hârâ 'rãihâ na tinha ãne: — Sadraqui norĩ te, 'Re ihâimana u'âsi mono ãma ma'ãpé wawata za'ra wa'aba! Ta hã ma tô tite hâiwa ãma romhuri'wa hã we satõ. Ma tô duré tinhib'a'uwẽ norĩ sõ'reptu za'ra, te te sina 're i'umnhasi za'ra mono hã. Ta norĩ hã te ĩsima iwẽ te te ĩma ãma uwaimrami za'ra õ di. Taha wa'rãmi ma tô tidâ'â za'ra zép si sima pisutu za'ra, hi'rãtitõ sisimro õ nhowa're're, duré aimawi ihâiba'õ ãma wata za'ra tõ da.

²⁹ Tahawa, wa za roti ipire na hã 'manha, siwa'ru a'uwẽ norĩ hã dapoto mono bâ, daro mono bâ duré damreme mono bâ 're idamreme zusi mono hã ni'wa hã Sadraqui norĩ te, Mezaqui, Abide-Negu, 'Re ihâimana u'âsi mono nhisi na te te nharĩ wasété wamhã, da te sihâri mono da, duré za isõrõwa da te tiwi prub da. E marĩ wa. Aimawi ihâiba'õ hã 'maihâimana õ wa, 'Re ihâimana u'âsi mono sine hã, ã norĩ te te isõ'reptu za'ra ne hã.

³⁰ Tawamhã apito Nabucodonozo, si'ubdatõ aibâ ipréduptém norĩ hã ma tô pisutu za'ra, Babilonia daza'rui wa'õtõ ãma romhuri ipire na te te tô duré 're romhuri za'ra mono da hã, te te aré ãma 're iromhuri za'ra mono zém nhipai u.