Daniéu 2 - ꞌRe Ihâimana Uꞌâsi Mono Zadawa Wasuꞌu

Nabucodonozo te te irosawẽrẽzé wasu'u

¹ Babilonia ãma Nabucodonozo apito na 're hâimana mono ré, maparane ãma iwahub ãma ma tô rosawẽ. Tahawa nasi sõtõ waihu'u õ di, hâtâ'â za'ẽtẽ wa.

² Tahawa, i'rãiwaihu'u pese norĩ zô, marĩ 'manharĩ nhipese 'wa norĩ zô, simi'â ré norĩ zô, duré wasi na romnhoré'wa norĩ zô hã ma tô sô tihârâ za'ra, te te irosawẽrẽzém na te te ãma tãma saprĩ za'ra da. Tawamhã ta norĩ hã apito u sihutu wamhã, isõ're oto simasa wa,

³ ma tô ãne ta norĩ ma, tinhimirosawẽrẽ hã wasu'u za'ra: — Te irosawẽrẽzé hã ma tô ĩhâtâ'â za'ẽne ĩma tisõ. Tahawa, wa ĩsima wẽ, marĩ te te iwasu'uzé, te waihu'u da.

⁴ Tawamhã ta norĩ hã aramaicu na damreme wamri na, ma tô apito ma ãne nharĩ za'ra: — Apito, 're aihâimana u'âsi mono da si, wa wasima wẽ za'ra ni! Ma'ãpé irosawẽrẽ hã wama wasu'u za'ra na. Tawamhã wa za marĩ te te iwasu'u na hã aima ãma saprĩ za'ra ni.

⁵ Tane nherẽ, apito ma tô sada'âbâ za'ra asa ãne: — Ãne wa tô ĩsima rowairébé: A norĩ wa'wa, ĩnhimirosawẽrẽ na ãma ĩma saprĩ za'ra wa'aba õ wamhã, wa za uburé dama ai'ru za'ra wa'wa, da te aiwa'õtõ za'ra wa'aba mono da, duré asõrõwa za'ra wa'wa, da te aiwi prub za'ra wa'aba mono da, isiprup si simi'wara mono da, sa'wari 'rãihâ na.

⁶ Tane nherẽ, te irosawẽrẽzé ĩma wasu'u za'ra wa'aba wamhã, duré ãma ĩma saprĩ wẽ za'ra wa'aba wamhã, wa za taré marĩ iwa'âbâ za'ẽtẽ na ãma aima ĩnhoprub za'ra wa'wa. Wa za duré aipisutu za'ra wa'wa, dama aipire na 're aihâimana za'ra wa'aba mono da. Tahawa, ma'ãpé te irosawẽrẽzém na hã ãma ĩma rowasu'u za'ra wa'aba. Taha pari te za duré marĩ te te iwasu'uzém na ãma ĩma isaprĩ za'ra wa'wa.

⁷ Tawamhã i'rãiwaihu'u pese norĩ, te duré ãne tãma nharĩ za'ra: — Ma'ãpé tô asimirosawẽrẽ a'â wama wasu'u za'ra na uimrehẽne. Taha parip si, wa za marĩ te te iwasu'uzé ãma aima saprĩ za'ra ni.

⁸ Tane nherẽ, apito, ma tô duré ãne ãma tãma wa'rãmi za'ra: — Wa tô ai'upsibi me za'ra wa'wa. Taré bâdâ uprosi za'ra wa'aba da, ma tô asima irosa'rata za'ra wa'wa, za te aima irowairébé za'ra wa'aba zéb da hã, asina waihu'u siromo za'ra wa'aba wa.

⁹ Te irosawẽrẽzé, ĩma wasu'u za'ra wa'aba õ wamhã, te za tô õhõ na si aihâiba mono bâ aba te aima irob'manharĩ za'ra wa'aba zé hã asina isõ'õtõ za'ra wa'wa. Taré aihâimana nhipese sina asadawa nhipese za'ra wa'aba na ĩma rowasu'u za'ra wa'aba da hã, ma tô asisadaihu'u siromo za'ra wa'wa, romhâimanazé hã niha u, ãma ĩwi saprĩ za'ra wa'aba da. Tahawa, ma'ãpé ĩma wasu'u za'ra wa'aba te irosawẽrẽzé hã. Tawamhã taha zarina si wa za duré aiwaihu'u pese za'ra wa'wa, za ãma ĩma isaprĩ za'ra wa'aba zé, aima iwaihu'u pese za'ra wa'aba na hã.

¹⁰ Tawamhã rowaihu'u pese 'wa norĩ, ma tô apito hã ãma sada'âbâ za'ra ãne: — Ni'wai õ di ti'ai ãma hã, asimirowaptẽrẽ zarina te te aima i'manharĩ da hã. Duré apito hã niwamhã i'maihâimana õ, siptete uptabi nherẽ, ãne hã te te iwaptẽrẽ hã, rowaihu'u pese 'wa norĩ wi hã, marĩ na i'uwaimrami'wa norĩ wi hã, duré wasi na romnhoré'wa norĩ wi hã.

¹¹ A hã iwaptẽrẽ hã pire uptabi di. Ni'wa hã te te aima ãma irowasu'u da hã waihu'u õ di. Ihâiba'õ norĩ si te aré tô niha na hã aima hâi'ré za'ra. Tane nherẽ, ta norĩ hã ãme ti'ai ãma dasiré 're hâimana za'ra mono õ di.

¹² Ãne hã te te tãma waihu'u za'ra wa, ma tô apito hã sada ab'rui pese za'ra. Tahawa, ma tô uburé rowaihu'u pese 'wa Babilonia ãma 're ihâimana za'ra mono norĩ, da te uprosi da dama 'ru za'ra.

¹³ Tawamhã ãne na apito te te irowairébézém na roti hã ma tô da te ãma ropé. Tahawa, te Daniéu norĩ zô isiré norĩ me sô tarĩtĩ za'ra ni, ta norĩ zama, da te dame uprosi da.

Daniéu ma, 'Re ihâimana u'âsi mono, rosawẽrẽ te te ihâi'rézé wasu'u

¹⁴ Tawamhã Daniéu ma tô Arioqui, apito 'madâ'â'wa norĩ nhib'ihâ'a zô rĩtĩ mono da hã mo, Babilonia ãma uburé rowaihu'u pese 'wa norĩ te te uprosi da, romreme te te i'âri zô hã. Tawamhã ma tô mreme wẽ sina

¹⁵ sadanha ãne, Arioqui hã: — E marĩ da, ma tane hã apito tinhimiroti itete na hã 'manha. Tawamhã Arioqui ma tô iromhâimanazém na hã ãma tãma rowasu'u.

¹⁶ Ãne wa, ma tô Daniéu apito u hã mo, te te tiwi waptẽrẽ da, bâdâ te te a'â tãma sõmri da, isimirosawẽrẽ na te te ãma tãma saprĩ da.

¹⁷ Taha pari Daniéu, ma tô 'ri u hã apâ mo. Morĩ wamhã, ma tô tisiwaihu'u norĩ ma, Anania, Mizaéu, Azaria norĩ ma hã uburé tãma rowasu'u za'ra.

¹⁸ Tawamhã Daniéu te tãma nharĩ za'ra, 'Re ihâimana u'âsi mono hâiwa ãma 're isãmra mono ma, mreme zusi da, ãma isiwamri za'ra zé te te tiwi waptẽrẽ za'ra da, duré apito nhimirosawẽrẽ dama iwaihu'u'õ te te tãma hâi'ré za'ra da, Daniéu norĩ, tisiwaihu'u norĩ me, Babilonia ãma rowaihu'u pese 'wa norĩ zu, da te uprosi tõ da.

¹⁹ Tawamhã Daniéu, tô taha bara na 'Re ihâimana u'âsi mono sõtõ 'rowim ne, marĩ te te tãma ihâi'ré hã ma tô titõmo na 'madâ. Taha na ma tô 'Re ihâimana u'âsi mono hã marĩ te te iwasu'uzé hã tãma hâi'ré. Tahawa, ma tô 'Re ihâimana u'âsi mono ãma tiwata,

²⁰ ãne: “'Re ihâimana u'âsi mono nhisi na si ãma 're dawata u'âsi za'ra mono, taha ãma si uburé rowaihu'u norĩ hã duré isiptetezé hã 're hâimana zahuré mono wa.

²¹ Õhõ si te za niha hã we 're iromhâimana mono zém na hã te te ãma 're azaprĩ. Õhõ si te za duré apito da hã te te 're da'a'maza. Õhõ si te za duré apâ te te 're da'azani. Duré õhõ si te za rowaihu'u pese 'wa norĩ ma hã rowaihu iwẽ hã te te tãma 're anhomri. Õhõ si te za duré i'rã nhimiza'rese norĩ ma hã isimiza'rese wẽ hã te te tãma 're anhomri.

²² Õhõ si te za marĩ dama isa'rese'õ hã dawi isima'uri pe hã te te dama 're ahâi'ré, robra na uburé marĩ 're ihâimana za'ra mono hã, tô õhõ ãma si rowa'a hã 're hâimana mono dâ'âsina.

²³ Ĩhi'rata norĩ te, 'Re ihâimana u'âsi mono, wa ai'ãma ĩwata, a hã rowaihu iwẽ na duré ĩnhiptetezém na ãma ĩma asõprub zahuré wa. Ma tô duré iwapa, ãma aima iwamreme zusizé hã, ãma iwazada'âbâ za'ra zém na, apito nhimirosawẽrẽ hâi'rézém na hã.”

Daniéu, apito ma, isimirosawẽrẽ te te ãma tãma isaprĩzé wasu'u

²⁴ Tawamhã Daniéu ma tô Arioqui, apito 'madâ'â'wa norĩ nhib'ihâ'a zô rĩtĩ mono da hã mo, Babilonia ãma uburé rowaihu'u pese 'wa norĩ te te uprosi da, romreme te te i'âri zô hã. Ãhã wa, ma tô Daniéu hã tãma tinha ãne: — Arioqui, rowaihu'u pese 'wa norĩ hã simro tõ. Apito u si ĩzaprõni, te te irosawẽrẽzém na te ãma tãma saprĩ da.

²⁵ Tawamhã Arioqui, ma tô Daniéu waptu na apito hâimanazéb u hã saprõ. Tawamhã te ãne tãma tinha: — Ãhãta zudeu wa tô 'manhopẽtẽ, wa te ãma ai'uté za'ra wa, irob za'ra hawi we wa te isimroi mono 'remhã. Ã hã te za irosawẽrẽzé hã ãma aima saprĩ.

²⁶ Tawamhã apito Béutésaza na isisi amo hã te Daniéu hã sadanha ãne: — E te irosawẽrẽzé hã ĩma wasu'u waihu'u pese di. E duré ãma ĩma saprĩ waihu'u pese di, marĩ te te iwasu'uzém na hã.

²⁷ Tawamhã Daniéu ma te ãma tãma wa'rã ãne: — Tô rowaihu'u pese 'wa nherẽ, marĩ 'manharĩ nhipese 'wa nherẽ, simi'â na romhuri'wa nherẽ, duré wasi norĩ na romnhoré'wa 're hâimana za'ra mono nherẽ, tiwi iwaptẽrẽ za'ra zé hã te te tô ta norĩ hã ãma aima saprĩ waihu'u za'ra õ di.

²⁸ Tane nherẽ, te hâiwa ãma 'Re ihâimana u'âsi mono hã 're sãmra, uburé marĩ dama iwaihu'u'õ hâi'ré'wa hã. Õ hã irosawẽrẽzém na ma tô aima waihu'u siro, za marĩ iwatobrozéb da hã. Tahawa, apito awa'awi na wa za asimirosawẽrẽ hã asõtõ 'rowi marĩ i'madâ'âzé hã aima ãma saprĩ za'ra.

²⁹ — Apito, a hã asimiwaptâ wa, anomro ré, ma tô romhutu'õ wab da hã irosa'rata u'â. Taha ré, uburé marĩ dama isa'rese'õ hâi'ré'wa hã ma tô aima hâi'ré, za marĩ iwatobrozéb da hã.

³⁰ Dama iwaihu'u'õ na ãma isaprĩzé hã ma tô ĩma waihu'u. E wa hã ĩ'rãi waihu'u wẽ na uburé dama 're ĩhâimana mono wa, ma tô ãne hã ĩma hâi'ré. Mare di. A hã irosawẽrẽzém na marĩ te te iwasu'uzé hã waihu'u da si, duré asimirosa'rada hã niha na iwaihu'u da si, ma tô ãne hã ĩma hâi'ré.

³¹ — Apito, asõtõ 'rowim ne, ma tô ropodo isa'ẽne dahâiba ne hã i'madâ, asõ're isa hã hâiwi. Ropoto na rowa'a hã. Tane nherẽ, pipa uptabi di, da te i'madâ'â da hã.

³² Ẽtẽ waipo pré oru na i'rã hã. Duré isõ'udu hã ipaihi me hã ẽtẽ waipo prã prata na. Duré idi hã izada'õtõ me hã ẽtẽ topsada brõzi na.

³³ Ite norĩ hã isi'uwazi tete na. Duré ipara hã isi'uwazi tete na aiwa ãma isipo'o na i'manharĩ zahuré hã, duré zé'a na aiwa ãma isipo'o na i'manharĩ zahuré hã.

³⁴ Tawamhã a hã 'madâ'â ré, ma tô ẽtẽ tõmo wawẽ uptabi inomrozém hawi da te rési õ nherẽ, ẽtẽ nhisi hawimhã waptãrã. Waptã'ã wamhã, ma tô ropoto para hã uwaimra. Ta hã ma tô te te para nhi'ẽ.

³⁵ Tawamhã ta norĩ hã ma tô uburé siti'a za'ra awa'awi, isi'uwazi tete 'manharĩ norĩ hã, zé'a hã, brõzi hã, prata hã, duré oru hã, amnho trigu, da te 're pré'é za'ra mono wa, iteihi zapru 're isimi'wara mono ne. Tawamhã rowa'u hã ma tô uburé te te sate, te te 'mairẽme ãna. Tane nherẽ, ma tô ẽne hã si'ré. Si'réi mono wamhã, ma tô ẽtẽ 'rãihâ na ai'manha. Ta hã ma tô uburé rob'upsi.

³⁶ — Ã hã asimirosawẽrẽ hã. Ãhã na awa'awi wa za oto ãma aima saprĩ, waihu'u da, a hã.

³⁷ Apito, uburé apito norĩ nhipai u hã asiptete uptabi di. 'Re ihâimana u'âsi mono hâiwa ãma 're isãmra mono hã ma tô ãne hã aima pisutu, dama asi'i'rãnho'õmo da hã, duré asiptete na dama aipire na 're aihâimana mono da.

³⁸ Õ hã daro mono bâ uburé asib'rata 're dahâimana za'ra mono da hã, ma tô aima pisutu. Abaze norĩ zama, si norĩ zama ma tô duré aima pisutu za'ra. A hã ropoto 'rã oru 'manharĩ hã te aiwasu'u.

³⁹ Tawamhã danhib'ihâ'a na 're aihâimana mono parimhã, te za aimawi danhib'apito hã 'maihãzé, asapari siptete prã na 're ihâimana mono da hã oto. Taha parimhã te za duré aimawi hã 'maihãzé si'ubdatõ ãma hã, ẽtẽ topsada brõzi na ãma isimiré hã uburé te te 're ida'a'madâ'â mono da hã, ro pâ.

⁴⁰ Taha parimhã, te za duré maparane si'uiwa na ãmamhã ti'maihâiba. Ta hã isi'uwazi ferru tete uptabi wa, te te marĩ 're i'apru mono ne hã za. Tô ferru hã uburé marĩ te te 're iprub za'ra mono ne, te za ã hã dama i'rãnho'u hã, uburé aimawi danhib'ihâ'a nhimi'madâ'âzé hã te te apru, daro mono bâ.

⁴¹ Tawamhã asõtõ 'rowi ropodo i'madâ'â na hã ipara, duré ipara hi hã isi'uwazi tete 'manharĩ na duré zé'a 'manharĩ na aiwa ãma isipo'o na. Ã hã dama i'rãnho'õmo nhimi'madâ'âzé, za sima isipo, te wasu'u. Ãne nherẽ, te za zahadu siptete wazu na 're hâimana, isi'uwazi tete ne hã. E marĩ wa. Ma tô i'madâ a hã, isi'uwazi waipo ferru hã zé'a na iwazari hã.

⁴² Tawamhã ipara hi hã isi'uwazi tete na aiwa ãma isipo'o na, duré zé'a na aiwa ãma isipo'o na hã. Ta hã nima niwĩmhã dama i'rãnho'õmo nhimi'madâ'âzé isiptede, duré nima niwĩmhã isib'uware, te wasu'u.

⁴³ Apito, a hã ma tô duré isi'uwazi tede, zé'a na iwazari hã i'madâ. Ta hã danhib'ihâ'a norĩ sisô 're irĩtĩ zahuré mono zé, te wasu'u, dasina damrozéb u'âbâmhã sina 're sitob zahuré mono da. Tane nherẽ, isi'uwazi tete norĩ, zé'a me sina 're isito waihu'u zahuré mono õ ne, danhib'ihâ'a nhimi'madâ'âzém norĩ zama hã sina 're sito waihu'u zahuré mono õ di za.

⁴⁴ Tawamhã apito norĩ ãne na 're hâimana za'ra mono ré, 'Re ihâimana u'âsi mono hâiwa ãma 're isãmra mono hã te za danhib'ihâ'a nhimi'madâ'âzé niwa za da te ipru waihu'u'õ hã pisutu, aimawi danhib'ihâ'a norĩ te te ãma i'ai'uté za'ra õ hã. Tawamhã ã hã te za aimawi ihâiba amo norĩ danhib'ihâ'a nhimi'madâ'âzé hã uburé pese uprosi pese. Tahawa, te za õhõ si oto 're hâimana u'âsi, pire na apito nhimi'madâ'âzém na hã.

⁴⁵ Ãne te te iwasu'u hã, ẽtẽ tõmo wawẽ, da te rési õ nherẽ, ẽtẽ nhisi hawi waptã'ã ré i'madâ hã, isi'uwazi tede ferru 'manharĩ na, brõzi na, prata na, zé'a na, duré oru na ropodo te te ipru pe. 'Re ihâimana u'âsi mono ma tô aima hâi'ré, za marĩ apto'oré iwatobrozé. Ãne irosawẽrẽzé hã. Duré ãne te aima ãma isaprĩzé hã i'uwaibaba na si wa aima wasu'u.

Daniéu pawa'âbâzé wasu'u

⁴⁶ Tawamhã apito Nabucodonozo, Daniéu nho'remhã ma tô hi'rãtitõ aime. Ma tô duré ti'ubu na ti'ai u hã ropto. Taha pari ma tô duré dama waihu'u, Daniéu ma mram na danhoprubzé hã, duré wedewa'u zadaze na danhoprubzé hã da te tãma sa'ra da, isõ're u hã.

⁴⁷ Tawamhã te oto Daniéu ma tinha, ãne: — 'Re ihâimana u'âsi mono ãma, a norĩ wa'wa 're i'aiwata za'ra wa'aba mono hã, sena na te tô uburé ihâiba'õ norĩ nhipai u siptete uptabi na 're hâimana. Uburé ti'ai ãma apito norĩ ma, te duré Danhib'apito uptabi na hã 're hâimana. Tahawa, ĩma waihu'u pese di oto, õhõ si uburé dama iwaihu'u'õ hâi'ré'wa na hã. E marĩ wa. Taha zarina si, a hã ma tô te irosawẽrẽzém na isa'rese'õ na i'uwaibaba na si ãma ĩma isaprĩ na hã ãma i'uwaimra, te waihu'u da hã.

⁴⁸ Tawamhã apito ma tô Daniéu danhipai u pire na danhib'ihâ'a na 're hâimana mono da hã pisutu oto. Ma tô duré ãma tãma tinhopru, marĩ iwa'âbâ za'ẽtẽ norĩ na hã. Ma tô duré Babilonia ãma daza'rui wa'õno ihâimana ãma dama i'rãnho'õmo na 're hâimana mono da hã, duré uburé rowaihu'u pese 'wa norĩ nhib'ihâ'a na 're hâimana mono da hã pisutu, ti'ai wa'õtõ nho'õmo 'remhã.

⁴⁹ Tawamhã Daniéu te te iwaptẽrẽ zarina, ma tô apito hã pisutu za'ra Sadraqui norĩ hã, Mezaqui, Abide-Negu, Babilonia ãma daza'rui wa'õno ihâimana ãma rob'madâ'â'wa na dama 're hâimana za'ra mono da hã. Tane nherẽ, Daniéu si te apito nhorõwa 'ri 'rãihâ 'remhã te te 're romhuri u'âsi.