Daniéu 12 - ꞌRe Ihâimana Uꞌâsi Mono Zadawa Wasuꞌu

Rob'rãsutu wasu'u

¹ Hâiwa hawi romhuri'wa hã te zahadu duré ĩma rowasu'u ãne: — Ãne na we 're romhâimana mono ré hã, te za hâiwa ãma romhuri'wa Migueu hã we oto sihâi'ré, 'Re ĩhâimana u'âsi mono nhib'a'uwẽ 'wawi 're isimapa mono 'wa hã. Taha ré, ropire uptabi na te za tiromhâiba za, niwa daza'rui mono bâ a'uwẽ 're ihâimana za'ra mono ma, ãne hã we iromhâimana mono õ, ã wamhã. Tane nherẽ, tô we iromhâimana mono zém na hã te za 'Re ĩhâimana u'âsi mono te, ibaihâ 're, isisi ui'éré ré norĩ hã uburé sõ'reptu za'ra, tinhib'a'uwẽ hã.

² Tawamhã da'ahâ uptabi na 're idadâ'â za'ra mono hã te za apâ tahâiwa'utu za'ra ni. Ni'wam norĩ si te za 're idanomro u'âsi mono zé hã sina uwaimrami za'ra. Duré nima norĩ te za rowazém na si 're ihâimana za'ra mono zé hã sina sõ'õtõ za'ra, robzépada isi'utõrĩ'õ u 're ihâimana za'ra mono da hã.

³ 'Rãiwaihu'u wẽ na 're ihâimana za'ra mono norĩ hã te za tihâiba na te te sina 're rob'uiwẽ za'ra, hâiwa na 're isimasa mono norĩ te te 're irob'uiwẽ za'ra mono ne. Duré i'uwaibaba na si te te dama 're irowasu'u za'ra mono norĩ hã te za hâiwa na wasi te te 're irob'uiwẽ za'ra mono ne, te te 're rob'uiwẽ u'âsi za'ra, sina.

⁴ Daniéu, ma'ãpé a hã romreme na rob'ui'éré ré hã marĩ uptobzém na tob'rata to na, sitom haré a'â nomro da, rob'rãsutu u. Da'ahâ uptabi na te za 're dasiwa'rãmi rowaihu'u wẽ zô, da te dasima sa'ẽtẽ za'ra da.

⁵ Tawamhã wa tô maparane hâiwa ãma romhuri'wa â zaihâ na isima'wara hã 'madâ'â zahuré. Ihâiba amo te pa zara niwĩ za, ĩ niwĩ. Duré ihâiba amo, te pa zaihâ amo niwĩ we za.

⁶ Tawamhã te nimahã hâiwa ãma romhuri'wa, tihâiba amo hã uza hâi wẽ uptabi na pa sãrã u isa hã sadanha ãne: — E niwa te za ã hã marĩ iwẽ uptabi na hã tiromhâiba.

⁷ Tawamhã hâiwa ãma romhuri'wa tinhib'rada hâimo te te wẽ sina, te 'Re ĩhâimana u'âsi mono idâ'â'õ nhisi na tinha ãne: — Wa za aima ropisutu. Ãne hã te za tô tiromhâiba, si'ubdatõ wahu aiwa ãma isipo'o u, 'Re ĩhâimana u'âsi mono tinhib'a'uwẽ da, te te ipisutu norĩ ma, da te tãma 're irob'manharĩ wasété za'ra mono zé hã si'utõrĩ wapsi.

⁸ Tane nherẽ, te waihu'u wẽ õ di wa hã, te wapari nherẽ. Tahawa, wa tô duré ãma sadanha, ãne: — Ma'ãpé ĩzawi na hã ãma ĩma rowasu'u na. E niha te za uburé ãne na hã we tiromhâimana 'rãsutu.

⁹ Ma tõ ãma ĩzada'â ãne: — Daniéu, aihâtâ'â ãna aimorĩ oto. E marĩ wa. Ã hã ĩmreme hã tom haré pi'uriwi a'â hâimana wa za, rob'rãsutu u.

¹⁰ Da'ahâ na te za tasipese za'ra ni. Ãhã wa, dawẽ uptabi na te za oto 're dahâimana za'ra. Tane nherẽ, iwasété norĩ hã te za tô tihâimana wasété na si te te ãma 're uzusi za'ra. Duré ãne na za iromhâimana mono zé hã ta norĩ hã te te siwi iwaihu'u za'ra da hã mare di za. 'Rãiwaihu'u wẽ na 're ihâimana za'ra mono norĩ si te za ãne na iromhâimanazé hã waihu'u za'ra.

¹¹ Abaze zata na 're idanhoprub za'ra mono zé da te isizârizé bâtâ hawim haré, duré 'Re ihâimana u'âsi mono nhorõwa 'ri 'rãihâ 're, marĩ iwasété uptabi, da te dasiwi isãrĩ hawim haré te za 1.290 na bâdâ hã ãma ai'utõ za.

¹² 'Re ĩhâimana u'âsi mono ãma i'uwaibaba na si 're ihâimana za'ra mono norĩ hã te za to sina hã 're hâimana za'ra, 1.335 bâdâ imorĩ 'remhã!

¹³ — A hã Daniéu, ma'ãpé rob'rãsutu u asiptete na ãma 're aihâimana mono. Te za tô atâ. Tane nherẽ, te za apâ hã aihâiwa'u, aipawa'âbâzé âri da hã.