Daniéu 11 - ꞌRe Ihâimana Uꞌâsi Mono Zadawa Wasuꞌu

¹ — Dariu hã, Média norĩ ma, i'rã nho'õmo na ihâimana na imorĩ'rata na ãma iwahub ãma, wa tô pawapto. Wa tô duré i'wawi aimapa.

Ezitu ãma, duré Siria na romnhisi ãma dama i'rã nho'õmo norĩ wasu'u

² Hâiwa hawi romhuri'wa hã te zahadu timreme na ãma ĩma uzusi ãne: — Sena na marĩ na hã wa za oto aima rowasu'u. Si'ubdatõ te za Persia ãma apito norĩ danhib'ihâ'a na dama 're hâimana za'ra za. Ta norĩ za'u si, te za duré maparane si'uiwa na ãma dama si'apito, uburé apito norĩ iwana ihâimana za'ra nhipai'u isibro pe hã. Ta hã sibro pese uptabi wa, te za siptete na dama 're hâimana, i'rã nho'õmo na. Te za uburé tite dasi'wapéi 'manharĩ'wa norĩ hã 'rã'õtõ, Grécia ãma a'uwẽ te te 'wapé za'ra da hã.

³ Taha parimhã ihâiba amo apito isi'wapé ze hã te za duré watobro. Tawamhã dama isi'i'rãnho'õmozé hã siptete uptabi wa, te za marĩ te te sima iwẽ na te te 're ab'manharĩ.

⁴ Tane nherẽ, isiptetezé bâ oto iwa tãma hâimana wamhã, te za isi'i'rãnho'õmozé hã tiwi waptãrã. Tahawa, maparane si'uiwa na, te za ti'a hã da te dasima wa'õtõ. Duré isõwa're're apito norĩ za ihâimana za'ra hã za isihudu norĩ hãi õ di za. Duré isiptede tãma 're ihâimana mono ne hãi õ di za, za tãma 're ihâimana za'ra mono hã.

⁵ — Ezitu ãma apito 're ihâimana mono hã siptete di za. Tane nherẽ, nima hã ite dasi'wapéi 'manharĩ'wa norĩ 'madâ'â'wa hã, isipai u siptete uptabi na te za 're hâimana. Tahawa, te za dama i'rã nho'õmo na siptete uptabi na te te 're da'ab'madâ'â.

⁶ Niha ãma wahub za'ra parip si, te za Ezitu ãma apito hã Siria ãma apito me dasisazezé hã sima 'manharĩ zahuré. Taha zarina, te za Ezitu ãma apito hã, Siria ãma apito 'ra ma, ti'ra sipi'õ hã tisõ, za ãma mro da hã, rowẽ si we apâ uburé dama 're romhâimana mono da. Tane nherẽ, te za isimirowa'õtõ zahuré zé hã tiwi ab'uwa zahuré. E marĩ wa. Taha pi'õ hã duré imro hã duré uburé romhuri'wa norĩ hã za da te simroi wa.

⁷ Ãne na ronomro pese õ ré, te za pi'õ sisãnawã hã oto si'apito. Tahawa, te za susi za'ra, hâiwa nhimi'e niwĩ apito te, dasi'wapéi 'manharĩ'wa norĩ hã. Te za duré ta norĩ te, 'ri isiptete u hã sisisi. Te te oto 'wapé za'ra wamhã, te za ãma ai'uté za'ra.

⁸ Tawamhã marĩ na romhâiba 'manharĩ, ãma 're idawata za'ra mono hã, duré marĩ iwa'âbâ za'ẽtẽ norĩ hã, ẽtẽ waipo pré oru 'manharĩ norĩ hã, duré ẽtẽ waipo prã prata norĩ hã te za Ezitu u uburé siwi 'wasa. Tawamhã nima norĩ wahum na te za hâiwa nhimi'e niwĩ daza'ru te, apito ma hã rowẽ na a'â 're hâimana mono da hã, tãma marẽ.

⁹ Taha pari te za hâiwa nhimi'e niwĩ daza'ru te, apito hã Ezitu te te âri da hã pibu. Tane nherẽ, da te ãma ai'uté wa, te za apâ tinhipti'ai u sina siri.

¹⁰ — Hâiwa nhimi'e niwĩ daza'ru te, apito 'ra norĩ hã te za dasi'wapé da, te te sima rob'upsãtã. Duré dasi'wapéi 'manharĩ'wa norĩ isõ'uma hã te za 'rã'õtõ. Tawamhã nima hã i'ra te za tite dasi'wapéi 'manharĩ'wa norĩ ré watobro, Ezitu ãma te te ai'uté za'ra da hã. Te za 're i'â pusi mono ne, te te da'ãma wamroi pese. Te za duré Ezitu u sisisi. Sisisi wamhã, te za apito te, 'ri isiptete u te te da'wapé za'ra.

¹¹ Tawamhã Ezitu te, apito sib'rui pese wamhã, te za tite dasi'wapéi 'manharĩ'wa norĩ ré watobro, hâiwa nhimi'e niwĩ daza'ru te apito te te 'wapé da. Tahawa, hâiwa nhimi'e niwĩ dasi'wapéi 'manharĩ'wa norĩ hã te za ezipsiu norĩ ma sihâiba nhomri za'ra.

¹² Tahawa, Ezitu ãma apito te za si'madâ'â zei pese, hâiwa nhimi'e niwĩ daza'ru apito te, dasi'wapéi 'manharĩ'wa norĩ ãma, te te ai'uté za'ra wẽ te, ahâ uptabi na te te uprosi za'ra wa. Tane nherẽ, taha tinhiptete na ãma hâimana hutu di za.

¹³ Taha parimhã te za duré hâiwa nhimi'e niwĩ daza'ru te apito hã dasi'wapéi 'manharĩ'wa norĩ hã 'rã'õtõ, imorĩ'rata na dasi'wapéi 'manharĩ'wa norĩ nhipai u, ahâ uptabi na. Tawamhã nima hã wahu ãma morĩ pari, tite dasi'wapéi 'manharĩ'wa norĩ ré, te za apâ sina sô siri, ezipsiu norĩ te te 'wapé za'ra da hã.

¹⁴ — Tahawa, Ezitu te apito da, te za da'ahâ uptabi na sada tahâimana za'ra ni. Ta norĩ 'remhã Izaraéu nhihudu norĩ nhipti'ai 'remhã te za nima norĩ aibâ isipãrĩ ze hã dame tihâimana za'ra. Ta norĩ hã te za tô sada dame tihâimana za'ra, sõtõ 'rowim ne marĩ te te i'madâ'â za'ra zéb zarina. Ãhã nherẽ, te za ta norĩ ãma ai'uté za'ra ni.

¹⁵ Tawamhã hâiwa nhimi'e niwĩ daza'ru te apito, tite dasi'wapéi 'manharĩ'wa norĩ ré, te za mo. Tahawa, dasi'wapé da, te za wede hâpâ norĩ, nimahã 'ri nho'õmo 'wawi wa'ra 'rãihâ te na te te sima isa'ra mono na hã ãma siwi uirĩ, te te ãma sa'uri za'ra wa, ãma sisisi da. Ãhã wamhã, te za ãma ai'uté za'ra. Tawamhã tô hâiwa nhimi'e niwĩ daza'ru hawi dasi'wapéi 'manharĩ'wa norĩ Ezitu u te te sina irosa'ré za'ra mono hã ezipsiu dasi'wapéi 'manharĩ'wa iwẽ norĩ isiptede asa tihâiba na te te ãma tãma wa'rãmi waihu'u za'ra õ di. Te za tô õne haré da te sate, tãma sib'uwa za'ra wa.

¹⁶ Ezitu u isisisi norĩ hã te za ezipsiu dasi'wapéi 'manharĩ'wa norĩ ma, sima iwẽ na niha hã marĩ tãma 'manharĩ za'ra, ni'wa hã sada hâimana za'ra ãna. Tawamhã ta norĩ hã te za Ti'a Iwẽ uptabi u asisi. Te za duré tô ãma ai'uté za'ra.

¹⁷ — Tawamhã hâiwa nhimi'e niwĩ daza'ru te apito, te za tô uburé tite dasi'wapéi 'manharĩ'wa norĩ ré hã mo. Tahawa, te za Ezitu te apito me marĩ na dasisazezé hã sima 'manharĩ zahuré. Te te ãma ai'uté da hã, te za Ezitu te apito ma, ti'ra sipi'õ hã tisõ, ãma mro da. Tane nherẽ, te te irowa'õtõzé hã te te ãma uwaimrami õ di za.

¹⁸ Tawamhã ta hã âporé Mediterãniu na isisi zaihâ na 'ri nho'õmo norĩ 're ihâimana za'ra mono norĩ ãma, ahâ na te za ãma ai'uté za'ra. Tane nherẽ, dasiré a'uwẽ'õ nherẽ, dasi'wapéi 'manharĩ'wa norĩ nhib'ihâ'a hã te za apito 're isi'madâ'â zei mono zé hã tiwi uprosi. Te za duré rowazé hã tãma tihi.

¹⁹ Tawamhã apito hã te za apâ oto sina siri, ite ti'ai wa'õtõ nho'õmo 're, 'ri isiptete norĩ u hã. Tane nherẽ, isimi'madâ'âzé hã te za tiwi waptãrã. Tahawa, niwamhã oto 're sihâi'ré mono õ di za.

²⁰ — Taha nho'wa're're te za duré apito ihâiba amo hã danhib'ihâ'a na dama 're hâimana. Ta hã te za rob'uiprazé arĩ ubumroi'wa hã satõ, sa'ẽtẽ na te te dawi 're apo'o mono da, isimi'madâ'âzéb 're, ãma sisibro pese da. Tawamhã nimahã wahu pari, te za õ hã apito hã oto dârâ, rom na dasi'wapéi ré ãne na hã dâ'â õ nherẽ.

²¹ — Taha nhana'remhã te za duré 'maihãzé apito hã, aibâ iwasété uptabi, dama ĩwẽ'õ. Si'apito da, da te pisutu õ nherẽ, te za tô dawi ãzé, hâimana wasété sima'uri pese sina.

²² Ta hã te za uburé tinhitob'ru dasi'wapéi 'manharĩ'wa norĩ ãma hã ai'uté za'ra. Duré sasedoti dama isa'ẽne ipire uptabi hã te za tiwĩ.

²³ Dasisazezé te te dame 'manharĩ nherẽ, te za taré dama ãma sadawa hapese, ãma dâ'â ãna. Duré tô ite dasi'wapéi 'manharĩ'wa norĩ umrore nherẽ, te za we siptete mono.

²⁴ Daza'ru ti'ai wa'õtõ nho'õmo 're, simarĩ pese na 're ihâimana za'ra mono hã te za simiza'rese õ ré susi za'ra. Tahawa, ta norĩ ma, te za marĩ iwasété uptabi hã 'manharĩ za'ra, niwa ihi'rata norĩ te te siwi i'manharĩ za'ra õ hã. Tawamhã tite dasi'wapéi 'manharĩ'wa norĩ ma, te za marĩ iwa'âbâ za'ẽtẽ mono hã isib'rata te te tãma po'o, te te da'ãma i'ai'uté za'ra norĩ wi, te te iwaibui mono hã. Tawamhã suru na a'â we hâimana ré, te za sima rosa'rata, 'ri isiptete norĩ te te 'wapé za'ra da hã, ti'ai wa'õtõ nho'õmo 'remhã.

^25-26 — Tinhiptete na isi'umnhasi zarina, duré tinhib'ru na isi'madâ'âzéb zarina, te za tite dasi'wapéi 'manharĩ'wa norĩ te te simro, te te ropãrĩ za'ra mono sina sisõré pese na, Ezitu te apito te te 'wapé da hã. Tawamhã ta hã tisi'wapéi u te za watobro, tite dasi'wapéi 'manharĩ'wa isiptete uptabi ré. Tane nherẽ, te te da'ãma i'ai'uté za'ra da hã mare di za. E marĩ wa. Roti na i'upari'wa norĩ hâimana nhipese za'ra na te te siwi sa'réi wa. Tawamhã ite dasi'wapéi 'manharĩ'wa norĩ ãma hã te za ai'uté za'ra ni. Te za dasi'wapéi 'manharĩ'wa norĩ ahâ uptabi na ai'utõ.

²⁷ Tawamhã apito norĩ te za sisõpẽtẽ zahuré. Tane nherẽ, te za sadawa nhipese na taré sima siwasu'u zahuré, hâimana nhipese na, za marĩ te te sima 'manharĩ wasété zahuré da nherẽ. Tane nherẽ, hâiba si'uiwa na te te si'ãma irowa'õtõ zahuré zé hã taré pese te za tihâiba, zahadu bâdâ hã wisi õ dâ'âsina.

²⁸ Taha pari hâiwa nhimi'e niwĩ daza'ru te apito hã te za tite ti'ai wa'õtõ nho'õmo u apâ sina siri. Tahawa, te za uburé dasi'wapéi wa, marĩ iwa'âbâ za'ẽne te te dawi i'awaibu hã siré tidu. Te za duré rowa'õno hã niha na hã sima 'manha, Izaraéu nhihudu norĩ wi isimizaze te te uprosi da hã. Marĩ te te sima iwẽzéb zarina te za tô tãma 'manharĩ za'ra. Taha pari te za apâ tite ti'ai wa'õtõ nho'õmo u hã mo.

²⁹ — Bâdâ oto wisi wamhã, te te ropãrĩ za'ra mono sina, sisõré pese na te za apâ mo tite dasi'wapéi 'manharĩ'wa norĩ ré hã, Ezitu te te duré 'wapé da hã. Tane nherẽ, tamemhã te te da'ãma ai'uté õ di za, imorĩ'rata na te te da'ãma i'ai'uté ne.

³⁰ Dasi'wapéi 'manharĩ'wa norĩ hã bâtâ zasizém hawi te za uba're na we ai'aba'ré. We si'aba'réi wamhã, te za susi za'ra, hâiwa nhimi'e niwĩ apito hã. Tawamhã dasi'wapéi ma, si'rãmi wa, te za tãma marẽ. Siti'rui uptabi wa, te za duré apâ Izaraéu nhihudu norĩ a'wapé. Ãhã wamhã, te za duré sima iwẽ na marĩ hã tãma 'manharĩ za'ra. Tawamhã zudeu norĩ tinhimizaze te te irẽme za'ra nhimiroti hã te za wapa, apito hã.

³¹ Tawamhã duré ite dasi'wapéi 'manharĩ'wa norĩ hã te za 'Re ihâimana u'âsi mono nhorõwa 'ri 'rãihâ siwi wasété pese. Te za duré bâtâ sidâpâ abaze zata na 're idanhoprub za'ra mono zé hã siwi sizâ. Tahawa, te za duré 'Re ihâimana u'âsi mono nhorõwa 'ri 'remhã siwi tisã, marĩ ipipa iwasété uptabi hã.

³² Apito hã timreme nhipese zarina te za zudeu norĩ tinhimizaze te te irẽme za'ra norĩ nhimipawaptobzém na tihâiba. Tane nherẽ, 'Re ihâimana u'âsi mono te te 're isawi pese za'ra mono norĩ hã te za siptete na apito da, 're hâimana za'ra.

³³ Rowaihu'u pese 'wa norĩ, te za tinhimiroti wẽ na te te 're dapawaptob za'ra. Tane nherẽ, suru na a'â we hâimana ré, te za ta norĩ sib'ézé wapa na hã dasiwi simro ni, niha wamhã unhama ro'o na. Duré niha wamhã, ti'ai wa'õtõ nho'õmo nhiti, da te dasiwi simroi mono da hã te za tãma rob'ru za'ra ni, pawasisi ré. Te za duré uburé isimarĩ hã tiwi sani za'ra ni.

³⁴ Ta norĩ ma, da te irob'manharĩ wasété za'ra mono siwaprã, te za 'Re ihâimana u'âsi mono nhib'a'uwẽ norĩ, ni'wam norĩ nhimipawaptobzé hã tãma tihâimana za'ra. Tane nherẽ, da'ahâ uptabi na te za taré marĩ zô dasima ãma ana ni.

³⁵ Nima norĩ i'rãiwaihu'u pe hã te za simro ni. Tane nherẽ, taha zarina te za 'Re ihâimana u'âsi mono nhib'a'uwẽ norĩ hã we tihâimanazé hã hiri wẽ za'ra. Tawamhã tô õhõ na si te za we ãma tihâimana za'ra, 'Re ihâimana u'âsi mono bâdâ te te ipisutuzéb u.

³⁶ — Tame te za tô apito marĩ hã te te sima iwẽzéb zarina te te 're ab'manharĩ. Ta hã 're isi'madâ'â zei mono zarina, te za ihâiba'õ norĩ nhipai'u pire na 're ihâimana mono na, te te sina 're rosa'rata. Tahawa, te za duré 'Re ihâimana u'âsi mono ãma hã te te 're wasété, timreme wasété uptabi na. Ãne hã te za uburé te te 're ab'manharĩ, 'Re ihâimana u'âsi mono te te i'azârizéb u. Te te ãma sima irowairébé siromo zéb zarina, te za tô oto tãma rob'manha.

³⁷ Apito hã, ihi'rata norĩ ihâiba'õ norĩ ãma 're iwata za'ra mono hã te te 're awazé mono õ di za, duré ihâiba'õ, pi'õ norĩ ma isawi pese zama. Uburé ihâiba'õ norĩ hã te te 're awazé mono õ di za tô, ta norĩ nhipai u pire na 're ihâimana mono na te te sina 're rosa'rata mono wa.

³⁸ Ta norĩ upana te za ihâiba'õ 'ri isiptete norĩ 'wawi 're isimapa mono ãma si 're wata. Taha ma, ihi'rata norĩ ma, isa'rese za'ra õ ma, te za ẽtẽ waipo pré oru na duré ẽtẽ waipo prã prata na duré ẽtẽ waipo iwa'âbâ za'ẽtẽ na duré siwa'ru marĩ iwa'âbâ za'ẽtẽ na zama tãma 're sõpru.

³⁹ Tawamhã ni'wam norĩ, darob amoi ãmap te na ihâiba'õ na 're iwata za'ra mono norĩ nhimipawaptobzém na, te za apito hã tite 'ri isiptete norĩ 'wawimhã 're simapa. Duré uburé aihĩni norĩ hã apito te te 're iwẽsãmri za'ra mono hã te za tô apito hã te te 're pisutu za'ra, da'ahâ na ta norĩ hã te te 're da'madâ'â za'ra mono da. Te za duré ti'a hã te te tãma 're po'o za'ra.

⁴⁰ — Oto we romhâimanazéb 'rãsudu wisi wamhã, te za Ezitu te apito hã hâiwa nhimi'e niwĩ te apito hã susi. Tahawa, te za tô sô watobro, wedewara zapore na dasi'wapézém na duré awaru na isi'wapéi'wa norĩ ré, duré uba're i'ahâ uptabi na hã. Â rom na 're i'âpusi mono ne, te za Ezitu u hã sisisi.

⁴¹ Ti'a Iwazéb zahi u te za duré daré ãzé. Sébré wamhã, daza'ru ahâ na te za rere. Tane nherẽ, Edõ ãma a'uwẽ norĩ, duré Moabi ãma a'uwẽ norĩ zama, Amo ãma a'uwẽ norĩ me, te za tiwi aimani za'ra.

⁴² Apito hã te za tô ti'ai wa'õtõ nho'õmo norĩ na ãma dawi site, ahâ na. Tahawa, Ezitu zama tiwi hã simani waihu'u õ di za.

⁴³ Ezitu hawimhã te za ẽtẽ waipo pré oru hã, ẽtẽ waipo prã prata hã, duré siwa'ru marĩ iwa'âbâ za'ẽtẽ norĩ si tô 'wasa. Tawamhã Libia hã, Etiopia me hã te za duré isahâpâmhã oto 're hâimana zahuré.

⁴⁴ Tane nherẽ, bâtâ pusizém hawi duré hâiwa nhimi'e hawi te za romreme hã wi, apito u hã. Wisi wamhã, te za romreme ma tipahi pese. Tahawa, sahi sina te za tite dasi'wapéi 'manharĩ'wa norĩ ré watobro, te te sima irowairébézéb zarina da'ahâ na te te da'a'uprosi da hã.

⁴⁵ Tawamhã Mediterãniu na âporé nhisi wa'wa ẽne iwẽ uptabi iwazéb zahi wa'wa me, te za sima 'ri nha, romhâ 'manharĩ na 'ri hã. Tane nherẽ, tame te za oto dârâ. Dâ'â wamhã, ni'wa hã te te pawapto waihu'u õ di za.