Daniéu 10 - ꞌRe Ihâimana Uꞌâsi Mono Zadawa Wasuꞌu

Daniéu, Tigre na panho'õmo nhisi zaihâ ãma, sõtõ 'rowim ne marĩ te te i'madâ'âzé wasu'u

¹ Si'ubdatõ Ciruhu ãma iwahubzém na, Persia te apito na 're ihâimana mono zém na, wa hã Daniéu, Béutésaza na zama ĩnhisi ma, ma tô 'Re ihâimana u'âsi mono, timreme hã ĩma hâi'ré. Imreme sena na 're hâimana mono nherẽ, pire uptabi di, te isadaihu'u da hã. Tawamhã imreme na ãma isaprĩzé hã tô ĩnhotõ 'rowim ne marĩ te i'a'madâ'âzém na si wa tô awaihu'u.

² Tahawa, si'ubdatõ romhuri 're, wa tô aiwa'õ.

³ Taha bâtâ mono na hã dasa ise hã te 'rẽne õ di. Romnhi na zama ĩsai õ di. Duré uwa 'rãi wa'u isé hã te zâ'rẽne õ di. Duré marĩ wa'u to isadaze na ĩsihâiba 'ma'wamarĩ õ di, si'ubdatõ romhuri isi'utõrĩzéb u.

⁴ Imorĩ'rata na wahup te a'amo dia 24 na, wa tô Tigre na panho'õmo nhisi zaihâ na hã ĩhâiba.

⁵ Oto ĩ'rãiwahutu wa, te rob'madâ'â wamhã, wa tô hâiwa ãma romhuri'wa hã 'madâ, i'uza ihâirã uptabi ré, duré ẽtẽ waipo pré oru uptabi na i'usisi waipo uptabi ré hã.

⁶ Ihâiba hã te nasi rowa'a za'ẽtẽ, ẽtẽ si'ubuzi waipo iwa'âbâ za'ẽtẽ ne hã. I'ubu hã duré tã si'ubuzi ne hã. Ito hã duré 'rãsitõ ro'o ne. Duré ipaihi, iza norĩ me hã te nasi rowa'a za'ẽtẽ za'ra, ẽtẽ topsada brõzi 'manharĩ ne. Duré imreme hã da'ahâ uptabi na da te dasima 're robzanhamri za'ra mono wa, da te ãma 're irobruru'u za'ra mono ne.

⁷ Wa hã Daniéu, ĩsiwaprosi wa tô ã hã 'madâ. Ĩsiré norĩ te te 'madâ'â za'ra õ di. Tane nherẽ, ma tô tãma tipẽ'ẽwara za'ra. Tahawa, ma tô sisa're. Ma tô duré aima'uri za'ra.

⁸ Tawamhã ĩsiwaprosi ĩzab ré, wa tô ĩnhotõ 'rowim ne oto 'madâ, ãma ĩtob'uzu hã. Wa tô duré ĩnhib'uwa na ĩhâiba. Wa tô ĩ'ubu'a. Marĩ te 'manharĩ waihu'u ãna, wa tô duré ĩhâiba.

⁹ Hâiwa ãma romhuri'wai mreme te wapari wa, ĩnhimiza'rese'õ si'utõrĩ wamhã, wa tô ti'ai u ĩdumana na waptãrã.

¹⁰ Tawamhã ni'wa nhib'rada ma tô ĩwahutu. Te te ĩwahutu wamhã, wa tô ĩhi'rãtitõ nhamra, ĩnhib'rata na ĩsi'upari sina.

¹¹ Tawamhã te hâiwa ãma romhuri'wa hã ãne ĩma tinha: — Daniéu, 'Re ihâimana u'âsi mono te te 're asawi pese. Tahawa, ma tô we ĩzatõ, te aima rowasu'u da. Ma'ãpé hâiwi aipara na asa na, za te aima irowasu'uzém na ĩwapari da. Tawamhã ãne te te ĩma nharĩ wa, wa tô ĩrẽrẽ'ẽ sina nherẽ hâiwi ĩpara na oto za.

¹² Ãne te ĩma tinha: — Daniéu, aipahi tõ. 'Re ihâimana u'âsi mono ma tô aimreme hã wapa, tiwi irowaptẽrẽzé hã, imorĩ'rata na asina tãma ti'awi wa, rowaihu iwẽ hã te te aima isõmri zô, isõ're i'aihâimana hawim haré. Tahawa, tiwi irowaptẽrẽzém na te te ãma i'asada'âbâzéb ré wa tô we atẽme mo.

¹³ Tawamhã hâiwa ãma romhuri'wa, Persia ãma apito norĩ nhimi'madâ'âzéb 'wawi 're isimapa mono hã ma tô 21 na bâdâ imorĩ 'rem na ĩzada tihâiba. Tane nherẽ, Migueu hâiwa ãma romhuri'wa norĩ nhib'ihâ'a siré, ma tô te te ĩpawaptob da, we ĩtẽme mo, ĩsiwaprosi Persia te apito norĩ zada, ĩhâimana wa.

¹⁴ Wa hã awa'awi na wa we atẽme mo, asib'a'uwẽ norĩ ma, za iromhâimanazém na te ãma aima saprĩ da. E marĩ wa. Ã hã i'ab'madâ'â mono hã apto'oré za marĩ iwatobrozém na te rowasu'u.

¹⁵ Ãne na te te ĩma nharĩ ré, wa tô ari'iwi ĩhâiba. Ti'ai u si wa tô rob'madâ'â pese.

¹⁶ Taha ré, ma tô ni'wa a'uwẽ ne hã ĩzaihâ upi. Tahawa, wa tô sadawahaipo'o, oto ĩmreme na te sãna'rata da. Tawamhã ãne wa tô hâiwa ãma romhuri'wa ĩnho're isa ma hã tãma tinha: — Ĩnhib'apito, ã hã marĩ te i'ab'madâ'â mono zé, ma tô robzépada hã ĩma waze. Tahawa, ĩnhib'uware na wa tô oto ĩhâiba.

¹⁷ Wa hã aima romhuri'wa, e niha wa za aima robzanha, ĩnhib'uwa wa, ĩpẽ'ẽzani waihu'u õ nherẽ.

¹⁸ Tawamhã te te duré ĩ'upi na sahu wamhã, ma tô ĩnhiptede hã apâ ĩwab ãzé.

¹⁹ Ãne te ĩma tinha: — 'Re ihâimana u'âsi mono ma hã tãma asawi uptabi di. Tahawa, aipahi tõ. 'Re ihâimana u'âsi mono hawi rowẽzé aima ihâimana da si iwẽ hã. Tahawa, sada asib'ru na! Duré asiptete na aihâimana! Ãne te te ĩma nharĩ wa, oto apâ ĩnhiptete wamhã, wa tô ãma sada'â ãne: — Ma'ãpé oto ãma ĩma rowasu'u na. A hã ĩnhiptede hã ma tô apâ ĩma isõ.

^20-21 Tawamhã te ĩma tinha ãne oto: — Marĩ wa, we atẽme ĩmorĩzé hã, e ma tô iwaihu. Sena na Ibaihâ nhisi 're, rob'ui'éré ihâimana na te ãma aima rowasu'u da, wa we atẽme mo. Tane nherẽ, ãhã na hã Persia u ĩmorĩ da si, hâiwa ãma romhuri'wa Persia 'madâ'â'wa, te 'wapé da. Wasi'wapézé tâibâ wamhã, hâiwa ãma romhuri'wa Grécia 'madâ'â'wa hã te za wei mo. Tane nherẽ, ni'wa te te ĩpawaptob da hã mare di za. Niha wamhã, Miguehe si, te za ĩpawapto, Izaraéu nhihudu norĩ 'wawi 're isimapa mono hã.