Colosu 4 - ꞌRe Ihâimana Uꞌâsi Mono Zadawa Wasuꞌu

¹ Danhib'apito norĩ, pawa'âbâ ãna aima romhuri'wa norĩ ma, te za 're i'manharĩ wẽ u'âsi za'ra wa'aba mo, i'uwaibaba na si. Asib'apito za'ra wa'wa hã hâiwa ãma 're isãmra mono hã te te 're ai'madâ'â u'âsi za'ra wa'aba mono na, asina 're waihu'u za'ra wa'aba mono wa, te za ãne na hã tãma 're i'manharĩ wẽ u'âsi za'ra wa'aba mo, aima romhuri'wa norĩ ma hã.

'Re ihâimana u'âsi mono ma, 're damreme zusi mono da, rotizé wasu'u

² 'Re ihâimana u'âsi mono ma, 're aimreme zusi u'âsi aba mono. Asimiza'rese te za tãma 're aimreme zusi aba mo, ãma 're aiwata za'ra wa'aba mono sina.

³ 'Re ihâimana u'âsi mono ma, 're aimreme zusi aba mono wamhã, wa'ãma zama te za duré tãma 're aimreme zusi aba mo, ta hã te te wama 're a'ridawa mono da, isadawa wasu'u hã wa te dama 're wasu'u za'ra mono da, Cristuhu wasu'uwẽ aré dama iwaihu'u'õ hã wa te dama 're waihu'u za'ra mono da oto. Taha para, ma tô oto dasiwi ĩ'âri ni, dazazéb 're, da te dasiwi ĩnherẽ da. Tahawa, wa oto taha 're nhamra.

⁴ Tahawa, ma'ãpé duré 'Re ihâimana u'âsi mono ma si, ĩ'ãma 're aimreme zusi aba mono za, taha si te te 're ĩpawaptob u'âsi mono da, Cristuhu wasu'uwẽ dama iwaihu'u'õ hã ipibu pese na si te dama 're wasu'u mono da, da te oto ãma 're iwaihu'u pese za'ra mono zéb da hã, ãhã da si te te ĩpisutu wa, 'Re ihâimana u'âsi mono hã.

⁵ Asimirosa'rata wẽ, oto ãma 're iwaihu'u za'ra wa'aba mono zéb zarina, te za Cristuhu zazei'õ'wa norĩ ma aihâimana prédup sina tãma 're aihâimana za'ra wa'aba mo. Duré 're danhopẽtẽ za'ra wa'aba mono sidâpâsi, te za Cristuhu wasu'uwẽ hã dama 're iwasu'u za'ra wa'aba mo, dasiré 're aihâimana za'ra wa'aba mono ré, da te 're waihu'u za'ra mono ãna 're dahâimana za'ra mono tõ da, Cristuhu wasu'uwẽ hã.

⁶ Isazei'õ'wa norĩ ma, 're rowasu'u za'ra wa'aba mono wamhã, aimreme wẽ na si te za tãma 're irowasu'u za'ra wa'aba mo, tãma ãma 're rowẽ zani za'ra wa'aba mono da, aimreme wẽ na te te ãma 're aiwapari ze za'ra wa'aba mono da. Ãne wamhã, i'uwaibaba si te za tô aimreme na tãma ãma 're iwa'rãmi za'ra wa'aba mo, Cristuhu wasu'uwẽ na te te ãma 're asadanharĩ za'ra wa'aba mono zéb uwaibaba.

Paulu hã te te idazawi 'rãsutu zé wasu'u

⁷ Wasisãnawã Tiquicu hã, wama isawi pe hã te za aima ĩwasu'u za'ra wa'wa, ãme ĩhâimana na hã. Ta hã wasiré Wanhib'apito ma romhuri wẽ 'wa, te tô wama umnhasi sina 're hâimana.

⁸ Tahawa, wa za oto atẽme ãma satõrĩ za'ra wa'wa ã ĩnhimi'ui'éré ré, ãme rowẽ na iwahâimana za'ra na te te aima wawasu'u wẽ za'ra wa'aba da, taha zarina aima rowẽ wairébé aba da, wazabâdâmhã.

⁹ Taha siré, te za duré Onezimu hã ãma mo, wasisãnawã wama isawi pese hâiba amo hã, wama i'umnha hã ta hã duré, tame asiré isazei'wa norĩ, asiré 're aihâimana za'ra wa'aba mono hã. Ta norĩ si te za aima rowasu'u za'ra wa'wa, ãme iromhâimanazém na hã, duré iwahâimana za'ra zém na zama.

¹⁰ Aristacu hã ãme dazazéb 're, ĩsiré ihâiba hã te ãma asawi za'ra wa'wa, timreme na. Marcu hã te duré ãma asawi za'ra wa'wa, Banabéhé mama amoi 'ra hã. Taha na wa tô nimahã na hã aima ãma roti pari za'ra wa'wa, niwa atẽme wisi za'ra wa'aba wamhã, asiwi sawi wẽ wa'aba da.

¹¹ Zozué hã te duré ãma asawi za'ra wa'wa, Zustu na isisi amo hã. Ã norĩ hã zudeu na 're ihâimana za'ra mono, si'ubdatõ ihâiba za'ra hã. Ĩsiré romhuri'wa norĩ hã ahâ uptabi nherẽ, si'ubdatõ si te zudeu norĩ hã te te ĩsiré 're romhuri za'ra, tô ã norĩ hã, 'Re ihâimana u'âsi mono, da'ãma 're isib'a'uwẽ mono zéb u, wa te tãma 're ida'awaibui mono na hã. Ã norĩ hã ma tô siwi ĩpawapto pese za'ra tô.

¹² Epafrasi te duré ãma asawi za'ra wa'wa, tame asiré isazei'wa norĩ siré 're ihâimana mono hã, Cristu Zezusihi ma romhuri'wa hã. Ta hã te ai'ãma 're mreme u'âsi 'wa simi'ẽ na, 'Re ihâimana u'âsi mono ma, taha si te te 're aipawaptob u'âsi za'ra wa'aba mono da, asiptete sina ãma 're anomro aba mono da, duré aihâimana prédup sina 're aihâimana wẽ za'ra wa'aba mono da, ta hã te te aima 're iwẽ za'ra wa'aba mono zéb zarina si. Cristu hã asina 're i'umnhasi za'ra wa'aba mono zém na 're asiptete za'ra wa'aba mono da, te duré ai'ãma 're mreme u'âsi za'ra wa'wa.

¹³ Ta hã te te ai'ãma 're iromhuri pese za'ra wa'aba mono na, wa tô ta hã ĩsi'uihâ na waihu'u. Laudiséa ãma isazei'wa norĩ 're ihâimana za'ra mono norĩ ãma, te te 're iromhuri pese mono na wa tô duré waihu'u. Duré Ierapuri ãma isazei'wa norĩ 're isi'ubumroi mono norĩ ãma, te te 're iromhuri pese mono na zama, wa tô duré waihu'u, ta hã.

¹⁴ Luca hã, dawede'wa wama isawi pe hã te duré ãma asawi za'ra wa'wa. Demasihi zama hã te duré ãma asawi za'ra wa'wa.

¹⁵ Ma'ãpé, duré wasisãnawã norĩ hã wama sawi za'ra wa'aba, Laudiséa ãma 're isi'ubumroi mono norĩ hã. Duré Nipaha zama wama sawi wẽ za'ra wa'aba. Duré taha nhorõwa ãma Cristuhu zazei'wa, siré 're isi'rã'õtõ u'âsi mono norĩ zama, wama sawi wẽ za'ra wa'aba.

¹⁶ Ã hã te ãma aima irob'ui'éré za'ra wa'wa hã asisõ'a asima sõré pari za'ra wa'aba wamhã, te za asiwi isõmri 'wa, Laudiséa u, tame isazei'wa norĩ hã sisõ'a te te duré sima sõré za'ra da. Duré Laudiséa u te dama irob'ui'éré hã te za duré iwa'rãmi aima sõmri za'ra wa'wa, ta hã duré asima sõré za'ra wa'aba da.

¹⁷ Arquipuhu ma, ma'ãpé ãne hã 'maiwaihu'u aba za: “'Re ihâimana u'âsi mono, romhuri te te aima ipisudu hã 'mairẽme õ di za. Uburé te za tãma ãma i'a'uwaimrami mo.” Ãne hã te za tãma i'maiwaihu'u 'wa, Arquipuhu ma hã.

¹⁸ Wa hã Paulu, wa ĩnhimi'ui'éré na ãma asawi za'ra wa'wa. Ma'ãpé ĩ'ãma 're aipo're pu'u u'âsi za'ra wa'aba mono za, dazazéb 're zahadu ĩhâimana na. Rowẽ u'âsi 're aihâimana za'ra wa'aba mono za, Wamama hã ai'ãma 're isiwãrĩ za'ra wa'aba mono zéb zarina.