Colosu 3 - ꞌRe Ihâimana Uꞌâsi Mono Zadawa Wasuꞌu

¹ Cristu hã dâ'â uptabi nherẽ, 'Re ihâimana u'âsi mono te te apâ ihâiwa'utu ne, ma tô a norĩ wa'aba zama aihâiwa'utu za'ra wa'wa, aipẽ'ẽ 're atâ'â u'âsi za'ra wa'aba ne 're i'aihâimana za'ra wa'aba mono zém hawi, 're anomro aba mono zép tém na si, oto 're aihâimana za'ra wa'aba mono da. Tahawa, ma'ãpé iwẽ uptabi hã hâiwa ãma asô 're isimi'wara aba mono zô si, 're rob'ruiwapari u'âsi za'ra wa'aba mono za. Tame te oto Cristu hã danhib'apito simasisizéb ãma 're sãmra u'âsi pire na, Timama 'Re ihâimana u'âsi mono nhimire niwĩ.

² Hâiwa ãma uburé marĩ iwẽ uptabi na 're ihâimana za'ra mono na si, te za asima ãma 're irosa'rata u'âsi za'ra wa'aba mo. Ãme ti'ai ãma uburé marĩ 're ihâimana za'ra mono na asima 're rosa'rata za'ra wa'aba mono õ di za oto.

³ 'Re anomro 'rata aba mono zé hã ma tô aima ai'utõrĩ za'ra wa'wa oto. 'Re ihâimana u'âsi mono ãma Cristuhu siré 're anomro aba mono zép tém na da te ai'ãma 're rosa'rata waihu'u za'ra wa'aba mono õ di zahadu. E marĩ wa. 'Re ihâimana u'âsi mono hã zahadu te te dama 're awaihu'u mono õ wa, ãne na hã.

⁴ Cristuhu ãma si tô sena 're wahâimana za'ra mono wamhã, taha na si ãma 're iwanomro mono zép té, te wama wasu'u za'ra. Ta hã nimahã na tinhimirowa'a na ti'ai u apâ wei morĩ wamhã, a norĩ wa'wa hã te za duré danho'a isiré aihâimana za'ra wa'wa, isine aiwẽ uptabi na 're aihâimana za'ra wa'aba mono na, da te oto ãma 're i'aiwaihu'u za'ra wa'aba mono zéb da hã.

'Re idanomro mono zép té wasu'u

⁵ Ti'ai ãma isazei'õ'wa norĩ hâimanazéb zarina, marĩ wasété zô 're irob'ruiwapari za'ra wa'aba mono zé hã te za 'râwi asiwi 're i'uprosi pese za'ra wa'aba mo, 're dadâ'â za'ra mono wa, marĩ zô da te oto 're irob'ruiwapari za'ra mono õ ne. Pi'õ na aibâ na zama siwa'ru aiwasédé, 're i'manharĩ za'ra wa'aba mono zé hã te za 'râwi 're i'uprosi pese za'ra wa'aba mo asiwi, duré asisô 're irowasutu za'ra wa'aba mono zé hã, duré marĩ wasété zô si asima 're irob'ruiwapari za'ra wa'aba mono zé hã, duré danhipai u asibro pese na 're aihâimana za'ra wa'aba mono da, marĩ zô si asima 're i'asõpré wa'aba mono zé hã. Ãne hã 'Re ihâimana u'âsi mono ma, wẽ õ di, marĩ zô i'upana asima 're irob'ruiwapari za'ra wa'aba mono zé hã. Tahawa, te za tô uburé aiwasédé hã asiwi 're i'uprosi pese za'ra wa'aba mo, aiwi 're si'utõrĩ pese za'ra wa'aba mono wa, 're anomro wẽ wa'aba mono da oto.

⁶ Ãne hã dawasété si, da te dasima 're i'ruiwapari za'ra mono zéb zarina, te za 'Re ihâimana u'âsi mono hã dama arob'manharĩ za'ẽtẽ ipipa na, te te siwi ida'awẽ'õ pese zéb zarina.

⁷ A norĩ wa'aba zama ma tô aré ãne na 're aihâimana za'ra wa'aba mo, aiwasété si asima 're isawi za'ra wa'aba mono zéb zarina, ãne na aré ãma 're aihâimana za'ra wa'aba mono ré hã.

⁸ Tahawa, te za uburé marĩ hã 're i'manharĩ wasété za'ra wa'aba mono zé hã irẽme pese za'ra wa'wa oto, 're ida'ruiwapari za'ra wa'aba mono zé hã, duré asisada 're asiti'ru za'ra wa'aba mono zé hã, duré niha dama 're rob'manharĩ za'ra wa'aba mono da, asima da'ãma 're irosa'rata wasété za'ra wa'aba mono zé hã, duré da'ãma 're iwasété za'ra wa'aba mono zé hã, duré uburé aimreme wasété 'wa hã. Ã norĩ hã te za uburé irẽme pese za'ra wa'wa.

⁹ Taré asima 're asadawa nhipese za'ra wa'aba mono õ di za oto, 're anomro 'rata aba mono zé hã 're rẽme pese za'ra wa'aba mono nherẽ, uburé aiwasédé 're i'manharĩ za'ra wa'aba mono zé hã.

¹⁰ Taha wa'rãmi, te oto 're idanomro mono zé itém na si 're anomro aba mo, iwẽ na. 'Re ihâimana u'âsi mono, ma tô te te 're aipoto téb za'ra wa'wa aipẽ'ẽ 're, isine 're aihâimana u'âsi za'ra wa'aba mono da oto, taha zarina õhõ si duré 're waihu'u pese za'ra wa'aba mono da.

¹¹ Tahawa, dapoto mono bâ dasipu'u pese na tãma 're dahâimana za'ra mono nherẽ, te te siwi 're da'ahâiba wẽ'õ mono õ di oto, 'Re ihâimana u'âsi mono hã. E marĩ wa. Cristuhu zazei'wa norĩ hã aiwapsi te te 're azawi pese mono wa, zudeu'õ norĩ hã zudeu norĩ me, duré sihâiwata nhihâri ré 're inomro mono norĩ hã, duré sihâiwata nhihâri ãna 're inomro mono norĩ hã, duré a'uwẽ pahi norĩ, marãi 'rowi 're ihâimana za'ra mono hã darob amoi ãma, duré iwada'uri zarina pawa'âbâ ãna te te dama 're iromhuri za'ra mono norĩ hã, duré wada'uri ãna si'uihâ na 're ihâimana za'ra mono norĩ hã. Ãne hã te uburé isazei'wa norĩ hã aiwapsi tãma 're hâimana za'ra, 'Re ihâimana u'âsi mono ma hã. Cristuhu si te pire uptabi na wama 're hâimana za'ra, danhipai u. Taha si wama ipire uptabi za'ra hã, wasiré isazei'wa norĩ ma hã. Taha si te za tizazei'wa norĩ pẽ'ẽ 're, 're sãmra u'âsi, ihâiba mono bâ.

¹² A norĩ wa'wa hã 'Re ihâimana u'âsi mono nhib'a'uwẽ, te tô oto 're aihâimana za'ra wa'aba mo. Ta hã te te 're asawi pese za'ra wa'aba mono wa, ma tô sima aipisutu za'ra wa'wa, taha ma si tãma 're aihâimana za'ra wa'aba mono da oto. Tahawa, da te 're robzépata za'ra mono wamhã, te za tô oto da'ãma 're aiwamri za'ra wa'aba mo. Te za duré 're idapawapto wẽ za'ra wa'aba mo. Asiré norĩ ma, aipire na 're aihâimana za'ra wa'aba mono na, 'râwi 're asi'madâ'â ze za'ra wa'aba mono õ di za. Aiwaimri te za dama 're aihâimana za'ra wa'aba mo. Duré aiwara sina dazada 're asahi za'ra wa'aba mono õ di za.

¹³ Ni'wam norĩ hã asiré nherẽ, marĩ na te te aiwi 're ro'wa'ré za'ra wa'aba mono nherẽ, ãma 're aiwa'a za'ra wa'aba mono õ di za, ta norĩ ãma hã. Duré marĩ na te te aiwi 're ro'wa'ré za'ra wa'aba mono nherẽ, ãma 're 'madâ'â u'âsi za'ra wa'aba mono õ di za. Wanhib'apito hã aiwasédé te te oto ai'ãma 're i'ab'madâ'â aba mono õ ne, ãma 're 'madâ'â za'ra wa'aba mono õ di za, ta norĩ ãma hã.

¹⁴ Danhipai u, dama ipire uptabi na roti hã, ãne: Te za 're asisawi pese za'ra wa'aba mo. Taha zarina si, te za uburé asiré isazei'wa norĩ hã rowẽ na asiré 're aihâimana za'ra wa'aba mo, aihâiba za'ra wa'wa hã misi ne.

¹⁵ Cristu hã te za te te 're aipawaptob u'âsi za'ra wa'wa, rowẽ na asiré ãma 're aihâimana za'ra wa'aba mono da. Tahawa, te za aipẽ'ẽ 're iré 're anomro u'âsi aba mo, uburé marĩ hã i'uwaibaba si ãma 're i'manharĩ za'ra wa'aba mono zéb da hã, 'râwi asina 're waihu'u za'ra wa'aba mono da. 'Re ihâimana u'âsi mono hã ma tô aipisutu za'ra wa'wa, simisutu dahâiba misi ne, asiré 're aihâimana za'ra wa'aba mono da, taha zarina aipẽ'ẽ 're rowẽ na asiré 're aihâimana za'ra wa'aba mono da, ãma. Tahawa, te za ãma 're aiwata u'âsi za'ra wa'aba mo, 'Re ihâimana u'âsi mono ãma si.

¹⁶ Cristuhu wasu'uwẽ na te za ãma 're asipo're pu'u u'âsi za'ra wa'aba mo, aipẽ'ẽ 're aima 're hâimana u'âsi za'ra wa'aba mono da, taha zarina aihâimana wẽ na 're anomro aba mono zé hã asima 're sa'ẽtẽ za'ra wa'aba mono da oto. 'Re ihâimana u'âsi mono hawi, dahâimanazém na rowaihu iwẽ hã ãma 're iwaihu'u za'ra wa'aba mono zéb zarina, te za dama ãma 're iroti pese za'ra wa'aba mo. 'Re ihâimana u'âsi mono hã sõprub uptabi wa, te za tãma 're asõ're u'âsi za'ra wa'aba mo, aipẽ'ẽ 're ãma 're aiwata za'ra wa'aba mono sina. Ipẽ'ẽzani te te aima 're iwaihu'u za'ra wa'aba mono zém na, te za rowẽ zarina tãma 're asõ're za'ra wa'aba mo, Wanhib'apito ãma 're idanho're za'ra mono na zama.

¹⁷ Uburé marĩ hã 're 'manharĩ za'ra wa'aba mono wamhã, duré uburé marĩ na 're aimreme zusi aba mono wamhã, Wanhib'apito Zezusihi zadawa para si, te za uburé marĩ hã 're i'manharĩ wẽ u'âsi za'ra wa'aba mo. Tawamhã Zezusi hã iwẽ uptabi hã wanhowa te te i'manharĩ wẽ zéb zarina, te za tô marĩ hã 're i'manharĩ wẽ u'âsi za'ra wa'aba mo, Wamama 'Re ihâimana u'âsi mono ãma 're aiwata za'ra wa'aba mono sina.

'Ri 're, 're idahâimana za'ra mono norĩ ma rotizé wasu'u

¹⁸ Pi'õ norĩ, aimro nhimiroti hã te za 're iwapari pese za'ra wa'aba mo, Cristuhu zazei'wa tô sena ãma 're ihâimana za'ra mono zéb zarina.

¹⁹ Aibâ norĩ, aimro te za 're isawi pese za'ra wa'aba mo. Tãma 're aihâimana wasété za'ra wa'aba mono ãna, te za asima 're isawi pese za'ra wa'aba mo.

²⁰ Ai'uté norĩ, aimama nhimiroti te za 're iwapari pese za'ra wa'aba mo, ana nhimiroti zama, Cristuhu zazei'wa oto 're ihâimana za'ra mono zéb zarina. E marĩ wa. 'Re ihâimana u'âsi mono hã te te aima 're wẽ za'ra wa'aba mono wa, ãne hã.

²¹ Damama norĩ, ai'ra norĩ ma, ai'aba'ré na aimreme hã 're sani za'ra wa'aba mono õ di za, ta norĩ hã te te sina 're aimreme wazéb za'ra wa'aba mono wa, tiwi 're robzei'õ pese za'ra mono tõ da.

²² Aiwada'uri zarina si, aipawa'âbâ ãna dama romhuri'wa norĩ, ti'ai ãma asib'apito norĩ mreme hã te za 're iwapari pese za'ra wa'aba mo. E asib'apito norĩ hã 'râwi titõmo na te te 're ai'madâ'â za'ra wa'aba mono wapsi, te za romhuri hã tãma 're i'madâ'â pese za'ra wa'aba mo, asimiromhuri na te te 're aiwẽsãmri za'ra wa'aba mono zéb da hã. Mare di. Ihâiba za're'ra nherẽ, te za tô romhuri hã tãma 're i'madâ'â pese za'ra wa'aba mo, Wanhib'apito hã asiwi 're iwazéb za'ra wa'aba mono zéb zarina.

²³ Ato sina te za tô tãma 're iromhuri u'âsi za'ra wa'aba mo asib'apito norĩ ma, hâiwa ãma Wanhib'apito 're isãmra mono ma, ato sina 're iromhuri za'ra wa'aba mono ne.

²⁴ Aipawa'âbâ aba zé hã hâiwa ãma asô 're isimi'wara aba mono hã, Wanhib'apito hã za te te aima isõmri za'ra wa'aba na asina waihu'u siromo za'ra wa'aba wa, te za ãne hã tô sena ti'ai ãma asib'apito norĩ ma 're iromhuri wẽ u'âsi za'ra wa'aba mo. Tane nherẽ, ta norĩ ma si 're romhuri za'ra wa'aba mono õ di. Ta norĩ u'âbâ, te Wanhib'apito Cristuhu ma zama 're iromhuri za'ra wa'aba mo, ta hã Wanhib'apito uptabi wama 're hâimana mono wa.

²⁵ Ni'wam norĩ hã tiwasété si te te 're 'manharĩ u'âsi za'ra mono wamhã, taha wa'rãmi te za 'Re ihâimana u'âsi mono hã hâ za'ra, nimahã na hã. E marĩ wa. Ni'wam norĩ hã po're'õ na 're nomro u'âsi mono nherẽ, tinhimihâzé te te tãma ba'a waihu'u za'ra õ wa za, 'Re ihâimana u'âsi mono hã, dama pire na 're ihâimana za'ra mono norĩ hã, dama wapu na 're ihâimana za'ra mono norĩ zama.